Nọ Plọnnu sọn Wẹnlatọ Numimọnọ lẹ Dè

Mí nọ yọ́n pinpẹn wẹnlatọ numimọnọ lẹ tọn taun to agun mẹ. Delẹ to yé mẹ to Jehovah sẹ̀n po nugbonọ-yinyin po sọn owhe susu die. Devo lẹ to yé mẹ sọgan ko wleawuna nugopipe dagbe lẹ to lizọnyizọn lọ mẹ to agọe. Wẹnlatọ ehelẹ ko mọ lehe Jesu ko deanana agun Klistiani tọn to azán godo tọn ehelẹ mẹ do gbọn azọ́n yẹwhehodidọ po mẹhẹnzun devi po tọn lọ hinhẹn gbloada dali. (Mat. 28:19, 20) Dile yé to mahẹ tindo to lizọnyizọn ehe mẹ, yé ko mọ “huhlọn he hú jọwamọ tọn” yí to whenue yé pehẹ avùnnukundiọsọmẹnu lẹ po whlepọn lẹ po. (2 Kọl. 4:7) Nususu wẹ mí sọgan plọn sọn wẹnlatọ numimọnọ ehelẹ dè. Eyin yè hùn dotẹnmẹ lọ dote na yé, ayajẹnu wẹ e nọ yin na yé nado plọnnu mẹdevo lẹ gando nuhe yé ko plọn lẹ go. (Ps. 71:18) Enẹwutu, mí dona nọ dín dotẹnmẹ hundote lẹ nado plọnnu sọn yé dè. Nawẹ ehe sọgan yin wiwà gbọn?

To Lizọnyizọn lọ Mẹ. Wẹnlatọ yọyọ lẹ kavi he ma tindo numimọ susu lẹ tindo nuhudo azọ́nplọnmẹ tọn nado tindo kọdetọn dagbe to lizọnyizọn lọ mẹ. Nususu wẹ mí sọgan plọn eyin mí nọ pọ́n lehe wẹnlatọ he whèwhín lẹ nọ hẹn lizọnyizọn yetọn di do. (Pọ́n hosọ lọ “Hẹn Zohunhun Towe Go to Lizọnyizọn lọ Mẹ” hukan atọ̀ntọ to hóvila lọ “Nọ Gọalọna Mẹhe Ma Tindo Numimọ Sọmọ Lẹ” glọ to Atọ̀họ̀-Nuhihọ́ lọ Tọn 15 février 2015 mẹ.) Ale tẹlẹ wẹ azọ́nwiwa hẹ wẹnlatọ ehelẹ to lizọnyizọn lọ mẹ ko hẹn wá na we?

Be a sọgan basi oylọna wẹnlatọ he pegan ganji de nado wazọ́n hẹ we to lizọnyizọn lọ mẹ ya? Eyin wẹnlatọ lọ yin madogánnọ, vlavo hiẹ sọgan nọ deanana plọnmẹ Biblu towe de to owhé etọn gbè sọn ojlẹ de mẹ jẹ devo mẹ. To oplọn lọ godo, biọ to wẹnlatọ lọ si nado dọ nuhe go e doayi lẹ podọ nado na we ayinamẹ.

Nọ Yí Whenu Zan hẹ Yé: Jẹakọ hẹ wẹnlatọ numimọnọ lẹ gbọn whenu yiyizan hẹ yé dali. A sọgan nọ basi oylọna dopo to yé mẹ wá sinsẹ̀n-bibasi whẹndo tọn towe bo kanhose e. Eyin wẹnlatọ lọ yin madogánnọ, be tito sọgan yin bibasi nado duvivi sinsẹ̀n-bibasi whẹndo tọn to owhé etọn gbè ya? Kàn lehe e mọ nugbo gbọn biọ ẹ. Dona tẹlẹ sin vivi wẹ e dù? Nukọnyiyi tẹwẹ e mọ to lẹdo etọn mẹ? Ayajẹ tẹwẹ e tindo dile e to Jehovah sẹ̀n?

Nọ mọnukunnujẹ yé go podọ ma nọ donukun nususu zẹjlẹgo sọn yé si blo, na yelọsu tindo dogbó yetọn lẹ wutu. Taidi mímẹpo, wẹnlatọ he ko to Jiwheyẹwhe sẹ̀n sọn owhe susu die lẹ tindo nunina voovo lẹ to lizọnyizọn lọ mẹ. (Lom. 12:6-8) Delẹ to yé mẹ tindo mẹhowhe, podọ ehe sọgan zọ́n bọ yé ma sọgan nọ yí whenu susu zan hẹ mí. Etomọṣo, mí sọgan plọn nususu sọn yé dè na numimọ he yé ko tindo to Jehovah sinsẹ̀n po nugbonọ-yinyin po mẹ wutu.