Naegbọn Mí Do Nọ Kú?

Gblọndo Biblu tọn

Nuhewutu gbẹtọ do nọ kú nọ paṣa mí, titengbe to whenue mẹyiwanna mítọn de kú. Biblu dọmọ: “Ylando wẹ adí he nọ hẹn okú wá.”​—1 Kọlintinu lẹ 15:56.

Naegbọn mẹlẹpo do nọ waylando bo nọ kú?

Adam po Evi po, he yin gbẹtọvi tintan lẹ kú, na yé waylando sọta Jiwheyẹwhe wutu. (Jenẹsisi 3:17-19) Kọdetọn dopo gee lọ he atẹṣiṣi yetọn sọta Jiwheyẹwhe hẹnwa wẹ okú, na ewọ dè wẹ “asisa ogbẹ̀ tọn” te.​—Salmu lẹ 36:9; Jenẹsisi 2:17.

Adam hẹn kọdetọn ylando tọn plá ovi etọn lẹpo. Biblu dọmọ: “Ylando gbọn mẹdopo gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè, na yemẹpo wẹ ko waylando wutu.” (Lomunu lẹ 5:12) Mẹlẹpo wẹ nọ kú, na yemẹpo wẹ waylando wutu.​—Lomunu lẹ 3:23.

Lehe okú na yin didesẹ gbọn

Jiwheyẹwhe dopagbe ojlẹ de tọn whenue “ewọ na ze okú mì kakadoi.” (Isaia 25:8) Nado de okú sẹ̀, ewọ dona de nuhe nọ hẹn ẹn wá sẹ̀, enẹ wẹ ylando. Jiwheyẹwhe na wà ehe gbọn Jesu Klisti gblamẹ, mẹhe “ze ylando aihọn tọn yì.”​—Johanu 1:29; 1 Johanu 1:7.