1 | Odẹ̀—“Mì to Magbọjẹ Mìtọn Lẹpo Bẹ Dlan Ewọ Ji”

NUHE BIBLU DỌ: ‘Mì bẹ magbọjẹ mìtọn lẹpo dlan Jiwheyẹwhe ji, na e to mìtọn hòpọn wutu.’—1 PITA 5:7.

Nuhe E Zẹẹmẹdo

Jehovah Jiwheyẹwhe biọ dọ mí ni nọ dọho na emi gando agbàn pinpẹn depope he to ahun ji na mí lẹ go. (Salmu lẹ 55:22) Nuhahun de ma tin he sinyẹn kavi whè gbau bọ yè ma gán hodẹ̀ gandego. Eyin e to ahunmẹduna mí, be e to ahunmẹduna Jehovah lọsu ga. Onú titengbe he mí gán wà nado do jijọho to ayiha mẹ wẹ nado nọ hodẹ̀ hlan ẹn.—Filipinu lẹ 4:6, 7.

Lehe Ehe Gán Gọalọ Do

Whenue mí to pipehẹ nuhahun apọ̀nmẹ tọn, mí gán nọ lẹndọ mí ma do alọgọtọ depope. Mẹdevo lẹ ma nọ mọnukunnujẹ nuhe mẹ jugbọn mí te to gigọ́ mẹ to whelẹponu. (Howhinwhẹn lẹ 14:10) Amọ́, eyin mí dọ lehe e nọ ṣí na mí na Jiwheyẹwhe to odẹ̀ mẹ, ewọ na dotoaina mí po awuvẹmẹ po bosọ mọnukunnujẹ ninọmẹ mítọn mẹ. Jehovah nọ mọ mí, e yọ́n awufiẹsa po nuhahun mítọn lẹ po, bosọ nọ jlo dọ mí ni hodẹ̀ hlan emi gando nudepope he to magbọjẹ do na mí go.—2 Otànnugbo lẹ 6:29, 30.

Eyin mí nọ dọhona Jehovah to odẹ̀ mẹ, enẹ nọ hẹn mí kudeji dogọ dọ ewọ nọ hò mítọn pọ́n. Mí gán do numọtolanmẹ dopolọ hẹ salmu-kantọ lọ he hodẹ̀ dọmọ: “Hiẹ ko mọ yajiji ṣie; hiẹ yọ́n ayimajai ahun ṣie mẹ tọn.” (Salmu lẹ 31:7) Nado yọnẹn poun dọ Jehovah lọsu nọ sè vivẹ́ na nuhe pehẹ mí te wutu nọ gọalọna mí nado jugbọn ojlẹ sinsinyẹn lẹ mẹ. Amọ́, e ma nọ doayi awufiẹsa mítọn lẹ go poun. E nọ mọnukunnujẹ nuhe mẹ jugbọn mí te hugan mẹdevo depope, bosọ nọ gọalọna mí nado mọ homẹmimiọn po tulinamẹ po to Biblu mẹ.

Biblu Gọalọna Julian

Lehe Magbọjẹ lẹ Nọ Yinuwado Ji E Do

“N’nọ pehẹ magbọjẹ po apọṣimẹ sinsinyẹn wunmẹ de po he nọ yin troubles obsessionnels compulsifs (TOC). N’nọ do magbọjẹ to whenue n’ma lẹn do paali. N’gán to ganji din, bọ to ojlẹ kleun de godo, n’na do magbọjẹ sinsinyẹn bo ma yọ́n nuhewutu wẹ. N’nọ do magbọjẹ titengbe whenue n’topọ́ hẹ mẹdevo lẹ. Nuhe yé nọ lẹn do go e nọ duahunmẹna mi sinsinyẹn.

“Mẹhe yọ́n nuhe pehẹ n’te lẹ nọ gọalọna mi taun. N’dona yigbe dọ to whedelẹnu, e ma yin nuhe n’to nukundo dọ yé ni dọ wẹ yé nọ dọ. Amọ́, n’nọ yọ́n pinpẹn vivẹnudido ahundopo tọn yetọn lẹ tọn.

“To whedelẹnu, ayimajai po apọṣimẹ-zọ̀n (TOC) ṣie po nọ zọ́n bọ e nọ vẹawuna mi nado hodẹ̀. E nọ biọ dọ ma dovivẹnu sinsinyẹn to apọ̀nmẹ nado gọ̀ biọ dee mẹ bo hodẹ̀ hlan Jehovah. Ayiha ṣie nọ to yìyì sọn nude ji jẹ nudevo ji po awuyiya po sọmọ bọ n’nọ saba biọ bẹwlu sinsinyẹn mẹ. Whenue n’ma gán sọ deanana linlẹn ṣie lẹ ba, e nọ vẹawuna mi taun nado dọ numọtolanmẹ ṣie lẹ na Jehovah.”

Lehe Biblu Nọ Gọalọna Mi Do

“N’ko plọn to Biblu pinplọn ṣie whenu dọ e ma yin dandan dọ mí ni hodẹ̀ gaa kavi yí hogbe he vivi sisè lẹ zan whẹpo Jiwheyẹwhe nido sè. To whedelẹnu, eyin n’ma gán dọ nuhe lẹn n’te nugbonugbo, n’nọ gbọ bo nọ dọ: ‘Jehovah, jaale gọalọna mi.’ Etlẹ yin to ninọmẹ enẹlẹ mẹ, n’nọ mọdọ Jehovah mọnukunnujẹ go e bo nọ na mi nuhe sin hudo n’do to ojlẹ lọ mẹ. Gbọnvona odẹ̀, n’sọ dín alọgọ doto lẹ tọn. Homẹ ṣie hùn dọ alọgọ voovo awe ehelẹ zọ́n bọ ninọmẹ ṣie pọnte taun. Na nugbo tọn, vivẹnu he n’do nado hodẹ̀ hlan Otọ́ olọn mẹ tọn ṣie ma yin osin-bado-pápá-nẹgbé, podọ ehe ko zọ́n bọ n’mọ owanyi po godonọnamẹ etọn po.”