Nọ Yí Ohó Jiwheyẹwhe Tọn Zan to Lizọnyizọn lọ Mẹ
1. Etẹwẹ sọgan gọalọna mí nado nọ yí Ohó Jiwheyẹwhe tọn zan to lizọnyizọn lọ mẹ?
1 Owe mítọn lẹ sọgan gọalọna mí nado nọ yí Ohó Jiwheyẹwhe tọn zan to lizọnyizọn lọ mẹ. Wefọ Owe-wiwe lẹ tọn he yọ́n-na-yizan bo sọgan fọnjlodotenamẹ lẹ nọ saba yin sislẹ. Di apajlẹ, pọ́n lehe alọnuwe lọ Wẹndagbe de sọn Jiwheyẹwhe Dè sọgan gọalọna mí nado mọ wefọ enẹlẹ do.
2. Nawẹ mí sọgan yí hosọ 8tọ zan to lizọnyizọn lọ mẹ gbọn?
2 Hiẹ sọgan yí wefọ Owe-wiwe lẹ tọn zan sọn hosọ 8tọ mẹ bo dọmọ: “Mí to gbẹtọ lẹ dlapọn to lẹdo lọ mẹ, na mẹsusu wẹ nọ kanse yede dọ, ‘Be Jiwheyẹwhe wẹ zọ́n bọ gbẹtọ lẹ do to yaji ya?’ [To aigba-denamẹ delẹ ji, e nọ yọ́n hugan nado do kanbiọ lọ hia whétọ lọ.] Etẹwẹ mì lẹn? [Jotẹnna gblọndo.] Biblu na gblọndo homẹmiọnnamẹ tọn de na kanbiọ enẹ.” Hia wefọ he yin sislẹ dopo kavi susu sọn Biblu mẹ tlọlọ bo dọhodo yé ji. Eyin whétọ lọ do ojlo hia, dọna ẹn dọ emi sọgan gbadopọnna hosọ lọ hẹ ẹ.
3. Nawẹ mí sọgan yí hosọ 9tọ zan nado bẹ hodọdopọ de jẹeji to aigba-denamẹ he ji Klistiani lẹ ma te gbọn?
3 Kanbiọ 2tọ to hosọ 9tọ glọ sọgan yọ́n-na-yizan taun to aigba-denamẹ he ji Klistiani lẹ ma te. Di apajlẹ, hiẹ sọgan dọmọ: “Mí to dlapọn kleun de basi na whẹndo lẹ nado dọhodopọ hẹ yé. Be mì lẹndọ whẹndo lẹ nọ pehẹ nuhahun susu to egbehe ya? [Jotẹnna gblọndo.] “Asi dona tindo sisi sisosiso na asu etọn.” Hogbe nuyọnẹn tọn enẹlẹ ko gọalọna asu po asi po susu. [E ma yin dandan dọ a ni dọ dọ Efesunu lẹ 5:33 wẹ dọ mọ. Eyin yọnnu wẹ a to hodọ hẹ, a sọgan dọ hogbe Efesunu lẹ 5:28 tọn lẹ na ẹn sọn tamẹ.] Be mì lẹndọ ayinamẹ enẹ hihodo na hẹn ale wá to alọwle mẹ ya?”
4. Etẹwẹ a sọgan wà to whenue a fó hodọdopọ hẹ mẹhe ma yin Klistiani de?
4 To whenue a dọhodopọ hẹ mẹlọ fó godo, basi tito hẹ ẹ nado zindonukọn to hodọdopọ lọ mẹ to whedevonu. Vlavo a sọgan basi tito nado dọhodo dopo to wefọ Owe-wiwe lẹ tọn devo he to kanbiọ he a yizan lọ glọ lẹ mẹ ji. To ojlẹ he sọgbe mẹ, a sọgan wá dọna whétọ lọ dọ Biblu mẹ wẹ hogbe nuyọnẹn tọn he ji mì dọhodo lọ lẹ te. To kọndopọ mẹ hẹ hodọdopọ he mì ko tindo lẹ gọna nukun he mẹlọ nọ yí do nọ pọ́n Biblu, ze owe he a mọdọ e na yiwanna de na ẹn.—Pọ́n owe-to-wemẹ he tin to Lizọnyizọn Ahọluduta Tọn Mítọn décembre 2013 mẹ.