WETA 11
Mì Gbọ Alọwle Ni Yin Pinpọnhlan Taidi Nuhe Jẹna Sisi
“Jaya hẹ asi ovu whenu towe tọn.”—HOWHINWHẸN LẸ 5:18.
1, 2. Kanbiọ tẹwẹ mí na gbadopọnna, podọ etẹwutu?
BE HIẸ ko wlealọ wẹ ya? Eyin mọ wẹ, be alọwle towe to ayajẹ hẹnwa na we, kavi a to pipehẹ nuhahun sinsinyẹn alọwle tọn lẹ wẹ ya? Be owanyi he tin to hiẹ po alọwlemẹ towe po ṣẹnṣẹn to didepo wẹ ya? Be hiẹ to akọndona gbẹzan alọwle tọn bo ma to ayajẹ mọ to e mẹ wẹ ya? Eyin mọ wẹ, e sọgan vẹna we dọ haṣinṣan pẹkipẹki alọwle tọn he a to vivi etọn dù dai ko miọn. Matin ayihaawe, taidi Klistiani de, hiẹ na jlo dọ alọwle towe ni hẹn pipà wá na Jehovah, Jiwheyẹwhe he a yiwanna. Enẹwutu, ninọmẹ he mẹ hiẹ tin te todin lẹ sọgan nọ duahunmẹna we bo nọ hẹn we jẹflumẹ. Eyin etlẹ yinmọ, jaale ma wá tadona lọ kọ̀n dọ todido depope ma tin gando ninọmẹ towe go blo.
2 To egbehe, Klistiani alọwlemẹ susu wẹ to akọndonanu to alọwle yetọn mẹ, bo ma tindo haṣinṣan pẹkipẹki de hẹ yede. Ṣogan, yé mọ aliho de nado hẹn haṣinṣan yetọn lodo. Hiẹ lọsu sọgan mọ pekọ to alọwle towe mẹ dogọ. Gbọnna?
HIẸ SỌGAN DỌNSẸPỌ JIWHEYẸWHE PO ALỌWLEMẸ TOWE PO DOGỌ
3, 4. Naegbọn alọwlemẹ lẹ na dọnsẹpọ yede pẹkipẹki eyin yé dovivẹnu nado dọnsẹpọ Jiwheyẹwhe dogọ? Na apajlẹ.
3 Hiẹ po alọwlemẹ towe po na dọnsẹpọ mìde pẹkipẹki eyin mì dovivẹnu nado dọnsẹpọ Jiwheyẹwhe dogọ. Etẹwutu? Lẹnnupọndo apajlẹ de ji: Yí nukun homẹ tọn do pọ́n osó he tindo awusọhia okọ́ta de tọn—he gblo to odò bo bó to aga. Dawe de ṣite to odò osó lọ tọn to awà dopo ji to whenuena yọnnu de ṣite to awà awetọ ji. Yé omẹ awe lẹ jẹ osó lọ hẹ́ ji. Whenuena yé bẹ osó lọ hihẹ, yé dẹn do yede taun. Ṣogan, dile dopodopo yetọn zindonukọn to osó lọ hihẹ mẹ pànta aga, yé nọ jẹ sisẹpọ yede ji vudevude. Be hiẹ mọ nuplọnmẹ he vọ́ jidenamẹ lọ to apajlẹ ehe mẹ ya?
4 Vivẹnu he a nọ do nado sẹ̀n Jehovah to gigọ́ mẹ sọgan yin yiyijlẹdo vivẹnudido he e nọ biọ nado hẹ́ osó de ji go. To whenuena e yindọ hiẹ yiwanna Jehovah, mí sọgan dọ dọ a ko to vivẹnudo vẹkuvẹku nado hẹ́ osó ji to yẹhiadonu-liho. Ṣigba, eyin owanyi he tin to hiẹ po alọwlemẹ towe po ṣẹnṣẹn ko depò, e dohia dọ mì to osó enẹ hẹ́ sọn awà voovo awe ji. Nalete, etẹwẹ na jọ eyin mì zindonukọn to osó lọ hihẹ mẹ? Nugbo wẹ dọ mì sọgan dẹn do mìde tlala to whenuena mì bẹ osó lọ hihẹ tlolo. Etomọṣo, dile mì to vivẹnudo dogọ nado dọnsẹpọ Jiwheyẹwhe pẹkipẹki—yèdọ nado to osó lọ hẹ́ yiaga dogọ—mọ wẹ hiẹ po alọwlemẹ towe po na to dindọnsẹpọ mìde dogọ do niyẹn. Na nugbo tọn, aliho dagbe hugan nado dọnsẹpọ alọwlemẹ towe pẹkipẹki wẹ nado dọnsẹpọ Jiwheyẹwhe dogọ. Ṣigba nawẹ a sọgan wà enẹ gbọn?
Eyin oyọnẹn Biblu tọn yin yiyizan, e sọgan hẹn alọwle mìtọn lodo
5. (a) Etẹwẹ yin aliho dopo nado dọnsẹpọ Jehovah po alọwlemẹ mẹtọn po pẹkipẹki? (b) Nukun tẹwẹ Jehovah nọ yí do pọ́n alọwle?
5 Aliho titengbe dopo he mẹ hiẹ po alọwlemẹ towe po sọgan hẹ́ osó to yẹhiadonu-liho te wẹ nado nọ hodo ayinamẹ he tin to Ohó Jiwheyẹwhe tọn mẹ do alọwle ji lẹ. (Psalm 25:4; Isaia 48:17, 18) Enẹwutu, lẹnnupọndo adà tangan ayinamẹ apọsteli Paulu tọn de ji. E dọmọ: “Mì gbọ alọwle ni yin tintindo to gbégbigbò mẹ [kavi yin pinpọnhlan taidi nuhe jẹna sisi] to omẹ popo” nukọn. (Heblu lẹ 13:4) Etẹwẹ enẹ zẹẹmẹdo? Hogbe lọ, ‘jẹna sisi’ dohia dọ nude yin nujọnu bo họakuẹ. Podọ nukun he Jehovah nọ yí do pọ́n alọwle pẹpẹ niyẹn—enẹ wẹ nuhe yin nujọnu bo họakuẹ.
MẸWHINWHÀN TOWE —OWANYI AHUNDOPO TỌN NA JEHOVAH
6. Etẹwẹ lẹdo hodidọ Paulu tọn gando ayinamẹ he e na do alọwle ji go dohia, podọ naegbọn e do yin nujọnu nado hẹn enẹ do ayiha mẹ?
6 Na nugbo tọn, taidi devizọnwatọ Jiwheyẹwhe tọn lẹ, hiẹ po alọwlemẹ towe po yọnẹn dọ alọwle yin nuhọakuẹ bosọ yin onú wiwe. Jehovah lọsu wẹ ze tito alọwle tọn dai. (Matiu 19:4-6) Etomọṣo, eyin hiẹ to pipehẹ nuhahun alọwle tọn lẹ todin, yinyọnẹn poun dọ alọwle jẹna sisi sọgan nọma ko pé nado whàn hiẹ po alọwlemẹ towe po nado nọ yinuwa hẹ mìnọzo to owanyi po yẹyi po mẹ. To whelọnu lo, etẹwẹ na whàn we nado wàmọ? Yí sọwhiwhe do lẹnnupọndo lehe Paulu dọhodo gbégbò didohia ji do. Hodidọ Paulu tọn ma do nuhe go e doayi de poun hia gba, kakatimọ e dotuhomẹnamẹ dọmọ: “Mì gbọ alọwle ni yin tintindo to gbégbigbò mẹ” kavi yin pinpọnhlan taidi nuhe jẹna sisi.a Tudohomẹnamẹ ehe hinhẹn do ayiha mẹ sọgan whàn we nado vọ́ huhlọn na owanyi he a tindo na alọwlemẹ towe. Naegbọn e do yinmọ?
7. (a) Gbedide Owe-wiwe tọn tẹlẹ wẹ mí nọ setonuna, podọ etẹwutu? (b) Kọdetọn dagbe tẹlẹ wẹ nọ wá sọn tonusise mẹ?
7 Yiagbọji bo lẹnnupọndo nukun he hiẹ nọ yí do pọ́n gbedide Owe-wiwe tọn devo lẹ ji taidi azọ́n mẹhẹnzun devi tọn kavi tudohomẹnamẹ lọ nado nọ pli dopọ na sinsẹ̀n-bibasi. (Matiu 28:19; Heblu lẹ 10:24, 25) Nugbo wẹ dọ e sọgan vẹawu to whedelẹnu nado setonuna gbedide enẹlẹ. Mẹhe hiẹ nọ dọyẹwheho na lẹ sọgan nọma tindo ojlo, kavi agbasazọ́n towe sọgan nọ hẹn agbọ́pé we sọmọ bọ opli Klistiani tọn lẹ yìyì na nọ vẹawu taun. Mahopọnna enẹ, hiẹ nọ zindonukọn to owẹ̀n Ahọluduta lọ tọn lilá mẹ podọ to opli Klistiani tọn lẹ yìyì mẹ. Mẹdepope ma sọgan glọnalina we—etlẹ yin Satani! Etẹwutu? Na owanyi ahundopo tọn he a tindo na Jehovah nọ whàn we nado setonuna gbedide etọn lẹ wutu. (1 Johanu 5:3) Po kọdetọn dagbe tẹlẹ po? Mahẹ tintindo to azọ́n yẹwhehodidọ tọn mẹ podọ opli lẹ yìyì nọ hẹn we tindo jijọho ahun mẹ tọn po ayajẹ nujọnu tọn po na hiẹ yọnẹn dọ a to ojlo Jiwheyẹwhe tọn wà wutu. Podọ taidi kọdetọn de, numọtolanmẹ enẹlẹ nọ vọ́ huhlọnna we. (Nẹhemia 8:10) Etẹwẹ mí plọn sọn ehe mẹ?
8, 9. (a) Etẹwẹ sọgan whàn mí nado setonuna tudohomẹnamẹ lọ nado pọ́n alọwle hlan taidi nuhe jẹna sisi, podọ etẹwutu? (b) Nuagokun awe tẹlẹ wẹ mí na gbadopọnna todin?
8 Kẹdẹdile owanyi sisosiso he a tindo na Jiwheyẹwhe nọ whàn we nado setonuna gbedide lọ nado dọyẹwheho bo yì opli lẹ mahopọnna aliglọnnamẹnu lẹ do, mọdopolọ owanyi he a tindo na Jehovah sọgan whàn we nado setonuna tudohomẹnamẹ Owe-wiwe tọn lọ dọmọ: ‘Mì gbọ alọwle mìtọn ni yin pinpọnhlan taidi nuhe jẹna sisi to omẹ popo nukọn,’ etlẹ yin to whenuena enẹ taidi nuhe vẹawu. (Heblu lẹ 13:4; Psalm 18:29; Yẹwhehodọtọ 5:4) Humọ, kẹdẹdile vivẹnudido towe lẹ nado tindo mahẹ to yẹwhehodidọ mẹ po opli lẹ yìyì po nọ hẹn dona susu wá sọn Jiwheyẹwhe dè do, mọ wẹ vivẹnudido towe lẹ nado pọ́n alọwle towe hlan taidi nuhe jẹna sisi na yin ayidego bosọ yin didona gbọn Jehovah dali do niyẹn.—1 Tẹsalonikanu lẹ 1:3; Heblu lẹ 6:10.
9 To whelọnu lo, nawẹ hiẹ sọgan pọ́n alọwle towe hlan taidi nuhe jẹna sisi gbọn? Hiẹ dona dapana nuyiwa he na ze alọwle towe do owù mẹ lẹ. To yidogọ mẹ, a dona ze afọdide delẹ he na vọ́ huhlọnna kanṣiṣa alọwle towe tọn.
DAPANA HODIDỌ PO WALỌ HE NỌ DE YẸYI SỌN ALỌWLE GO LẸ PO
10, 11. (a) Walọ tẹwẹ nọ de yẹyi sọn alọwle go? (b) Kanbiọ tẹwẹ alọwlemẹ lẹ dona kanse yede?
10 Asi Klistiani de dọ to ojlẹ de mẹ wayi dọmọ: “N’hodẹ̀ na Jehovah dọ ni gọalọna mi nado doakọnnanu.” Nado doakọnna etẹ? E basi zẹẹmẹ dọmọ: “Asu ṣie nọ yí hogbe lẹ do hò mi. N’sọgan nọma tindo apà to agbasa go ṣigba hogbe whánsọmẹ tọn he e nọ yizan gbọzangbọzan lẹ, taidi ‘Agbàn de poun wẹ a yin to kọji na mi!’ kavi ‘Nuvọ́nọ de poun wẹ a yin!’ ko doapà ahun ṣie.” Asi ehe fọ́n whẹho sinsinyẹn de dote—enẹ wẹ hogbe ylankan lẹ yiyizan to alọwle mẹ.
11 Lehe e nọ blawu do sọ eyin alọwlemẹ lẹ to whédo Klistiani tọn mẹ dlan hogbe ylankan lẹ do yede bo hẹn awugble he ma nọ yawu busẹ lẹ wá to numọtolanmẹ-liho! E họnwun dọ, alọwle he mẹ hogbe ylankan lẹ nọ yin yiyizan te ma tindo yẹyi. Etẹwẹ yin ninọmẹ alọwle towe tọn to whẹho ehe mẹ? Aliho dopo nado yọ́n ehe wẹ whiwhẹ yíyí do kanse alọwlemẹ towe dọ, “Nawẹ hogbe ṣie lẹ nọ yinuwado jiwe do?” Eyin alọwlemẹ towe dọ dọ hogbe towe lẹ nọ saba hẹn awugblena emi to numọtolanmẹ-liho, be a dona wleawufo nado hẹn ninọmẹ lọ pọnte.—Galatianu lẹ 5:15; Efesunu lẹ 4:31.
12. Nawẹ sinsẹ̀n-bibasi mẹde tọn sọgan lẹzun ovọ́ to nukun Jiwheyẹwhe tọn mẹ gbọn?
12 Hẹn ẹn do ayiha mẹ hezeheze dọ aliho he mẹ hiẹ nọ yí odẹ́ towe zan te to alọwle mẹ nọ yinuwado haṣinṣan towe hẹ Jehovah ji. Biblu dọmọ: “Eyin omẹ depope lẹn to ede mẹ dọ emi nọ basi sinsẹ̀n to aliho he sọgbe mẹ ṣogan bo ma nọ dogànnuna odẹ́ etọn, ṣigba nọ to ahun edetiti tọn klọ zọnmii, ovọ́ wẹ wunmẹ sinsẹ̀n-bibasi omẹ ehe tọn.” (Jakobu 1:26, NW ) Hodidọ towe tindo kanṣiṣa pẹkipẹki hẹ sinsẹ̀n-bibasi towe. Biblu ma nọgodona linlẹn lọ dọ nudepope he mẹde wà to whégbè ma yin nujọnu sọmọ eyin mẹlọ gbẹ́ sọalọakọ́n dọ emi to Jiwheyẹwhe sẹ̀n. Jaale ma klọ dewe blo. Whẹho nujọnu tọn de wẹ ehe yin. (1 Pita 3:7) Hiẹ sọgan tindo nugopipe susu po zohunhun po, ṣigba eyin a nọ desọn ojlo mẹ nado hẹn awugblena alọwlemẹ towe po hogbe whánsọmẹ tọn lẹ po, hiẹ to yẹyi desọn tito alọwle tọn go podọ Jiwheyẹwhe sọgan pọ́n sinsẹ̀n-bibasi towe hlan taidi ovọ́.
13. Nawẹ alọwlemẹ de sọgan hẹn awufiẹsa wá na awetọ etọn to numọtolanmẹ-liho gbọn?
13 Alọwlemẹ lẹ sọ dona tin to aṣeji ma nado hẹn awugblena yede to numọtolanmẹ-liho to aliho he ma yin tlọlọ lẹ mẹ. Lẹnnupọndo apajlẹ awe ji: Onọ̀ godoponọ de nọ dọho whẹwhẹ to alokan ji hẹ sunnu Klistiani alọwlemẹ he tin to agun etọn mẹ de nado dín ayinamẹ sọn e si, podọ yé nọ dọho na ojlẹ gaa; mẹmẹsunnu Klistiani tlẹnnọ de nọ wazọ́n na ojlẹ gaa hẹ mẹmẹyọnnu Klistiani alọwlemẹ de to sinsẹ̀nzọn kunnudegbe tọn mẹ to sẹmẹsẹmẹ. Mẹmẹsunnu po mẹmẹyọnnu alọwlemẹ he yin nùdego to apajlẹ ehelẹ mẹ po sọgan tindo linlẹn dagbe; ṣogan, nawẹ walọ yetọn nọ yinuwado alọwlemẹ yetọn dopodopo ji gbọn? Asi he to pipehẹ ninọmẹ mọnkọtọn de dọmọ: “Mimọ dọ asu ṣie nọ na whenu gọna ayidonugo susu sọmọ mẹmẹyọnnu devo to agun lọ mẹ nọ hẹn awugblena mi. N’nọ mọdọ nuyiwa ehe de mi pò.”
14. (a) Azọngban alọwle tọn tẹwẹ yin nùzindeji to Gẹnẹsisi 2:24? (b) Etẹwẹ mí dona kanse míde?
14 Nuhe sọgbe wẹ e yin dọ alọwlemẹ ehe po mẹdevo he tin to ninọmẹ mọnkọtọn mẹ lẹ po ni tindo numọtolanmẹ awufiẹsa tọn. Alọwlemẹ yetọn lẹ gbẹkọ anademẹ tangan he Jiwheyẹwhe na do alọwle ji go dọmọ: ‘Sunnu na jo otọ́ po onọ̀ po do, bo na sẹbọdo asi etọn go.’ (Gẹnẹsisi 2:24) Nugbo wẹ dọ mẹhe wlealọ lẹ gbẹ́ nọ tindo sisi na mẹjitọ yetọn lẹ; ṣigba sọgbe hẹ tito Jiwheyẹwhe tọn, azọngban yetọn tintan dona yin hlan alọwlemẹ yetọn. Mọdopolọ, Klistiani lẹ nọ tindo owanyi sisosiso na yisenọ hatọ lẹ; ṣogan azọngban yetọn tintan dona yin hlan alọwlemẹ yetọn. Enẹwutu, eyin Klistiani alọwlemẹ lẹ nọ yí whenu susu zẹjlẹgo zan hẹ yisenọ hatọ lẹ kavi jẹakọ hẹ yé zẹjlẹgo, titengbe omẹ vijinu awetọnọ lẹ, yé to kanṣiṣa alọwle yetọn tọn zedo owù mẹ. Be enẹ wẹ to nuhahun hẹnwa to alọwle towe mẹ ya? Kanse dewe dọ, ‘Be n’to whenu, ayidonugo, po owanyi he alọwlemẹ ṣie jẹna po na ẹn nugbonugbo ya?’
15. Sọgbe hẹ Matiu 5:28, naegbọn Klistiani alọwlemẹ lẹ dona dapana ayidonugo he ma sọgbe zizedo omẹ vijinu awetọnọ devo ji?
15 Humọ, Klistiani alọwlemẹ he nọ ze ayidonugo he ma sọgbe do omẹ vijinu awetọnọ he ma yin alọwlemẹ yetọn ji lẹ yí nulú do to zọnlinzin gbọn aigba he didi ji. E blawu dọ Klistiani alọwlemẹ delẹ ko wleawuna numọtolanmẹ owanyi tọn na mẹhe yé jẹakọ hẹ zẹjlẹgo lẹ. (Matiu 5:28) Taidi kọdetọn de, kanṣiṣa owanyi tọn mọnkọtọn lẹ ko tlọ yé do walọ he nọ de yẹyi sọn alọwle go mẹ. Lẹnnupọndo nuhe apọsteli Paulu dọ do whẹho ehe ji.
‘MÌ HẸN ADỌ́ZAN ALỌWLE TỌN FLU BLO’
16. Gbedide tẹwẹ Paulu na gando alọwle go?
16 Tlolo he Paulu dotuhomẹnamẹ dọ ‘mì gbọ alọwle ni yin pinpọnhlan taidi nuhe jẹna sisi’ godo, e yí avase lọ dogọ dọmọ: ‘Mì hẹn adọ́zan alọwle tọn flu blo: na galọtọ po ayọdetọ lẹ po wẹ Jiwheyẹwhe na dawhẹna.’ (Heblu lẹ 13:4) Paulu yí hogbe lọ ‘adọ́zan alọwle tọn’ zan na kọndopọ zanhẹmẹ tọn. Kọndopọ mọnkọtọn ‘ma yin hinhẹnflu,’ kavi yin wiwe to walọyizan-liho, eyin e wá aimẹ to tito alọwle tọn kẹdẹ mẹ. Enẹwutu, Klistiani lẹ nọ setonuna ohó gbọdo lọ he dọmọ: “Jaya hẹ asi ovu whenu towe tọn.”—Howhinwhẹn lẹ 5:18.
17. (a) Naegbọn pọndohlan aihọn tọn gando ayọdide go ma sọgbe hẹ Klistiani lẹ tọn? (b) Nawẹ mí sọgan hodo apajlẹ Job tọn gbọn?
17 Mẹhe nọ tindo kọndopọ zanhẹmẹ tọn hẹ mẹhe ma yin alọwlemẹ yetọn lẹ ma tindo sisi depope na osẹ́n walọ dagbe tọn he Jiwheyẹwhe doai lẹ. Nugbo wẹ dọ mẹsusu nọ pọ́n ayọdide hlan taidi nuhe sọgbe to egbehe. Ṣogan, nudepope he mẹdevo lẹ lẹn gando ayọdide go ma dona yinuwado nukun he Klistiani lẹ nọ yí do pọ́n ẹn ji. Yé yọnẹn dọ to godo mẹ, ‘Jiwheyẹwhe wẹ na dawhẹna galọtọ po ayọdetọ lẹ po,’ e ma yin gbẹtọ gba. (Heblu lẹ 10:31; 12:29) Enẹwutu, Klistiani nugbo lẹ nọ tẹdo pọndohlan he Jehovah tindo do whẹho ehe ji go. (Lomunu lẹ 12:9) Flindọ tọgbo Job dọmọ: “Yẹn basi alẹnu de hẹ nukun ṣie lẹ.” (Job 31:1) Mọwẹ, nado dapana nudepope he sọgan planmẹ jẹ ayọdide kọ̀n, Klistiani nugbo lẹ nọ dava nukun yetọn bo ma nọ bọnukundona omẹ vijinu awetọnọ he ma yin alọwlemẹ yetọn.—Pọ́n Nudọnamẹ Dogọ “Nuhe Biblu Dọ Gando Gbẹdai po Kinklan po Go.”
18. (a) To nukun Jehovah tọn mẹ, obá tẹ mẹ wẹ ayọdide sinyẹn jẹ? (b) Kanṣiṣa tẹwẹ tin to ayọdide po boṣiọ-sinsẹ̀n po ṣẹnṣẹn?
18 To nukun Jehovah tọn mẹ, obá tẹ mẹ wẹ ayọdide sinyẹn jẹ? Osẹ́n Mose tọn gọalọna mí nado yọ́n numọtolanmẹ Jehovah tọn to whẹho ehe mẹ. To Islaeli, ayọdide po boṣiọ-sinsẹ̀n po tin to ylando he nọ hẹn okú wá lẹ mẹ. (Levitiku 20:2, 10) Be hiẹ mọ kanṣiṣa de to onú awe lọ lẹ ṣẹnṣẹn ya? Islaelivi he sẹ̀n boṣiọ gbà alẹnu etọn hẹ Jehovah, to whenuena Islaelivi he deayọ gbà alẹnu etọn hẹ alọwlemẹ etọn. Yé omẹ awe lẹ yinuwa to aliho oklọ tọn mẹ. (Eksọdusi 19:5, 6; Deutelonomi 5:9; Malaki 2:14) Enẹwutu, yé omẹ awe lẹ wẹ hùwhẹ to nukun Jehovah, Jiwheyẹwhe nugbonọ he go yè sọgan dejido lọ tọn mẹ.—Psalm 33:4.
19. Etẹwẹ sọgan hẹn gbemima mẹde tọn sinyẹn deji nado gbẹ́ ayọdide dai, podọ etẹwutu?
19 Nugbo wẹ dọ Klistiani lẹ ma tin to Osẹ́n Mose tọn glọ. Ṣogan, eyin Klistiani lẹ flindọ ayọdide yin ylando sinsinyẹn de to Islaeli hohowhenu tọn, ehe sọgan hẹn gbemima yetọn sinyẹn deji ma nado jai jẹ ylando mọnkọtọn mẹ. Etẹwutu? Lẹnnupọndo apajlẹ ehe ji: Be e na wá linlẹn mẹ na we gbede nado biọ ṣọṣi mẹ bo jẹklo bosọ hodẹ̀ to boṣiọ de nukọn ya? ‘Gbede pọ́n!’ wẹ a na dọ. Ṣigba be hiẹ na yin whiwhlepọn nado wàmọ eyin akuẹ he yinukunkẹ taun de yin zizedonukọnna we ya? ‘E pẹ̀n pọ́n!’ wẹ a na dọ. Na nugbo tọn, linlẹn lọ tata nado dogodo Jehovah gbọn sinsẹ̀n-bibasi na boṣiọ de dali yin awuhiọnu na Klistiani nugbo de. Mọdopolọ, linlẹn lọ dọ Klistiani lẹ ni dogodo Jehovah, Jiwheyẹwhe yetọn, gọna alọwlemẹ yetọn gbọn ayọdide dali dona hiọawu na yé—mahopọnna nudepope he sọgan whàn yé nado waylando. (Psalm 51:1, 4; Kọlọsinu lẹ 3:5) Mí ma na jlo nado wà nuhe na hẹn Satani jaya bo de yẹyi sọn Jehovah po tito wiwe alọwle tọn po go gbede.
LEHE HIẸ SỌGAN HẸN KANṢIṢA ALỌWLE TOWE TỌN SINYẸN DEJI DO
20. Etẹwẹ ko jọ to alọwle delẹ mẹ? Na apajlẹ.
20 Gbọnvona didapana walọ he nọ de yẹyi sọn alọwle go lẹ, afọdide tẹlẹ wẹ a sọgan ze nado hẹn sisi he a tindo na alọwlemẹ towe jideji dogọ? Nado na gblọndo, yí alọwle jlẹdo ohọ̀ de go. Enẹgodo, yí hogbe he jọmẹ, nuyiwa mẹtọnhopọn tọn po sisi he alọwlemẹ lẹ nọ dohia yede po jlẹdo nuyizan whanpẹnọ lẹ he nọ doaṣọ́na ohọ̀ de go. Eyin kanṣiṣa he tin to ṣẹnṣẹn mìtọn sinyẹn ganji, alọwle mìtọn taidi ohọ̀ he dọnmẹdogo de na e yin aṣọ́dona po nuyizan whanpẹnọ he nọ hẹn ẹn tindo awusọhia dagbe lẹ po wutu. Eyin owanyi mìtọn depò, nuyizan whanpẹnọ enẹlẹ nọ busẹ vudevude, bọ alọwle lọ nọ hẹn whanpẹ etọn bu taidi ohọ̀ he ma tindo aṣọ́donu depope. To whenuena e yindọ a jlo na setonuna gbedide Jiwheyẹwhe tọn he dọ dọ ‘mì gbọ alọwle ni yin pinpọnhlan taidi nuhe jẹna sisi,’ hiẹ na yin whinwhàn nado hẹn ninọmẹ lọ pọnte. To popolẹpo mẹ, nuhe họakuẹ bo dọnmẹdogo dona yin vivọjlado janwẹ. Nawẹ a sọgan wà ehe gbọn? Ohó Jiwheyẹwhe tọn dọmọ: “Nuyọnẹn wẹ yè do nọ gbá ohọ̀; zinzin wẹ yè do nọ do e ai. Gbọn [oyọnẹn] dali wẹ yè nọ hẹn abomẹ gọ́ na adọkun hunkọhunkọ akuẹgegenu tọn po ehe yọnwhanpẹ lẹ po.” (Howhinwhẹn lẹ 24:3, 4) Lẹnnupọndo lehe hogbe ehelẹ gando alọwle go do ji.
21. Nawẹ alọwle mítọn sọgan yin hinhẹn lodo vudevude gbọn? (Sọ pọ́n apotin lọ “Nawẹ N’Sọgan Hẹn Alọwle Ṣie Pọnte Dogọ Gbọn?”)
21 ‘Onú akuẹgegenu’ he nọ gọ́ whédo ayajẹnọ de mẹ lẹ bẹ jẹhẹnu lẹ taidi owanyi nujọnu tọn, obu jijọ-di-Jiwheyẹwhe tọn po yise dolido po hẹn. (Howhinwhẹn lẹ 15:16, 17; 1 Pita 1:7) Yé nọ hẹn alọwle lodo. Ṣigba be a doayi lehe abò he yin alọdlẹndo to howhinwhẹn he mẹ mí yihodọ sọn to aga nọ yin hinhẹn gọ́ po onú akuẹgegenu lẹ po do go ya? ‘Gbọn oyọnẹn dali.’ Mọwẹ, eyin oyọnẹn Biblu tọn yin yiyizan, e sọgan diọ nulẹnpọn gbẹtọ lẹ tọn bo whàn yé nado hẹn owanyi he yé tindo na ode awetọ jideji dogọ. (Lomunu lẹ 12:2; Filippinu lẹ 1:9) Enẹwutu, whedepopenu he hiẹ po alọwlemẹ towe po sinai dopọ bo yí sọwhiwhe do gbadopọnna wefọ Biblu tọn de, taidi wefọ egbesọ tọn kavi hosọ sinai do Biblu ji de to Atọ̀họ̀-Nuhihọ́ Lọ Tọn kavi Réveillez-vous! mẹ gando alọwle go, e nọ taidi dọ mì to nuyizan whanpẹnọ he na doaṣọ́na ohọ̀ mìtọn gbeje pọ́n. Eyin owanyi he mì tindo na Jehovah nọ whàn mì nado yí ayinamẹ he mì gbadopọnna lọ zan to alọwle mìtọn mẹ, to yẹhiadonu-liho, mì to nuyizan whanpẹnọ enẹlẹ bẹ do “abomẹ.” Taidi kọdetọn de, delẹ to aṣọ́donu he nọ yidogọna whanpẹ alọwle mìtọn tọn dai sọgan yin gigọdotẹnmẹ.
22. Pekọ tẹwẹ mí sọgan tindo eyin mí dovivẹnu nado yí adà mítọn wà to alọwle mítọn hinhẹn lodo mẹ?
22 Nugbo wẹ dọ e sọgan yí whenu po vivẹnudido susu po nado gọ̀ aṣọ́donu enẹlẹ do otẹn yetọn dopodopo mẹ. Ṣogan, eyin a dovivẹnu nado yí adà towe wà, hiẹ na tindo pekọ nujọnu tọn na a yọnẹn dọ emi to tonusena gbedide Biblu tọn lọ he dọmọ: “To yẹyi mẹ mì nọ na pipà daho mìnọzo.” (Lomunu lẹ 12:10; Psalm 147:11) Hú popolẹpo, vivẹnudido vẹkuvẹku towe nado pọ́n alọwle towe hlan taidi nuhe jẹna sisi na hẹn we gbọṣi owanyi Jiwheyẹwhe tọn mẹ.
a Lẹdo hodidọ lọ tọn dohia dọ ayinamẹ Paulu tọn gando alọwle go yin apadewhe tudohomẹnamẹ voovo he e na lẹ tọn.—Heblu lẹ 13:1-5.