Lehe A Gán Nọ Na Ayinamẹ Do

1. Mẹnu wẹ dona na ayinamẹ? Basi zẹẹmẹ.

ETẸWẸ nọ yin numọtolanmẹ towe gando ayinamẹ nina go? Homẹ mẹdelẹ tọn nọ hùn nado na ayinamẹ. Mẹdevo lẹ nọ whleawu nado na ayinamẹ kavi nado dọ̀n ayiha mẹde tọn wá nude ji, podọ e nọ ṣí de na yé to whenue yé to mọwà. Depope he whẹho lọ yin, mímẹpo wẹ nọ to dandannu glọ nado na ayinamẹ sọn ojlẹ de mẹ jẹ devo mẹ. Etẹwutu? Na Jesu dọ dọ owanyi he hodotọ nugbo emitọn lẹ nọ dohia ode awetọ wẹ yè nado yọ́n yé. (Joh. 13:35) Podọ dopo to aliho he mẹ mí nọ do owanyi mítọn hia te wẹ nado na ayinamẹ mẹmẹsunnu po mẹmẹyọnnu mítọn lẹ po to whenue e biọ do mọ. Ohó Jiwheyẹwhe tọn dọ dọ “ayinamẹ ahundopo tọn” lẹ nọ hẹn “họntọnjiji dagbe” lodo kavi sinyẹn deji.—Howh. 27:9.

2. Etẹwẹ mẹho lẹ dona penugo nado nọ wà, podọ etẹwutu? (Sọ pọ́n apotin lọ “Ayinamẹ lẹ to Opli Osẹ Ṣẹnṣẹn Tọn Ji.”)

² Mẹho lẹ na taun tọn dona penugo nado nọ na ayinamẹ po kọdetọn dagbe po. Jehovah ko gbọn Jesu gblamẹ deazọ́nna sunnu ehelẹ nado penukundo agun lọ go. (1 Pita 5:2, 3) Dopo to aliho he mẹ yé nọ wàmọ te lẹ mẹ wẹ gbọn ayinamẹ sinai do Biblu ji lẹ nina dali to whenue yé to hodidọ lẹ na to agun mẹ. Yé sọ dona na ayinamẹ lẹngbọ dopodopo, ehe bẹ dehe ko danbú sọn lẹngbọpa lọ mẹ lẹ hẹn. Nawẹ mẹho lẹ, podọ to linlẹn he gbloada mẹ mímẹpo gán nọ na ayinamẹ dagbe lẹ gbọn?

3. (a) Nawẹ mí gán plọn nado yin ayinamẹtọ dagbe de gbọn? (Isaia 9:6; sọ pọ́n apotin lọ “Nọ Hodo Apajlẹ Jesu Tọn Whenue A to Ayinamẹ Na.”) (b) Etẹwẹ mí na gbadopọnna to hosọ ehe mẹ?

³ Mí gán plọn nususu gando ayinamẹtọ dagbe de yinyin go eyin mí gbadopọnna apajlẹ mẹhe go Biblu donù delẹ tọn, titengbe Jesu tọn. Dopo to tẹnmẹ-yinkọ etọn lẹ mẹ wẹ “Ayinamẹtọ Jiawu.” (Hia Isaia 9:6.) To hosọ ehe mẹ, mí na dọhodo nuhe mí gán wà eyin yè biọ to mí si nado na ayinamẹ, gọna nuhe mí gán wà eyin mí dona na ayinamẹ to whenue yè ma biọ to mí si nado wàmọ ji. Mí nasọ gbadopọnna nuhewutu e yin nujọnu nado na ayinamẹ to ojlẹ sisọ mẹ, podọ to aliho dagbe mẹ.

EYIN YÈ BIỌ TO MÍ SI NADO NA AYINAMẸ

4, 5. Eyin mẹde kàn ayinamẹ sè mí, kanbiọ tẹwẹ mí dona nọ kanse míde jẹnukọn? Na apajlẹ.

⁴ Eyin mẹde kàn ayinamẹ sè mí, etẹwẹ yin onú tintan he mí dona wà? Mí gán mọdọ na mí yin mẹjọmẹ wutu wẹ, bo na jlo na gọalọ to afọdopolọji. Amọ́, mí dona kanse míde jẹnukọn dọ, ‘Be n’pegan nado na ayinamẹ do whẹho ehe ji ya?’ To whedelẹnu, aliho dagbe hugan he mẹ mí gán gọalọ te wẹ ma nado na ayinamẹ mẹlọ, amọ́ bo deanana ẹn yì mẹhe pegan nado na anademẹ gando whẹho lọ go de dè.

⁵ Lẹnnupọndo apajlẹ ehe ji. Mí ni dọ dọ họntọn vivẹ́ de do nuhahun agbasamalo tọn sinsinyẹn de. E dọna we dọ emi ko to dodinnanu basi do nukunpedomẹgo voovo he tin lẹ ji, enẹgodo e biọ to asi we nado dọ linlẹn towe gando nukunpedomẹgo he a lẹndọ e pọnte hugan go. A gán tindo pọndohlan tangan de do whẹho lọ ji, amọ́ a ma yin dotozọ́nwatọ, mọ a ma mọ azọ́nplọnmẹ yí nado penukundo awutu lọ go. To ninọmẹ enẹ mẹ, aliho dagbe hugan nado nọgodona họntọn towe wẹ nado gọalọna ẹn na e nido yì mọ doto he pegan to adà enẹ mẹ de.

6. Naegbọn mí gán de nado nọte whẹpo do na ayinamẹ?

⁶ Eyin mí tlẹ mọdọ mí pegan nado na ayinamẹ do whẹho titengbe de ji, mí gán de nado nọte na ojlẹ de whẹpo do na gblọndo mẹhe kàn ayinamẹ sè mí lọ. Etẹwutu? Howhinwhẹn lẹ 15:28 dọ dọ, “dodonọ . . . nọ lẹnayihamẹpọn whẹpo do gblọnho.” Bọ eyin mí ka lẹndọ mí yọ́n gblọndo lọ lo? Mí gán gbẹ́ yí whenu bo basi dodinnanu, hodẹ̀ bosọ lẹnayihamẹpọn. To whenẹnu, mí gán kudeji dogọ dọ gblọndo mítọn na sọgbe hẹ numọtolanmẹ Jehovah tọn gando whẹho lọ go. Doayi apajlẹ yẹwhegán Natani tọn go.

7. Etẹwẹ a plọn sọn apajlẹ yẹwhegán Natani tọn mẹ?

⁷ Whenue Ahọlu Davidi to hodọ hẹ yẹwhegán Natani, e dọ dọ emi jlo na gbá tẹmpli de na Jehovah. Natani na ẹn ayinamẹ to afọdopolọji nado wàmọ. Amọ́, Natani dona ko yiagbọji bo kanhose Jehovah whẹ́. Etẹwutu? Na Jehovah ma jlo dọ Davidi ni gbá tẹmpli lọ wutu. (1 Otàn. 17:1-4) Dile nujijọ ehe dohia do, whenue yè biọ to mí si nado na ayinamẹ, mí nọ do nuyọnẹn hia eyin mí “whleawu nado dọho.”—Jak. 1:19.

8. Whẹwhinwhẹ́n devo tẹwẹ mí tindo nado nọ nọ̀ aṣeji whenue mí jlo na na ayinamẹ?

⁸ Lẹnnupọndo whẹwhinwhẹ́n devo ji he wutu mí dona to aṣeji whenue mí jlo na na ayinamẹ mẹde: E gán yin owhẹ̀ mítọn ga eyin ayinamẹ he mí na zọ́n bọ mẹde basi nudide he hẹn kọdetọn ylankan lẹ wá na ẹn. Matin ayihaawe, mí do whẹwhinwhẹ́n dagbe nado yí sọwhiwhe do lẹnnupọn whẹpo do na ayinamẹ.

AYINAMẸ NINA TO WHENUE YÈ MA BIỌ TO MÍ SI

9. Nujikudo tẹwẹ mẹho lẹ dona tindo whẹpo do na ayinamẹ? (Galatianu lẹ 6:1)

⁹ Sọn ojlẹ de mẹ jẹ devo mẹ, mẹho lẹ dona nọ ze afọdide tintan nado na ayinamẹ mẹmẹsunnu kavi mẹmẹyọnnu he ko ṣì “afọ ze” de. (Hia Galatianu lẹ 6:1.) Mẹde gán to nudide nulú tọn delẹ basi, ehe gán zọ́n bọ e na wá jai jẹ ylando sinsinyẹn mẹ. Yanwle mẹho lẹ tọn wẹ nado gọalọna mẹlọ nado gbọṣi ali he nọ planmẹ yì ogbẹ̀ madopodo mẹ lọ ji. (Jak. 5:19, 20) Amọ́ eyin ayinamẹ yetọn na do kọdetọn dagbe, yé dona ko hẹn ẹn diun whẹ́ dọ mẹlọ ṣì afọ ze nugbonugbo. Jehovah na dotẹnmẹ mímẹpo nado nọ basi nudide lẹ sinai do ayihadawhẹnamẹnu mítọn ji. (Lom. 14:1-4) Amọ́, etẹwẹ lo eyin mẹmẹsunnu de ko ṣì afọ ze nugbonugbo bọ mẹho lẹ ko basi dide nado na ẹn ayinamẹ delẹ?

10-12. Whenue mẹho lẹ to ayinamẹ he yè ma biọ to yé si de na, etẹwẹ yé dona wà? Na apajlẹ. (Sọ pọ́n yẹdide lọ lẹ.)

¹⁰ Avùnnukundiọsọmẹnu de wẹ e nọ yin na mẹho lẹ nado na ayinamẹ mẹde whenue mẹlọ ma biọ to yé si nado wàmọ. Etẹwutu? Apọsteli Paulu dọ dọ mẹde gán ko ṣì afọ ze whẹpo do wá yọnẹn. Enẹwutu jẹnukọn whẹ́, mẹho lẹ dona ko jla aimẹ do, na mẹlọ nido kẹalọyi ayinamẹ lọ.

¹¹ Ayinamẹ he yè ma biọ to mẹsi nado na de gán taidi tintẹnpọn nado do jinukun do aigba he sinyẹn de ji. Whẹpo glesi de do nọ do jinukun, e nọ jlo aigba lọ whẹ́. Ehe nọ zọ́n bọ aigba lọ nọ bọ̀ bo nọ to ninọmẹ dagbe mẹ bọ yè gán donú deji. Enẹgodo, glesi lọ nọ do jinukun etọn. Gbọngodo, e nọ húsinna jinukun lọ, na e nido whẹ́n. Mọdopolọ, whẹpo mẹho agun tọn de nido na ayinamẹ he ma yin bibiọ sọn e si de, to linlẹn de mẹ, e na wà dagbe nado wleawudaina aigba lọ. Di apajlẹ, whenue ojlẹ sọ̀ nado dọho, mẹho lọ na hẹn mẹmẹsunnu lọ deji dọ onú etọn nọ duahunmẹna emi taun. Eyin ayinamẹtọ lọ yin yinyọnẹn taidi mẹde he nọ do owanyi po homẹdagbe po hia, e na bọawuna mẹdevo lẹ dogọ nado kẹalọyi ayinamẹ etọn.

¹² To hodọdopọ lọ whenu, mẹho lọ gán zindonukọn nado hẹn aigba lọ bọ̀, eyin e flinnu mẹlọ dọ mẹlẹpo wẹ nọ ṣinuwa bo do hudo ayinamẹ tọn sọn ojlẹ de mẹ jẹ devo mẹ. (Lom. 3:23) Po ogbè fifá po gọna sisi sisosiso, mẹho lọ na yí Owe-wiwe lẹ zan nado dohia ẹ to aliho he họnwun mẹ lehe e ko ṣì afọ ze do. Tlolo he mẹmẹsunnu lọ kẹalọyi dọ emi ko ṣinuwa, mẹho lọ na “do jinukun lọ” eyin e yí hogbe he bọawu lẹ zan nado basi zẹẹmẹ nuhe e dona wà nado dovivẹnu bo jla ninọmẹ lọ do tọn na ẹn. Gbọngodo, mẹho lọ na “húsinna” jinukun lọ gbọn mẹmẹsunnu lọ pipà sọn ahun mẹ wá po dẹ̀hiho hẹ ẹ po dali.—Jak. 5:15.

13. Nawẹ mẹho lẹ gán kudeji gbọn dọ mẹlọ mọnukunnujẹ ayinamẹ lọ mẹ?

¹³ To whedelẹnu, nuhe dọ ayinamẹtọ lọ te nọ gbọnvona nuhe sè mẹhe to ayinamẹ mọyi lọ te. Etẹwẹ gán gọalọna mẹho lẹ nado nọ dapana enẹ? Yé gán nọ yí sisi do kàn kanbiọ mẹhẹnlẹnnupọn tọn lẹ sè nado vọ́ zinnudo nuagokun tangan lẹ ji. (Yẹwh. 12:11) Gblọndo lọ lẹ na gọalọna ayinamẹtọ lọ nado kudeji dọ mẹlọ mọnukunnujẹ ayinamẹ he yin nina ẹn lọ mẹ.

AYINAMẸ NINA TO OJLẸ HE SỌGBE MẸ PODỌ TO ALIHO HE SỌGBE MẸ

14. Be mí dona nọ na ayinamẹ whenue mí to homẹgble ji wẹ ya? Basi zẹẹmẹ.

¹⁴ Mapenọ wẹ mímẹpo, enẹwutu mí nọ dọ kavi wà nudelẹ he nọ gblehomẹna mẹdevo lẹ. (Kol. 3:13) Ohó Jiwheyẹwhe tọn kọngbedopọ dọ to whedelẹnu mí tlẹ gán hẹn homẹgble ode awetọ sinsinyẹn. (Efe. 4:26) Amọ́, mí dona nọavùnte sọta ojlo lọ nado na ayinamẹ to whenue mí to homẹgble ji. Etẹwutu? Na “homẹgble gbẹtọ tọn ma nọ hẹn dodowiwa Jiwheyẹwhe tọn di” wutu. (Jak. 1:20) Eyin mí na ayinamẹ whenue mí to homẹgble ji, mí gán jei ovi tẹ́ gbé bo yì fọ́n-vi. Ehe ma zẹẹmẹdo dọ mí ma dona dọ linlẹn po numọtolanmẹ mítọn lẹ po tọ́n gbede na mẹhe hẹn homẹgble mí lọ gba. Amọ́, mí gán dọho hẹ mẹlọ po kọdetọn dagbe po dogọ eyin mí nọte jẹ whenue mí masọ to homẹgble ji. Doayi apajlẹ dagbe he ayinamẹtọ nugbonọ Jobu tọn, yèdọ Elihu zedai go.

15. Etẹwẹ mí plọn sọn apajlẹ Elihu tọn mẹ? (Sọ pọ́n yẹdide lọ.)

¹⁵ Elihu yí azán delẹ zan nado dotoaina Jobu dile e to avùnlọ yí na ede sọta whẹsadokọnamẹ homẹmiọnnamẹtọ lalo etọn lẹ tọn. Elihu do awuvẹmẹ hia Jobu. Amọ́ Elihu sọ gblehomẹ, na Jobu dọho agọ̀ lẹ gando Jehovah go bosọ dọ̀n ayidonugo wá ede ji glanglan wutu. Etlẹ yin to ojlẹ enẹ mẹ, Elihu nọte kakajẹ whenue ohó jẹ e ji, podọ e yí walọmimiọn po sisi sisosiso po do dọho whenue e to ayinamẹ na Jobu. (Jobu 32:2; 33:1-7) Apajlẹ Elihu tọn plọn mí nugbo titengbe de: E nọ yọ́n hugan nado namẹ ayinamẹ to ojlẹ he sọgbe mẹ podọ to aliho dagbe he do sisi po owanyi po hia mẹ.—Yẹwh. 3:1, 7.

ZINDONUKỌN NADO NỌ NAMẸ AYINAMẸ BOSỌ NỌ KẸALỌYI I

16. Etẹwẹ a plọn sọn Salmu lẹ 32:8 mẹ?

¹⁶ Wefọ he ji hosọ ehe sinai do dọ dọ ‘Jehovah nọ ze nukun etọn do mí ji bo nọ na mí ayinamẹ.’ (Hia Salmu lẹ 32:8.) Ehe dohia dọ e nọ to alọgọna mí zọnmii. E ma nọ na mí ayinamẹ lẹ poun, amọ́ e sọ nọ gọalọna mí nado yí yé do yizan mẹ. Apajlẹ dagbe nankọ die na mílọsu! Eyin mí do lẹblanulọkẹyi lọ nado na ayinamẹ mẹdevo lẹ, mì gbọ mí ni nọ hodo apajlẹ Jehovah tọn bo nọ ze nukun mítọn lẹ do yé ji nado na yé tuli dile mí penugo do bo gọalọna yé na e nido pà yé.

17. Whenue mẹho lẹ na ayinamẹ tangan he sinai do Biblu ji lẹ, etẹwẹ yé nọ do yede hia nado yin? Basi zẹẹmẹ. (Isaia 32:1, 2)

¹⁷ Todin hugan gbede pọ́n, mí dona na ayinamẹ dagbe lẹ bosọ mọ yé yí. (2 Tim. 3:1) Mẹho agun tọn he nọ na ayinamẹ tangan he sinai do Biblu ji lẹ nọ “taidi asisa osin tọn lẹ to aigba húhú de ji.” (Hia Isaia 32:1, 2.) Họntọn he yọ́n nuhe otó mítọn jlo na sè, amọ́ bo ka nọ dọ nuhe mí dona sè na mí lẹ nọ na mí nunina họakuẹ de he taidi “atin-sinsẹ́n pọmu sika tọn to núzinzan fataka tọn mẹ.” (Howh. 25:11) Mì gbọ mímẹpo ni zindonukọn nado wleawuna nuyọnẹn he mí do hudo etọn nado nọ namẹ ayinamẹ dagbe lẹ bosọ nọ mọ yé yí.