KANBIỌ HE JỌJA LẸ NỌ KANSE
Be N’Dona Jo Wehọmẹ Do Wẹ Ya?
“N’ma yiwanna wehọmẹ-yìyì!” Eyin nuhe a nọ lẹn niyẹn, a gán jlo nado do wehọmẹ yìyì te. Hosọ ehe na gọalọna we nado bayi nudide dagbe lẹ.
Nuhewutu mẹdelẹ nọ jo wehọmẹ-yìyì do
Pọ́n whẹwhinwhẹ́n he bọdego he mẹplọntọ delẹ na:
E nọ vẹawu nado plọnnu. ‘Azọ́n ma wà ganji ṣie to wehọmẹ fọ́n bo doyi.’
Ojlo matindo. ‘N’ma mọ nujọnu de to nuhe plọn n’te lẹ mẹ.’
Akuẹ mimọ vẹawu. ‘N’dona wazọ́n nado gọalọna whẹndo ṣie.’
Lẹnnupọndo nue wehọmẹ jijodo towe na hẹnwa ji
Biblu dọmọ: “Zinzintọ nọ lẹnnupọndo afọdide dopodopo ji.” (Howhinwhẹn lẹ 14:15) Etẹ enẹ plọnwe? Eyin a to linlẹn nado jo wehọmẹ do, lẹnnupọndo nue enẹ na hẹnwa ji.
Kanse dewe dọ:
‘Eyin n’jo wehọmẹ do, be e na bọawuna mi nado mọ azọ́n dagbe de to sọgodo ya?
“Yọnẹn dọ a na do hudo agbasazọ́n tọn, podọ e yọnbayi dọ a na wá penukundo whẹndo go to gbèdopo. Na e na pà we gbọn, eyin mẹyidoazọ́nmẹtọ lẹ nọ biọ e whè gbau gbedewema wehọmẹ daho tọn?”—Julia.
‘Eyin n’jo wehọmẹ do, be e na bọawuna mi nado pehẹ ninọmẹ sinsinyẹn lẹ to sọgodo ya?’
“Wehọmẹ nọ plọnazọ́n mẹ nado duto nuhe a na wá pehẹ to gbẹ̀mẹ lẹ ji. To nukọn mẹ, mẹhe a na dukosọ hẹ lẹ, whlepọn he a na pehẹ lẹ po azọ́n he a na wà po na taidi nuhe nkọ a pehẹ to wehọmẹ.”—Daniel.
‘Eyin n’jo wehọmẹ do, be n’na do nugopipe he sin hudo n’na do whenue n’whẹ́n mẹho ya?’
“A sọgan mọdọ nuhe plọn a te todin to wehọmẹ lẹ ma yin dandan, amọ́ whenue a do owhe 23 bo nọ penugo nado penukundo akuẹzinzan towe lẹ go, ‘e na vivi na we dọ a plọnnu ganji gando nulinlẹn go to wehọmẹ.’”—Anna.
Afọdide dagbe hugan he a gán ze
Biọ alọgọ. Biblu dọ dọ: “Gbọn ayinamẹtọ susu gblamẹ wẹ kọdetọn dagbe nọ tin.” (Howhinwhẹn lẹ 11:14) Eyin a ma to azọ́nwa ganji to wehọmẹ, biọ alọgọ mẹjitọ, mẹplọntọ, ayinamẹtọ kavi mẹho he go a dejido de tọn nado mọ ayinamẹ lẹ yí gando lehe a na yinukọn do go.
“Dọho hẹ mẹplọntọ towe gando lee nulẹ to awuvẹ na we do go. Whedelẹnu a gán nọ lẹndọ mẹplọntọ towe wẹ zọ́n bọ a ma to nukọnyi to wehọmẹ, amọ́ eyin yè biọ alọgọ, ninọmẹ lọ sọgan pọnte.”—Edward.
Lẹnnupọndo ninọmẹ lọ pete ji. Biblu dọ dọ: “Opodo whẹho de tọn pọnte hú bẹjẹeji etọn.” (Yẹwhehodọtọ 7:8) Whenue a fó wehọmẹ, a na ko tindo jẹhẹnu po nugopipe he zẹ̀ nuhe a plọn to wehọmẹ lẹ po go.
“E gán nọma biọ dọ a ni bayi tẹnpọn wehọmẹ tọn lẹ whenue a ko whẹ́n mẹho, amọ́ lehe a pehẹ apọṣimẹ do to wehọmẹ na wá gọalọna we whenue a pehẹ nuhahun gbẹ̀mẹ tọn lẹ to wehọmẹ fifo godo.”—Vera.
Wehọmẹ jijodo taidi yè ni tọ́n sọn tọjihun de mẹ whẹpo e nido glin; e gán wá vẹna we dọ a ma gbọṣi tọjihun lọ mẹ!
Lẹnnupọndo nudide towe lẹ ji. Biblu dọ dọ: “Mẹhe ma nọ whesọ lẹpo wẹ na biọ ohẹ́n mẹ dandan.” (Howhinwhẹn lẹ 21:5) Ma yawu wá gbèta lọ kọ̀n dọ, wehọmẹ jijodo wẹ yin onú dopo gee he emi gán wà blo. A gán wá dotana wepinplọn towe gbọn Intẹnẹt ji kavi mẹhe nọ plọnnumẹ to whégbè lẹ dè.
“Wehọmẹ-yìyì nọ plọnmẹ azọ́n sinsinyẹn wiwà gọna lehe yè na didẹ nuhahun lẹ bo nọ kọngbedopọ hẹ mẹdevo lẹ do. Ale he yè nọ mọyi lẹ nọ dẹn-to-aimẹ. Tuklajijẹ nado fó wehọmẹ ma nọ yin to ovọ́ mẹ.”—Benjamin.
Nuagokun lọ die: Eyin a fó wehọmẹ, a na ko plọn nususu he na gọalọna we to gbẹ̀mẹ.