Be Hiẹ Ko Wleawu Fó Na Azán Jehovah Tọn Ya?
“Azán daho Oklunọ tọn tin sẹpọ, e tin sẹpọ bosọ to unklẹn susu.”—ZẸFANIA 1:14.
1. Nawẹ Owe wiwe lẹ basi zẹẹmẹ azán Jehovah tọn gbọn?
“AZÁN daho bosọ dobu” Jehovah tọn na wá do titonu ylankan ehe ji madẹnmẹ. Owe wiwe lẹ basi zẹẹmẹ azán Jehovah tọn taidi azán awhàn tọn, zinvlu tọn, dobu, ayimajai tọn, homẹgble tọn, hẹnmẹjọsi, po vọjijẹ tọn po. Ṣogan, luntọ́ntọ lẹ na tin, na “mẹdepope he dawhá ylọ oyín [Jehovah, NW ] tọn wẹ yè na whlẹngán.” (Joẹli 2:30-32; Amọsi 5:18-20) Mọwẹ, enẹgodo Jiwheyẹwhe na và kẹntọ etọn lẹ sudo bo na whlẹn omẹ etọn lẹ gán.
2. Naegbọn mí nado tindo linlẹn niyaniya-yinyin tọn dogbọn azán Jehovah tọn dali?
2 Yẹwhegan Jiwheyẹwhe tọn lẹ blá linlẹn niyaniya-yinyin tọn do azán Jehovah tọn go. Di dohia, Zẹfania wlan dọmọ: “Azán daho Oklunọ tọn tin sẹpọ, e tin sẹpọ bosọ to unklẹn susu.” (Zẹfania 1:14) Ninọmẹ lọ yin niyaniya hugan to egbehe na Mẹvasudotọ-gán Jiwheyẹwhe tọn, yèdọ Ahọlu Jesu Klisti, to na ‘blá ohi etọn do alinkan bo na hẹsọ́ ji to aliho nugbo, huwhẹ, po dodowiwa tọn po mẹ.’ (Psalm 45:3, 4) Be hiẹ ko wleawu fó na azán enẹ ya?
Yé Tindo Nukundido Daho Lẹ
3. Nukundido tẹlẹ wẹ delẹ to Klistiani Tẹsalonika tọn lẹ tindo, podọ na whẹwhinwhẹ́n awe tẹlẹ wutu wẹ yé do ṣinuwa?
3 Mẹsusu ko tindo nukundido he ma mọ hẹndi yí gando azán Jehovah tọn go. Klistiani fliflimẹ tọn delẹ to Tẹsalonika dọmọ, ‘azán Jehovah tọn ko wá!’ (2 Tẹsalonikanu lẹ 2:2) Ṣigba whẹwhinwhẹ́n titengbe awe tin he wutu e ma ko do tin to yakẹ. To sislẹ dopo to ehelẹ mẹ, apọsteli Paulu ko dọmọ: “Na whenuena yé to didọmọ, Jijọho po gingán po; whenẹnu wẹ dindọn ajiji wá ota yetọn.” (1 Tẹsalonikanu lẹ 5:1-6) To “ojlẹ opodo” tọn ehe mẹ, mílọsu to tenọpọn hẹndi hogbe enẹlẹ tọn. (Daniẹli 12:4) Tẹsalonikanu lẹ sọ gboawupo to kunnudenu devo tintindo mẹ dọ azán daho Jehovah tọn ko wá, na Paulu dọna yé dọmọ: “Azán lọ ma na wá, adavo aijijẹ de wá whẹ́.” (2 Tẹsalonikanu lẹ 2:3) To whenuena Paulu wlan hogbe enẹlẹ (nudi owhe 51 W.M.), “aijijẹ” sọn sinsẹ̀n Klistiani nugbo tọn mẹ ma ko wleawu pete gba. To egbehe, mí mọ ẹn hezeheze to Mẹylọhodotọklisti mẹ. Nalete, mahopọnna nukundido he ma mọ hẹndi yí yetọn lẹ, mẹyiamisisadode nugbonọ enẹlẹ to Tẹsalonika, he gbọṣi sinsẹ̀n-bibasi hlan Jiwheyẹwhe mẹ po nugbonọ-yinyin po kakajẹ okú, mọ alè olọn mẹ tọn yí to godo mẹ. (Osọhia 2:10) Mí lọsu na mọaleyi ga eyin mí gbọṣi nugbonọ-yinyin mẹ dile mí to tenọpọn azán Jehovah tọn.
4. (a) Etẹ go wẹ azán Jehovah tọn yin bibla do to 2 Tẹsalonikanu lẹ 2:1, 2 mẹ? (b) Pọndohlan tẹlẹ wẹ mẹhe nọ yin yiylọdọ Sinsẹ̀n-nuplọnmẹtọ daho Ṣọṣi tọn lẹ tindo gando lẹgọwa Klisti tọn po whẹho he gandego devo lẹ po go?
4 Biblu blá “azán daho Oklunọ tọn” do “gigọwa Jesu Klisti Oklunọ mítọn tọn” go. (2 Tẹsalonikanu lẹ 2:1, 2) Mẹhe nọ saba yin yiylọdọ Sinsẹ̀n-nuplọnmẹtọ daho Ṣọṣi tọn lẹ tindo linlẹn voovo lẹ dogbọn gigọwa Klisti tọn, tintin tofi etọn, po Gandudu Owhe Fọtọ́n etọn tọn po dali. (Osọhia 20:4) To owhe kanweko awetọ W.M., Papias Hialapoli tọn tindo nukundido ojijẹ jiawu aigba ji tọn to Gandudu Owhe Fọtọ́n Klisti tọn whenu. Justin Martyr dọho gando tintin tofi Jesu tọn go pludopludo donukun Jelusalẹm heyin gigọ̀ do otẹn etọn mẹ nado yin aisintẹn Ahọluduta Etọn tọn. Irénée Lyons tọn plọnmẹ dọ to whenuena Ahọluigbagan Lomu tọn yin vivasudo po godo, Jesu na sọawuhia hezeheze, blá Satani, bo na dugán to Jelusalẹm aigba ji tọn mẹ.
5. Etẹwẹ weyọnẹntọ delẹ ko dọ dogbọn “Wiwá Awetọ” Klisti tọn po Gandudu Owhe fọtọ́n etọn tọn po dali?
5 Whenuho-kantọ Philip Schaff doayi e go dọ “yise ayidego hugan tọn” to ojlẹ lọ jẹnukọnna Pipli Nicée tọn to 325 W.M. wẹ “yise gandudu yinukundomọ Klisti tọn to gigo mẹ to aigba ji po mẹwiwe heyin finfọnsọnkú lẹ po na owhe fọtọ́n lẹ, whẹpo fọnsọnku paa tọn lẹ po whẹdida tọn po nido bẹjẹeji.” Wezẹhomẹ lọ A Dictionary of the Bible, heyin kinkan gbọn James Hastings dali, dọmọ: “Tertullien, Irénée, po Hippolyte po gbẹ́ pò to nukundo Gigọwá he tin to yakẹ [Jesu Klisti tọn]; ṣigba po Sinsẹ̀n-nuplọnmẹtọ Alexandrine tọn lẹ po mí tindo pọndohlan devo tọn. . . . To whenuena nuplọnmẹ Augustine tọn lẹ hẹn ojlẹ Gandudu Owhe Fọtọ́n tọn po awhànfunfun Ṣọṣi tọn po zun onú dopolọ, Wiwá Awetọ lọ yin sisẹ yinukọn jẹ sọgodo he dẹn de mẹ.
Azán Jehovah Tọn po Tintin Tofi Jesu Tọn Po
6. Naegbọn mí ma nado wá tadona kọ̀n dọ azán Jehovah tọn gbẹ́ pò to nukọn taun?
6 Linlẹn agọ̀ lẹ tintindo ko dekọtọn do flumẹjijẹ lẹ mẹ, ṣigba mì ma dike mí ni lẹndọ azán Jehovah tọn gbẹ́ pò to nukọn taun blo. Tintin tofi mayọnmọ Jesu tọn, ehe go azán Jehovah tọn yin biblado sọgbe hẹ Owe wiwe lẹ, ko bẹjẹeji. Atọ̀họ̀-Nuhihọ́ Lọ Tọn po owe Kunnudetọ Jehovah Tọn devo lẹ po ko nọ saba wleawu kunnudenu Owe wiwe tọn dọ tintin tofi Klisti tọn bẹjẹeji to owhe 1914 tọn mẹ.a To whelọnu lo, etẹwẹ Jesu dọ dogbọn tintin tofi etọn dali?
7. (a) Etẹwẹ yin delẹ to adà ohia tintin tofi Jesu tọn lẹ mẹ po vivọnu titonu onú lẹ tọn po? (b) Nawẹ mí sọgan yin whinwhlẹngan gbọn?
7 Tintin tofi Jesu tọn lẹzun hosọ hodọdopọ tọn to ojlẹ vude jẹnukọnna okú etọn. To sisè vasudo tẹmpli Jelusalẹm tọn etọn didọ po godo, apọsteli etọn lẹ yèdọ Pita, Jakobu, Johanu po Andlé po kanse dọmọ: “Dọ na mí, whenuena onú helẹ na jọ? Etẹwẹ na yin ohia wiwá towe tọn, po opodo aihọn tọn po tọn?” (Matiu 24:1-3; Malku 13:3, 4) To gblọndo mẹ, Jesu dọ dọdai awhàn lẹ, huvẹ lẹ, aigba sisọsisọ lẹ, po adà “ohia” tintin tofi etọn tọn po vivọnu whenu-nu lẹ tọn devo lẹ po. E sọ dọmọ: “Mẹhe doakọnna kakajẹ opodo, mẹdopolọ wẹ yè na whlẹn gán.” (Matiu 24:13) Mí na yin whinwhlẹngan eyin mí doakọnna po nugbonọ-yinyin po kakajẹ opodo gbẹzan mítọn dinwhenu tọn kavi jẹ opodo titonu ylankan ehe tọn.
8. Jẹnukọnna vivọnu titonu Ju tọn, etẹwẹ na yin wiwadotana, podọ etẹwẹ to yinyin wiwà dogbọn ehe dali to egbehe?
8 Whẹpo opodo lọ nado wá, adà titengbe hugan tintin tofi Jesu tọn de na yin hinhẹndi. Gando e go, e dọmọ: ‘Yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.’ (Matiu 24:14) Whẹpo Lomunu lẹ do và Jelusalẹm sudo bọ titonu Ju tọn lẹ do wá vivọnu to owhe 70 W.M., Paulu sọgan dọ dọ wẹndagbe lọ yin “yẹwheho etọn [dọ] hlan omẹ he tin to olọn glọ lẹpo.” (Kọlọsinu lẹ 1:23) Ṣigba, to egbehe, azọ́n yẹwhehodidọ tọn he gblo tlala de to yinyin bibasi gbọn Kunnudetọ Jehovah Tọn lẹ dali “to aigba fininọ lẹpo mẹ.” To owhe vude he wayi lẹ gblamẹ, Jiwheyẹwhe ko hùn aliho dote na kunnudide daho de nado yin nina to Whèzẹtẹn Europe tọn. To wezinhọ po azọ́nwanu devo lẹ po lẹdo aihọn pé, titobasinanu Jehovah tọn tin to awuwle mẹ na jideji nuwiwa tọn, etlẹ yin to “aigba-denamẹ he mayin azọ́nwa deji” ji. (Lomunu lẹ 15:22, 23, NW ) Be ahun towe yin whinwhàn nado wà nuhe go a pé lẹpo to kunnudide nina mẹ whẹpo opodo lọ nido wá ya? Eyin mọwẹ, Jiwheyẹwhe sọgan na we huhlọn nado tindo mahẹ alèhẹnwanamẹ tọn to azọ́n he tin to nukọn lọ mẹ.—Filippinu lẹ 4:13; 2 Timoti 4:17.
9. Onú agokun tẹ ji wẹ Jesu zinnudo, dile e yin kinkandai to Matiu 24:36 do?
9 Azọ́n yẹwhehodidọ Ahọluduta lọ tọn po adà ohia tintin tofi Jesu tọn devo lẹ po heyin didọ dai to yinyin hinhẹndi to alọnu din. Enẹwutu, opodo ko sẹpọ na titonu ylankan onú lẹ tọn ehe. Nugbo, Jesu dọmọ: “Ṣigba azán nẹ po ojlẹ po tọn, mẹde ma yọnẹn, lala, e mayin angẹli olọn tọn lẹ, adavo Otọ́ ṣie dopo akàn.” (Matiu 24:4-14, 36) Ṣigba dọdai Jesu tọn sọgan gọalọna mí nado tin to awuwle mẹ na “azán nẹ po ojlẹ [enẹ] po.”
Yé Wleawu Fó
10. Nawẹ mí yọnẹn gbọn dọ e yọnbasi nado gbọṣi nukle to gbigbọmẹ?
10 Nado lùn azán daho Jehovah tọn tọ́n, mí dona gbọṣi nukle to gbigbọmẹ bo nọte gligli na sinsẹ̀n-bibasi nugbo. (1 Kọlintinu lẹ 16:13) Mí yọnẹn dọ akọndonanu mọnkọtọn yọnbasi, na whẹndo jijọ-di-Jiwheyẹwhe tọn de wà mọ bo lùn Osingigọ he và gbẹtọvi ylankan lẹ sudo tọ́n to owhe 2370 J.W.M. To ojlẹ enẹ yiyijlẹdo tintin tofi etọn go, Jesu dọmọ: “Le azán Noa tọn te, mọkẹdẹ wẹ wiwá Ovi gbẹtọ tọn na nọ. Na di to azán nẹlẹ mẹ he tin to osingigọ lọ nukọn yé to dùdù bo to nùnù, bo to alọwle, bosọ to nina to alọwle mẹ, kakajẹ azán he gbè Noa biọ ohún mẹ. Yè ma sọ yọnẹn kaka osingigọ do wá, bo plọ́ yé omẹ po yì; mọkẹdẹ wẹ wiwá Ovi gbẹtọ tọn na nọ ga.”—Matiu 24:37-39.
11. Yanwle tẹwẹ Noa doafọna mahopọnna danuwiwa he tin to azán etọn gbè?
11 Taidi míwlẹ, Noa po whẹndo etọn po nọ aihọn danuwiwa tọn de mẹ. Angẹli tolivẹtọ heyin “visunnu Jiwheyẹwhe tọn lẹ” ko ze agbasa gbẹtọ tọn dó bo ko yí asi lẹ mẹhe ji mẹgángán Nẹfilimi lẹ na yé—yèdọ kanylantọ lẹ he matin ayihaawe hẹn ninọmẹ lẹ yin danuwiwa tọn hugan. (Gẹnẹsisi 6:1, 2, 4; 1 Pita 3:19, 20) Ṣigba, “Noa . . . zinzọnlin hẹ Jiwheyẹwhe” to yise mẹ. E do ede hia nado “yin dodonọ bo pé to whẹndo etọn lẹ mẹ”—yèdọ whẹndo ylankan azán etọn gbe tọn. (Gẹnẹsisi 6:9-11) Po ginganjẹ Jiwheyẹwhe go po to odẹ̀ mẹ, mí sọgan wà onú dopolọ to aihọn danuwiwa po kanyinylan tọn po ehe mẹ dile mí to tenọpọn azán Jehovah tọn.
12. (a) Gbọnvona aki de whiwhè, azọ́n tẹwẹ Noa wà? (b) Nawẹ gbẹtọ lẹ yinuwa do yẹwhehodidọ Noa tọn go gbọn, podọ etẹwẹ yin kọdetọn etọn lẹ na yé?
12 Noa yin yinyọnẹn ganji taidi whiwhètọ aki de tọn nado whlẹn ogbẹ̀ gán to Osingigọ lọ whenu. Ewọ sọ yin “yẹwhehodọtọ dodo tọn,” ṣigba mẹhe tin to ojlẹ etọn mẹ lẹ ‘ma doayi’ wẹndomẹ he yin nina ẹn gbọn Jiwheyẹwhe dali go gba. Yé to dùdù bo to nùnù, bo to alọwle, bo to ovi lẹ ji, bo to nukọnzindo to whẹho paa gbẹ̀mẹ tọn lẹ mẹ kaka Osingigọ lọ do plọ yemẹpo yì. (2 Pita 2:5; Gẹnẹsisi 6:14) Yé ma jlo nado sè dogbọn hogbe po walọyizan he jlọ po dali gba, yèdọ dile whẹndo ylankan egbehe tọn sú otó etọn lẹ do nuhe Kunnudetọ Jehovah Tọn lẹ nọ dọ dogbọn “lẹnvọjọ hlan Jiwheyẹwhe dè,” yise to Klisti mẹ, dodowiwa, po “whẹdida he ja po tọn” dali do. (Owalọ lẹ 20:20, 21; 24:24, 25) Kandai de matin to aimẹ dogbọn gbẹtọ sọha he tin to aigba ji to whenuena Noa to wẹndomẹ Jiwheyẹwhe tọn lá dali gba. Ṣigba onú dopo họnwun, sọha mẹhe tin to aigba ji tọn lẹ whèpo to ajiji mẹ to owhe 2370 J.W.M. mẹ! Osingigọ lọ zà mẹylankan lẹ sẹ, bo pò mẹhe wleawu fó na nuyiwa Jiwheyẹwhe tọn enẹ kẹdẹ lẹ dote—yèdọ Noa po omẹ ṣinawe devo lẹ po sọn whẹndo etọn mẹ.—Gẹnẹsisi 7:19-23; 2 Pita 3:5, 6.
13. Gbedide whẹdida tọn tẹmẹ wẹ Noa tindo jide gigọ́ te, podọ nawẹ e yinuwa to gbesisọmẹ po ehe po do?
13 Jiwheyẹwhe ma dọna Noa owhe susu jẹnukọn gando azán po ganmẹ taun Osingigọ lọ tọn po go gba. Ṣigba, to whenuena Noa yin owhe 480 mẹvi, Jehovah degbe dọmọ: “Gbigbọ ṣie ma na nọ gbẹtọ mẹ dli gba, na . . . agbasalan wẹ ewọ ga; podọ mọ azán etọn lẹ na yin owhè kantọ̀n.” (Gẹnẹsisi 6:3) Noa tindo jide gigọ́ to gbedide whẹdida sọn olọn mẹ wá tọn ehe mẹ. To whenuena e tindo owhe 500 godo, e jì “Ṣẹm, Ham, po Jafẹti po,” podọ aṣa ojlẹ enẹlẹ mẹ tọn dohia dọ visunnu etọn lẹ na ko tindo owhe 50 jẹ 60 whẹpo do wlealọ. To whenuena Noa yin didọna nado whè aki de na whlẹngán gbọn Osingigọ lọ mẹ, e họnwun dọ visunnu enẹlẹ po asi yetọn lẹ po na ko gọalọna ẹn to vivẹnudido enẹ mẹ. Vlavo aki lọ whiwhè tin to otẹn dopolọ mẹ po sinsẹ̀nzọn Noa tọn taidi “yẹwhehodọtọ dodo tọn” de po, he hẹn alọnu etọn ján na owhe 40 jẹ 50 he jẹnukọnna Osingigọ lọ lẹ. (Gẹnẹsisi 5:32; 6:13-22) Na owhe enẹ lẹpo, ewọ po whẹndo etọn po yinuwa po yise po. Mì gbọ mí ni do yise hia dile mí to yẹwheho wẹndagbe lọ tọn dọ bo to tenọpọn azán Jehovah tọn.—Heblu lẹ 11:7.
14. Etẹwẹ Jehovah dọna Noa to godo mẹ, podọ etẹwutu?
14 Dile aki lọ sẹpọ tadona kọ̀n, Noa sọgan ko lẹndọ Osingigọ lọ tin to yakẹ, dile etlẹ yindọ e ma yọ́n whenue e na wá do taun. To godo mẹ Jehovah dọna ẹn dọmọ: “Na azán ṣinawe dogọ yẹn na jajikun do aigba ji, to okle kande po ozán kande po.” (Gẹnẹsisi 7:4) Enẹ na Noa po whẹndo etọn po ojlẹ he sù nado bẹ́ wunmẹ kanlin lẹpo tọn do aki lọ mẹ na yé lọsu ni biọ e mẹ whẹpo Osingigọ lọ nido bẹjẹeji. Mí ma tindo nuhudo nado yọ́n azán po ganmẹ he vasudo titonu ehe tọn po na bẹjẹeji gba; lunluntọ́n kanlin lẹ tọn mayin zize do alọ mítọn mẹ gba, podọ gbẹtọ he sọgan luntọ́n lẹ ko to aki yẹhiadonu tọn lọ mẹ biọ, yèdọ paladisi gbigbọmẹ omẹ Jiwheyẹwhe tọn lẹ tọn.
‘Mì Nọ Họ́ali’
15. (a) To hogbe towe titi tọn lẹ mẹ, nawẹ hiẹ na basi zẹẹmẹ hogbe Jesu tọn lẹ he yin mimọ to Matiu 24:40-44 mẹ gbọn? (b) Nugandomẹgo tẹwẹ ma yọ́n ojlẹ taun lọ he Jesu na wá nado hẹn ahọsuyi Jiwheyẹwhe tọn ṣẹ tindo?
15 Gando tintin tofi etọn go, Jesu basi zẹẹmẹ dọmọ: “Whenẹnu wẹ omẹ awe na to [azọ́nwa] to ogle mẹ, yè na yí dopo, bo jo awetọ dai. Yọnnu awe na to [gbàdo lì] to osé kọ̀n; yè na yí dopo, bo jo awetọ dai. Enẹwutu mì nọ họ́ mìde: na mì ma yọ́n azán he gbè Oklunọ mìtọn ja. Ṣigba yọ́n ehe dọ, eyin mẹmẹnu owhé lọ tọn ko yọ́n ojlẹ he mẹ ajotọ ja te, e na ko họ́ali, e ma do ko dike yè ni kùndò biọ owhé etọn gbè gba. Enẹwutu mì ni wleawu dai: na ojlẹ he mẹ mì ma lẹn do wẹ Ovi gbẹtọ tọn ja.” (Matiu 24:40-44; Luku 17:34, 35) Ojlẹ lọ taun he Jesu na wá nado hẹn ahọsuyi Jehovah tọn ṣẹ ma yọnẹn nọ hẹn mí tin to aṣeji bo nọ na mí dotẹnmẹ-hundote egbesọegbesọ tọn nado dohia dọ mí to sinsẹ̀n-basi hlan Jehovah po ayilinlẹn mayin ṣejannabi tọn lẹ po.
16. Etẹwẹ na jọ do dopodopo mẹhe yin ‘jijodo’ lẹ tọn po mẹhe yin ‘yíyí’ lẹ tọn po go?
16 Dopodopo mẹhe na yin ‘jijo dai’ hlan vasudo po mẹylankan po lẹ na bẹ mẹhe ko tindo nukunnumọjẹnumẹ dai lẹ ṣigba he tlọ biọ aliho gbẹzan ṣejannabi tọn mẹ hẹn. Na mí ni tin to mẹhe yin ‘yíyí’ lẹ mẹ, yèdọ mẹhe ze yede jó na Jehovah pete lẹ bo gọna pẹdido taun na awuwledainanu gbigbọmẹ tọn etọn lẹ gbọn “afanumẹ nugbonọ, nuyọnẹntọ” lọ gblamẹ. (Matiu 24:45-47) Kakajẹ opodo, mì gbọ mí ni wà sinsẹ̀nzọn hlan Jiwheyẹwhe po “owanyi [po] sọn ayiha wiwe mẹ, sọn homẹdagbe mẹ, podọ sọn yise he madoklọ mẹ.”—1 Timoti 1:5.
Walọ Wiwe Yin Onú Titengbe
17. (a) Etẹwẹ yin dọdai etọn dọ to 2 Pita 3:10 mẹ? (b) Etẹwẹ yin delẹ to walọyizan po nuyiwa po he yin tuli etọn na gbọn 2 Pita 3:11 dali?
17 Apọsteli Pita wlan dọmọ: “Azán Oklunọ tọn ja di ajotọ to ozán mẹ, ehe mẹ olọn lẹ na yí lìlì gángán do juwayi, bọ nugonu lẹ nasọ gbọn yozo sinyẹnsinyẹn mẹ yọ́, aigba po azọ́n he tin to e mẹ lẹ po nasọ fiọ gbidigbidi.” (2 Pita 3:10) Olọn po aigba yẹhiadonu tọn lẹ po ma na lùn yozò adi zogbe Jiwheyẹwhe tọn tọ́n gba. Enẹwutu Pita yidogọ dọmọ: “Le onú helẹ po na yọ́ kọnyingbe nẹ, omẹ na hunkọ wẹ mìwlẹ na yin to owalọ wiwe lẹpo mẹ, to jijọ-di-Jiwheyẹwhe tọn mẹ.” (2 Pita 3:11) To walọyizan po nuyiwa ehelẹ mẹ wẹ tintin to opli Klistiani tọn lẹ tẹnmẹ to gbesisọmẹ tin te, dagbe wiwà na mẹdevo lẹ, po mahẹ he tindo zẹẹmẹ tintindo to yẹwheho wẹndagbe lọ tọn didọ mẹ po.—Matiu 24:14; Heblu lẹ 10:24, 25; 13:16.
18. Eyin mí to awuwlena haṣinṣan tintindo hẹ aihọn lọ, etẹwẹ mí dona wà?
18 ‘Walọ wiwe po jijọ-di-Jiwheyẹwhe tọn po’ biọ dọ mí ni ‘hẹn míde madodiho sọn aihọn dè.’ (Jakobu 1:27) Ṣigba etẹwẹ lo eyin mí to awuwlena haṣinṣan pẹkipẹki po aihọn ehe po? Vlavo mí ko yin kiklọ biọ ninọmẹ owù tọn de mẹ to nukọn Jiwheyẹwhe tọn gbọn ayidedai mawé lẹ dindin kavi todoai hlan ohunhiho po ohàn he nọ ze gbigbọ aihọn jijọ-madi-Jiwheyẹwhe tọn ehe daga po dali. (2 Kọlintinu lẹ 6:14-18) Eyin mọwẹ whẹho lọ yin, mì gbọ mí ni din alọgọ Jiwheyẹwhe tọn to odẹ̀ mẹ na mí ma nado juwayi po aihọn lọ po ṣigba nọte to aliho alọkẹyi tọn mẹ to Visunnu gbẹtọ tọn nukọn. (Luku 21:34-36; 1 Johanu 2:15-17) Eyin mí ko basi klandowiwe hlan Jiwheyẹwhe, po jide po mí na jlo nado wà nuhe go huhlọn mítọn pé nado wleawu bo hẹn haṣinṣan zohunhun tọn de go po e po bo gbọnmọ dali tin to awuwlemẹ na azán daho dobu Jehovah tọn.
19. Naegbọn susugege lilátọ Ahọluduta lọ tọn lẹ sọgan donukun nado lùn vivọnu titonu ylankan onú lẹ tọn ehe tọ́n?
19 Noa jijọ-di-Jiwheyẹwhenọ po whẹndo etọn po lùn Osingigọ he và aihọn hohowhenu tọn enẹ sudo tọ́n. Gbẹtọ jlọjlọ lẹ lùn vivọnu titonu Ju tọn tọ́n to owhe 70 W.M. Di dohia, apọsteli Johanu gbẹ́ yin zohunhunnọ to sinsẹ̀nzọn Jiwheyẹwhe tọn mẹ to nudi owhe 96-98 W.M., to whenuena e wlan owe Osọhia tọn, kandai Wẹndagbe tọn etọn, po wekanhlanmẹ gbọdo atọ̀n etọn lẹ po. Vlavo mẹdelẹ lùn vivọnu titonu Ju tọn tọ́n, to fọtọ́n susu he kẹalọyi yise nugbo lọ to Pẹntikọsti owhe 33 W.M. tọn lẹ mẹ. (Owalọ lẹ 1:15; 2:41, 47; 4:4) To egbehe susugege lilatọ Ahọluduta lọ tọn lẹ sọgan tindo todido nado lùn vivọnu titonu onú lẹ tọn dintọn tọ́n.
20. Naegbọn mí dona yin “yẹwhehodọtọ dodo tọn” zohunhunnọ lẹ?
20 Po hihọ́-basinamẹ biọ aihọn yọyọ lọ mẹ he tin to nukọn na mí po, mì gbọ mí ni yin “yẹwhehodọtọ dodo tọn” zohunhunnọ lẹ. Lẹblanulọkẹyi nankọtọn wẹ e yin nado wà sinsẹ̀nzọn hlan Jiwheyẹwhe to azán godo tọn ehelẹ mẹ! Podọ ayajẹ nankọtọn wẹ e yin nado deanana gbẹtọ lẹ hlan “aki” egbezangbe tọn lọ kọ̀n, yèdọ paladisi gbigbọmẹ tọn he nọ yin vivi etọn dù gbọn omẹ Jiwheyẹwhe tọn lẹ dali! Na livi susu he tin to e mẹ din lẹ ni gbọṣi nugbonọ-yinyin mẹ, gbọṣi nukle to gbigbọmẹ, bo tin to awuwlemẹ na azán daho Jehovah tọn. Ṣigba etẹwẹ na gọalọna mímẹpo nado gbọṣi nukle?
[Nudọnamẹ Odò Tọn]
a Pọ́n weta 10 po 11 po heyin owe Oyọnẹn He Nọ Planmẹ Sọyi Ogbẹ̀ Madopodo Mẹ tọn, heyin zinzinjẹgbonu gbọn Watchtower Bible and Tract Society of New York, Inc. dali.
Nawẹ Hiẹ Na Na Gblọndo Gbọn?
◻ Nukundido tẹlẹ wẹ mẹdelẹ ko tindo gando azán Jehovah tọn po tintin tofi Klisti tọn po go?
◻ Naegbọn mí do sọgan dọ dọ Noa po whẹndo etọn po wleawu fó na Osingigọ lọ?
◻ Etẹwẹ na jọ do mẹhe to ‘alihọ́ zọnmii’ lẹ po mẹhe ma wà mọ lẹ po go?
◻ Naegbọn walọ wiwe do yin onú tangan, titengbe dile mí dọnsẹpọ azán daho Jehovah tọn pẹkipẹki?