Mí Gán Hẹn Odẹ̀ Mítọn lẹ Pọnte Dogọ

1. Etẹwẹ Jehovah biọ to sinsẹ̀n-basitọ etọn lẹ si nado wà? (Sọ pọ́n yẹdide lọ.)

MẸNU dè wẹ mí gán lẹhlan whenue mí do hudo homẹmiọnnamẹ po anademẹ po tọn? Mí yọ́n gblọndo kanbiọ enẹ tọn. Mí gán hodẹ̀ hlan Jehovah Jiwheyẹwhe. Nuhe ewọ biọ to mí si nado nọ wà lọ pẹẹ niyẹn. Jehovah jlo dọ mí ni nọ hodẹ̀ whẹwhẹ, yèdọ nado “nọ hodẹ̀ to whepoponu.” (1 Tẹs. 5:17) Mí gán voawu bo hodẹ̀ hlan ẹn bosọ nọ dín anademẹ etọn to adà gbẹzan mítọn tọn lẹpo mẹ. (Howh. 3:5, 6) Na Jehovah yin Jiwheyẹwhe alọtlútọ de wutu, e ma ze dogbó de dai gando whla nẹmu he mí gán hodẹ̀ hlan ẹn go.

2. Etẹwẹ mí na gbadopọnna to hosọ ehe mẹ?

² Mí nọ yọ́n pinpẹn nunina dẹ̀hiho tọn. Amọ́, na alọnu mítọn nọ ján wutu, e gán nọ vẹawuna mí nado mọ whenu na dẹ̀hiho. Mí gán sọ mọdọ e biọ dọ mí ni hẹn odẹ̀ mítọn lẹ pọnte dogọ. Mí dopẹ́ dọ mí gán mọ tulinamẹ po anademẹ susu lẹ po to Owe-wiwe lẹ mẹ. To hosọ ehe mẹ, mí na gbadopọnna nuhe mí gán plọn sọn Jesu dè na nuhe dù lehe mí gán nọ de whenu dovo nado hodẹ̀ do. Mí nasọ dọhodo lehe mí gán hẹn odẹ̀ mítọn lẹ pọnte dogọ do ji eyin mí nọ donù onú titengbe atọ́n delẹ go.

JESU NỌ DE WHENU DOVO NADO HODẸ̀

3. Etẹwẹ Jesu yọnẹn gando odẹ̀ go?

³ Jesu yọnẹn dọ odẹ̀ mítọn lẹ nọ họakuẹ taun to nukun Jehovah tọn mẹ. Ojlẹ dindẹn whẹpo e do wá aigba ji, e mọ bọ Otọ́ etọn na gblọndo odẹ̀ sunnu po yọnnu nugbonọ lẹ po tọn. Di apajlẹ, Jesu to apá na Otọ́ etọn whenue e na gblọndo na odẹ̀ ahundopo tọn Hanna, Davidi, Elija po nugbonọ devo lẹ po tọn lẹ. (1 Sam. 1:10, 11, 20; 1 Ahọ. 19:4-6; Salm. 32:5) Abajọ Jesu plọn devi etọn lẹ nado nọ hodẹ̀ whẹwhẹ po jidide po!—Mat. 7:7-11.

4. Etẹwẹ mí plọn sọn odẹ̀ Jesu tọn lẹ mẹ?

⁴ Jesu ze apajlẹ dai na devi etọn lẹ to odẹ̀ he ewọ lọsu hò hlan Jehovah lẹ mẹ. To lizọnyizọn etọn blebu whenu, Jesu nọ hodẹ̀ whẹwhẹ. E dona de whenu dovo nado hodẹ̀, na alọnu etọn nọ saba ján, bọ gbẹtọgun lẹ sọ nọ lẹdo e wutu. (Malku 6:31, 45, 46) E nọ fọ́nzán nado nọ edeṣo bo hodẹ̀. (Malku 1:35) E whè gbau to nujijọ dopo whenu, e yí ozán de blebu do hodẹ̀ whẹpo do basi nudide titengbe de. (Luku 6:12, 13) Podọ whlasusu wẹ e hodẹ̀ to ozán he jẹnukọnna okú etọn mẹ whẹpo e do dotana adà azọ́ndenamẹ aigba ji tọn etọn he vẹawu hugan.—Mat. 26:39, 42, 44.

5. Nawẹ mí gán hodo apajlẹ Jesu tọn gbọn?

⁵ Apajlẹ Jesu tọn plọn mí dọ mahopọnna lehe alọnu mítọn nọ ján sọ, mí dona nọ de whenu dovo nado hodẹ̀. Taidi Jesu, mí gán nọ de whenu dovo nado hodẹ̀, vlavo bo nọ fọ́nzán kavi nọ nukle pẹẹde dogọ to whèjai lẹ. Eyin mí nọ wàmọ, mí na dohia Jehovah dọ mí yọ́n pinpẹn nunina vonọtaun ehe tọn. Mẹmẹyọnnu de he nọ yin Lynne flin obá he mẹ e yinuwadeji jẹ whenue e plọnnu whla tintan gando lẹblanulọkẹyi odẹ̀ tọn go. E dọmọ: “Whenue n’plọn dọ n’gán dọhona Jehovah to whedepopenu, e gọalọna mi nado nọ pọ́n ewọ hlan di Họntọn vivẹ́ ṣie, podọ e sọ zọ́n bọ n’jlo na hẹn odẹ̀ ṣie lẹ pọnte dog̣ọ.” Ayihaawe ma tin dọ susu mítọn wẹ nọ do numọtolanmẹ dopolọ. Enẹwutu, mì gbọ mí ni dọhodo onú atọ́n he go mí gán nọ donù to odẹ̀ mítọn lẹ mẹ ji.

ONÚ TITENGBE ATỌ́N DELẸ HE GO MÍ GÁN HODẸ̀ GANDO

6. Sọgbe hẹ Osọhia 4:10, 11, etẹwẹ Jehovah jẹna?

⁶ Nọ pà Jehovah. To numimọ he jiawu de mẹ, apọsteli Johanu mọ mẹho 24 lẹ to olọn mẹ bọ yé to sinsẹ̀n-basi hlan Jehovah. Yé to Jiwheyẹwhe pà, na yé yọnẹn dọ ewọ wẹ jẹ nado mọ “gigo, gbégbò po huhlọn po” yí. (Hia Osọhia 4:10, 11.) Angẹli nugbonọ lẹ lọsu do whẹwhinwhẹ́n susu lẹ nado na pipà po gbégbò po Jehovah. Yé tin to olọn mẹ po ewọ po, podọ yé ko wá yọ́n ewọ ganji. Yé nọ mọ jẹhẹnu etọn lẹ to nuhe e nọ wà lẹ mẹ. Dile yé to lehe Jehovah nọ yinuwa do pọ́n, yé nọ yin whinwhàn nado na ẹn pipà.—Jobu 38:4-7.

7. Whẹwhinwhẹ́n tẹlẹ wutu wẹ mí gán pà Jehovah?

⁷ Mílọsu nọ jlo na pà Jehovah to odẹ̀ mítọn lẹ mẹ, bo nọ dọ nuhe mí yiwanna gando ewọ go lẹ na ẹn gọna nuhewutu mí do nọ na ẹn sisi. Dile a to Biblu plọn, tẹnpọn nado doayi jẹhẹnu Jehovah tọn he dọ̀n we hugan lẹ go. (Jobu 37:23; Lom. 11:33) Enẹgodo, dọ numọtolanmẹ towe na Jehovah gando jẹhẹnu enẹlẹ go. Mí gán sọ pà Jehovah, na e nọ yinuwado ota míwlẹ po whẹndo gbigbọmẹ tọn mítọn blebu po tọn mẹ wutu. E nọ penukundo mí go bo nọ basi hihọ́na mí to whepoponu.—1 Sam. 1:27; 2:1, 2.

8. Etẹwẹ yin delẹ to whẹwhinwhẹ́n susu he wutu mí nọ dopẹna Jehovah lẹ mẹ? (1 Tẹsalonikanu lẹ 5:18)

⁸ Nọ dopẹna Jehovah. Mí do whẹwhinwhẹ́n susu nado nọ dopẹna Jehovah to odẹ̀ mẹ. (Hia 1 Tẹsalonikanu lẹ 5:18.) Mí gán nọ dopẹna ẹn na onú dagbe depope he mí tindo; to popolẹpo mẹ, ewọ dè wẹ nunina dagbe lẹpo nọ wá sọn. (Jak. 1:17) Di apajlẹ, mí gán dopẹna ẹn na whanpẹ aigba lọ gọna nudida jiawu lẹ tọn. Mí gán sọ dọna ẹn dọ mí yọ́n pinpẹn ogbẹ̀, whẹndo, họntọn po todido mítọn po tọn. Podọ mí nọ jlo na dopẹna Jehovah, na e na mí dotẹnmẹ nado duvivi haṣinṣan họakuẹ de tọn hẹ ẹ wutu.

9. Naegbọn e gán biọ dọ mí ni wleawuna pinpẹn-nutọn-yinyọnẹn na Jehovah?

⁹ E gán biọ dọ mí ni dovivẹnu vonọtaun de nado lẹnnupọndo whẹwhinwhẹ́n he mílọsu tindo nado do pinpẹn nutọn hia Jehovah lẹ ji. Mí to gbẹnọ to aihọn he mẹ gbẹtọ lẹ ma nọ yọ́n pinpẹn nutọn te de mẹ. Mẹlẹ nọ saba na ayidonugo nuhe yé jlo lẹ hugan nuhe yé gán wà nado do pinpẹn nutọn hia na nuhe yé tindo lẹ. Eyin jijọ enẹ bẹpla mí, odẹ̀ mítọn lẹ gán nọ bẹ obiọ lẹ kẹdẹ hẹn. Kakatimọ, mí dona zindonukọn nado nọ wleawuna pinpẹn nutọn na nuhe Jehovah nọ wà na mí lẹpo bosọ nọ do e hia.—Luku 6:45.

10. Nawẹ pinpẹn-nutọn-yinyọnẹn gọalọna mẹmẹyọnnu de nado doakọnnanu gbọn? (Sọ pọ́n yẹdide lọ.)

¹⁰ Pinpẹn-nutọn-yinyọnẹn gán gọalọna mí nado doakọnna nuhahun lẹ. Lẹnnupọndo apajlẹ Kyung-sook tọn ji he sọawuhia to Atọ̀họ̀-Nuhihọ́ lọ Tọn 15 janvier 2015 tọn mẹ. Doto lẹ mọ kansẹ-zọ̀n sinsinyẹn de na ẹn. E dọmọ: “Azọ̀n ehe yinuwado ji e taun. N’do numọtolanmẹ lọ dọ n’ko hẹn nulẹpo bu, podọ obu nọ di mi taun.” Etẹwẹ gọalọna ẹn nado doakọnnanu? E dọ dọ, to ozán lẹpo mẹ whẹpo emi nido damlọn, emi nọ yì họta owhé emitọn tọn bo nọ hodẹ̀ hlan Jehovah po gbèzeyiaga po nado dopẹna ẹn na onú voovo atọ́n he e wà na emi to azán lọ gbè lẹ. Mọwiwà nọ de nuhiha etọn pò, bo nọ whàn ẹn nado do owanyi etọn na Jehovah hia. E mọ lehe Jehovah nọgodona devizọnwatọ nugbonọ etọn lẹ do whenue yé pehẹ ninọmẹ he sẹhundaga lẹ, podọ e wá mọnukunnujẹemẹ dọ dona lẹ nọ supọ́ to gbẹzan mítọn mẹ hugan whlepọn lẹ. Taidi Kyung-sook, mí do whẹwhinwhẹ́n susu lẹ nado dopẹna Jehovah, eyin mí tlẹ to pipehẹ whlepọn de to alọnu. Pinpẹn nutọn didohia ẹ to odẹ̀ mẹ gán gọalọna mí nado nọ doakọnnanu bosọ hẹn ayajẹ mítọn go.

11. Naegbọn devi Jesu tọn lẹ do hudo adọgbigbo tọn to whenue ewọ ko lẹkọyi olọn mẹ godo?

¹¹ Nọ biọ adọgbigbo Jehovah whenue a to lizọnyizọn lọ mẹ. Ojlẹ vude whẹpo Jesu do lẹkọyi olọn mẹ, e flinnu devi etọn lẹ gando azọngban yetọn nado dekunnu gando emi go “to Jelusalẹm, to Jude po Samalia lẹpo po, podọ kaka yì awà he dẹn hugan aigba tọn lẹ ji” go. (Owalọ 1:8; Luku 24:46-48) To ojlẹ kleun de godo, nukọntọ Ju lẹ wle apọsteli Pita po Johanu po bo hẹn yé wá Whẹdatẹn Daho Ju lẹ tọn nukọn bo degbe dọ sunnu nugbonọ ehelẹ ni doalọtena yẹwhehodidọ, podọ yé tlẹ sọ sìn-adán na yé. (Owalọ 4:18, 21) Nawẹ Pita po Johanu po yinuwa gbọn?

12. Sọgbe hẹ Owalọ lẹ 4:29, 31, etẹwẹ devi lẹ wà?

¹² Pita po Johanu po gblọn na nukọntọ sinsẹ̀n tọn Ju lẹ dọmọ: “Eyin e sọgbe to nukun Jiwheyẹwhe tọn mẹ nado dotoaina mì kakati nido yin Jiwheyẹwhe, mì yì lẹnpọn. Ṣigba, na míwlẹ tọn, mí ma sọgan nọma dọ nuhe mí ko mọ bosọ sè lẹ.” (Owalọ 4:19, 20) Whenue yè jo Pita po Johanu po, devi lẹ hodẹ̀ hlan Jehovah po gbèzeyiaga po gando ojlo etọn wiwà go. Yé dọmọ: “Na afanumẹ towe lẹ nado to ohó towe dọ po adọgbigbo lẹpo po.” Jehovah na gblọndo odẹ̀ ahundopo tọn enẹ tọn.—Hia Owalọ lẹ 4:29, 31.

13. Etẹwẹ mí gán plọn sọn apajlẹ Jin-hyuk tọn mẹ?

¹³ Mí gán hodo apajlẹ devi lẹ tọn eyin mí zindonukọn nado nọ dọyẹwheho etlẹ yin to whenue aṣẹpatọ lẹ degbena mí ma nado wàmọ. Lẹnnupọndo apajlẹ Jin-hyuk tọn ji, yèdọ mẹmẹsunnu de he yin súsú do gànmẹ na kadaninọ etọn wutu. Whenue e to gànmẹ, e yin azọ́ndena nado nọ penukundo gàntọ he to gànhọ ṣokẹdẹninọ tọn mẹ delẹ go, amọ́ yè ma na ẹn gbè nado dọhona yé gando nuhe ma tindo kanṣiṣa depope hẹ azọ́ndenamẹ enẹ go, etlẹ yin Biblu. E hodẹ̀ bo biọ adọgbigbo po wuntuntun po nado dọyẹwheho whedepopenu he dotẹnmẹ etọn hundote. (Owalọ 5:29) E dọmọ: “Jehovah na gblọndo odẹ̀ ṣie lẹ tọn bo na mi adọgbigbo po nuyọnẹn po nado bẹ plọnmẹ Biblu nukunwhiwhe atọ́n tọn susu jẹeji to gànhọ lẹ nukọn. Enẹgodo to zánmẹ, n’nọ kàn wekanhlanmẹ he n’na ze na gàntọ lọ lẹ to wunkẹngbe.” Mílọsu gán deji dọ Jehovah na gọalọna mí nado hẹn lizọnyizọn mítọn di. Taidi Jin-hyuk, mí gán nọ biọ adọgbigbo po nuyọnẹn po to odẹ̀ mẹ.

14. Etẹwẹ gán gọalọna mí eyin mí to pipehẹ nuhahun lẹ? (Salmu lẹ 37:3, 5)

¹⁴ Nọ biọ alọgọ Jehovah tọn nado pehẹ nuhahun lẹ. Susu mítọn wẹ to ahidi hẹ nuhahun lẹ to agbasa-liho kavi to numọtolanmẹ-liho, okú mẹyiwanna de tọn, nuhahun whẹndo tọn, homẹkẹn kavi nuhahun devo de. Podọ nudelẹ taidi azọ̀n bẹplamẹ po awhàn po tlẹ ko sọ hẹn susu to nuhahun ehelẹ mẹ vẹawu dogọ nado doakọnna. Nọ dọ nuhe to ahun ji na we lẹpo na Jehovah. Nọ dọhona ẹn gando ninọmẹ towe go dile a gán wà na họntọn vivẹ́ de do. Deji dọ Jehovah na “yinuwado ota towe mẹ.”—Hia Salmu lẹ 37:3, 5.

15. Nawẹ odẹ̀ gán gọalọna mí nado “doakọnnanu to nukunbibia mẹ” gbọn? Na apajlẹ.

¹⁵ Linsinsinyẹn to odẹ̀ mẹ na gọalọna mí nado “doakọnnanu to nukunbibia mẹ.” (Lom. 12:12) Jehovah yọ́n nuhe mẹ jugbọn sinsẹ̀n-basitọ etọn lẹ te—“e nọ sè awhágbe yetọn na alọgọ.” (Salm. 145:18, 19) Gbehosọnalitọ owhe 29 mẹvi de he nọ yin Kristie mọ nugbo-yinyin ehe tọn. To ajiji mẹ, e jẹ nuhahun agbasalilo tọn sinsinyẹn lẹ tindo ji. Ehe zọ́n bọ e bẹ apọṣimẹ-zọ̀n sinsinyẹn. To nukọn mẹ, e sè dọ doto lẹ mọ azọ̀n he ma do pọngbọ de na onọ̀ etọn. Kristie dọmọ: “N’hodẹ̀ vẹkuvẹku hlan Jehovah nado na mi huhlọn he n’do hudo etọn to azán dopodopo ji. N’dovivẹnu nado hẹn aṣa gbigbọmẹ tọn dagbe lẹ go bo nọ yì opli lẹ bosọ nọ basi oplọn mẹdetiti tọn.” E yidogọ dọmọ: “Odẹ̀ gọalọna mi nado jugbọn ojlẹ he vẹawu hugan lẹ mẹ. N’yọnẹn dọ Jehovah topọ hẹ mi to whepoponu, podọ linlẹn enẹ miọnhomẹna mi sisosiso. Dile etlẹ yindọ nuhahun agbasa tọn ṣie lẹ ma mọ pọngbọ to afọdopolọji, Jehovah na gblọndo odẹ̀ ṣie lẹ tọn bo na mi jijọho ahun mẹ tọn.” Mì gbọ mí ni ma wọ̀n gbede blo dọ “Jehovah yọ́n lehe e nọ whlẹn mẹhe ze yede jo na Jiwheyẹwhe lẹ sọn whlepọn mẹ do.”—2 Pita 2:9.

16. Naegbọn mí do hudo alọgọ Jehovah tọn nado nọavùnte sọta mẹtẹnpọn lẹ?

¹⁶ Nọ biọ alọgọ Jehovah tọn nado nọavùnte sọta mẹtẹnpọn. Taidi gbẹtọvi mapenọ lẹ, mí dona nọ to avùnho mapote sọta mẹtẹnpọn lọ nado wà nuhe ma sọgbe. Satani to nuhe go e pé lẹpo wà nado hẹn avùnhiho lọ vẹawuna mí dile e gán yọnbasi do. Dopo to aliho he mẹ e nọ hẹn nulẹnpọn mítọn flu te lẹ mẹ wẹ gbọn ayidedai mawé lẹ gblamẹ. Ayidedai mọnkọ lẹ gán zọ́n bọ linlẹn mawé lẹ na gọ́ ayiha mítọn mẹ, yèdọ linlẹn he na yinuwado gbẹtọ homẹ tọn mítọn ji bo gán plan mí jẹ ylando sinsinyẹn kọ̀n lẹ.—Malku 7:21-23; Jak. 1:14, 15.

17. Whenue mí ko hodẹ̀ bo biọ alọgọ godo, etẹwẹ mí gán wà nado dapana mẹtẹnpọn lẹ? (Sọ pọ́n yẹdide lọ.)

¹⁷ Mí do hudo alọgọ Jehovah tọn eyin mí na duto mẹtẹnpọn lọ nado wà nuhe ma sọgbe ji. Jesu basi obiọ he bọdego ehe to odẹ̀ apajlẹ tọn lọ mẹ, e dọmọ: “A sọ hẹn mí biọ whlepọn mẹ blo, ṣigba whlẹn mí sọn mẹylankan lọ si.” (Mat. 6:13) Jehovah jlo na gọalọna mí, amọ́ mí dona nọ biọ alọgọ etọn. Mí sọ dona nọ yinuwa to kọndopọ mẹ hẹ odẹ̀ mítọn lẹ. Mí gán ze afọdide yọ́n-na-yizan lẹ ma nado hùn míde do nuvò na pọndohlan ylankan po linlẹn he gbayipe to titonu Satani tọn mẹ lẹ po. (Salm. 97:10) Mí gán yí linlẹn dagbe lẹ do gọ́ ayiha mítọn mẹ eyin mí nọ hia Biblu bosọ nọ plọn ẹn. Opli lẹ yìyì po mahẹ dido to lizọnyizọn lọ mẹ po nasọ basi hihọ́na nulẹnpọn mítọn. Podọ, Jehovah dopà dọ emi ma na dike mí ni yin whiwhlepọn zẹ̀ nuhe mí gán doakọnna go.—1 Kọl. 10:12, 13.

18. Gando odẹ̀ go, etẹwẹ mímẹpo dona nọ wà?

¹⁸ Dopodopo mítọn dona nọ hodẹ̀ hugan gbede pọ́n nado to nugbonọ yin na Jehovah zọnmii to azán godo tọn he vẹawu ehelẹ mẹ. Nọ de whenu dovo egbesọegbesọ nado hodẹ̀ vivẹ́. Jehovah jlo dọ ‘mí ni nọ hùn ahun mítọn na emi’ to odẹ̀ mẹ. (Salm. 62:8) Nọ pà Jehovah bo nọ dopẹna ẹn na nuhe e nọ wà lẹpo. Nọ biọ dọ ni gọalọna we nado nọ gboadọ to lizọnyizọn lọ mẹ. Nọ vẹ̀ ẹ dọ ni gọalọna we nado duto nuhahun depope ji bo nọavùnte sọta mẹtẹnpọn depope he a gán pehẹ. Ma dike nudepope kavi mẹdepope ni glọnalina we nado nọ hodẹ̀ hlan Jehovah to gbesisọ mẹ blo. Amọ́, nawẹ Jehovah nọ na gblọndo odẹ̀ mítọn lẹ tọn gbọn? Mí na dọhodo kanbiọ titengbe enẹ ji to hosọ he bọdego mẹ.