Mì Yí Mawazẹjlẹgo Dogọ Oyọnẹn Mìtọn
‘Mì yí mawazẹjlẹgo dogọ oyọnẹn mìtọn.’—2 PITA 1:5-8.
1. Awugbopo tẹwẹ nọ hẹn suhugan nuhahun gbẹtọvi lẹ tọn wá?
TO NUJIJLA titengbe de sọta amasin-adínọ ṣiṣizan whenu, ayinamẹ yin nina jọja lẹ to États-Unis dọmọ: “Saa dọ lala poun.” Lehe ninọmẹ lẹ na pọnte do sọ eyin mẹlẹpo na nọ dọ lala poun e mayin na amasin-adínọ lẹ kẹdẹ gba ṣigba na ahànnu zẹjlẹgo, gbẹzan ylankan kavi fẹnnuwiwa tọn lẹ, ajọwiwa nugbomadọ tọn lẹ, podọ na ‘wantuntun agbasalan tọn lẹ’ ga! (Lomunu lẹ 13:14) Ṣogan, mẹnu wẹ na sọalọakọ́n dọ lala didọ nọ bọawu to whepoponu?
2. (a) Apajlẹ Biblu tọn tẹlẹ wẹ dohia dọ sọn dowhenu wẹ e ko vẹawu nado dọ lala na ylanwiwa? (b) Etẹwẹ apajlẹ ehelẹ dona na tuli mí nado wà?
2 To whenuena e yindọ gbẹtọvi mapenọ lẹpo wẹ e nọ vẹawu na nado yí mawazẹjlẹgo zan, mí dona jlo nado plọn lehe mí sọgan dùto ylanwiwa depope he pannukọn mí ji do. Biblu dọna mí dogbọn mẹdelẹ dali he dovivẹnu nado sẹ̀n Jiwheyẹwhe ṣigba he e nọ vẹawuna to whedelẹnu nado dọ lala na ylanwiwa. Flin Davidi po ylando ayọdide tọn he e wà hẹ Bati-ṣeba po. E hẹn okú wá na homẹvọnọ awe, yèdọ ovi he yé mọhò etọn to ayọdide lọ mẹ podọ asu Bati-ṣeba tọn ga. (2 Samuẹli 11:1-27; 12:15-18) Kavi lẹnnupọn do apọsteli Paulu ji, mẹhe yigbe tlọlọ dọmọ: “Na dagbe he yẹn jlo yẹn ma wà, ṣigba ylankan he yẹn ma jlo, enẹ wẹ yẹn to wiwà.” (Lomunu lẹ 7:19) Be hiẹ nọ tindo numọtolanmẹ flumẹjijẹ tọn dopolọ to whedelẹnu ya? Paulu zindonukọn dọmọ: “Yẹn hùnhomẹ to osẹ́n Jiwheyẹwhe tọn mẹ dile gbẹtọ homẹ tọn te: ṣigba yẹn sọ mọ osẹ́n devo de to awutugonu ṣie lẹ mẹ he to awhànfun hẹ osẹ́n ohò ṣie mẹ tọn, bosọ to hinhẹn mi wá mẹglọnọ hlan osẹ́n ylando tọn he tin to awutugonu ṣie lẹ mẹ. Ṣo! tapònọ he yẹn yin! Mẹnu wẹ na whlẹn mi sọn agbasa okú tọn he si?” (Lomunu lẹ 7:22-24) Apajlẹ Biblu mẹ tọn lẹ dona hẹn gbemima mítọn lodo ma nado gbọjọ gbede to avùnhiho mítọn nado tindo mawazẹjlẹgo he yiaga mẹ.
Mawazẹjlẹgo, Nude He Dona Yin Pinplọn
3. Basi zẹẹmẹ nuhewutu mí ma sọgan donukun dọ e na bọawu nado do mawazẹjlẹgo hia.
3 Mawazẹjlẹgo, he bẹ nugopipe lọ nado dọ lala na ylanwiwa hẹn, yin nùdego to 2 Pita 1:5-7 mẹ to pọmẹ hẹ yise, jijọ dagbe, oyọnẹn, akọndona, jijọ-di-Jiwheyẹwhe, owanyi mẹmẹsunnu tọn, po owanyi po. Mẹde ma nọ yin jiji po depope to jẹhẹnu dagbe devo ehelẹ mẹ po gba. Yé dona yin awuwlena wẹ. Nado do yé hia ganji nọ biọ gbemima po vivẹnudido po. Enẹwutu be mí dona donukun dọ mawazẹjlẹgo ni bọawu wẹ ya?
4. Naegbọn mẹsusu nọ lẹndọ yé ma tindo nuhahun to mawazẹjlẹgo didohia mẹ, ṣigba etẹwẹ ehe dohia?
4 Nugbo wẹ dọ, mẹsusu sọgan lẹndọ yé ma tindo nuhahun to mawazẹjlẹgo didohia mẹ gba. Yé nọ wà nuhe jlo yé, bo nọ to nuyiwa sọn ojlo mẹ kavi to mayọnẹn mẹ sọgbe hẹ ojlo agbasa mapenọ yetọn tọn bo ma nọ lẹnnupọn sọmọ gando kọdetọn etọn lẹ go—vlavo na yedelẹ kavi na mẹdevo lẹ. (Juda 10) Nugomape kavi ojlo matindo nado dọ lala na ylanwiwa ko gbayipe todin hú gbede pọ́n tọn. Ehe dohia na taun tọn dọ mí to gbẹ̀nọ to ‘azán godo tọn lẹ’ mẹ ehe Paulu dọho etọn to whenuena e dọ dọdai dọmọ: “Ojlẹ awusinyẹn tọn lẹ na wá. Na gbẹtọ lẹ na lẹzun owanyi na yede tọ́, nukunkẹnnọ, awagundotọ, saklanọ, nùzantọ, . . . [wazẹjlẹgonọ].”—2 Timoti 3:1-3.
5. Naegbọn Kunnudetọ Jehovah tọn lẹ tindo ojlo to hodidọ do mawazẹjlẹgo ji mẹ, podọ ayinamẹ tẹwẹ gbẹ́ sọgbe?
5 Avùnnukundiọsọmẹ he tin to awuwiwlena mawazẹjlẹgo mẹ yin yinyọ́n ẹn ganji gbọn Kunnudetọ Jehovah tọn lẹ dali. Taidi Paulu, yé yọ́n lehe ojlo agbasa mapenọ tọn mítọn nọ hẹn ẹn vẹawu na mí do nado hẹn homẹ Jiwheyẹwhe tọn hùn gbọn gbẹninọ sọgbe hẹ nujinọtedo etọn lẹ dali. Ehe wẹ zọ́n bọ yé ko tindo ojlo sọn whenu dindẹn die to lehe yé sọgan dùto avùnnukundiọsọmẹ ehe ji gbọn mẹ. Sọn 1916 gbọ́n wẹ zinjẹgbonu linlinnamẹwe he mí to hihia to alọnu ehe tọn ko dọho gando “afọdide he sọgbe he mí dona ze nado deanana mídelẹ, linlẹn mítọn lẹ, ohó mítọn po walọ mítọn lẹ po” go. E na ayinamẹ nado nọ hẹn Filippinu lẹ 4:8 do ayiha mẹ. Ayinamẹ gbọdo he tin to wefọ enẹ mẹ gbẹ́ sọgbe, dile etlẹ yindọ e ko yin nina sọn nudi owhe 2 000 lẹ die bo tlẹ sọgan vẹawu nado hodo todin hú whenue e yin kinkàn kavi to 1916. Etomọṣo, Klistiani lẹ nọ dovivẹnu vẹkuvẹku nado dọ lala na ojlo aihọn tọn lẹ, na yé yọnẹn dọ mọwiwà yetọn zẹẹmẹdo mọwẹ didọ na Mẹdatọ yetọn.
6. Naegbọn mí ma tindo whẹwhinwhẹ́n depope nado gbọjọ to awuwiwlena mawazẹjlẹgo mẹ?
6 Mawazẹjlẹgo yin nùdego to Galatianu lẹ 5:22, 23 mẹ taidi apadewhe ‘sinsẹ́n gbigbọ wiwe tọn.’ Eyin mí nọ do jẹhẹnu ehe hia to pọmẹ hẹ “owanyi, ayajẹ, jijọho, linsinyẹn, homẹdagbe, dagbewà, [yise], walọmimiọn,” e na hẹn ale susu wá na mí. Dile Pita basi zẹẹmẹ do, mọwiwà na glọnalina mí ma nado lẹzun “adidọnọ, kavi madosinsẹ́nnọ” to sinsẹ̀nzọn mítọn hlan Jiwheyẹwhe mẹ. (2 Pita 1:8) Ṣigba mí ma dona gbọjọ kavi gblewhẹdo mídelẹ gba eyin mí gboawupo nado do jẹhẹnu ehelẹ hia to niyaniya mẹ kavi to gigọ́mẹ dile mí jlo do. Vlavo hiẹ na ko doayi e go dọ wehọmẹvi de nọ yawu sewé hú devo to wehọmẹ. Kavi to azọ́nmẹ, mẹde nọ yawu yọ́n azọ́n yọyọ de hú azọ́nwatọgbẹ́ etọn lẹ. Mọdopolọ, mẹdelẹ nọ plọn nado nọ do jẹhẹnu Klistiani tọn lẹ hia to niyaniya mẹ hú mẹdevo lẹ. Nuhe yin nujọnu lọ wẹ nado zindonukọn nado to awuwlena jẹhẹnu dagbe lẹ jẹ obá he mẹ nugopipe mítọn jẹ. Mí sọgan wà ehe gbọn alọkikẹyi alọgọ he Jehovah nọ na mí to Ohó po agun etọn po mẹ dali. Jijẹ yanwle mítọn lẹ kọ̀n to niyaniya mẹ ma yin nujọnu sọ vivẹnudido vẹkuvẹku nado to nukọnzindo zọnmii gba.
7. Etẹwẹ dohia dọ mawazẹjlẹgo yin nujọnu?
7 Dile mawazẹjlẹgo tlẹ yin sislẹ gbọngodo to sinsẹ́n gbigbọ tọn mẹ, ehe ma dohia dọ jẹhẹnu he jẹnukọn lẹ yin nujọnu hú i gba. Kakatimọ, mí dona hẹn do ayiha mẹ dọ mí sọgan dapana “azọ́n agbasalan tọn” lẹpo eyin mí tindo mawazẹjlẹgo to gigọ́mẹ. Ṣogan, gbẹtọvi mapenọ lẹ nọ tindo ayilinlẹn lọ nado joawuna “azọ́n agbasalan tọn lẹ . . . , ayọdide, galilọ, mawé, wantuntun, boṣiọ-sinsẹ̀n, owọ́n, okẹ̀n, avùn, awuwhàn lẹ, homẹgble, wiwọ́, atẹ̀, plọngiglọ.” (Galatianu lẹ 5:19, 20) Enẹwutu, mí dona to avùnho to whepoponu, bo magbe nado de ayilinlẹn ylankan lẹ sẹ̀ sọn ahun po ayiha mítọn lẹ po mẹ.
Mẹdelẹ Dona Hoavùn Sinsinyẹn
8. Ninọmẹ tẹlẹ wẹ nọ hẹn mawazẹjlẹgo didohia vẹawu taun na mẹdelẹ?
8 E nọ vẹawu taun na Klistiani delẹ hú devo lẹ nado do mawazẹjlẹgo hia. Etẹwutu? Oplọn mẹjitọ lẹ tọn kavi numimọ he wayi lẹ sọgan hẹn ẹn vẹawu dogọ. Eyin awuwiwlena mawazẹjlẹgo po dido e hia po ma ko yin nuhahun de na mí, enẹ dona hẹn mí jaya. Ṣigba na taun tọn, mí dona yin awuvẹmẹtọ po nukunnumọjẹnumẹtọ po to whenuena mí to nuyiwa hẹ mẹhe e nọ vẹawuna taun nado do e hia lẹ, eyin awugbopo yetọn nado do mawazẹjlẹgo hia tlẹ fọ́n nuhahun delẹ dote na mí. Na mape mítọn wutu, mẹnu to mí mẹ wẹ tindo whẹwhinwhẹ́n depope nado jlá ede di dodonọ?—Lomunu lẹ 3:23; Efesunu lẹ 4:2.
9. Madogán tẹlẹ wẹ mẹdelẹ tindo, podọ whetẹnu wẹ madogán ehelẹ na yin dududeji mlẹnmlẹn?
9 Di dohia: Mí sọgan yọnẹn dọ Klistiani hatọ mítọn delẹ he ko jo taba nùnù kavi amasin-adínọ “ayidedai” tọn lẹ do sọgan gbẹ́ nọ tindo ojlo sinsinyẹn na yé to whedelẹnu. Kavi avùnnukundiọsọmẹ wẹ e nọ yin na mẹdelẹ nado dealọpòna núdùdù he yé nọ dù kavi ahàn sinsinyẹn lẹ. E nọ vẹawu na mẹdelẹ nado dava odẹ́ yetọn, enẹwutu yé nọ yawu ṣì hodọ. Nado dùto awugbopo enẹlẹ ji nọ biọ vivẹnudido sọwhiwhe tọn to awuwiwlena mawazẹjlẹgo mẹ. Etẹwutu? Jakobu 3:2 yigbe tlọlọ dọmọ: “Na onú susu mẹ wẹ mí omẹ popo to ylanwa te. Eyin mẹde ma waylan to ohó mẹ, ewọ lọ wẹ sọgbe, ewọ wẹ sọgan dogànnuna agbasa lẹpo ga.” Humọ, mẹdelẹ nọ tindo ojlo sinsinyẹn nado hòakọ. Kavi e sọgan vẹawu na mẹdelẹ nado dava yede ma nado nọ yawu gblehomẹ. E sọgan biọ whenu susu nado plọn lehe yè sọgan dùto madogán ehelẹ po devo lẹ po ji do. Dile etlẹ yindọ mí sọgan dovivẹnu bo dùto ojlo ylankan lẹ ji todin, to whenuena mí jẹ pipé-yinyin kọ̀n kẹdẹ wẹ yé na yin didesẹ mlẹnmlẹn. Ṣigba todin, vivẹnudido nado nọ yí mawazẹjlẹgo zan wẹ na gọalọna mí ma nado vọ́ tlọ́ biọ gbẹzan ylanwiwa tọn mẹ. Dile mí zindonukọn to avùnhiho lọ mẹ, mì gbọ mí ni gọalọna ode awetọ mítọn ma nado gbọjọ.—Owalọ lẹ 14:21, 22.
10. (a) Naegbọn mawazẹjlẹgo yiyizan to whẹho zanhẹmẹ tọn lẹ mẹ do yin avùnnukundiọsọmẹnu titengbe na mẹdelẹ? (b) Diọdo nujọnu tọn tẹwẹ mẹmẹsunnu de basi? (Pọ́n apotin weda 16 tọn.)
10 Whẹho zanhẹmẹ tọn wẹ yin adà devo he mẹ e nọ vẹawu na mẹdelẹ te nado yí mawazẹjlẹgo zan. Dile Jehovah Jiwheyẹwhe dá mí do, zanhẹmẹ yin jọwamọnu de. Ṣogan, e nọ vẹawu na mẹdelẹ taun nado hẹn zanhẹmẹ do otẹn etọn mẹ, to gbesisọmẹ hẹ nujinọtedo Jiwheyẹwhe tọn lẹ. Ojlo zanhẹmẹ tọn sinsinyẹn he yé tindo sọgan sọ hẹn nuhahun yetọn sinyẹn dogọ. Mí to gbẹ̀nọ to aihọn de mẹ he ko hunnukun agọ̀ do zanhẹmẹ mẹ bo nọ tẹnpọn nado fọ́n ojlo agọ̀ dote namẹ to aliho susu mẹ. Ehe sọgan fọ́n nuhahun delẹ dote na Klistiani he jlo na gbọṣi tlẹnmẹ lẹ—e whè gbau na ojlẹ de—nado sẹ̀n Jehovah matin ayihafẹsẹnamẹnu alọwle tọn lẹ. (1 Kọlintinu lẹ 7:32, 33, 37, 38) Ṣigba to kọndopọmẹ hẹ ayinamẹ Owe-wiwe tọn he dọ “e pọnte nado wlealọ hú nado túnwán,” yé sọgan basi dide nado wlealọ, podọ ehe tindo yẹyi na nugbo tọn. Mọdopolọ, yé nọ magbe nado wlealọ “to Oklunọ mẹ kẹdẹ,” dile Owe-wiwe na ayinamẹ etọn do. (1 Kọlintinu lẹ 7:9, 39) Mí sọgan deji dọ Jehovah nọ jaya na ojlo he yé tindo nado setonuna nunọwhinnusẹ́n dodo etọn lẹ. Klistiani hatọ yetọn lẹ nọ jaya nado to gbẹdo hẹ sinsẹ̀ntọ nugbo lẹ he nọ hodo nujinọtedo he yiaga mọnkọtọn lẹ bosọ yin tenọglinọ.
11. Nawẹ mí sọgan gọalọna mẹmẹsunnu kavi mẹmẹyọnnu de he jlo nado wlealọ ṣigba he ma ko penugo nado wàmọ gbọn?
11 Eyin alọwlemẹ he sọgbe de ma yin mimọ lo? Yí nukun homẹ tọn do pọ́n lehe mẹde sọgan jẹflumẹ sọ eyin e jlo nado wlealọ ṣigba bo ma ko penugo nado wàmọ! E sọgan mọ họntọn etọn lẹ to alọwle bo to ayajẹ tindo jẹ obá de mẹ, bọ ewọ gbẹ́ pò to alọwlemẹ he jẹna ẹn de dín. Na mẹdelẹ he tin to ninọmẹ enẹ mẹ, walọ mawé vijinu-yido-daihun tọn sọgan wá lẹzun nuhahun tẹgbẹ tọn de. Depope he whẹho lọ yin, Klistiani de ma na jlo nado hẹn hatọ etọn he to vivẹnudo nado gbọṣi wiweji gbọjọ gba. To mayọnẹn mẹ, mí sọgan hẹnmẹ gbọjọ eyin mí nọ kàn kanbiọ mẹtọnmahopọn tọn lẹ sè taidi, “Whetẹnu wẹ hiẹ jlo na wlealọ taun?” Enẹ sọgan yin didọ matin linlẹn ylankan de, ṣigba lehe e na pọnte hugan nado do mawazẹjlẹgo hia gbọn hihọ́ hogbe mítọn lẹ dali do sọ! (Psalm 39:1) Tlẹnnọ he tin to mí mẹ bo gbẹ́ hẹn wiweji-ninọ yetọn go lẹ jẹna pipà owanyinọ mítọn. Kakati nado nọ dọ nuhe na hẹn yé gbọjọ lẹ, mí sọgan dovivẹnu nado nọ na tuli yé. Di dohia, mí sọgan tẹnpọn nado basi oylọna tlẹnnọ lẹ to whenuena pipli mẹhe whèwhín lẹ tọn de basi tito nado pli dopọ na núdùdù de kavi na gbẹdido mẹjlọdote Klistiani tọn.
Mawazẹjlẹgo to Alọwle Mẹ
12. Naegbọn mẹhe tlẹ ko wlealọ lẹ do tindo nuhudo mawazẹjlẹgo tọn jẹ obá de mẹ?
12 Alọwiwle, to ede mẹ, ma nọ de nuhudo lọ na mawazẹjlẹgo to whẹho zanhẹmẹ tọn lẹ mẹ sẹ̀ gba. Di apajlẹ, nuhudo zanhẹmẹ asu tọn sọgan gbọnvo taun na asi tọn. Kavi ninọmẹ agbasa alọwlemẹ dopo tọn sọgan hẹn kọndopọ zanhẹmẹ tọn vẹawu kavi tlẹ hẹn ẹn yin nuhe ma yọnbasi to ojlẹ delẹ mẹ. Vlavo na nuhe ko jọ wayi lẹ wutu, e sọgan sinyẹnawuna alọwlemẹ dopo nado setonuna ayinamẹ lọ he dọmọ: “Mì gbọ asu lọ ni wà jlodagbe he jẹ hlan asi; mọkẹdẹ wẹ asi ni nọ wà hlan asu ga.” To ninọmẹ mọnkọtọn mẹ, e sọgan biọ dọ omẹ awetọ lọ ni yí mawazẹjlẹgo susu zan. Ṣigba yé omẹ awe lẹ sọgan hẹn ayinamẹ owanyinọ Paulu tọn hlan Klistiani he ko wlealọ lẹ do ayiha mẹ dọmọ: ‘Mì tẹ̀ ẹ ode awetọ mìtọn blo, adavo e yin po gbeyiyi po na osaa de, na mì nido jo mìde na odẹ̀; bosọ gọwá nọpọ́, na Satani ma nado whlé mì pọ́n na temanọ mìtọn wutu.’—1 Kọlintinu lẹ 7:3, 5.
13. Etẹwẹ mí sọgan wà do ota mẹhe to vivẹnudo nado yí mawazẹjlẹgo zan lẹ tọn mẹ?
13 Lehe asu po asi po lẹ dona dopẹ́ do sọ eyin yé omẹ awe lẹ ko plọn nado yí mawazẹjlẹgo zan ganji to alọwle yetọn mẹ. Mọdopolọ, yé dona nọ do nukunnumọjẹnumẹ hia na sinsẹ̀n-basitọ hatọ lẹ he gbẹ́ pò to vivẹnudo nado do e hia to adà enẹ mẹ. Mí ma dona wọnji gbede nado hodẹ̀ na Jehovah nado na mẹmẹsunnu gbigbọmẹ tọn mítọn lẹ wuntuntun, adọgbigbo, po gbemima po nado zindonukọn to avùnhiho yetọn mẹ nado do mawazẹjlẹgo hia podọ nado ze afọdide lẹ nado dùto ojlo ylankan lẹ ji.—Filippinu lẹ 4:6, 7.
Mì to Alọgọna Ode Awetọ Mìtọn Zọnmii
14. Naegbọn mí dona do awuvẹmẹ po nukunnumọjẹnumẹ po hia Klistiani hatọ lẹ to nuyiwa hẹ yé mẹ?
14 E sọgan vẹawu na mí to whedelẹnu nado mọnukunnujẹ Klistiani hatọ mítọn lẹ mẹ he to kanván nado do mawazẹjlẹgo hia to adà he ma yin nuhahun na mí de mẹ. Ṣigba mí gbọnvona mídelẹ to jọwamọ-liho. Mẹdelẹ nọ yawu do numọtolanmẹ hia; ṣigba e ma yinmọ na mẹdevo lẹ. E nọ bọawu na mẹdelẹ nado dava yedelẹ, enẹwutu mawazẹjlẹgo ma yin nuhahun de na yé gba. E nọ vẹawu na mẹdevo lẹ. Ṣogan, flindọ, mẹhe to kanván nado dùto ninọmẹ de ji ma yin mẹylankan gba. Klistiani hatọ lẹ tindo nuhudo nukunnumọjẹnumẹ po awuvẹmẹ mítọn tọn po. Mílọsu lẹ na tindo ayajẹ dile mí zindonukọn nado to lẹblanu dohia mẹhe to kanván nado do mawazẹjlẹgo hia to gigọ́mẹ lẹ. Mí sọgan mọ ehe to ohó Jesu tọn lẹ mẹ heyin kinkàndai to Matiu 5:7.
15. Naegbọn hogbe Psalm 130:3 tọn lẹ do yin homẹmiọnnamẹnu de to mawazẹjlẹgo didohia mẹ?
15 Mí ma dona dawhẹ agọ̀ gbede na Klistiani hatọ de he gboawupo to ojlẹ delẹ mẹ nado do gbẹtọ-yinyin Klistiani tọn hia. Lehe e yin tulinamẹnu do sọ nado yọnẹn dọ e mayin awugbopo vlavo tọn ehelẹ kẹdẹ wẹ Jehovah nọ mọ gba, ṣigba e sọ nọ mọ vivẹnu susu he mí to dido nado do mawazẹjlẹgo hia, eyin Klistiani hatọ mítọn lẹ ma tlẹ doayi yé go. Homẹmiọnnamẹnu taun de wẹ e yin nado hẹn hogbe Psalm 130:3 tọn lẹ do ayiha mẹ dọmọ: “Oklunọ E, mẹnu wẹ sọgan ṣite, eyin hiẹ, OKLUNỌ na payiha ylando go?”
16, 17. (a) Nawẹ mí sọgan yí Galatianu lẹ 6:2, 5 do yizan mẹ to mawazẹjlẹgo didohia mẹ gbọn? (b) Etẹwẹ mí na gbadopọnna dogbọn mawazẹjlẹgo dali to hosọ he bọdego mẹ?
16 Nado hẹn homẹ Jehovah tọn hùn, dopodopo mítọn lẹ dona wleawuna mawazẹjlẹgo, ṣigba mí sọgan deji dọ Klistiani hatọ lẹ na gọalọna mí. Dile etlẹ yindọ dopodopo mítọn lẹ wẹ na hẹn agbàn ede tọn, etomọṣo mí yin tudohomẹna nado gọalọna ode awetọ mítọn lẹ nado dùto madogán lẹ ji. (Galatianu lẹ 6:2, 5) Mí dona nọ dopẹna mẹjitọ, alọwlemẹ, kavi họntọn de he nọ glọnalina mí ma nado yì fie mí ma dona yì lẹ, ma nado pọ́n nuhe mí ma dona mọ lẹ, kavi ma nado wà nuhe mí ma dona wà lẹ. Alọgọna mí wẹ e te nado do mawazẹjlẹgo hia, yèdọ nugopipe lọ nado dọ lala na ylanwiwa bosọ kudeji!
17 Klistiani susu sọgan kọngbedopọ hẹ nuhe mí ko gbadopọnna kakajẹ dín dogbọn mawazẹjlẹgo dali, ṣigba yé sọgan mọdọ yé gbẹsọ dona basi vọjlado susu to gbẹzan yetọn mẹ. Yé na jlo nado do mawazẹjlẹgo hia to gigọ́mẹ, jẹ obá he mẹ gbẹtọvi mapenọ lẹ sọgan do e hia jẹ. Be hiẹ lọsu tindo numọtolanmẹ enẹ wẹ ya? To whelọnu lo, etẹwẹ a sọgan wà nado wleawuna sinsẹ́n gbigbọ Jiwheyẹwhe tọn ehe? Podọ nawẹ ehe wiwà sọgan gọalọna we nado jẹ yanwle whenu dindẹn die tọn towe lẹ kọ̀n taidi Klistiani de gbọn? Mì gbọ mí ni gbadopọnna ehelẹ to hosọ he bọdego mẹ.
Be Hiẹ Flin Ya?
Naegbọn Mawazẹjlẹgo Do Yin . . .
• nujọnu na Klistiani lẹ nado wleawuna?
• avùnnukundiọsọmẹ titengbe de na mẹdelẹ?
• dandan to alọwle mẹ?
• jẹhẹnu de he mí sọgan gọalọna mẹdevo lẹ nado wleawuna?
[Apotin/Yẹdide to weda 16]
E Plọn Nado Dọ Lala
Dopo to Kunnudetọ Jehovah tọn lẹ mẹ to Allemagne yin yíyí do azọ́nmẹ nado nọ penukundo maṣinu he nọ ze ogbè do jẹhọn mẹ lẹ go. Azọ́n etọn wẹ nado nọ penukundo tito voovo 30 televiziọn po ladio po tọn delẹ go. Eyin bẹwlu de jọ, e dona na ayidonugo hlan tito lọ nado sọgan yọ́n fie nuhahun lọ wá sọn. E dọmọ: “E taidi dọ bẹwlu lẹ nọ saba jọ to ojlẹ he ma sọgbe lẹ mẹ, yèdọ to whenuena adà danuwiwa kavi fẹnnuwiwa tọn de to yinyin didohia. Adà ylankan he yin didohia lẹ nọ dibla gbọṣi ayiha ṣie mẹ na azán susu kavi osẹ susu, taidi dọ yé yin titlẹ́ do apọ̀n ṣie mẹ wẹ nkọ.” E yigbe dọ ehe tindo nugandomẹgo ylankan do gbigbọnọ-yinyin etọn ji: “Yẹn yin mẹde he nọ yawu dù-adì, enẹwutu adà danuwiwa tọn lẹ nọ hẹn ẹn vẹawu na mi nado yí mawazẹjlẹgo zan. Adà fẹnnuwiwa tọn lẹ nọ fọ́n tukla dote to yẹn po asi ṣie po ṣẹnṣẹn. Avùnnukundiọsọmẹ de wẹ e yin na mi egbesọegbesọ. Nado sọgan dùto e ji, yẹn basi dide nado dín azọ́n devo, eyin akuẹ etọn ma tlẹ sù. To madẹnmẹ, yẹn mọ azọ́n devo. Ojlo ṣie ko yin hinhẹndi.”
[Yẹdide to weda 15]
Oyọnẹn Biblu tọn nọ gọalọna mí nado yí mawazẹjlẹgo zan