Nọ Yí jw.org Zan to Lizọnyizọn lọ Mẹ

Nọtẹn Intẹnẹt tọn mítọn yin azọ́nwanu dagbe de nado hẹn wẹndagbe lọ gbayipe “kaka yì awà he dẹn hugan aigba tọn lẹ ji.” (Owalọ 1:8) Ṣigba, whétọ susu ma sọgan mọ jw.org na yede. Yé nọ yọnẹn kiki eyin wẹnlatọ de deanana yé yì e ji.

Nugopọntọ tomẹyitọ de yí video lọ Naegbọn Mí Dona Plọn Biblu? do alokan etọn ji bo nọ do e hia to whedepopenu he dotẹnmẹ de hundote. Di apajlẹ, eyin e to kunnude sọn whédegbè jẹ whédegbè, e nọ dọmọ: “N’to dlapọn kleun de basi na kọmẹnu ṣie lẹ nado do lehe yé sọgan mọ gblọndo na kanbiọ titengbe atọ̀n delẹ do hia yé: Naegbọn nuhahun sù to aihọn lọ mẹ sọmọ? Nawẹ Jiwheyẹwhe na didẹ yé gbọn? Podọ todin whẹ́, nawẹ mí sọgan pehẹ nuhahun lẹ gbọn? Video kleun ehe na gblọndo kanbiọ enẹlẹ tọn.” Enẹgodo, e nọ hò video lọ na whétọ lọ bo nọ pọ́n lehe e na yinuwa do. Video lọ nọ dọ̀n ayidonugo gbẹtọ lẹ tọn sọmọ bọ yé ma nọ de nukun sọn e ji kakajẹ whenue e fó. Nugopọntọ lọ nọ yidogọ dọmọ: “Mì ṣẹṣẹ sè dọ mì sọgan biọ plọnmẹ Biblu de gbọn Intẹnẹt ji. Amọ́, na n’tofi, n’gán do lehe oplọn lọ nọ yì do hia mì to kleun mẹ.” Eyin whétọ lọ yigbe, e nọ yí alọnuwe Wẹndagbe zan bo nọ basi dohia oplọn lọ tọn. Eyin alọnu mẹlọ tọn ján, e nọ basi tito nado wàmọ to gọyìpọn he na bọdego lọ whenu. Eyin e yì kafe-satẹn de nado yí gbọjẹ kleun de, e nọ yawu do mẹhe to apá etọn gbọn hodọdopọ zohunhun tọn de bibẹjẹeji dali bo nọ wá do video lọ hia ẹ. Be a nọ yí jw.org zan to lizọnyizọn lọ mẹ ya?