Be Mẹde Sọgan Yọ́n Mẹhe Kàn Biblu Taun Ya?

Gblọndo Biblu tọn

Yè nọ dọna mẹsusu dọ mí ma sọgan yọ́n mẹhe kàn Biblu taun. Ṣigba, Biblu nọ saba do mẹhe kàn owe ehe dai lẹ hia hezeheze. Di apajlẹ, adà delẹ nọ bẹjẹeji po hogbe delẹ po taidi, ‘ohó Nẹhemia tọn,’ “numimọ Isaia tọn,” podọ ‘ohó OKLUNỌ tọn he wá jẹ Joẹli dè.’​—Nẹhemia 1:1; Isaia 1:1; Joẹli 1:1.

Suhugan Biblu-kantọ lẹ tọn wẹ yigbe dọ oyín Jehovah, Jiwheyẹwhe nugbo dopo lọ tọn mẹ wẹ yé basi kandai lọ lẹ te podọ ewọ wẹ deanana yé. Yẹwhegán he kàn owe Heblu tọn lẹ lá hugan whla 300 dọmọ: “Lehe wẹ OKLUNỌ dọ.” (Amọsi 1:3; Mika 2:3; Nahumi 1:12) Biblu-kantọ devo lẹ mọ owẹ̀n Jiwheyẹwhe tọn yí gbọn angẹli lẹ gblamẹ.​—Zekalia 1:7, 9.

Nudi gbẹtọ 40 wẹ kàn Biblu na owhe 1 600. Sunnu delẹ yin yiyizan nado kàn hugan owe Biblu tọn dopo. Na nugbo tọn, Biblu yin wesẹdotẹn kleun owe 66 tọn. E bẹ owe 39 Owe-wiwe Heblu tọn lẹ tọn he mẹsusu nọ ylọdọ Alẹnu Hoho podọ owe 27 Owe-wiwe Glẹki tọn lẹ tọn he nọ saba yin yiylọdọ Alẹnu Yọyọ hẹn.