Nunina Kọgbọ Tọn to Ojlẹ Azọ̀nylankan Lẹdo Aihọn Pé Tọn Mẹ

To mars 2020, whenue Pipli He Nọ Penukundo Agbasalilo Go Lẹdo Aihọn Pé (OMS) ylọ COVID-19 dọ azọ̀nylankan lẹdo aihọn pé de, mẹsusu ma na ko lẹndọ azọ̀n ehe na nọ aimẹ hugan owhe dopo. Azọ̀n lọ ko zọ́n bọ gbẹtọ livi susu lẹ kakajẹ Kunnudetọ Jehovah tọn delẹ ji, ko jiya to agbasa-liho, numọtolanmẹ-liho podọ to akuẹzinzan-liho. Tito tẹwẹ Kunnudetọ Jehovah tọn lẹ bayi nado hẹn kọgbọ wá to ojlẹ nugbajẹmẹji tọn ehe mẹ?

Nunina Kọgbọ Tọn lẹ Na Mẹhe Do Hudo Lẹ

To anademẹ Wedegbẹ́ Anadenanutọ tọn Hagbẹ Anademẹtọ Kunnudetọ Jehovah tọn lẹ tọn glọ, nuhe hugan Wedegbẹ́ Kọgbọ tọn 950 wẹ yin didoai lẹdo aihọn pé na azọ̀n COVID-19 tọn wutu. To ninọmẹ delẹ mẹ, Kunnudetọ he to lẹdo delẹ mẹ gọalọna ode awetọ, amọ́ to ninọmẹ devo lẹ mẹ, yé mọ alọgọ tohọluduta lẹ tọn yí. Wedegbẹ́ Kọgbọ tọn sọ dovivẹnu nado má nunina kọgbọ tọn lẹ to fisusu.

Di apajlẹ, pọ́n ninọmẹ ehe to Paraguay. Linlinwe de dọ dọ na nuhahun akuẹzinzan tọn he azọ̀nylankan lọ hẹnwa wutu, “mẹsusu to Paraguay wẹ nọ dọ́ huvẹ.” Amọ́, Wedegbẹ́ Kọgbọ tọn he yin didoai to Paraguay, ko jẹ koli he bẹ nuhe yè na zan na osẹ awe hẹn lẹ má ji, enẹ wẹ núdùdù, nuyizan wiwejininọ tọn lẹ po nudevo he whẹndo he bẹ omẹ ẹnẹ hẹn de gán zan lẹ po. Nuhe to koli dopodopo mẹ na sọ 16 000F CFA linlán (Dọla Amelika tọn 30).

Nawẹ mẹhe to azọ́n kọgbọ tọn wà ehelẹ nọ basi hihọ́na yede po mẹdevo lẹ po gbọn ma nado bẹ COVID-19? Yé nọ ṣinyọnnudo awọntin bosọ nọ nọla na ode awetọ. Yé sọ nọ dindona nado yọnẹn eyin azọ́nwhé he nọ sà núdùdù na yé lẹ nọ wleawuna núdùdù lọ to fihe to wiweji de bo ka sọ nọ hodo osẹ́n hihọ́ tọn lẹ. Ehe zẹẹmẹdo dọ, yé ni hẹn ẹn diun dọ mẹhe to agbàn do dó koli lọ lẹ mẹ lẹpo ni nọ do nuhe na bayi hihọ́na mẹlẹ, nado nọ súnsún kẹkẹ kavi mọto yetọn lẹ ganji, podọ nado nọ bẹ koli lọ lẹ do fihe yè ko súnsún nado hù aṣẹ na wánvú lọ. Gbọnvona onú enẹlẹ, mẹhe nọ wá má koli lọ lẹ na mẹmẹsunnu lẹ nọ tẹnpọn nado nọla na yé.

Nunina lẹ Yiyizan po Nuyọnẹn Po

Kakajẹ janvier 2021, Wedegbẹ́ Anadenanutọ tọn ko nagbè nado zan nuhe hugan 13 650 000 000F CFA (Dọla Amelika tọn livi 25) na nunina kọgbọ tọn. Alahọ po Wedegbẹ́ Kọgbọ tọn lẹ po nọ yí nunina ehelẹ zan po sọwhiwhe po bosọ nọ dovivẹnu nado deahi na nuhe yé jlo na họ̀ lẹ ganji. Di apajlẹ to Chili, mẹmẹsunnu he to tito bayi na azọ́n kọgbọ tọn lẹ jlo na họ̀ ayìví wunmẹ de he nọ yin apàkún kilo 750. Amọ́, apàkún lọ ko yíkuẹ donu awe todin hugan akuẹ he yè do sà to osun he wayi mẹ. Gànhiho awe to whenue yé ko yigbe nado họ̀ apàkún lọ po akuẹ vivẹ́ po godo, nusàtọ lọ dọna mẹmẹsunnu lẹ dọ nuhọ̀tọ devo wá gọ̀ apàkún he e ko họ̀ dai jo. Enẹwutu, kakati nusàtọ lọ nido sà ẹ yin akuẹ he yè do to sisà todin lọ, e sà apàkún he yè gọ̀ jo lọ na mẹmẹsunnu mítọn lẹ yin akuẹ he yè do sà ẹ to osun he wayi mẹ!

Amọ́, whenue mẹmẹsunnu mítọn lẹ wá nado ze apàkún lọ, nusàtọ lọ masọ jlo na sà ẹ na yé ba bo sawhẹ dokọna yé dọ yé to núdùdù má to aliho he ma sọgbe mẹ dile titobasinanu devo lẹ to wiwà do. To odẹ̀ kleun de hihò do homẹ godo, mẹmẹsunnu mítọn dopo basi zẹẹmẹ na nusàtọ lọ dọ yè ko dindona to agun dopodopo mẹ nado yọ́n mẹhe do hudo nugbonugbo lẹ. Mẹmẹsunnu lẹ sọ basi zẹẹmẹ dọ akọ̀ voovo mẹ wẹ mẹhe jlo na mọ nunina lọ lẹ yí wá sọn, enẹwutu yé dona pọ́n nuhe na wà dagbe na whẹndo he jlo na mọ koli lọ lẹ yí. Podọ to enẹgodo, yé hẹn nusàtọ lọ deji dọ akuẹ po azọ́n sinsinyẹn he nọ yin wiwà do Kunnudetọ Jehovah tọn lẹ tamẹ lẹpo po nọ yin bibasi sọn ojlo mẹ wẹ. Ehe jiawu na ẹn taun. E ma yindọ nusàtọ lọ yigbe nado de akuẹ lọ pò kẹdẹ wẹ gba, ṣigba e sọ basi nunina apàkún kilo 400 tọn na mẹmẹsunnu lẹ whenue yé wá họ̀nù to whedevonu.

“Kunnudenu de Dọ Yé Yiwanna Ode Awetọ Nugbo”

To Libéria, asuṣiọsi mẹhomẹ de he nọ yin Lusu nọ nọpọ́ hẹ whẹndo he bẹ omẹ atọ́n hẹn. To whenue yé bayi tẹsi bo dù núdùdù afọnnu tọn godo, ovivi etọn sunnu he do owhe ṣinawe doayi e go dọ yé masọ do núdùdù de to whégbè ba. Ovi lọ kanse dọ, “Etẹwẹ mí na dù?” Lusu dọna ẹn dọ emi ko hodẹ̀ bo biọ alọgọ podọ emi deji dọ Jehovah na wleawu nude tọn na yé. To whèmẹ to gbenẹgbe, Mẹho agun tọn Lusu tọn lẹ ylọ ẹ to alokan ji bo dọna ẹn nado wá ze núdùdù delẹ. E dọmọ: “Ovivi ṣie lọ dọ dọ emi yọnẹn todin dọ Jehovah gán sè odẹ̀, na Jehovah na gblọndo odẹ̀ ṣie tọn.”

Nawe de to République démocratique du Congo nọ nọ̀ fidopo lọ po whẹndo Kunnudetọ lẹ tọn de po. To whenue e mọdọ whẹndo lọ mọ núdùdù yí sọn yisenọ hatọ yetọn lẹ dè godo, nawe lọ dọ dọ, “To azọ̀nylankan lọ godo, mí na lẹzun Kunnudetọ Jehovah tọn lẹ, na yé ko penukundo mẹmẹsunnu po mẹmẹyọnnu yetọn lẹ po go to ojlẹ sinsinyẹn ehe mẹ.” Asu etọn kanse e dọ, “Be a jlo na lẹzun Kunnudetọ Jehovah tọn na lẹsi atì dopo poun wutu wẹ ya?” Yọnnu lọ gblọn dọ, “Eyeo e ma yinmọ, amọ́ lẹsi atì dopo enẹ yin kunnudenu de dọ yé yiwanna ode awetọ nugbo.”

Kunnudetọ Jehovah tọn lẹ penugo nado yawu sudo nuhudo mẹmẹsunnu po mẹmẹyọnnu mítọn lẹ po tọn to ojlẹ azọ̀nylankan lẹdo aihọn pé tọn ehe mẹ na alọtútlú mìtọn wutu. Mì wanu taun na nunina he mì nọ bayi gbọn donate.jw.org gblamẹ lẹ ji.