OPLỌN 29

Jẹhẹnu Ogbè Tọn

NUHE yin didọ podọ lehe e yin didọ do nọ yinuwado gbẹtọ lẹ ji tlala. Eyin ogbè mẹhe to hodọna we tọn dọnmẹdogo, bo vivi sisè, bo yin họntọnjihẹmẹ tọn, be e mayin nugbo wẹ dọ a na jlo nado dotoai ganji hugan eyin ogbè lọ miọn kavi sinyẹn ya?

Awuwiwlena jẹhẹnu dagbe ogbè tọn ma yin azọ́nyinyọnẹn to ogbè yiyizan mẹ kẹdẹ gba. E sọ sọgan gando gbẹtọ-yinyin mẹtọn go ga. Dile mẹde to nukọnyi to oyọnẹn po yizan nugbo Biblu tọn etọn po mẹ, diọdo lẹ nọ jẹ awusọhia ji to hodidọ etọn mẹ. Jẹhẹnu dagbe lẹ taidi owanyi, ayajẹ, po homẹdagbe po nọ sọawuhia to ogbè etọn mẹ. (Gal. 5:22, 23) To whenuena onú mẹdevo lẹ tọn to ahunmẹduna ẹn, ogbè etọn nọ do e hia. Eyin gbigbọ lewuwu tọn ko yin didiọ po pinpẹn-nutọn-yinyọnẹn po, nuhe yin didọ po kọnugbè lọ po nọ do e hia. (Avi. 3:39-42; 1 Tim. 1:12; Juda 16) Eyin a ma tlẹ sè ogbè heyin didó lọ, e ma na vẹawu na we nado doayi vogbingbọn lọ go eyin mẹde yí goyiyi, fifiẹ, zingidi po adán po do to hodọ, to whenuena mẹdevo yí whiwhẹ, sọwhiwhe, homẹdagbe, po owanyi po do to hodọ.

To whẹho delẹ mẹ ogbè he vlẹ sọgan yin kọdetọn azọ̀n he hẹn aṣọ̀kàn mẹde tọn gble kavi oblọ agbasa tọn heyin ogú etọn dù de tọn. Ninọmẹ mọnkọtọn lẹ sọgan sinyẹn sọmọ bọ yé ma na yin hinhẹngbọ mlẹnmlẹn to titonu ehe mẹ gba. Ṣigba, pinplọn nado yí awutugonu hodidọ tọn lẹ zan ganji sọgan hẹn ninọmẹ lọ pọnte.

Jẹnukọn whẹ́, nujọnu wẹ e yin nado yọnẹn dọ jẹhẹnu ogbè gbẹtọ lẹ tọn gbọnvo na yedelẹ. Yanwle towe ma dona yin nado hodo apajlẹ hodidọ mẹdevo tọn gba. Kakatimọ, yí jẹhẹnu vonọtaun he ogbè towe tindo lẹ zan ganji. Etẹwẹ sọgan gọalọna we nado wà ehe? Aliho titengbe awe wẹ tin.

Deanana Agbọ́ Yíyí Towe Ganji. Nado yí ogbè zan to aliho he yọ́n hugan mẹ, a tindo nuhudo jẹhọn he pé tọn bosọ dona deanana agbọ́ yíyí towe ganji. Matin ehelẹ, ogbè towe ma na tátá, bọ hodidọ towe sọgan yin lobọlobọ tọn.

Adà he klohugan afuje tọn matin to aga akọ́nnu tọn gba; abọ́hu lẹ wẹ hẹn awà ehe ji taidi nuhe klo poun. Kakatimọ, aga pipetẹn akọ́nji po adọgo po tọn wẹ afuje gblo te taun bo yin biblá do adàjahú odò tọn lẹ go. Pipetẹn akọ́nji tọn wẹ klan akọ́nnu dovo sọn adọgo go.

To whenuena a gbọ̀ do homẹ, eyin adà aga afuje towe tọn kẹdẹ mẹ wẹ a gbọ́n jẹhọn do, agbọ́ na vọ̀ do we to madẹnmẹ. Ogbè towe ma na tindo huhlọn ba, podọ onú na yawu ṣikọna we. Nado gbọ̀ ganji, a dona sinai kavi nọte do jijlọ ji bo hẹn abọ́ towe lẹ vòawu. To whenuena a gbọ̀ do homẹ nado dọho, dovivẹnu vẹkuvẹku ma nado vlọ́n adà aga akọ́nnu towe tọn kẹdẹ blo. Onú tintan he a dona wà wẹ nado gbọ́n jẹhọn do adà odò afuje towe tọn mẹ. To whenẹnu, adà odò adàjahú towe tọn na vlọ́n to adà awe lẹ mẹ. To ojlẹ dopolọ mẹ, pipetẹn akọ́nji po adọgo po tọn lọ na wá odò, bo na sẹtẹn na adọgo po adọvi lẹ po dẹẹdẹ sọmọ bọ hiẹ na mọtolanmẹ dọ avọ̀ he a dó lọ vọ́ finyọ́n we vude to alinkàn. Ṣigba e mayin finẹ wẹ afuje towe te gba; e tin to gblagbla adàjahú tọn lẹ mẹ. Nado tẹ́n dewe pọ́n, ze alọ dopo do adà odò adàjahú towe tọn dopodopo ji. Todin gbọ̀ sisosiso. Eyin a to gbigbọ̀ ganji, a ma na má adọ̀ bo ze abọ́ lẹ daga gba. Kakatimọ, a na mọ dọ adàjahú lẹ to tẹnsẹ dẹẹdẹ yì aga podọ wá odò.

Enẹgodo, wazọ́n do lehe a nọ de jẹhọn tọ́n do ji. Dowé na jẹhọn lọ bo ma dike ni nọ tọ́n po awuyiya po zẹjlẹgo blo. Nọ de e tọ́n vudevude. Ma tẹnpọn nado deanana ẹn gbọn vẹgo towe finfinyọn dali blo. Yin e mayin mọ, ogbè lọ na pẹ̀n bo na yiaga to aliho he ma sọgbe mẹ. Huhlọn he nọ tọ́nsọn agbasa-kàn he tin to adọgo po gblagbla adàjahú lẹ tọn po mẹ wẹ nọ de jẹhọn tọ́n, to whenuena akọ́nji nọ deanana lehe e to tintọ́n po awuyiya po do.

Kẹdẹdile wezunhọntọ de nọ plọn wezunhinhọ̀n do, mọwẹ hodọtọ de sọgan plọn nado nọ deanana agbọ́ yíyí etọn dile e jẹ do. Nọte do jijlọ ji bo dẹ́ abọ́ lẹ do godo, gbọ̀ nado sọgan gbọ́n jẹhọn do adà odò afuje towe tọn mẹ, bosọ de agbọ́ tọ́n vudevude dile a to ode, awe, atọ̀n hia jẹgbonu dẹẹdẹ jẹ fie a sọgan hia jẹ to agbọ́ dopo akàn yíyí whenu. Enẹgodo, plọn nado hiawe daga dile a to gbigbọ̀ to aliho dopolọ mẹ.

Hẹn Agbasa-Kàn lẹ Voawu. Onú devo he na hẹn mí tindo jẹhẹnu dagbe ogbè tọn wẹ awuvivo. Eyin a plọn nado nọ voawu to whenuena a to hodọ, nukọnyiyi towe sọgan paṣa we. Ayiha po agbasa po dona yin hinhẹn voawu, na awumavo ayiha tọn sọgan hẹn awumavo agbasa-kàn lẹ tọn wá ga.

Hẹn ayiha towe voawu gbọn pọndohlan dagbe tintindo gando hosetọ towe lẹ go dali. Eyin a dukosọ hẹ gbẹtọ lẹ to kunnudegbe, flindọ eyin osun vude poun wẹ a tlẹ ko yizan nado plọn Biblu, a ko yọ́n nususu dogbọn lẹndai Jehovah tọn he a sọgan má hẹ yé lẹ dali. Humọ, a to yé dlapọn na yé tindo nuhudo alọgọ tọn wutu, vlavo yé doayi e go kavi lala. To alọ devo mẹ, eyin a to hodọ to Plitẹnhọ Ahọluduta tọn mẹ, suhugan hosetọ towe lẹ tọn wẹ yin omẹ Jehovah tọn lẹ. Họntọn towe lẹ wẹ yé yin, podọ yé jlo dọ a ni tindo kọdetọn dagbe. Hodọtọ devo matin to aihọn mẹ he nọ dọho to mẹplidopọ họntọnjihẹmẹtọ po owanyinọ lẹ po nukọn dile mí nọ wà do to gbesisọmẹ gba.

Hẹn vẹgo-kàn lẹ voawu gbọn ayiha towe zize do yé ji dali bo tin to aṣeji ma nado dike yé ni sinyẹn zẹjlẹgo. Flin dọ vẹgo-kàn towe lẹ nọ dọnú to whenuena jẹhọn gbọ̀n yé mẹ. Kọnugbè lọ nọ diọ dile vẹgo-kàn lọ lẹ finyọ́n dopọ kavi túnpò, kẹdẹdile ogbè ginta tọn nọ diọ to whenuena okàn etọn yin biblá kavi yin túntún pò do. Eyin a hẹn vẹgo-kàn lẹ voawu, kọnugbè lọ nọ yido. Ehe sọ nọ hẹn ẹn yọnbasi na awọntin-slo nado tin to hùnhùn, podọ ehe na yinuwado jẹhẹnu ogbè towe tọn ji.

Hẹn agbasa towe blebu voawu—yèdọ kligonu, alọ, abọ́, po okọ̀ towe po. Ehe na yidogọna jẹhẹnu he nuhudo tin na nado hẹn ogbè towe yin sisè to aganu. Ogbè nọ yin didetọ́n ganji to whenuena agbasa lọ blebu wazọ́n dopọ. Ṣigba awumavo agbasa tọn sọgan glọnalina ẹn. Kọnugbè he nọ yin awuwlena to aṣọ̀kàn mẹ, nọ tọ́n gbọn awọntin-slo mẹ podọ gbọn ohú he tin to akọ́nnu, adú, po aglàn po mẹ. Ehe lẹpo sọgan hẹn nudidọ ogbè towe tọn pọnte. Eyin a ze onú pinpẹ̀n de do agbá ginta tọn ji, ogbè lọ ma na siọ. Eyin a jlo dọ nudidọ lọ ni tọ́n ganji, nudepope ma dona tin to agbá lọ ji. Onú dopolọ wẹ e yin po agbasa-hú mítọn lẹ po, ehe nọ yin hinhẹn lodo gbọn agbasa-kàn lẹ dali. Dile ogbè lọ to tintọ́n, a na penugo nado diọ ẹ dile e jẹ do bo do numọtolanmẹ voovo lẹ hia. Hiẹ ma na tindo nuhudo nado vlọ́n ogbè towe nado dọho na mẹplidopọ daho de gba.

LEHE OGBÈ NỌ YIN DIDETỌN GBỌN

Jẹhọn he a nọ dohlan sọn afuje towe mẹ wẹ nọ hẹn nudidọ ogbè tọn lẹpo tọ́n. Afuje nọ yinuwa taidi wọhún de, e nọ fún jẹhọn gbọn gbigbọ-kàn mẹ biọ aṣọ̀kàn mẹ, ehe tin to ṣẹnṣẹn vẹgo towe tọn. To aṣọ̀kàn mẹ, to adà awetọ etọn lẹ mẹ wẹ okàn tlẹ́lẹ awe heyin bibladopọ delẹ tin te he nọ yin yiylọ dọ vẹgo-kàn. Ehelẹ wẹ nọ de ogbè tọ́n na taun tọn. Okàn he tin topọ ehelẹ nọ hùn bo nọ sú aliho jẹhọn tọn gbọn aṣọ̀kàn mẹ nado dike jẹhọn ni biọ homẹ bo tọ́n, podọ nado de nuhe ma jẹ lẹ sẹ sọn afuje mẹ. To agbọ́ yíyí tata whenu, nudidọ depope ma nọ yin sisè dile jẹhọn gbọn vẹgo-kàn lẹ mẹ. Ṣigba to whenuena mẹde jlo na dọho, okàn lọ lẹ nọ finyọ́n vẹgo-kàn lọ, bọ ehelẹ nọ dọnú dile jẹhọn he tọ́nsọn afuje mẹ yin hinhẹn po huhlọn po nado gbọn yé mẹ. Ehe nọ dekọtọn do hodidọ mẹ.

Lehe vẹgo-kàn lẹ yin vinvlọ́n sọ, mọwẹ yé nọ dọnú po awuyiya po sọ bọ ogbè he nọ yin didetọ́n nọ yiaga do. Ṣigba, dile okàn lọ lẹ yin hinhẹn jè sọ, mọwẹ ogbè lọ nọ yido dogọ do. To whenuena nudidọ lọ ko tọ́nsọn aṣọ̀kàn mẹ godo, e nọ biọ adà aga vẹgo tọn mẹ. To enẹgodo e nọ gbọn onù mẹ po awọntin-slo mẹ po tọ́n. Finẹ wẹ kọnugbè he nọ jla nudidọ lọ do bo nọ hẹn ẹn klo kavi na ẹn huhlọn nọ yin yiyidogọ te. Aglàn, odẹ́, adú, po nùflo lẹ po nọ yinuwa to pọmẹ nado dè nudidọ voovo lẹ tọ́n, ehe nọ dekọtọn do hodidọ heyin nukunnumọjẹemẹ hezeheze mẹ.

Nujiawu de wẹ ogbè gbẹtọ tọn yin. Azọ́nwanu gbẹtọ tọn depope ma sọzẹn hẹ ẹ. E tindo nugopipe lọ nado do numọtolanmẹ owanyi tọn, homẹgble tọn kavi wangbẹna sinsinyẹn tọn hia. Eyin ogbè yin awuwlena bo yin pinplọn ganji, e sọgan dọnú to aliho voovo mẹ bo de hàngbe vivi po hogbe he vivi sisè bo fọnjlodotenamẹ lẹ po tọ́n.

DÙDÙ TO NUHAHUN TANGAN DELẸ JI

Ogbè he ma dogán. Nugbo lọ dọ ogbè de miọn ma zẹẹmẹdo dọ e ma dogán gba. Eyin kọnugbè lọ yọ́nsè bo dọnmẹdogo, mẹdevo lẹ sọgan dotoaina ẹn po homẹhunhun po. Ṣigba ogbè dona yiaga dile e jẹ do nado tindo kọdetọn dagbe.

Nado hẹn jẹhẹnu ogbè towe tọn pọnte, a dona wazọ́n do nudidọ etọn ji. Enẹ biọ dọ a ni plọn nado hẹn agbasa towe blebu voawu, dile e yin zẹẹmẹ-basina to nupinplọn ehe mẹ do. Agbasa towe hinhẹn voawu po pinplọn nado nọ jihàn do kọ̀mẹ po sọgan gọalọ. Nùflo towe lẹ dona jẹ yedelẹ go yẹẹ, ṣigba yé ma dona yin zínzín dopọ hugan. Dile a to hànji do kọ̀mẹ, a na tindo numọtolanmẹ nudidọ lọ tọn to otà po akọ́nnu towe po.

To whedelẹnu, ogbè mẹde tọn nọ taidi nuhe ma dogán kavi pẹ̀n na agbasamalo wutu kavi na amlọnmadọ́ ganji wutu. E họnwun dọ, eyin ninọmẹ enẹ yin hinhẹn pọnte, ogbè lọsu na gọ̀ jẹ otẹn etọn mẹ.

Ogbè lélé. Numọtolanmẹ sinsinyẹn sọgan yinuwado vẹgo-kàn ji bọ ogbè na yiaga hugan. Ogbè sinsinyẹn na hẹn awumavo plá hosetọ lẹ lọsu. Gbọn vẹgo-kàn lẹ hinhẹn voawu dali, a na penugo nado ze ogbè towe do odò. Wà ẹ sọn ojlo mẹ wá, bo nọ plọn ẹn to hodidọ egbesọegbesọ tọn mẹ. Alọgọ devo wẹ nado nọ yì agbọ́ ji.

Awọntinmẹgbè didó. To ojlẹ delẹ mẹ, nuhahun ehe nọ wá aimẹ to whenuena awọntin sú, ṣigba e ma nọ yin mọ to whepoponu. To whedelẹnu, eyin agbasa-kàn po vẹgo-kàn lẹ po ma tin to awuvivo mẹ, awọntin-slo lẹ nọ sú bọ jẹhọn ma nọ penugo nado wayi po awubibọ po. Ehe nọ dekọtọn do awọntinmẹgbè didó mẹ. Nado dapana ehe, a dona voawu ganji.

Ogbè-gbó didó. Ogbè mọnkọtọn ma nọ dọnmẹdogo, e tlẹ nọ glọnalina hodọdopọ họntọnjihẹmẹ tọn. E sọgan dobuna mẹdevo lẹ.

To whẹho delẹ mẹ, e nọ biọ dọ mẹlọ ni to vivẹnudo zọnmii nado diọ gbẹtọ-yinyin etọn. (Kọl. 3:8, 12) Eyin enẹ ko yin wiwà, nunọwhinnusẹ́n he gando yizan ogbè tọn go lẹ hihodo sọgan gọalọ. Hẹn vẹgo po aglàn po voawu. Ehe na hẹn ogbè yọ́nsè ganji bo na glọnalina hodidọ do dẹ́glọ.