LEHE NUNINA MÌTỌN LẸ NỌ YIN YIYIZAN DO
Kọgbọ Hinhẹnwa Na Mẹhe Jiya Nugbajẹmẹji Tọn Lẹ
1er FÉVRIER 2021
Nugbajẹmẹji jọwamọ tọn susu wẹ jọ to 2020 kajajẹ azọ̀nylankan COVID-19 tọn he to nugbà lẹdo aihọn pé lọ ji. Nawẹ Kunnudetọ Jehovah tọn lẹ ko gọalọna mẹhe jiya etọn lẹ gbọn?
To owhe sinsẹ̀nzọn tọn 2020 tọn mẹ,a dọlab Amelika tọn livi 28 wẹ Wedegbẹ́ Anadenanutọ tọn Hagbẹ Anademẹtọ tọn detọ́n na azọ́n kọgbọ tọn. Ehe hẹn kọgbọ wá na mẹdelẹ he jiya nugbajẹmẹji voovo 200 tọn—kakajẹ azọ̀n COVID-19 tọn, jẹhọn ahizi lẹ, singigọ to Aflika, núdùdù whèdomẹ to Vénézuéla, gọna akú to Zimbabwe ji. Nunina akuẹ tọn lọ lẹ gọalọ nado wleawu núdùdù, osin, adọtẹn, avọ̀, gọna nukunpedomẹgo dotowhé tọn, po onú dandan tọn devo lẹ po na aimẹ jijlado, nuvọjlado, po ohọ̀ vivọgbá po. Apajlẹ azọ́n kọgbọ tọn delẹ tọn die.
COVID-19. Lẹdo aihọn pé, azọ̀nylankan lọ dotukla mẹ’sunnu po mẹ’yọnnu mítọn lẹ po to agbasa-liho, numọtolanmẹ-liho, podọ to akuẹzinzan-liho. Nado gọalọna yé, Wedegbẹ́ Kọgbọ tọn 800 linlán wẹ yin didoai lẹdo aihọn pé. Wedegbẹ́ ehelẹ penukundo nuhudo mẹ’sunnu mítọn lẹ tọn go bosọ nọ yawu na linlin lee nulẹ to yìyì do tọn, ehe zọ́n bọ Wedegbẹ́ Anadenanutọ tọn yọ́n lee e na deanana nulẹ do ganji.
To whe lọ blebu mẹ, Wedegbẹ́ Kọgbọ tọn lẹ gọalọna mẹsusu nado mọ núdùdù, osin, alọklọnu lẹ, gọna amasin lẹ. To lẹdo delẹ mẹ, Wedegbẹ́ lọ lẹ sọ wazọ́n dopọ hẹ mẹho lẹ nado gọalọna mẹ’sunnu lẹ nado mọ alọgọ aṣẹpatọ lẹ tọn yí.
Mẹhe ma yin Kunnudetọ lẹ lọsu doayi azọ́n kọgbọ tọn mítọn go. Di apajlẹ, Field Simwinga, ogán agbegbe Nakonde tọn de to Zambie, dọna mẹ’sunnu mítọn lẹ dọ: “Mí yọ́n pinpẹn alọgọ mìtọn he wá do gànmẹ na whẹndo he jiya nugbajẹmẹji lọ tọn ehelẹ tọn taun.”
Núdùdù Whèdomẹ to Angola. Azọ̀nylankan COVID-19 tọn zọ́n bọ huvẹ tọ́n to Angola bọ nulẹpo sọ yikuẹ. E vẹawuna mẹ’sunnu po mẹ’yọnnu mítọn susu po nado mọ núdùdù họ̀.
Núdùdù didohlan Angola sọn Brésil
Yè biọ to alahọ Brésil tọn si nado do núdùdù delẹ hlan mẹ’sunnu mítọn lẹ to Angola. Nado dowéna nunina kọgbọ tọn lẹ, mẹ’sunnu lẹ dín aliho dagbe hugan lẹ nado họ̀ núdùdù bo bẹ dohlan, yé sọ nọ họ̀ nulẹ dopọ ji. Nado họ̀ núdùdù atì dopodopo bo do e hlan ma hugan nudi dọla 22, amọ́ yé nọ mọ nudi kilo 20 lẹsi, ayivi, po amì po tọn to e mẹ. Kakajẹ din, núdùdù atì 33 544 wẹ yin didohlan—ehe zinpinpẹn etọn lẹpo yin tọ́nu 654. Ehe lẹpo gọna alọgọ he yin mimọyi to lẹdo lọ lọsu mẹ lẹ gọalọ nado na núdùdù gbẹtọ 50 000 linlán!
Na mẹ’sunnu mítọn lẹ mọ azọ́n kọgbọ tọn ehe do? Alexandre, he nọ nọ̀ lẹdo he to olá Angola tọn de mẹ dọmọ: “N’mọ dọ kunnudenu de wẹ dọ Jehovah yiwanna mi bọ n’masọ to dee ṣo. Titobasinanu Jehovah tọn doyẹyigona mi taun!” Mariza, onọ̀ godoponọ de dọ: “Jehovah sè dẹ̀ ṣie. N’dopẹna ewọ po titobasinanu etọn po!”
Mẹ’sunnu lẹ to Angola dopẹ na nunina kọgbọ tọn he yé mọyi lẹ
Kọgbọ to Akúdido whenu to Zimbabwe. To owhe sinsẹ̀nzọn 2020 tọn mẹ, akú sinsinyẹn do to Zimbabwe, bosọ do gbẹtọ livi susu lẹ huvẹ. Kunnudetọ fọtọ́n susu lẹ wẹ jiya núdùdù whèdomẹ tọn to Zimbabwe.
Wedegbẹ́ kọgbọ tọn atọ́n yin didoai nado gọalọ nado hẹn núdùdu yì na mẹ’sunnu mítọn lẹ. Wẹnlatọ kanweko susu lẹ wẹ gọalọ nado bla núdùdù, gọna agbàn devo lẹ, bosọ ze mọto yetọn jo nado bẹ yé yì.c To owhe sinsẹ̀nzọn 2020 tọn mẹ, dọla 691 561 wẹ yin zinzan nado wleawu núdùdù tọn na gbẹtọ 22 700 linlán!
Núdùdù nina mẹ’sunnu lẹ to Zimbabwe (jẹnukọnna azọ̀n bẹplamẹ)
To ninọmẹ delẹ mẹ, núdùdù ko vọ̀ do mẹ’sunnu lẹ whẹpo azọ́n kọgbọ tọn do bẹ. Whenue núdùdù lọ wá, mẹ’sunnu mítọn lẹ dopẹna Jehovah. Mẹdelẹ tlẹ jẹ ohàn Ahọluduta tọn lẹ ji ji.
To lẹdo de mẹ, asuṣiọsi Kunnudetọ awe yì pli de tẹnmẹ to lẹdo yetọn mẹ hẹ kọmẹnu lẹ nado dọhodo núdùdù he ogbẹ́ he ahọlu yọnẹn bo ma ka doalọ demẹ de to nina ji. Amọ́ mẹlẹ wá jẹ tonudidọ hó lẹ ké ji to pli lọ ji, mẹ’yọnnu lọ lẹ gbẹ́ dọ emi ma gán kẹalọyi enẹ bo do mọ alọgọ yí. Dile yé to tintọ́n sọn pli lọ ji, mẹlẹ to yé ṣanko bo dọ, “Mì ma hà bo tọ́n núdùdù gbé wá mí dè!” Osẹ awe poun godo, mẹ’sunnu mítọn lẹ jẹ lẹdo lọ mẹ bosọ ze núdùdù jo na mẹ’yọnnu mítọn lẹ—yèdọ ojlẹ susu jẹnukọnna alọgọ ogbẹ́ diẹ tọn!
Prisca dọ: “Jehovah ma’o dowinyan sinsẹ̀ntọ etọn lẹ pọ́n gbede”
Azọ́n kọgbọ tọn to Zimbabwe sọ dekọtọn do kunnudide dagbe de mẹ. Di apajlẹ, numimọ Prisca, he nọ nọ̀ gbetato pẹvi de mẹ tọn die. Mahopọnna awusinyẹn he akúdido lọ hẹnwa lẹ, Prisca nọ tọ́n na lizọnyizọn lọ to mercredi po vendredi lẹ po, etlẹ yin to ojlẹ glezọ́nwiwa tọn mẹ. Melẹ nọ ṣàn ẹn kò bo nọ dọ: “Whẹndo towe na do huvẹ wẹ a te po yẹwhehodidọ towe po.” Prisca nọ dọna yé dọ: “Jehovah ma’o dowinyan sinsẹ̀ntọ etọn lẹ pọ́n gbede.” Jlẹ kleun de to enẹgodo, e mọ nunina kọgbọ tọn yí sọn titobasinanu mítọn si. Ehe jiawu na kọmẹnu etọn delẹ, he dọna Prisca dọ: “Jiwheyẹwhe ma dowinyan we nugbo, mí jlo na yọ́n nususu dogọ gando ewọ go.” To alọnu, kọmẹnu etọn ṣinawe wẹ nọ hodo opli agun tọn lẹ to ladio ji.
Dile opodo lọ to sisẹpọ, mí na gbẹ́ nọ pehẹ nugbajẹmẹji jọwamọ tọn lẹ. (Matiu 24:3, 7) Mí yọ́n pinpẹn nunina alọtútlú tọn mìtọn he mí nọ mọ gbọn donate.jw.org ji lẹ tọn taun. Yé na yin yiyizan nado hẹn kọgbọ wá na mẹhe to nuhudo etọn mẹ lẹ to ojlẹ sisọ mẹ.
a Owhe sinsẹ̀nzọn tọn 2020 tọn bẹsọn septembre 2019 jẹ août 2020.
b Dọla he go mí donù tofi lẹpo yin dọla Amelika tọn.
c Na osẹ́n he lẹdo azọ̀nylankan COVID-19 tọn lẹpo wutu, yè dona nagbè mẹ’sunnu mítọn lẹ whẹpo yé nido ze núdùdù yì na mẹhe to hudo etọn mẹ lẹ. Yé sọ nọ basi hihọ́na yede ma nado ze yede do owù mẹ na azọ̀n lọ wutu.