Etẹwẹ Yin Aṣli lọ Nado Do Sọgodo Dagbe?
Mẹsusu nọ lẹndọ huhlọn he nukun ma gán mọ lẹ wẹ nọ deanana sọgodo mẹtọn. Enẹwutu, yé nọ hodo aṣa delẹ nado hẹn sọgodo yetọn pọnte.
NUHE MẸSUSU YISE
SUNWHLẸVU-PINPỌN: Mẹdelẹ yise dọ fie sunwhlẹvu lẹ te to wẹkẹ lọ mẹ to whenue yè ji yé wẹ nọ do nue sọgodo yetọn na yin hia. Yé nọ dín odù he jọ yé nado dapana nuylankan he ja yé ji lẹ kavi nado yọ́n nue yé gán wà na nulẹ nido nọ pà yé.
NUPLỌNMẸ FENG SHUI TỌN: Mẹdevo lẹ yise dọ aliho he mẹ yé gbá owhé yetọn kavi to nulẹ do e mẹ te wẹ gán zọ́n bọ sọgodo yetọn na yọ́n. Dawe de he nọ yin Lo Winga bo nọ nọ̀ Hong Kong dọ dọ: “Dawe de he sinyẹn to feng shui mẹ dọna mi dọ eyin n’ze onú loboto [cristal] de do nọtẹn tangan de to abò mẹ, n’na do akuẹ dogọ.”
TỌGBO LẸ SINSẸ̀N: Mẹdevo lẹ sọ yise dọ eyin emi nọ sẹ̀n tọgbo emitọn he kú lẹ kavi yẹwhe lẹ, yé na ṣọ́ emi bo kọ̀n dona do emi ji. Nawe de he nọ yin Van bo nọ nọ̀ Viêt Nam dọmọ: “N’yọnẹn dọ eyin n’nọ sẹ̀n tọgbo ṣie lẹ, onú na yọ́n na yẹn po ovi ṣie lẹ po todin bọ sọgodo mítọn nasọ yọ́n.”
VIVỌJỌ: Mẹsusu wẹ nọ dọ dọ eyin mẹde kú, e nọ to yinyin vivọji mapote. Yé nọ lẹndọ nuhe yé wà to whenue yé to ogbẹ̀ to fide wayi wutu wẹ nudagbe kavi nuylankan do nọ jọ do yé go.
Mẹsusu devo lẹ ka sọ tin bo nọ dọ dọ otàngblo kẹdẹ wẹ onú enẹlẹ yin, ganṣo yé gbẹ́ nọ hodo aṣa delẹ taidi alọpahomẹ pinpọn, fakinkàn, kavi nọ yì numọtọ lẹ dè. Na yewlẹ, aliho de wẹ enẹ yin nado yọ́n sọgodo yetọn.
BE E NỌ HẸN ALE WÁ YA?
Be ogbẹ̀ mẹhe nọ yí onú enẹlẹ sè bo nọ hodo aṣa mọnkọ lẹ po tọn nọ pọnte bọ sọgodo yetọn nọ yọ́n ya?
Pọ́n apajlẹ dawe de he nọ yin Hào bo nọ nọ̀ Viêt Nam tọn. Na e to sọgodo dagbe de dín wutu, e lẹhlan sunwhlẹvu pinpọn, nuplọnmẹ feng shui tọn bosọ nọ sẹ̀n tọgbo lẹ. Be e pà ẹ ya? Nue e dọ die: “Ajọ́ ṣie yìdo bọ n’duahọ, whẹndo ṣie sọ biọ nuhahun mẹ. N’jẹflumẹ pete.”
Qiuming he nọ nọ̀ Taïwan lọsu lẹhlan sunwhlẹvu pinpọn po nuplọnmẹ feng shui tọn po. E nọ sẹ̀n tọgbo lẹ bo yise dọ mẹhe kú lẹ nọ vọjọ bọ biọwá mẹ wẹ nulẹpo te. Amọ́, to whenue e yiagbọji bo lẹnnupọndo nuplọnmẹ ehelẹ ji godo, e wá dọ dọ: “N’mọdọ nuplọnmẹ po aṣa ehelẹ po sọta yede bo nọ ze mẹ do bẹwlu mẹ. N’doayi e go dọ nue mẹhe nọ pọ́n sunwhlẹvu lẹ nọ dọ lẹ ma nọ saba yin nugbo. Podọ eyin mẹhe kú nọ vọjọ nugbo, nawẹ e gán diọ jijọ bo wà nue sọgbe do eyin e ma flin nue e wà to whenue e to ogbẹ̀?”
“N’mọdọ nuplọnmẹ po aṣa ehelẹ po sọta yede bo nọ ze mẹ do bẹwlu mẹ.”—QIUMING, TAÏWAN
Hào, Qiuming po mẹsusu devo lẹ po wá mọdọ biọwá, sunwhlẹvu lẹ pinpọn, tọgbo lẹ sinsẹ̀n kavi vọjọ ma nọ de sọgodo mítọn hia. Be enẹ dohia dọ mílọsu ma do huhlọn de do sọgodo mítọn ji wẹ ya?
Mẹsusu wẹ nọ mọdọ wepinplọn yinukọn kavi adọkun wẹ na zọ́n bọ sọgodo yetọn na yọ́n. Amọ́, etẹwẹ mẹdelẹ he ko doafọna onú enẹlẹ dọ?
a To hosọ ehe po dehe bọdego lẹ po mẹ, yinkọ delẹ ko yin didiọ.
b Hogbe enẹlẹ to Biblu he yin Owe Wiwe de mẹ to Galatianu lẹ 6:7 mẹ. Mẹhe nọ nọ̀ otò Arabe tọn mẹ lẹ tlẹ nọ saba dọ dọ eyin a do opẹ̀, opẹ̀ wẹ a na gbẹ̀n; eyin a do ayivi, ayivi wẹ a na gbẹ̀n.