Awhàn Nọ Hẹnnugble
Nue nọ yinuwado gbẹtọ lẹ ji sinsinyẹn sọ̀ awhàn po nudindọn he nọ bẹ danuwiwa hẹn lẹ po ma sù. Lẹdo aihọn pé, awhànfuntọ lẹ po tòvi lẹ po ko yọ́n kọdetọn vẹadi he awhàn nọ hẹnwa lẹ.
AWHÀNFUNTỌ LẸ
“Nugbajẹmẹji lẹ—nujijọ ylankan he nọ diọ gbẹzan mẹtọn lẹ kavi okú—wẹ nọ gbọn kámẹ-gòmẹ. Ehe nọ zọ́n bọ yè nọ wá pò na nuhiha.”—Gary, he nọ nọ̀ Grande-Bretagne.
“Sòpẹ́n wá jẹ nẹgbé po nukunmẹ po na mi, podọ n’mọ bọ mẹsusu yin hùhù, enẹ wẹ yọpọ po mẹho po. Awhàn nọ hẹn ahun mẹtọn sinyẹn.”—Wilmar, he nọ nọ̀ Colombie.
“Eyin yè desòdomẹ to nukun towe mẹ, a ma gán wọn nujijọ lọ pọ́n. Awhágbe po hunwinwẹn mẹlọ tọn po nọ gbọṣi ayiha mẹtọn mẹ. A ma gán wọn omẹ enẹ gbedegbede.”—Zafirah, he nọ nọ̀ États-Unis.
TÒVI LẸ
“E nọ ṣí na mi dọ n’ma gán sọ do ayajẹ gbede wẹ nkọ. A na dibuna ogbẹ̀ towe, amọ́ humọ, a nasọ dibuna ogbẹ̀ whẹndo towe po họntọn towe lẹ po tọn.”—Oleksandra, he nọ nọ̀ Ukraine.
“E nọ dobu nado tò sọn ogàn 2 mẹ zánfinfọ́n kakajẹ ogàn 11 zánmẹ tọn mẹ nado yí núdùdù, mọ a ma yọnẹn eyin sòpẹ́n de na buali bo wá jẹ gowe bo gbleawuna we.”—Daler, he nọ nọ̀ Tadjikistan.
“Awhàn zọ́n bọ n’masọ do otọ́ po onọ̀ po ba. N’mọ dee to ṣokẹdẹ bo masọ do mẹhe na doalọakọ́nji na mi kavi hò ṣie pọ́n.”—Marie, he nọ nọ̀ Rwanda.
Mahopọnna nuyiwadomẹji vẹadi awhàn tọn lẹ, mẹhe go mí donù to aga lẹ wá nọ jijọho mẹ. Humọ, yé kudeji dọ awhàn po nudindọn he nọ bẹ danuwiwa hẹn lẹ po na doalọte to madẹnmẹ. Zinjẹgbonu Atọ̀họ̀-Nuhihọ́ lọ Tọn ehe na basi zẹẹmẹ sinai do Biblu ji gando lehe enẹ na jọ do go.