Jijọho tintindo Mahopọnna Awhàn po Nudindọn Danuwiwa Tọn lẹ Po
“Whẹpo n’do jẹ Biblu plọn ji, n’ma yọ́n nuhewutu kanyinylan, mawadodo po tukla po do gọ́ ogbẹ̀ lọ mẹ sọmọ. Amọ́ todin, n’tindo jijọho ahun mẹ tọn. N’yọnẹn dọ Jehovah Jiwheyẹwhe na diọ aihọn ehe zun nọtẹn hihọ́ tọn de.” —Gary, he wà awhànzọ́n dai.
E ma yin Gary kẹdẹ wẹ e ṣí mọ na. Pọ́n lehe Biblu ko gọalọna mẹdevo lẹ do.
BIBLU DỌMỌ: “Na hiẹ yọ́n bo nọ wleawu nado jonamẹ, Jehovah E.”—Salmu lẹ 86:5.
LEHE WEFỌ EHE GỌALỌ DO: “Wefọ ehe nọ hẹn mi kudeji dọ Jehovah yin lẹblanunọ. N’yọnẹn dọ e ko wleawufo nado jona mi, na nuhe n’ko wà wayi to whenue n’doalọ to awhàn mẹ lẹpo.”—Wilmar he nọ nọ̀ Colombie.
BIBLU DỌMỌ: “Yẹn to olọn yọyọ lẹ po aigba yọyọ de po dá; podọ onú hoho tọn lẹ ma nasọ yin finflin ba, mọ yé ma na gọwá ahun mẹ ba.”—Isaia 65:17.
LEHE WEFỌ EHE GỌALỌ DO: “Na numimọ he n’do to awhànzọ́n mẹ lẹ wutu, n’jẹazọ̀n apọṣimẹ sinsinyẹn tọn. Amọ́, wefọ ehe nọ flin mi dọ Jehovah na súnsún linlẹn he to ayimajai hẹnwa na mi lọ lẹ sẹ̀ to madẹnmẹ, bọ n’ma nasọ nọ kudlọ ylankan lẹ ba. Tẹnmẹ ma na tin na yé to ahun ṣie mẹ ba. Nunina nankọ die!”—Zafirah he nọ nọ̀ États-Unis.
BIBLU DỌMỌ: “To azán etọn lẹ gbè, dodonọ na vùn, bọ jijọho na sudeji kakajẹ whenue osun ma na tin ba.”—Salmu lẹ 72:7.
LEHE WEFỌ EHE GỌALỌ DO: “N’nọ saba lẹnnupọndo hogbe ehelẹ ji. To madẹnmẹ, odlọ ylankan he yè nọ kú na awhàn wutu lẹ na wá vivọnu, podọ mí ma nasọ nọ hanú gando dagbemẹninọ mẹyiwanna mítọn lẹ tọn go ba.”—Oleksandra he nọ nọ̀ Ukraine.
BIBLU DỌMỌ: “Oṣiọ towe lẹ na wá nọgbẹ̀. . . . Mì fọ́n bo yí ayajẹ do dawhá, mì mẹhe nọ nọ̀ kọ́gudu mẹ lẹ emi!”—Isaia 26:19.
LEHE WEFỌ EHE GỌALỌ DO: “To awhàn akọ̀ vivasudo tọn he yin fùnfùn sọta Tutsi lẹ whenu, diblayin hagbẹ whẹndo tọn ṣie lẹpo wẹ yin hùhù. Amọ́, wefọ ehe hẹn mi kudeji dọ n’na wá gọ̀ yé mọ whladopo dogọ. N’to jejeji nado sè kọnugbè ayajẹ tọn yetọn lẹ whenue yé na yin finfọnsọnku!”—Marie he nọ nọ̀ Rwanda.
BIBLU DỌMỌ: “Na whenu pẹẹde dogọ, mẹylankan lẹ ma na tin ba . . . Ṣigba, homẹmimiọnnọ lẹ wẹ na dugu aigba tọn, yé nasọ nọ mọ awuvivi susu to jijọho susugege mẹ.”—Salmu lẹ 37:10, 11.
LEHE WEFỌ EHE GỌALỌ DO: “Dile etlẹ yindọ awhàn lọ ko doalọte, mawadodo po mẹylankan lẹ po gbẹ́ tin. Wefọ ehelẹ na taun tọn ko na mi huhlọn. Jehovah nọ mọ onú lẹpo bosọ mọnukunnujẹ ninọmẹ ṣie mẹ. E dopà dọ to madẹnmẹ yajiji lẹpo wẹ na wá vivọnu bo ma nasọ yin finflin ba.”—Daler he nọ nọ̀ Tadjikistan.
Mẹhe dọho to linlinwe ehe mẹ lẹ yin delẹ to Kunnudetọ Jehovah tọn livi susu he Biblu ko gọalọna nado tindo jijọho lẹ mẹ. Yé ko plọn lehe yé na nọ duto wangbẹna akọ̀ tọn, otò tọn, hẹnnu tọn po devo lẹ po ji do. (Efesunu lẹ 4:31, 32) Kunnudetọ Jehovah tọn lẹ ma nọ doalọ to tonudidọ mẹ, podọ yé nọ gbẹ́ nado doalọ to danuwiwa mẹ.—Johanu 18:36.
Kunnudetọ Jehovah tọn lẹ sọ nọ mọ godonọnamẹ pipli mẹmẹsunnu tọn yetọn he mẹ owanyi tin te tọn yí. (Johanu 13:35) Di apajlẹ, Oleksandra he go mí donù wayi to dandannu glọ nado họnyi otò devo mẹ po nọviyọnnu etọn po na awhàn wutu. E dọmọ: “Whenue mí dasá dogbó, mí mọ Kunnudetọ lẹdo lọ tọn lẹ to afọdopolọji, podọ yé ko to finẹ nado dokuavọna mí. Godonọnamẹ yetọn gọalọna mí nado diọada bo nọgbẹ̀ to otò yọyọ de mẹ taidi fibẹtado-dintọ lẹ.”
Mí yí zohunhun do to oylọ-basina we nado wá kọnawudopọ hẹ mí to opli mítọn lẹ ji, fihe mí nọ plọnnu gando owẹ̀n jijọho tọn Biblu tọn go te gọna lehe mí na yí i do yizan mẹ do. Yì jw.org ji nado mọ nọtẹn he sẹpọ we de kavi nado biọ tito Biblu pinplọn tọn vọnu de hẹ kunnudetọ Jehovah tọn de to owe lọ Duvivi Ogbẹ̀ Tọn Kakadoi! mẹ.