Be Owe-Wiwe lẹ Diọ Wẹ Ya?

Mẹdelẹ nọ dọ dọ gbẹtọ lẹ diọ nuhe to Owe-wiwe mẹ lẹ. Amọ́, yẹwhegán Isaia dọ dọ Ohó Jiwheyẹwhe tọn “na gbọṣi aimẹ kakadoi.” (Isaia 40:8) Naegbọn mí gán deji dọ opà he Jiwheyẹwhe do to Owe-wiwe mẹ lẹ gbẹ́ yin nugbo?

Jiwheyẹwhe gán glọnalina gbẹtọ lẹ bọ yé ma na diọ nudepope to Owe-wiwe mẹ. To hohowhenu, mẹhe nọ vọ́ Owe-wiwe kàn lẹ nọ yí sọwhiwhe do lẹn sọha wekun he to kandai wiwe lọ mẹ lẹ tọn, na yé ma jlo na yí nudepope dogọ, de nude pò sọn e mẹ, kavi wọnji apadewhe etọn go wutu. Amọ́, mape zọ́n bọ delẹ to mẹhe vọ́ Owe-wiwe kàn lẹ mẹ ṣì fidelẹ kàn.

NAEGBỌN MÍ GÁN DEJI DỌ GBẸTỌ LẸ MA DIỌ OWẸ̀N HE TO OWE-WIWE MẸ?

Vọkan Owe-wiwe tọn he yin kinkan to hohowhenu susu wẹ tin. Enẹwutu, eyin nuṣiwa kleun de sọawuhia to vọkan de mẹ, vọkan he pò lẹ nọ gọalọ nado doayi e go.—A gán hia hosọ lọ “Be Nuhe Biblu Bẹhẹn lẹ Ko Diọ Wẹ Ya?” to jw.org ji nado mọnukunnujẹemẹ dogọ.

Di apajlẹ, to 1947 kanlinyìntọ delẹ mọ kandai hohowhenu tọn susu to osókla lẹ mẹ to lẹdo Ohù Kúkú tọn mẹ, ehe wá yin yiylọdọ Owe-Hihá Ohù Kúkú tọn lẹ. Kandai lọ lẹ bẹ adà Owe-wiwe tọn he ko tin sọn owhe 2 000 linlán die lẹ hẹn. To whenue weyọnẹntọ lẹ yí kandai enẹlẹ jlẹdo Owe-wiwe he mí nọ hia to egbehe lẹ go, etẹ go wẹ yé doayi?

Yé doayi e go dọ Ohó Jiwheyẹwhe tọn he tin to egbehe sọgbe hẹ kandai dowhenu tọn lẹ,a podọ to whenue yé gbeje kandai he sọ dohó taun lẹ pọ́n, yé mọdọ owẹ̀n Jiwheyẹwhe tọn he to Owe-wiwe mẹ ma diọ. Mí gán deji dọ Jiwheyẹwhe ma dike nudepope diọ to Kandai Wiwe lẹ mẹ, bọ nuhe mí nọ hia to e mẹ to egbehe lẹ sọgbe.

Enẹwutu, nọ hia Owe-wiwe lẹ po jidide po dọ nuhe to e mẹ lẹ sọgbe. Todin, gbọ mí ni plọnnu sọn nuhe Jiwheyẹwhe dọna wẹnsagun etọn lẹ mẹ.