Lehe Jesu Yin Hihọ́-Basina Gbọn

JEHOVAH nọ wà onú delẹ to aliho jiawu mẹ to whedelẹnu nado basi hihọ́na yọpọvu he ma penugo nado basi hihọ́na yede lẹ. Eyin a disa yì nukànmẹ to gbèdopo, hiẹ sọgan mọ aliho he mẹ Jehovah nọ wà ehe te. Ṣigba a sọgan nọ ma mọnukunnujẹ nuhe to jijọ mẹ to tintan whenu.

To whenuena a to nukànmẹ, a sọgan mọ ohẹ̀ de zlọ́n bo wá jẹ do aigba to fie sẹpọ we. Ohẹ̀ lọ yinuwa taidi dọ awà etọn dopo ko wẹ́n nkọtọn. E nọ dọ̀n awà etọn dopo gblẹ̀gblẹ̀ bo nọ sẹ̀ yì nukọn to whenuena a to dindọn sẹpọ ẹ. Dile a to hihodo ohẹ̀ lọ, e na to hinhọ̀n na we janwẹ. Ṣigba, to ajijimẹ, ohẹ̀ lọ nọ zlọ́n yì. To whenẹnu wẹ a mọdọ nudepope ma tlẹ wà awà etọn! Be a yọ́n nuhe ohẹ̀ lọ to tintẹnpọn nado wà ya?

Fie ohẹ̀ lọ zlọ́n wá jẹ do he sẹpọ we enẹ, ovi etọn lẹ wẹ e bẹ yì whlá do nukànmẹ. To whenuena ohẹ̀ lọ mọ we, e lẹndọ a sọgan mọ ovi emitọn lẹ bo na hù yé. Enẹwutu e doyẹklọ we taidi dọ awà etọn dopo ko wẹ́n nkọtọn, na e nido sọgan dọ̀n we sọn ovi etọn lẹ kọ̀n. Be a yọ́n mẹhe sọgan basi hihọ́na mí dile ohẹ̀ de nọ basi na ovi etọn lẹ do ya?⁠— To Biblu mẹ, Jehovah yin yiyijlẹdo ohẹ̀ de he nọ yin akùn go, he nọ gọalọna ovi etọn lẹ.—Deutelonomi 32:11, 12.

Ovi he Jiwheyẹwhe yiwanna hugan wẹ Jesu. To whenuena Jesu tin to olọn mẹ, e yin omẹ gbigbọnọ huhlọnnọ de di Otọ́ etọn. E sọgan basi hihọ́na ede. Ṣigba to whenuena Jesu wá yin jiji di viyẹyẹ de to aigba ji, e ma sọgan basi hihọ́na ede gba. E tindo nuhudo hihọ́-basinamẹ tọn.

Nado hẹn azọ́n he Jiwheyẹwhe zọ́n ẹn di to aigba ji, Jesu dona whẹ́n mẹho bo lẹzun sunnu pipé de. Ṣigba, Satani tẹnpọn nado hù Jesu whẹpo e nado whẹ́n mẹho. Vivẹnudido Satani tọn nado hù Jesu to whenuena e gbẹ́ pò to ovu po aliho he mẹ Jehovah basi hihọ́na ẹn gbọn po yin otàn vivi de. Be a jlo na sè otàn lọ ya?⁠—

Whenu vude to jiji Jesu tọn godo, Satani wleawuna nude he sọawuhia taidi sunwhlẹvu de nado tọ́n to aga to Whèzẹtẹn-waji. Mẹhe nọ yin yiylọdọ sunwhlẹvu-plọntọ lẹ hodo sunwhlẹvu lọ na kilomẹtlu kanweko susu lẹ kaka wá Jelusalẹm. To whenuena yé jẹ finẹ, yé kàn fie mẹhe na yin ahọlu Ju lẹ tọn lọ na yin jiji te biọ. To whenuena yé kanse mẹhe yọ́n nuhe Biblu dọ gando ehe go lẹ, yé dọna yé dọmọ: “To Bẹtlẹhẹm.”—Matiu 2:1-6.

To whenuena Hẹlodi, ahọlu kanylantọ Jelusalẹm tọn sè dọ ahọlu yọyọ de ko yin jiji to otò Bẹtlẹhẹm tọn he ma dẹn do e mẹ, e dọna sunwhlẹvu-plọntọ lẹ dọmọ: ‘Mì yì dín ovi lọ mọ, enẹgodo mì lẹkọwa bo wá dọna mi.’ Be a yọ́n nuhewutu Hẹlodi jlo nado yọ́n fie Jesu te ya?⁠— Na awuwhàn Hẹlodi tọn wutu wẹ podọ e jlo na hù ovi lọ!

Nawẹ Jiwheyẹwhe basi hihọ́na Ovi etọn gbọn?⁠— Do glido, to whenuena sunwhlẹvu-plọntọ lọ lẹ dín Jesu mọ, yé na ẹn nunina lẹ. Ṣigba to godo mẹ, Jiwheyẹwhe dọna sunwhlẹvu-plọntọ lọ lẹ to odlọ mẹ ma nado lẹkọyi Hẹlodi dè ba. Enẹwutu yé gbọn aliho devo lẹkọyi whé bo ma lẹkọyi Jelusalẹm. Homẹgble Hẹlodi tlala to whenuena e sè dọ sunwhlẹvu-plọntọ lọ lẹ ko lẹkọyi. To vivẹnudido etọn mẹ nado mọdọ emi hù Jesu, Hẹlodi degbè dọ visunnu he tin to Bẹtlẹhẹm he owhe yetọn bẹsọn awe wá odò lẹpo ni yin hùhù! Ṣigba Jesu ko tọ́nsọn otò lọ mẹ to whenẹnu.

Be a yọ́n lehe Jesu wagbọn do họ̀ngán ya?⁠— To yìyì sunwhlẹvu-plọntọ lọ lẹ tọn godo, Jehovah na avase Josẹfu heyin asu Malia tọn, nado fọ́n bo họnyi Egipti. To finẹ, Jesu họ̀ngán sọn alọ Hẹlodi kanylantọ lọ tọn mẹ. To owhe delẹ godo, to whenuena Malia po Josẹfu po lẹkọwa sọn Egipti po Jesu po, Jiwheyẹwhe sọ na avase devo Josẹfu. E dọna ẹn to odlọ de mẹ nado sẹtẹn yì Nazalẹti, fie Jesu ma na tin to owù depope mẹ te.—Matiu 2:7-23.

Be a mọ lehe Jehovah basi hihọ́na Ovi etọn do ya?⁠— Mẹnu wẹ hiẹ lẹndọ e taidi hẹ̀ví lọ he onọ̀ etọn ze whlá do nukànmẹ? Kavi mẹnu wẹ taidi Jesu to whenuena e pò to ovu? Be e mayin hiẹ wẹ?⁠— Mọwẹ, na mẹdelẹ to jijlo nado waylan do gowe. Be a yọ́n mẹlọ ya?⁠—

Biblu dọ dọ Satani taidi kinnikinni he to lìlì de he jlo na tlẹ́n mí dù. Podọ kẹdẹdile kinnikinni lẹ nọ to ṣiṣọ́ kanlinvi lẹ do, mọwẹ Satani po aovi etọn lẹ po nọ saba wà na ovi lẹ do. (1 Pita 5:8) Ṣigba Jehovah dohuhlọn hú Satani. Jehovah sọgan basi hihọ́na ovi etọn lẹ kavi basi vọjlado na oylan depope he Satani wà do yé.

To Weta 10tọ owe ehe tọn mẹ, be a flin nuhe Lẹgba po aovi etọn lẹ po nọ tẹnpọn nado hẹn mí wà ya?⁠— Mọwẹ, nado basi kọndopọ zanhẹmẹ tọn he Jiwheyẹwhe gbẹ́ lẹ. Ṣigba mẹnu lẹ kẹdẹ wẹ sọgan tindo kọndopọ zanhẹmẹ tọn?⁠— Sunnu po yọnnu po he ko whẹ́n mẹho bo ko wlealọ hẹ yedelẹ kẹdẹ wẹ.

Ṣigba, e blawu dọ, mẹhe ko whẹ́n mẹho delẹ nọ jlo nado zanhẹ ovi pẹvi lẹ. To whenuena yé ko wàmọ, yọpọvu ehelẹ sọgan jẹ nuhe yé ko plọn sọn mẹhe ko whẹ́n mẹho lọ lẹ dè basi ji. Yé sọ nọ jẹ vijinu yetọn lẹ yido daihun ji to aliho he ma sọgbe mẹ. Enẹ wẹ jọ to whenu dindẹn die to tòdaho Sọdọmi tọn mẹ. Biblu dọ dọ mẹhe nọ nọ̀ otò lọ mẹ lẹ, ‘mẹho po yọpọ po,’ tẹnpọn nado zanhẹ sunnu he wá owhé Lọti tọn gbè lẹ.—Gẹnẹsisi 19:4, 5.

Enẹwutu dile Jesu tindo nuhudo hihọ́-basinamẹ tọn do, hiẹ lọsu tindo nuhudo hihọ́-basinamẹ tọn sọta mẹhe ko whẹ́n mẹho lẹ—⁠podọ yọpọvu lẹ ga—⁠he sọgan tẹnpọn nado zanhẹ we lẹ. To paa mẹ, omẹ ehelẹ na nọ yinuwa taidi họntọn towe lẹ. Yé tlẹ sọgan dọ na we dọ emi na na we nunina de eyin a sọgan dopagbe na yé ma nado dọ nuhe yé jlo na wà hẹ we lọ na mẹdepope. Ṣigba omẹ ehelẹ yin ṣejannabinọ, taidi Satani po aovi etọn lẹ po, nado na pekọ ojlo zanhẹmẹ tọn wẹ tin to otẹn tintan mẹ na yé. Podọ yé nọ tẹnpọn nado hẹn homẹhun yede gbọn zinzanhẹ yọpọvu lẹ dali. Ehe ylan taun!

Be a yọ́n nuhe yé sọgan wà nado na pekọ ojlo zanhẹmẹ tọn yetọn ya?⁠— Yé sọgan tẹnpọn nado nọ sá alọ do vijinu towe go. Kavi yé tlẹ sọgan nọ sá vijinu yetọn do vijinu towe go. Ṣigba hiẹ ma dona dike mẹde ni yí onẹ́ kavi ayọ́ towe do daihun pọ́n gbede. Nọvisunnu towe kavi nọviyọnnu towe kavi onọ̀ towe kavi otọ́ towe lọsu ma tlẹ dona yí ì do daihun. Aṣlinu towe wẹ onú ehelẹ yin.

Nawẹ hiẹ sọgan basi hihọ́na agbasa towe sọn mẹhe nọ wà onú ylankan ehelẹ si gbọn?⁠— Tintan whẹ́, ma dike mẹdepope ni yí vijinu towe do daihun blo. Eyin mẹde tẹnpọn nado wàmọ, dawhá dọmọ: “Gbọ! Eyin e ma yinmọ, na jẹwhẹ towe!” Podọ eyin mẹlọ dọ dọ hiẹ lọsu wẹ zọ́n bọ onú mọnkọtọn do jọ, ma yí ì sè blo. Lalo wẹ. Ma dibusi i blo, yì jẹwhẹ! Eyin mẹlọ tlẹ dọ dọ aṣlinu de wẹ nuhe mì basi dopọ lọ yin to ewọ po hiẹ po kẹdẹ ṣẹnṣẹn, ma yí ì sè blo, yì jẹwhẹ. Eyin mẹlọ tlẹ dopagbe nado na we nunina dagbedagbe lẹ kavi dobuna we, tẹnpọn bo họ̀nsọn e dè bo yì jẹwhẹ.

A ma dona dibu, ṣigba a dona tin to aṣeji. Eyin mẹjitọ towe lẹ gbẹ́ na we ma nado yì mẹde dè kavi fihe owù tin te, a dona setonuna yé. Eyin a wàmọ, a na glọnalina omẹ ylankan de nado wà onú gbigble de hẹ we.