Mẹnu Wẹ Na Lùn ‘Azán Jehovah Tọn’ Tọ́n?
“Omẹ na hunkọ wẹ mìwlẹ lo yín to owalọ wiwe lẹpo mẹ, to jijọ-di-Jiwheyẹwhe tọn mẹ, na mì ni to nukundo, bosọ to mìzọnmìzọn ji hlan wiwá azán [ Jehovah, NW ] tọn tọn.”—2 PITA 3:11, 12.
1. Mẹnu lẹ wẹ ko wazọ́n po gbigbọ Elija tọn po huhlọn etọn po?
JEHOVAH JIWHEYẸWHE ko de sọn gbẹtọvi lẹ ṣẹnṣẹn mẹdopodopo he na lẹzun whédutọgbẹ́ hẹ Visunnu etọn, yèdọ Jesu Klisti, to Ahọluduta olọn tọn mẹ. (Lomunu lẹ 8:16, 17) To whenuena yé gbẹpo to aigba ji, Klistiani yiamisisadode lẹ ko wazọ́n to gbigbọ po huhlọn Elija tọn po mẹ. (Luku 1:17) To hosọ he wayi mẹ, mí doayi kanṣiṣa he tin to nuwiwa yetọn lẹ po yẹwhegan Elija tọn lẹ po ṣẹnṣẹn go. Ṣigba etẹwẹ dogbọn azọ́n mẹhe jẹ otẹn Elija tọn mẹ, yèdọ yẹwhegan Eliṣa tọn dali?—1 Ahọlu lẹ 19:15, 16.
2. (a) Etẹwẹ yin azọ́njiawu godo tọn Elija tọn, podọ tintan Eliṣa tọn? (b) Kunnudenu tẹwẹ tin to finẹ dọ Elija ma yì olọn mẹ?
2 Azọ́njiawu godo tọn heyin bibasi gbọn Elija dali wẹ enẹ heyin mimá osìn Otọ̀ Jọdani tọn gbọn lìlì awugbo vonọtaun etọn do e mẹ dali. Ehe na dotẹnmẹ Elija po Eliṣa po nado dasa gbọn aigba húhú ji. Dile yé to zọnlinzin gbọn whèzẹtẹn waji otọ̀ lọ tọn, jẹhọnahizi de ze Elija sọyi nọtẹn devo aigba lọ tọn ji. (Pọ́n apotin lọ to weda 14 he hosọ etọn yin “Olọn Tẹwẹ Elija Hẹji Yì” mẹ) Nuhe yin jijodo wẹ awugbo vonọtaun Elija tọn. To whenuena Eliṣa yí ì zan nado lì Jọdani, osìn etọn lẹ má whladopo dogọ, he hẹn ẹn penugo nado lẹkọwa aigba húhú ji. Azọ́njiawu ehe hẹn ẹn họnwun dọ Eliṣa ko lẹzun mẹjẹmẹtẹnmẹ Elija tọn to godoninọna sinsẹ̀n-bibasi nugbo to Islaeli mẹ.—2 Ahọlu lẹ 2:6-15.
Jẹhẹnu Jijọ-di-Jiwheyẹwhe Tọn lẹ Yin Titengbe
3. Etẹwẹ Paulu po Pita po dọ dogbọn tintin tofi Jesu tọn po ‘azán Jehovah tọn’ po dali?
3 Owhe kanweko lẹ to azán Elija po Eliṣa po tọn godo, apọsteli Paulu po Pita po kọ̀n ‘azán Jehovah tọn’ dopọ hẹ tintin tofi Klisti tọn podọ to enẹgodo sọgodo “olọn yọ́yọ́ lẹ, po aigba yọ́yọ́ de po” tọn. (2 Tẹsalonikanu lẹ 2:1, 2; 2 Pita 3:10-13) Nado lùn azán daho Jehovah tọn tọ́n—to whenuena Jiwheyẹwhe na và kẹntọ etọn lẹ sudo bo whlẹn omẹ etọn lẹ gán—mí dona din Jehovah bo do homẹmimiọn po dodowiwa po hia. (Zẹfania 2:1-3) Ṣigba jẹhẹnu dogọ delẹ sọawuhia dile mí gbadopọnna nujijọ he gando yẹwhegan Eliṣa go lẹ.
4. Azọngban tẹwẹ zohunhun nọ yiwà to sinsẹ̀nzọ́n Jehovah tọn mẹ?
4 Zohunhun na sinsẹ̀nzọ́n Jiwheyẹwhe tọn yin titengbe eyin mí na lùn ‘azán Jehovah tọn’ tọ́n. Elija po Eliṣa po yin zohunhunnọ to sinsẹ̀nzọ́n Jehovah tọn mẹ. Po zohunhun dopolọ po, to egbehe pipotọ Klistiani yiamisisadode lẹ basi sinsẹ̀nzọn wiwe hlan Jehovah bo yin nukọntọ to yẹwheho wẹndagbe lọ tọn lilá mẹ.a Sọn ṣẹnṣẹn 1930 tọn gbọ́n, yé ko na tuli mẹhe kẹalọyi owẹ̀n Ahọluduta lọ tọn lẹ bo to nukundo nado nọgbẹ̀ to aigba ji lẹpo nado klan yedelẹ do wiwe hlan Jehovah bo yí baptẹm. (Malku 8:34; 1 Pita 3:21) Livi lẹ ko kẹalọyi tulinamẹ ehe po homẹhunhun po. To ojlẹ de mẹ wayi yé tin to zinvlu gbigbọmẹ tọn mẹ bo yin oṣiọ to ylando mẹ, ṣigba todin yé ko plọn nugbo Jiwheyẹwhe tọn, bo ko kẹalọyi todido ogbẹ̀ mavọmavọ tọn to paladisi aigba ji tọn mẹ, bo yin zohunhunnọ to sinsẹ̀nzọn Jehovah tọn mẹ. (Psalm 37:29; Osọhia 21:3-5) Gbọn zohunhun yetọn, gbekọndopọ, johẹmẹ, po azọ́n dagbe devo lẹ po dali, yé hẹn kọfanamẹ daho wá na mẹmẹsunnu gbigbọmẹ Klisti tọn he gbẹ́ pò to aigba ji lẹ.—Matiu 25:31-46.
5. Naegbọn e do yin onú titengbe nado wà dagbe na “mẹmẹsunnu” Jesu tọn lẹ, podọ apajlẹ tẹwẹ mí tindo sọn azán Eliṣa tọn gbè?
5 Mẹhe wà onú dagbe na “mẹmẹsunnu” Jesu tọn lẹ na mẹyiamisisadode ehelẹ yin hodotọ etọn wutu tindo todido lùnlùn ‘azán Jehovah tọn’ tọ́n. Asu po asi po he wlealọ de to gbetato Ṣunẹmi tọn mẹ yin didona taun na yinyin mẹhe jọmẹ bo yíjonọ Eliṣa po mẹmẹsi etọn po tọn. Asu po asi po ehe ma tindo visunnu de, podọ asu lọ ko poyọnho. Ṣigba Eliṣa dopagbe na yọnnu Ṣunaminu lọ dọ e na ji visunnu de, podọ ehe sọ yinmọ. To whenuena visunnu dopo ehe kú to owhe delẹ godo, Eliṣa yì Ṣunẹmi bo fọ́n ẹn. (2 Ahọlu lẹ 4:8-17, 32-37) Dona dagbe tẹ die na johẹmẹ didohia Eliṣa!
6, 7. Apajlẹ tẹwẹ Naamani zedai, podọ nuyiwadomẹji tẹwẹ ehe tindo do lùnlùn ‘azán Jehovah tọn’ tọ́n ji?
6 Whiwhẹ yin nuhudo nado sọgan kẹalọyi anademẹ sinai do Biblu ji sọn “mẹmẹsunnu” Klisti tọn lẹ si po todido lùnlùn azán Jehovah tọn tọ́n tọn po. Naamani awhàngan awhànpa Silia tọn pòtọnọ lọ dona do whiwhẹ hia nado sọgan hodo ayinamẹ viyọnnu kanlinmọ Islaeli tọn de tọn bo din pọngbọ gbọn yìyì Islaeli nado din Eliṣa mọ dali. Kakati ni tọ́n sọn owhé etọn gbè nado wá pe Naamani, Eliṣa do owẹ̀n ehe hlan ẹn dọmọ: “Yì bo lẹ̀awu Jọdani mẹ whla ṣinawe, agbasalan towe nasọ gọ̀ wá de we, hiẹ nasọ yín wiwe.” (2 Ahọlu lẹ 5:10) Nsọle-yinyin Naamani tọn fọ́n, bọ e gblehomẹ, ṣigba to whenuena e yí huwhẹ do yì bo whèadin biọ Jọdani mẹ whla ṣinawe, “agbasalan etọn sọ vọ́ gọ̀ di do agbasalan ovi ovú de tọn mẹ, ewọ sọ yín wiwe.” (2 Ahọlu lẹ 5:14) Whẹpo e do lẹkọwa whé, Naamani zingbejizọnlin yì Samalia nado dopẹna yẹwhegan Jehovah tọn. Na gbemima ma nado duale to agbasa-liho sọn huhlọn namẹ Jiwheyẹwhe tọn mẹ, Eliṣa tọ́n wá pe Naamani ṣigba ma na kẹalọyi nunina depope gba. Naamani po huwhẹ po dọ na Eliṣa dọmọ: “Mẹmẹsi towe sọn dinvie zọnmii ma nasọ na avọ́ nunina mimẹ̀ kavi sanvọ́ hlan yẹwhe devo lẹ de dè ba, adavo hlan Oklunọ dè.”—2 Ahọlu lẹ 5:17.
7 Gbọn whiwhẹ yíyí do hodo ayinamẹ Owe wiwe tọn mẹyiamisisadode lẹ tọn dali, livi susu ko yin didona susugege to egbehe. Humọ, gbọn yise yiyizan to avọ́sinsan ofligọ Jesu tọn mẹ dali, omẹ ahunjijlọnọ ehelẹ ko yin kiklọwe to gbigbọ-liho. Todin yé nọ duvivi lẹblanulọkẹyi yinyin họntọn Jehovah Jiwheyẹwhe po Jesu Klisti po tọn. (Psalm 15:1, 2; Luku 16:9) Podọ mẹdezejo yetọn hlan Jiwheyẹwhe po sinsẹ̀nzọ́n etọn po na yin ahọsuna to yinyin whinwhlẹngan yetọn mẹ sọn vasudo mavọmavọ he na wá goyitọ lẹ, ylanwatọ he malẹnvọjọ lẹ ji to madẹnmẹ to ‘azán Jehovah tọn’ he to dindọnsẹpọ po niyaniya po mẹ.—Luku 13:24; 1 Johanu 1:7.
“Mẹnu Wẹ Tin to Adà Ṣie Ji? Mẹnu?”
8. (a) Walọyizan tẹwẹ mẹhe na lùn ‘azán Jehovah tọn’ tọ́n lẹ na tindo hlan ojlo sọn olọn mẹ wá wiwà? (b) Azọ́ndenamẹ tẹwẹ yin nina Jehu? (c) Etẹwẹ na jọ do Jẹzebẹli go?
8 Mẹhe to nukundo nado lùn ‘azán Jehovah tọn’ tọ́n lẹ sọ dona tindo nujikudo to ojlo olọn mẹ tọn wiwà mẹ. Po adọgbigbo po Elija dọ dọdai vasudo Ahọlu Ahabi hlọnhutọ tọn, yèdọ whẹndo sinsẹ̀n-bibasi na Baali tọn. (1 Ahọlu lẹ 21:17-26) Ṣigba, whẹpo mẹhuhu ehe nado jọ, mẹjẹmẹtẹnmẹ Elija tọn Eliṣa dona fó azọ́n he ma ko yín fifo delẹ whẹ́. (1 Ahọlu lẹ 19:15-17) To whenuena ojlẹ dide Jehovah tọn wá, Eliṣa dọna mẹmẹsi de nado yì bo yiamisisadode awhàngan awhànpa lẹ tọn Jehu taidi ahọlu yọ́yọ́ Islaeli tọn. To amisisa kinkọn do ota na Jehu pó godo, wẹnsagun lọ dọ na ẹn dọmọ: “Le wẹ Oklunọ dọ, Jiwheyẹwhe Islaeli tọn, yẹn ko yí we do dè ahọlu do omẹ Oklunọ tọn lẹ ji, yèdọ do Islaeli ji. Hiẹ nasọ hò owhé Ahabi mẹmẹnu towe tọn, na yẹn nido yiahọsu ohùn mẹmẹsi ṣie lẹ yẹwhegan lẹ tọn, po ohùn mẹmẹsi Oklunọ tọn lẹpo po tọn, to alọ Jẹzebẹli tọn mẹ. Na owhé Ahabi tọn pete na dọ̀n.” Ahọsi kanylantọ Jẹzebẹli na yin dindlan hlan avún lẹ bo ma na tindo ṣiọdidi he jẹaṣọ depope gba.—2 Ahọlu lẹ 9:1-10.
9, 10. Nawẹ hogbe Elija tọn lẹ mọ hẹndi yí to whẹho Jẹzebẹli tọn mẹ gbọn?
9 Omẹ Jehu tọn lẹ yọ́n nujọnu-yinyin mẹdide etọn bo lá ẹ di ahọlu yọ́yọ́ Islaeli tọn. To nuyiwa po nujikudo po, Jehu fọ́n biọ Jezleẹli mẹ nado bẹ azọ́n hùhù atẹṣitọ he yin tọ́ntlọngbọ́n to sinsẹ̀n-bibasi Baali tọn mẹ lẹ jẹeji. Omẹ tintan he tindo numọtolanmẹ owhán Jehu tọn wẹ visunnu Ahabi tọn, yèdọ Ahọlu Jeholami. E kùn osọ́ sọn tòdaho lọ mẹ nado kanse eyin Jehu ko wá po linlẹn jijọho tọn po. “Jijọho tẹ́, dẹn sọ mọ le galilọ Jẹzebẹli onọ̀ towe tọn lẹ, po afinọn etọn lẹ po yin susu sọ mọ?” wẹ Jehu gblọn dọ. Po enẹ po, ogá Jehu tọn hò ahun Jeholami tọn.—2 Ahọlu lẹ 9:22-24.
10 Yọnnu jijọ-di-Jiwheyẹwhe tọn lẹ nọ dapana nado taidi Jẹzebẹli kavi wunmẹ etọn depope. (Osọhia 2:18-23) To ojlẹ he mẹ Jehu wá Jezleẹli, ewọ ko tẹnpọn nado doaṣọna ede. To pinpọ́n dò sọn fleṣenu, e dọnudo e po mẹṣanko po. E kanse devi etọn lẹ dọmọ: “Mẹnu wẹ tin to adà ṣie ji? Mẹnu?” To afọdopolọji, devizọnwatọ awe kavi atọ̀n sọ pọ́n odò. Be adà Jehu tọn mẹ wẹ yé tin te ya? “Sisẹ ẹ dlan odò” wẹ e degbè dọ. To enẹ mẹ, yé yinuwa po nujikudo po, bo dlan Jẹzebẹli kanylantọ gbọn fleṣenu. Ewọ yin tintlẹn, bo mọ awuvẹ to azò osọ́ tọn lẹ glọ. To whenuena gbẹtọ lẹ wá nado di i, ‘yé ma mọ nude sọn e go hú otaka, po afọ lẹ po, po alọpahomẹ alọ etọn lẹ tọn po gba.’ Lehe hogbe Elija tọn lẹ mọ hẹndi sẹhundaga de yí do sọ he dọmọ: “Avún lẹ na dù agbasalan Jẹzebẹli tọn”!—2 Ahọlu lẹ 9:30-37.
Godonọna Sinsẹ̀n-bibasi Nugbo sọn Ahún mẹ Wá
11. Mẹnu wẹ Jehonadabi yin, podọ nawẹ e do godonọnamẹ etọn hia na sinsẹ̀n-bibasi nugbo gbọn?
11 Mẹhe to nukundo nado lùn ‘azán Jehovah tọn’ tọ́n bo na nọgbẹ̀ to aigba ji lẹ dona nọgodona sinsẹ̀n-bibasi nugbo po ahún lẹpo po. Yé dona taidi Jehonadabi, kavi Jonadabi, sinsẹ̀n-basitọ Jehovah tọn he mayin Islaelivi de. Dile Jehu zindonukọn nado to azọ́ndenamẹ etọn hẹndi po zohunhun po, Jehonadabi jlo nado do alọkẹyi po godonọnamẹ etọn po hia. Enẹwutu e tọ́n nado yì pé ahọlu yọ́yọ́ Islaeli tọn, mẹhe pànta Samalia nado hù pipotọ owhé Ahabi tọn lẹ. To whenuena e mọ Jehonadabi, Jehu kanse dọmọ: “Ayiha towe yín jijlọ, dile ayiha ṣie yín jijlọ to ayiha towe dè do?” Gblọndo nujikudo Jehonadabi tọn whàn Jehu nado dlẹn alọ etọn bo basi oylọ na Jehonadabi biọ awhàn kẹkẹ etọn mẹ, bo dọmọ: “Hodo mi wá, bo pọ́n vivẹnu ṣie na Oklunọ.” Matin gbandindọn, Jehonadabi kẹalọyi lẹblanulọkẹyi lọ nado do godonọnamẹ etọn hia na ahọsuyitọ yiamisisadode Jehovah tọn.—2 Ahọlu lẹ 10:15-17.
12. Naegbọn Jehovah gbọn jlọjẹ dali do biọ mẹdezejo mlẹnmlẹn?
12 Godonọnamẹ sọn ahun mẹ wá sinsẹ̀n-bibasi nugbo tọn na jide tọn yin nuhe jẹ, na Jehovah wẹ Mẹdatọ po Ganhunupotọ Wẹkẹ tọn po, he gbọn jlọjẹ dali biọ bo jẹ na mẹdezejo mlẹnmlẹn mítọn. E degbena Islaelivi lẹ dọmọ: “Hiẹ ma na basi boṣiọ pipà de hlan dewe, kavi apajlẹ ojlẹmọ depope tọn he tin to olọn mẹ aga, kavi he tin to aigba mẹ todò, kavi he tin to otọ̀ mẹ to aigba glọ: hiẹ ma na dẹ́ dewe dodò hlan yé, kavi sẹ̀n yé gba: na yẹn Oklunọ Jiwheyẹwhe towe Jiwheyẹwhe awuwhàntọ de wẹ.” (Eksọdusi 20:4, 5) Mẹhe tindo todido nado lùn ‘azán Jehovah tọn’ tọ́n lẹ dona basi sinsẹ̀n hlan ẹn mlẹnmlẹn, mọwiwà, “to gbigbọ mẹ podọ to nugbo mẹ.” (Johanu 4:23, 24) Yé dona yin hinhẹn lodo na sinsẹ̀n-bibasi nugbo, taidi Elija, Eliṣa, po Jehonadabi po.
13. Dile ahun Jehonadabi tọn tin po Jehu po do, mẹnu lẹ wẹ yigbena Ahọlu Mẹssia tọn, podọ nawẹ yé do ehe hia gbọn?
13 To vasudo owhé Ahabi tọn godo, Ahọlu Jehu ze afọdide devo lẹ nado yọ́n sinsẹ̀n-basitọ Baali tọn lẹ bo dè sinsẹ̀n lalo tọn ehe sọn Islaeli. (2 Ahọlu lẹ 10:18-28) To egbehe, Ahọlu olọn mẹ tọn Jesu Klisti ko yin dide nado và kẹntọ Jehovah tọn lẹ sudo bo suwhẹna nupojipetọ-yinyin Etọn. Dile ahun Jehonadabi tọn tin po Jehu po do, to egbehe “gbẹtọ susugege” “lẹngbọ devo” Jesu tọn lọ yigbe po ahun lẹpo po na Klisti taidi Ahọlu Mẹssia tọn bo kọngbedopọ hẹ mẹmẹsunnu gbigbọmẹ tọn lẹ to aigba ji. (Osọhia 7:9, 10; Johanu 10:16) Yé do kunnudenu ehe tọn hia gbọn sinsẹ̀n nugbo bibasi po mahẹ zohunhun tọn tintindo to lizọnyizọn Klistiani tọn mẹ po dali, bo nọ to avase na kẹntọ Jiwheyẹwhe tọn lẹ na ‘azán Jehovah tọn’ he to sisẹpọ po niyaniya po.—Matiu 10:32, 33; Lomunu lẹ 10:9, 10.
Nujijọ Sinsinyẹn lẹ Tin to Yakẹ!
14. Etẹwẹ to tenọpọn sinsẹ̀n lalo?
14 Jehu yinuwa nado hẹn sinsẹ̀n-bibasi Baali tọn wá opodo to Islaeli. To azán mítọn gbè, gbọn Jehu Daho lọ, yèdọ Jesu Klisti gblamẹ, Jiwheyẹwhe na hẹn vasudo Babilọni Daho lọ tọn wá, yèdọ huhlọn aihọn sinsẹ̀n lalo tọn. To madẹnmẹ mí na mọ hẹndi hogbe angẹli lọ tọn hlan Johanu dọmọ: “Azò ao he hiẹ mọ to ota na kanlin lọ, ehelẹ wẹ na gbẹwanna ayọdetọ lọ [Babilọni Daho lọ], bo na basi i matinhuwhẹhomẹtọnọ, bosọ hẹn ẹn jẹmẹ́, yé na dù olàn etọn, bo nasọ yí miyọ́n do fiọ ẹ gbidigbidi. Na Jiwheyẹwhe ko yí do ayiha yetọn mẹ nado hẹn ojlo etọn di, nado dogbepọ, podọ nado yí ahọludu yetọn na kanlin lọ, kaka ohó Jiwheyẹwhe tọn nado di.” (Osọhia 17:16, 17; 18:2-5) ‘Azò ao lọ lẹ’ nọtena huhlọn tonudidọ tọn he to gandu to aigba ji. Dile etlẹ yindọ yé tindo haṣinṣan ayọdide tọn hẹ Babilọni Daho lọ todin, ojlẹ etọn whègli. Nugonu tonudidọ aihọn ehe tọn na và sinsẹ̀n lalo tọn sudo, podọ “kanlin ylankan lọ”—yèdọ Plidopọ Akọta lẹ tọn—na tindo azọngban titengbe de hẹ ‘azò ao lọ lẹ’ to viva ẹ sudo mẹ.b Lehe e yin ojlẹ gigopana Jehovah tọn do sọ!—Osọhia 19:1-6.
15. Etẹwẹ na jọ to whenuena afọdide yin zize nado và titobasinanu aigba ji Jiwheyẹwhe tọn sudo?
15 To mẹjijijẹ Ahọlu Jehu tọn sọta sinsẹ̀n-bibasi Baali tọn godo, owhé gigonọ etọn lẹ́ ayidonugo hlan kẹntọ tonudidọ Islaeli tọn lẹ. Ahọlu Jesu Klisti na yí onú dopolọ wà. Huhlọn tonudidọ tọn lẹ na gbọṣi aimẹ to vasudo sinsẹ̀n lalo taidi Baali tọn lẹ godo. To nuyiwadomẹji Satani Lẹgba tọn glọ, mẹhe diọnukunsọ nupojipetọ-yinyin Jehovah tọn lẹ na wleawu na mẹjijijẹ zohunhun tọn nado và titobasinanu aigba ji Jiwheyẹwhe tọn sudo. (Ezekiẹli 38:14-16) Ṣigba Jehovah na yí Ahọlu Jesu Klisti zan nado lìnu yé hù gbọn viva yé sudo to Amagẹdọni mẹ dali to, “awhàn azán daho Jiwheyẹwhe Ganhunupo tọn lọ gbè,” he na hẹn whẹsuna nupojipetọ-yinyin Jehovah tọn wá podo.—Osọhia 16:14, 16; 19:11-21; Ezekiẹli 38:18-23.
Devizọnwiwa po Zohunhun Eliṣa Tọn Po
16, 17. (a) Nawẹ mí yọnẹn gbọn dọ Eliṣa yin zohunhunnọ kakajẹ podo gbẹzan etọn tọn? (b) Etẹwẹ mí dona wà po ogá nugbo tọn lọ lẹ po?
16 Kakajẹ whenuena ‘azán Jehovah tọn’ na hẹn opodo wá na titonu ylankan Satani tọn lọ blebu, devizọnwatọ Jiwheyẹwhe tọn lẹ na yin adọgbotọ po zohunhunnọ po taidi Eliṣa. Gbọnvona azọ́n etọn taidi mẹdemẹ Elija tọn, Eliṣa wà sinsẹ̀nzọn ede ṣokẹdẹ taidi yẹwhegan Jehovah tọn na owhe 50! Podọ Eliṣa yin zohunhunnọ jẹ opodo gbẹzan gaa etọn tọn. Ojlẹ vude jẹnukọnna okú etọn, e yin dlapọn basina gbọn ovivi Jehu tọn, Ahọlu Joaṣi dali. Eliṣa dọ na ẹn nado dè ogá de gbọn fleṣenu. Oga lọ jẹ nuhe go e dona jẹ lọ, podọ Eliṣa dawhá dọmọ: “Ogá awhàngba Oklunọ tọn tọn, yèdọ ogá awhàngba tọn to Silia ji: na hiẹ na hò Silianu lẹ to Afẹki mẹ, kaka hiẹ ko do sú yé do.” To obiọ Eliṣa tọn mẹ, Joaṣi sọ vọ́ ogá lọ dè do aigba whladopo dogọ. Ṣigba e wà ehe po zohunhun matindo po, bo dè whlaatọ̀n poun. Enẹgodo Eliṣa dọ dọ, taidi kọdetọn de, Joaṣi na yin nina awhàngbigba whlaatọ̀n kẹdẹ do Silia ji, podọ enẹ wẹ nuhe jọ lọ. (2 Ahọlu lẹ 13:14-19, 25) Ahọlu Joaṣi ma hò Silianu lẹ liai to gigọ́mẹ, ‘jẹ otẹn godo tọn mẹ’ gba.
17 Ṣigba, po zohunhun po taidi enẹ heyin Eliṣa tọn, pipotọ yiamisisadode lẹ zindonukọn to avùn lọ mẹ sọta sinsẹ̀n bibasi lalo tọn lẹ. Gbẹdohẹmẹtọ yetọn he tindo todido aigba ji tọn lẹ to onú dopolọ wà. Humọ, mẹlẹpo he to nukundo nado lùn ‘azán Jehovah tọn’ tọ́n na wà dagbe nado hẹn do ayiha mẹ hogbe zohunhun Eliṣa tọn lẹ dogbọn sisọ́ aigba sinsinyẹn dali. Mì gbọ mí ni yí ogá nugbo tọn bo gbọn zohunhun dali do dè hẹ yé—yèdọ pludopludo—mọwẹ, kakajẹ whenuena Jehovah na dọ dọ azọ́n mítọn hẹ yé ko yin tadona.
18. Nawẹ mí na basi zẹẹmẹ hogbe 2 Pita 3:11, 12 tọn lẹ gbọn?
18 ‘Azán Jehovah tọn’ to madẹnmẹ na hẹn opodo wá na titonu ylankan dinwhenu tọn. Enẹwutu mì gbọ mí ni yin zodolanmẹna gbọn ohó ahunfọndotenamẹ apọsteli Pita tọn lẹ dali. “Le onú helẹ pó na yọ́ kọnyingbe nẹ,” wẹ Pita dọ, “omẹ na hunkọ wẹ mìwlẹ lo yín to owalọ wiwe lẹpo mẹ, to jijọ-di-Jiwheyẹwhe tọn mẹ, na mì ni to nukundo, bosọ to mizọnmizọn ji hlan wiwá azán Jiwheyẹwhe tọn tọn! (2 Pita 3:11, 12) To whenuena adà titonu ehe tọn lẹpo na yọ́ gbọn miyọ́n homẹgble Jiwheyẹwhe tọn didohia gbọn Jesu Klisti mẹ dali, mẹhe tindo kandai walọyizan jijlọ po mẹdezejo jijọ-di-Jiwheyẹwhe tọn lẹ po kẹdẹ wẹ na lùntọ́n. Walọ dagbe po wiwejininọ gbigbọmẹ tọn po yin dandan. Mọdopolọ wẹ owanyi na gbẹtọvi hatọ lẹ, he nọ yin didohia gbọn gbeyiyi na nuhudo yetọn lẹ dali, na titengbe tọn to aliho gbigbọmẹ tọn mẹ gbọn lizọnyizọn Klistiani tọn dali.
19. Etẹwẹ mí dona wà nado lùn ‘azán Jehovah tọn’ tọ́n?
19 Be hogbe towe po walọyizan towe lẹ po nọ dowe hia taidi nugbonọ po devizọnwatọ zohunhunnọ Jiwheyẹwhe tọn lẹ po ya? Eyin mọwẹ, hiẹ sọgan tindo todido lùnlùn ‘azán Jehovah tọn’ tọ́n tọn to aihọn yọ́yọ́ dopagbe Jiwheyẹwhe tọn mẹ. Mọwẹ, lunluntọ́n sọgan yin numimọ towe eyin hiẹ wà dagbe na mẹmẹsunnu gbigbọmẹ tọn Klisti tọn lẹ na yé yin hodotọ etọn lẹ wutu, dile asu po asi po Ṣunaminu lọ yíjonọ Eliṣa tọn do. Nado lùntọ́n hiẹ sọ dona taidi Naamani, he gbọn huwhẹ dali kẹalọyi nuplọnmẹ sọn olọn mẹ wá bo lẹzun sinsẹ̀n-basitọ Jehovah tọn de. Eyin hiẹ jlo nado nọgbẹ̀ to paladisi aigba ji tọn de mẹ, hiẹ dona basi dohia godonọnamẹ sọn ahun mẹ wá tọn na sinsẹ̀n-bibasi nugbo, dile Jehonadabi wà do. To whelọnu lo hiẹ sọgan tin to devizọnwatọ nugbonọ Jehovah tọn lẹ ṣẹnṣẹn, he to madẹnmẹ na tindo numimọ hẹndi hogbe Jesu tọn lẹ tọn dọmọ: “Mì wá, mì donanọ Otọ́ ṣie tọn, mì dugu ahọludu he yè ko wleawu etọn dai na mì sọn dòdó aihọn tọn wá.”—Matiu 25:34.
[Nudọnamẹ Odò Tọn]
a Pọ́n weta 18 po 19 po owe lọ “Que ton nom soit sanctifié,” heyin zinzinjẹgbonu gbọn Watchtower Bible and Tract Society of New York, Inc. dali.
b Pọ́n weda 254-6 Osọhia—Hẹndi Pete Etọn Sẹpọ! mẹ, yin zinzinjẹgbonu gbọn Watchtower Bible and Tract Society of New York, Inc. dali.
Nawẹ Hiẹ Na Na Gblọndo Gbọn?
◻ Nuhudo jẹhẹnu tẹlẹ tọn wẹ mí tindo nado sọgan lùn ‘azán Jehovah tọn’ tọ́n?
◻ Apajlẹ tẹwẹ yin zizedai gbọn asu po asi po Ṣunaminu lọ to azán Eliṣa tọn gbè dali?
◻ Nuplọnmẹ tẹwẹ sọgan yin pinplọn sọn Naamani dè?
◻ Nawẹ mí sọgan hodo apajlẹ Jehonadabi tọn gbọn?
◻ Nawẹ 2 Pita 3:11, 12 dona yinuwa do mí ji gbọn?