Nọ Yí Adà Owe Biblu Plọn Mí Tọn lẹ Zan Ganji

Eyin nuplọntọ de to nukunnumọjẹ nuhe Biblu plọnmẹ taun mẹ bo to yíyí i do yizan mẹ, e na whẹ́n to gbigbọ-liho bo de sinsẹ́n tọ́n. (Ps. 1:1-3) Nado gọalọna nuplọntọ lọ na e nido yinukọn, mí dona nọ yí adà yọ́n-na-yizan owe lọ tọn delẹ zan ganji.

Kanbiọ Homẹbibiọ Tọn Lẹ: Weta lọ lẹ nọ bẹjẹeji po kanbiọ delẹ po ehe gblọndo yetọn tin to nupinplọn lọ mẹ. A sọgan hia kanbiọ lọ lẹ nado fọ́n ojlo nuplọntọ lọ tọn dote na oplọn lọ. Kavi a sọgan biọ to e si nado na gblọndo kanbiọ lọ lẹ tọn to kleun mẹ. Eyin nuhe e dọ ma tlẹ sọgbe, ma dọ nude to whenẹnu blo. Gblọndo he e na lọ lẹ na zọ́n bọ a na yọ́n nuagokun he biọ ayidonugo po dehe ji a na zinnudo lẹ po.—Howh. 16:23; 18:13.

Nudọnamẹ Dogọ: Eyin nuplọntọ lọ mọnukunnujẹ nuhe mì plọn lọ lẹ mẹ bosọ kẹalọyi yé, a sọgan na ẹn tuli poun dọ ni gbadopọnna adà lọ “Nudọnamẹ Dogọ” he sọgbe hẹ oplọn lọ na ede. To oplọn he na bọdego whenu, a sọgan yí ojlẹ kleun de nado hẹn ẹn diun dọ e mọnukunnujẹ nudọnamẹ dogọ lọ mẹ. Etomọṣo, eyin nudọnamẹ dogọ lọ na gọalọna ẹn, a dona yí whenu do gbadopọnna hẹ ẹ to oplọn lọ whenu kavi apadewhe etọn gbọn hukan lọ lẹ hihia po kanbiọ he a na ko wleawuna lẹ po kinkanse e dali.

Apotin Dogbapọn Tọn: Nudọnamẹ he to apotin enẹ mẹ to vivọnu weta dopodopo tọn nọ na gblọndo na kanbiọ homẹbibiọ tọn lọ lẹ. A sọgan yí apotin ehe zan nado hẹn ẹn diun dọ nuplọntọ towe mọnukunnujẹ nuagokun lọ lẹ mẹ bo sọgan basi zẹẹmẹ yetọn. Hia nudọnamẹ dopodopo daga gọna wefọ he zọnpọ hẹ ẹ lẹpo. Enẹgodo, na tuli nuplọntọ towe nado yí wefọ lọ lẹ do basi zẹẹmẹ nuhewutu nudọnamẹ lọ do sọgbe tọn.—Owalọ 17:2, 3.