Naegbọn Kunnudetọ Jehovah Tọn lẹ Ma Nọ Dù Jijizan?
Kunnudetọ Jehovah tọn lẹ ma nọ dù jijizan na yé yise dọ hùnwhẹ enẹlẹ ma nọ hẹn homẹ Jiwheyẹwhe tọn hùn wutu. Dile etlẹ yindọ Biblu ma dosẹ́n jijizan dùdù tọn tlọlọ, e gọalọna mí nado lẹnnupọndo onú titengbe delẹ ji podọ nado yọ́n pọndohlan Jiwheyẹwhe tọn gando jijizan dùdù go. Lẹnnupọndo onú ẹnẹ delẹ po nubiọtomẹsi Biblu tọn he gando yé go lẹ po ji.
Hùnwhẹ jijizan dùdù tọn lẹ wá sọn aṣa kosi lẹ tọn mẹ. Sọgbe hẹ owe lọ Funk & Wagnalls Standard Dictionary of Folklore, Mythology, and Legend, hùnwhẹ ehelẹ wá sọn nuyise lọ mẹ dọ to jijizan mẹde tọn gbè, “gbigbọ aovi lẹ tọn nọ tindo dotẹnmẹ hundote lọ nado yangbé mẹhe to hùnwhẹ lọ basi lẹ tọn,” podọ “họntọn he to finẹ lẹ gọna obiọ ota dagbe tọn lẹ nọ basi hihọ́na mẹhe to jijizan dù lọ.” Owe lọ The Lore of Birthdays (Oklọ Jijizan Tọn) dohia dọ to hohowhenu, kandai jijizan tọn lẹ “yin onú titengbe na awuwlena ohia dọṣẹ tọn de” ehe nọ sinai do “dodinnanu dabla sunwhlẹvu pinpọn tọn ji.” Owe ehe yidogọ dọ “nuyise he gbayipe lọ wẹ yindọ vẹla he nọ yin yiyizan na jijizan lẹ tindo huhlọn jiawu nado hẹn obiọ ota dagbe tọn lẹ ṣẹ.”
Ṣigba, Biblu jẹagọdo bojijlẹ, dọṣẹdidọ, afinyọnnuwiwa kavi onú mọnkọtọn lẹ. (Deutelonomi 18:14; Galatianu lẹ 5:19-21) Na taun tọn, dopo to whẹwhinwhẹ́n he wutu Jiwheyẹwhe do gblewhẹdo tòdaho Babilọni hohowhenu tọn lẹ mẹ wẹ yindọ tòmẹnu etọn lẹ nọ tindo mahẹ to sunwhlẹvu pinpọn mẹ, ehe yin dọṣẹdidọ wunmẹ de. (Isaia 47:11-15) Kunnudetọ Jehovah tọn lẹ ma nọ to nulẹnpọn mapote do dodonu aṣa dopodopo tọn ji; etomọṣo eyin nuhe Owe-wiwe lẹ dọ gando aṣa de go họnwun, mí ma nọ miọnnukundo e.
Klistiani dowhenu tọn lẹ ma nọ dù jijizan. Owe de basi zẹẹmẹ dọ Klistiani dowhenu tọn lẹ “nọ pọ́n hùnwhẹ jijizan tọn bibasi hlan taidi aṣa kosi tọn de.” (The World Book Encyclopedia) Biblu dohia dọ apọsteli lẹ po mẹdevo he yin pinplọn tlọlọ gbọn Jesu dali lẹ po ze apajlẹ de dai he Klistiani lẹpo dona nọ hodo.—2 Tẹsalonikanu lẹ 3:6.
Hùnwhẹ dopo gee he yin bibiọ to Klistiani lẹ si nado nọ basi ma gando jijizan de go, ṣigba e gando okúzán de go—okúzán Jesu tọn. (Luku 22:17-20) Ehe ma dona paṣa mí, na Biblu dọ dọ “okúzán [yọ́n] hú gbeegbe yè ji omẹ.” (Yẹwhehodọtọ 7:1) Whẹpo Jesu do kú, e ko basi oyín dagbe de to Jiwheyẹwhe dè, podọ ehe zọ́n bọ okúzán etọn yọ́n hú gbeegbe yè ji i.—Heblu lẹ 1:4.
Biblu ma donù Jiwheyẹwhe sẹ̀ntọ depope go he dù jijizan. Ehe ma yin jiwinwọn, na Biblu donù hùnwhẹ jijizan tọn awe go he yin bibasi gbọn mẹhe ma nọ sẹ̀n Jiwheyẹwhe lẹ dali. Ṣigba, Biblu ma dọho dagbe gando nujijọ awe enẹlẹ depope go.—Gẹnẹsisi 40:20-22; Malku 6:21-29.
Be ovi Kunnudetọ lẹ tọn nọ mọdọ nude gbọ emi go na yé ma nọ dù jijizan lẹ wutu wẹ ya?
Taidi mẹjitọ dagbe depope, Kunnudetọ lẹ nọ do owanyi hia ovi yetọn lẹ to owhe lọ blebu gblamẹ, bo tlẹ nọ nanú yé bosọ nọ basi tito nuwiwa ayajẹ tọn lẹ tọn hẹ yé. Yé nọ dovivẹnu nado hodo apajlẹ pipé Jiwheyẹwhe tọn, mẹhe ma nọ whleawu nado nanú dagbe lẹ ovi etọn lẹ. (Matiu 7:11) Ovi Kunnudetọ lẹ tọn ma nọ mọdọ nude gbọ emi go dile ohó ovi he bọdego lẹ tọn dohia do:
“Homẹ mẹtọn nọ hùn hugan eyin yè mọ nunina de yí to whenue yè ma donukun etọn.”—Tammy, owhe 12.
“Dile etlẹ yindọ mẹjitọ ṣie lẹ ma nọ nanú mi to jijizan ṣie gbè, yé nọ wàmọ to ojlẹ devo lẹ mẹ. N’nọ yiwanna enẹ, na n’ma nọ donukun in paali.”—Gregory, owhe 11.
“Yè ni zan nukunwhiwhe kleun delẹ bo dù gâteaux pẹẹde bo jihàn awe de, be ayajijẹ niyẹn a? Wá whé ṣie gbè bo wá pọ́n nue yè nọ ylọdọ ayajijẹ!”—Eric, owhe 6.