Hodọdopọ hẹ Whétọ de—Be Mẹdagbe Lẹpo Wẹ Na Yì Olọn mẹ Ya?

HOMẸ Kunnudetọ Jehovah tọn lẹ tọn nọ hùn nado dọhodo Biblu ji hẹ kọmẹnu yetọn lẹ. Be kanbiọ sinai do Biblu ji de tin he nọ duahunmẹna we ya? Be nuyise kavi aṣa sinsẹ̀n tọn Kunnudetọ Jehovah tọn lẹ tọn depope tin he mẹ a jlo na mọnukunnujẹ ya? Eyin mọ wẹ, ma whleawu nado fọ́n whẹho lọ dote to whedevonu he a na dukosọ hẹ Kunnudetọ de blo. Homẹ etọn na hùn nado dọhodopọ hẹ we do whẹho mọnkọtọn lẹ ji.

Hodọdopọ he bọdego yin dehe Kunnudetọ Jehovah tọn de sọgan tindo hẹ whétọ de. Mí ni dọ dọ Kunnudetọ de he nọ yin Enayọn wá owhé dawe de he nọ yin Dotu tọn gbè.

Etẹwẹ Mẹhe Na Yì Olọn mẹ lẹ Na Wà to Dọ́n?

Enayọn: Etẹwẹ a lẹn, sọgodo tẹwẹ to tepọn mẹdagbe lẹ?

Dotu: Eyin etlẹ taidi dọ sọgodo dózin, n’yise dọ mẹdagbe lẹ na mọ ahọsumẹ yí to godo mẹ. Mí na yì olọn mẹ dandan.

Enayọn: Todido jiawu de wẹ enẹ yin. Biblu dọ nususu gando olọn mẹ po mẹhe na tindo lẹblanulọkẹyi nado yì dọ́n lẹ po go. Be hiẹ ko lẹnnupọndo nuhe mẹhe na yì olọn mẹ lẹ na wà to dọ́n ji ya?

Dotu: Mí na kọnawudopọ hẹ Jiwheyẹwhe bo na to pipà ẹ kakadoi.

Enayọn: Na nugbo tọn, todido he fọnjlodotenamẹ de wẹ enẹ yin. Nuhe jẹna ayidego wẹ yindọ Biblu dọho gando lẹblanulọkẹyi he mẹhe na yì olọn mẹ lẹ na mọyi po azọngban titengbe he yé na tindo po go.

Dotu: Azọngban tẹwẹ?

Enayọn: Azọngban enẹ yin nùdego to Osọhia 5:10 mẹ. Wefọ lọ dọmọ: “Hiẹ [Jesu] sọ hẹn yé zun ahọluduta de po yẹwhenọ lẹ po hlan Jiwheyẹwhe mítọn, bọ yé na duahọlu do aigba ji.” Dotu, be a doayi azọngban he mẹhe na yì olọn mẹ lẹ na hẹndi go ya?

Dotu: Wefọ lọ dọ dọ yé na duahọlu do aigba ji.

Enayọn: Be enẹ ma jẹna ayidonugo ya?

Mẹnu lẹ ji Wẹ Yé Na Duahọlu Do?

Enayọn: Todin, be hiẹ ma kọngbedopọ dọ eyin mẹhe na yì olọn mẹ lẹ na duahọlu, mẹhe ji yé na duahọlu do lẹ dona tin ya? To popolẹpo mẹ, etẹwẹ yin nujọnu-yinyin gandudu de tọn eyin e ma tindo mẹjidugando lẹ?

Dotu: N’mọ nuhe dọ a te.

Enayọn: Enẹwutu, kanbiọ he sọgbe nado kanse wẹ yindọ, Mẹnu lẹ ji wẹ yé na duahọlu do?

Dotu: N’lẹndọ mẹhe to aigba ji he ma ko kú bo yì olọn mẹ lẹ ji wẹ mí na duahọlu do.

Enayọn: Enẹ na sọgbe hẹ lẹnpọn dagbe—eyin mẹdagbe lẹpo wẹ na yì olọn mẹ. Ṣigba, yọnbasi devo he ji mí dona lẹnnupọndo die. Be e ma yọnbasi dọ mẹdelẹ—yèdọ mẹdagbe delẹ—ma jei olọn mẹ ya?

Dotu: N’ma ko sè dọ Klistiani de yí enẹ sè pọ́n.

Enayọn: Nuhe n’hia to Psalm 37:29 mẹ wẹ zọ́n bọ n’do kàn kanbiọ enẹ sè. Be a sọgan jaale bo hia wefọ enẹ ya?

Dotu: Eyọn. E hia dọmọ: “Dodonọ wẹ na dugu aigba tọn, bo nasọ nọ nọ̀ e mẹ kakadoi.”

Enayọn: A basi. Be a doayi fie mẹdagbe susu na nọ go ya?

Dotu: Wefọ lọ dọ dọ yé na nọ aigba ji.

Enayọn: Nulọ pẹpẹ niyẹn—podọ e ma na yin na ojlẹ gli de. Doayi e go dọ wefọ lọ dọ dọ: “bo nasọ nọ nọ̀ e mẹ kakadoi.”

Dotu: Vlavo nuhe na dọ wefọ lọ te poun wẹ yindọ mẹdagbe lẹ ma na hán to aigba ji gbede. Eyin mí kú bo yì olọn mẹ, mẹdagbe devo he yin jiji lẹ nọ jẹ otẹn mítọn mẹ.

Enayọn: Mẹsusu sọgan basi zẹẹmẹ wefọ lọ tọn do mọ. Ṣigba, be e ma yọnbasi dọ wefọ enẹ ni tindo zẹẹmẹ devo ya? Be e ma yin didọ e te dọ mẹdagbe lẹ na nọgbẹ̀ to aigba ji kakadoi ya?

Dotu: N’ma yọnẹn eyin n’mọnukunnujẹ nuhe dọ a te mẹ.

Paladisi de He Na Wá Aigba ji to Sọgodo

Enayọn: Eyọn, sọ pọ́n adà Biblu tọn devo he dọho gando ogbẹ̀ to aigba ji to sọgodo go. Gbọ mí ni hia Osọhia 21:4. Wefọ lọ dọ gando mẹhe na nọgbẹ̀ to aigba ji to ojlẹ enẹ mẹ lẹ go dọmọ: “Ewọ [Jiwheyẹwhe] nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.” Be todido enẹ ma fọnjlodotenamẹ ya?

Dotu: Mọwẹ. Ṣigba, n’lẹndọ nuhe ogbẹ̀ na taidi to olọn mẹ hodọ wẹ wefọ enẹ te.

Enayọn: Nugbo wẹ dọ mẹhe na yì olọn mẹ lẹ na duvivi dona mọnkọtọn lẹ tọn. Ṣigba, pọ́n wefọ lọ whladopo dogọ. Etẹwẹ e dọ gando okú go?

Dotu: E dọ dọ “okú ma nasọ tin ba.”

Enayọn: Nulọ pẹpẹ niyẹn. Todin, n’deji dọ a na kọngbedopọ hẹ mi dọ eyin nude ma nasọ tin ba, nulọ dona ko tin dai.

Dotu: Mọwẹ.

Enayọn: Ṣigba okú ma tin to olọn mẹ pọ́n, kavi e ma yin mọ wẹ ya? Aigba ji file kẹdẹ wẹ gbẹtọvi lẹ nọ kú te.

Dotu: Hùn un. N’na gbẹ́ lẹnnupọndo enẹ ji.

Enayọn: A mọ, Dotu, Biblu plọnmẹ dọ mẹdagbe delẹ na yì olọn mẹ, ṣigba dọ mẹdagbe susu devo lẹ na nọgbẹ̀ to aigba ji file. Na nugbo tọn, n’deji dọ a na ko sè gando hodidọ he diyin lọ go dọmọ: “Donanọ wẹ homẹmimiọnnọ lẹ; na yé na dugu aigba tọn.”—Matiu 5:5, Biblu Wiwe lọ—Gun Alada.

Dotu: Mọwẹ, n’ko sè whlasusu bọ wefọ enẹ yin hihia to ṣọṣi mẹ.

Enayọn: Eyin homẹmimiọnnọ lẹ na dugu aigba tọn, be enẹ ma dohia dọ gbẹtọ lẹ na to gbẹnọ to aigba ji ya? Mẹhe na tin togbẹ̀ to aigba ji lẹ na duvivi dona he yin didọdai to Osọhia mẹ lẹ tọn. Yé na mọ bọ aihọn mítọn na yin didiọ pete, na Jiwheyẹwhe na de nuylankan lẹpo sẹ̀—etlẹ yin okú lọsu.

Dotu: N’mọ nuhe na dọ a te, ṣigba n’ma deji dọ wefọ dopo kavi awe poun ko pé nado do nuhe dọ a te hia.

Enayọn: Nugbo wẹ a dọ. Ṣigba, wefọ susu wẹ dọho gando nuhe ogbẹ̀ na taidi to aigba ji to sọgodo go. Vlavo n’sọgan do dopo to wefọ he n’yiwanna hugan lẹ mẹ hia we, eyin whenu tin.

Dotu: N’tindo whenu vude.

“Mẹylankan lẹ Ma Na Tin Ba”

Enayọn: Mí hia wefọ 29 Psalm 37tọ tọn wayi din. Gbọ mí ni sọ yì owe Psalm tọn lọ mẹ. Todin, mí na hia wefọ 10 po 11 po. Be a sọgan jaale bo hia wefọ enẹlẹ ya?

Dotu: Mọwẹ. “Na whenu pẹẹde, mẹylankan lẹ ma na tin ba: nugbo, hiẹ na yí sọwhiwhe do lẹn otẹn etọn pọ́n, e ma nasọ tin. Ṣigba homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.”

Enayọn: A basi. Sọgbe hẹ wefọ 11tọ, fie wẹ “homẹmiọnnọ lẹ,” kavi mẹdagbe lẹ na nọ?

Dotu: E dọ dọ yé “na dugu aigba tọn.” Ṣigba, n’mọdọ wefọ enẹ to hẹndi mọ to alọnu din; na to popolẹpo mẹ, mẹdagbe lẹ tin to aigba ji to egbehe.

Enayọn: Nugbo wẹ. Ṣigba, doayi e go dọ wefọ lọ sọ dọ dọ mẹdagbe lẹ na tindo “jijọho susu.” Be mí tindo jijọho susu to aihọn lọ mẹ to egbehe ya?

Dotu: Lala.

Enayọn: To whelọnu lo, nawẹ opagbe enẹ na mọ hẹndi gbọn? N’sọgan yí nuyijlẹdonugo ehe zan: Mí ni dọ dọ hiẹ tindo owhé de. Delẹ to họ̀hayatọ towe lẹ mẹ nọ wà dagbe—yé nọ penukundo ohọ̀ yetọn go bo nọ tẹnpọn nado jọmẹ hẹ kọmẹnu yetọn lẹ. Homẹ towe hùn nado haya ohọ̀ na yé. Ṣigba, họ̀hayatọ devo lẹ ylan; yé ma nọ wlebòna ohọ̀ lọ bo nọ dotukla kọmẹnu yetọn lẹ. Todin, eyin họ̀hayatọ ylankan lọ lẹ ma jlo na diọ, etẹwẹ a na wà?

Dotu: N’na de yé tọ́n.

Enayọn: Nuhe Jiwheyẹwhe na wà na mẹylankan he lẹdo mí to egbehe lẹ pẹpẹ niyẹn. Pọ́n wefọ 10tọ whladopo dogọ. E dọmọ: “Mẹylankan lẹ ma na tin ba.” To hogbe devo mẹ, Jiwheyẹwhe na de mẹhe to tukla hẹnwa na mẹdevo lẹ sẹ̀. Enẹgodo, mẹdagbe lẹ na penugo nado duvivi ogbẹ̀ tọn to aigba ji to jijọho mẹ. N’mọdọ linlẹn lọ dọ mẹdagbe lẹ na nọgbẹ̀ kakadoi to aigba ji sọgan gbọnvo to aliho de mẹ na nuhe a ko plọn wayi lẹ.

Dotu: Mọwẹ be, n’ma ko sè linlẹn mọnkọtọn pọ́n to ṣọṣi ṣie mẹ.

Enayọn: Podọ dile a donù e go wayi do, wefọ dopo kavi awe poun ma ko pé nado gbadopọnna whẹho mọnkọtọn. Na nugbo tọn, mí dona gbadopọnna nuhe Biblu lọ blebu dọ gando sọgodo mẹdagbe lẹ tọn go. Ṣigba, sọgbe hẹ wefọ he mí hia to egbé lẹ, be hiẹ lẹndọ e yọnbasi na mẹdagbe delẹ nado yì olọn mẹ, to whenue mẹdagbe susu devo lẹ na nọgbẹ̀ kakadoi to aigba ji fi ya?

Dotu: N’ma kudeji dọ mọ wẹ. Ṣigba n’dona kẹalọyi dọ e taidi mọ sọgbe hẹ wefọ he a hia din lẹ. N’na gbẹ́ lẹnnupọndeji.

Enayọn: Eyin a gbadopọnna whẹho lọ yinukọn dogọ, kanbiọ devo lẹ sọgan wá ayiha mẹ na we. Di apajlẹ, etẹwẹ dogbọn mẹdagbe he ko nọgbẹ̀ jẹnukọnna mí lẹ dali? Be yemẹpo wẹ yì olọn mẹ ya? Eyin e ma yinmọ, fie wẹ yé tin te todin?

Dotu: Kanbiọ ojlofọndotenamẹ tọn lẹ niyẹn.

Enayọn: Vlavo n’sọgan wà onú awe nado gọalọna we. Tintan, dike ma kàn wefọ delẹ he dọho gando whẹho lọ go na we.a Awetọ, e na jlo mi nado lẹkọwa na mí nido dọhodopọ do wefọ lọ lẹ ji to whenue hiẹ na ko yí whenu bo hia yé bosọ lẹnnupọndo yé ji godo. Be e yọ́n do mọ ya?

Dotu: Mọwẹ, enẹ yọ́n. A basi.

[Nudọnamẹ odò tọn]