Kanbiọ Lẹ Sọn Wehiatọ Lẹ Dè

Etẹ na dọ wẹ Jesu te whenue e dọ dọ: ‘Mì lẹndọ yẹn wá nado hẹn jijọho wá blo’?

Jesu lá owẹ̀n jijọho tọn de. Amọ́ to gbèdopo, e dọna apọsteli etọn lẹ dọmọ: “Mì lẹndọ yẹn wá nado hẹn jijọho wá aigba ji blo; yẹn ma wá nado hẹn jijọho wá gba, adavo ohí. Na yẹn wá nado hẹn kinklan wá, yèdọ visunnu sọta otọ́ etọn, viyọnnu sọta onọ̀ etọn, podọ ovisi sọta asu-nọ̀ etọn.” (Mat. 10:34, 35) Etẹ na dọ wẹ Jesu te?

Jesu ma jlo na klan hagbẹ whẹndo tọn lẹ sọn ode awetọ go gba, amọ́ e yọnẹn dọ nuplọnmẹ emitọn lẹ na hẹn kinklan wá whẹndo delẹ mẹ. Enẹwutu, mẹhe jlo na lẹzun devi Klisti tọn bosọ yí baptẹm lẹ dona yọ́n kọdetọn he nudide yetọn na hẹnwa lẹ. Eyin yé pehẹ homẹkẹn alọwlemẹ kavi hagbẹ whẹndo tọn devo lẹ tọn, e gán vẹawu nado to nugbonọ yin na nuplọnmẹ Klisti tọn lẹ zọnmii.

Biblu dotuhomẹna Klistiani lẹ nado nọ “nọ̀ jijọho mẹ hẹ gbẹtọ lẹpo.” (Lom. 12:18) Amọ́, nuplọnmẹ Jesu tọn lẹ gán yinuwa taidi “ohí” de to whẹndo delẹ mẹ. Ehe nọ jọ to whenue hagbẹ whẹndo tọn de kẹalọyi nuplọnmẹ Jesu tọn lẹ to whenuena devo lẹ gbẹ́ yé dai kavi jẹagọdo yé. To ninọmẹ mọnkọ mẹ, hẹnnumẹ lẹ, enẹ wẹ mẹhe to whédo lọ mẹ lẹ nọ lẹzun “kẹntọ” mẹhe to nugbo plọn lọ tọn.—Mat. 10:36.

To whedelẹnu, devi Klisti tọn he tin to whédo he klan to sinsẹ̀n-liho de mẹ lẹ nọ pehẹ ninọmẹ he nọ whlé owanyi yetọn na Jehovah po Jesu po pọ́n lẹ. Di apajlẹ, hẹnnumẹ mayisenọ lẹ gán sisẹ́ yé nado dù hùnwhẹ sinsẹ̀n tọn de. To whenue yé yin whiwhlepọn, mẹnu sin homẹ wẹ yé na hẹn hùn? Jesu dọmọ: “Mẹdepope he tindo owanyi na otọ́ kavi onọ̀ hú mi ma jẹna mi.” (Mat. 10:37) Na nugbo tọn, Jesu ma to didọ dọ devi emitọn lẹ dona dekanpona owanyi he yé do na mẹjitọ yetọn nado jẹna emi gba. Kakatimọ, e to pinplọn yé lehe yé na de nuhe yin nujọnu hugan lẹ do to gbẹzan yetọn mẹ. Eyin hagbẹ whẹndo tọn mayisenọ lẹ jẹagọdo nudide mítọn nado sẹ̀n Jehovah, mí nọ zindonukọn nado to wanyina yé, amọ́ mí nọ mọnukunnujẹemẹ dọ owanyi mítọn na Jiwheyẹwhe wẹ to otẹn tintan mẹ.

Matin ayihaawe, nukundiọsọmẹ whẹndo tọn gán vẹawu taun. Etomọṣo, devi Jesu tọn lẹ dona hẹn hogbe etọn lẹ do ayiha mẹ dọmọ: “Mẹdepope he ma jlo na hẹn yatin etọn bo hodo mi ma jẹna mi.” (Mat. 10:38) To hogbe devo mẹ, Klistiani lẹ nọ pọ́n nukundiọsọmẹ whẹndo tọn hlan taidi apadewhe yajiji he devi Klisti tọn lẹ dona kẹalọyi sọn ojlo mẹ wá lẹ tọn. To ojlẹ dopolọ mẹ, todido yetọn wẹ yindọ walọyizan dagbe yetọn na whàn hagbẹ whẹndo tọn mayisenọ lẹ nado diọ linlẹn bo tindo ojlo nado plọn Biblu.—1 Pita 3:1, 2.