Gọalọna Nukuntọ́nnọ lẹ Nado Plọnnu Gando Jehovah Go
1. Nawẹ Jesu do awuvẹmẹ hia nukuntọ́nnọ lẹ gbọn?
1 Azán kleun delẹ wẹ pò bọ Jesu na kú. Dile e to tintọ́n sọn tòdaho Jẹliko tọn mẹ, nukuntọ́nnọ nubiọdutọ awe dawhá hlan ẹn dọmọ: “Oklunọ, wàlẹblanuna mí.” Mahopọnna dọ whlepọn sinsinyẹn he Jesu na pehẹ lẹ to ahunmẹduna ẹn taun, e nọte bo ylọ dawe lọ lẹ bo hẹnazọ̀ngbọna yé. (Mat. 20:29-34) Nawẹ mí sọgan hodo apajlẹ Jesu tọn nado nọ do awuvẹmẹ hia nukuntọ́nnọ lẹ gbọn?
2. Nawẹ mí sọgan dekunnuna nukuntọ́nnọ de he mí dukosọ hẹ to nọtẹn gbangba tọn de gbọn?
2 Nọ Gọalọna Yé: Eyin a dukosọ hẹ nukuntọ́nnọ de, vlavo to nọtẹn gbangba tọn de, dọ yinkọ towe na ẹn bo dọna ẹn dọ emi jlo na gọalọna ẹn. To paa mẹ, gbẹtọ lẹ ma nọ yinuwa hẹ nukuntọ́nnọ lẹ to aliho he sọgbe mẹ, enẹwutu e sọgan whleawu to tintan whenu. Etomọṣo, homẹdagbe he a dohia ẹ po ojlo nujọnu tọn he a tindo to ewọ mẹ po sọgan zọ́n bọ e na voawu hẹ we. Humọ, hẹn do ayiha mẹ dọ nukuntintọ́n wunmẹ delẹ nọ sinyẹn taun podọ devo lẹ ma nọ sinyẹn sọmọ, podọ ehe sọgan yinuwado obá he mẹ a na gọalọna ẹn jẹ ji. To whenue a ko gọalọna ẹn godo, a sọgan dọna ẹn dọ emi to mahẹ tindo to azọ́n Biblu pinplọnmẹ tọn de mẹ. Dọna ẹn dọ emi na jlo nado hia wefọ de na ẹn, taidi Psalm 146:8 kavi Isaia 35:5, 6. Eyin e sọgan hia nukinkan nukuntọ́nnọ lẹ tọn, kanse e eyin e na jlo nado tindo zinjẹgbonu nukinkan nukuntọ́nnọ lẹ tọn de he na gọalọna ẹn nado plọnnu dogọ do Biblu ji. Hiẹ sọgan yí hoyidokanji de na ẹn sọn jw.org ji ga. Eyin ọdinatẹẹ etọn sọgan hiawe daga tlọlọ, e tlẹ sọgan yiwanna hosọ he tin to jw.org ji po zinjẹgbonu he sọgan yin yíyí taidi RTF (Rich Text Format) lẹ po.—Pọ́n apotin lọ “To Whenue A to Alọgọna Nukuntọ́nnọ De . . .”
3. Nawẹ mí sọgan dín nukuntọ́nnọ lẹ mọ to aigba-denamẹ mítọn ji gbọn?
3 Nọ Dín Nukuntọ́nnọ lẹ Mọ: Mí ma nọ yawu dukosọ hẹ nukuntọ́nnọ lẹ to lizọnyizọn whédegbè jẹ whédegbè tọn mẹ, na susu yetọn ma nọ voawu nado dọho hẹ jonọ he wá ohọ̀n yetọn ji lẹ. Enẹwutu, e nọ biọ vivẹnudido vẹkuvẹku nado “dín” yé mọ bo dekunnuna yé. (Mat. 10:11) Be a tindo azọ́nwatọgbẹ́ de kavi wehọmẹvigbẹ́ de he yin nukuntọ́nnọ ya? Ze afọdide nado dekunnuna ẹn. Eyin wehọmẹ nukuntọ́nnọ lẹ tọn de tin to aigba-denamẹ mìtọn ji, yí zinjẹgbonu mítọn delẹ he tin to nukinkan nukuntọ́nnọ lẹ tọn mẹ na wehọmẹ lọ nado zedo wesẹdotẹn yetọn. Be a yọ́n mẹde he hagbẹ whẹndo tọn etọn de yin nukuntọ́nnọ ya? Be azọ́nwhé he nọ gọalọna nukuntọ́nnọ lẹ kavi owhé he gbè yè yí nukuntọ́nnọ lẹ do lẹ tin to aigba-denamẹ mìtọn ji ya? Basi zẹẹmẹ na hagbẹ whẹndo tọn lọ, mẹhe to azọ́nwa to azọ́nwhé lọ kavi ogán owhé lọ tọn dọ Kunnudetọ Jehovah tọn lẹ tindo ojlo taun nado gọalọna nukuntọ́nnọ lẹ, bosọ dọna ẹn dọ emi na jlo nado hẹn owe he tin to nukinkan nukuntọ́nnọ lẹ tọn mẹ kavi hoyidokanji lẹ wá na yé. Do opagbe Biblu tọn hia ẹ dọ, to madẹnmẹ Jiwheyẹwhe na de nukuntintọ́n sẹ̀ mlẹnmlẹn. A sọgan sọ jlo nado do video lọ he hosọ etọn yin “Sans elle, je serais perdu” sọn jw.org ji hia, ehe pìntàn dawe nukuntọ́nnọ de tọn he Biblu tintindo to nukinkan nukuntọ́nnọ lẹ tọn mẹ hẹn ale wá na. Eyin a dọ yanwle dlapọn towe tọn, enẹ sọgan hùn dotẹnmẹ dote na we nado mọ nukuntọ́nnọ lẹ.
4. Etẹlẹ wẹ numimọ Janet tọn plọn mí?
4 Mẹmẹyọnnu nukuntọ́nnọ de he nọ yin Janet dla owhé he gbè nukuntọ́nnọ lẹ nọ nọ̀ de pọ́n. E bẹ hodọdopọ jẹeji hẹ nawe de. Janet dọna ẹn dọmọ, “Jesu hẹnazọ̀ngbọna nukuntọ́nnọ lẹ nado do nuhe e na wà to nukọn mẹ na nukuntọ́nnọ lẹpo hia.” Yé gbadopọnna Osọhia 21:3, 4 dopọ, podọ Janet basi zẹẹmẹ lehe opagbe ehe na mọ hẹndi to Ahọluduta Jiwheyẹwhe tọn glọ do tọn. Nawe lọ nabọẹ suu bo wá dọmọ: “N’ma ko sèhó ehe nkọ sọn nukuntọ́nnọ de dè pọ́n. Suhugan mẹhe nọ mọnú lẹ tọn wẹ nọ lẹndọ mẹhe yin nukuntọ́nnọ lẹ tọ́nnukun na yewlẹ kavi tọgbo yetọn lẹ wà nuylankan de wutu.” Janet do owe lọ Biblu Plọn Mí hlan nawe lọ gbọn Intẹnẹt ji, podọ todin yé nọ plọn Biblu whla awe to osẹ dopo mẹ.
5. Dile etlẹ yindọ mí ma sọgan hẹnazọ̀ngbọna nukuntọ́nnọ lẹ dile Jesu wà do, dona tẹlẹ wẹ ojlo he mí dohia to yé mẹ sọgan hẹnwa?
5 Na nugbo tọn, mí ma sọgan hẹnazọ̀ngbọna nukuntọ́nnọ lẹ dile Jesu wà do. Ṣigba, mí sọgan gọalọna mẹhe tọ́nnukun to gbigbọ-liho lẹ, yèdọ mẹhe ayiha yetọn lẹ yin nukuntọ́nna gbọn yẹwhe aihọn ehe tọn dali lẹpo, gọna mẹhe tọ́nnukun to agbasa-liho lẹ. (2 Kọl. 4:4) Jesu hẹnazọ̀ngbọna dawe awe lọ lẹ sẹpọ tòdaho Jẹliko tọn na “lẹblanu whàn” ẹn wutu. (Mat. 20:34) Eyin mí do ojlo mọnkọtọn hia to nukuntọ́nnọ lẹ mẹ, mí sọgan tindo lẹblanulọkẹyi lọ nado gọalọna delẹ to yé mẹ nado plọnnu gando Jehovah go, yèdọ mẹhe na de nukuntintọ́n sẹ̀ mlẹnmlẹn.