Linlin Ahọluduta Tọn Sọha 38tọ Na Yin Mimá to Novembre Mẹ!
1. Kanbiọ tẹlẹ wẹ gbẹtọ lẹ nọ kanse yede gando oṣiọ lẹ go, podọ nawẹ yé na mọ gblọndo na kanbiọ enẹlẹ to novembre mẹ gbọn?
1 Kẹntọ de wẹ okú yin na mẹlẹpo, mahopọnna dọ nuyise voovo wẹ gbẹtọ lẹ tindo. (1 Kọl. 15:26) Mẹsusu wẹ nọ kanse yede fie oṣiọ lẹ te, podọ eyin emi na wá vọ́ yé mọ to gbèdopo. Enẹwutu, agun lẹpo lẹdo aihọn pé na tindo mahẹ to Linlin Ahọluduta Tọn Sọha 38tọ he hosọ etọn yin Be Oṣiọ lẹ Sọgan Gọwá Nọgbẹ̀ Nugbonugbo Ya? mimá mẹ na osun dopo. Nujijla vonọtaun ehe na bẹjẹeji to 1er novembre. To nujijla ehe godo, Linlin Ahọluduta Tọn Sọha 38tọ na nọ yin yiyizan to lizọnyizọn lọ mẹ taidi alọnuwe pẹvi lẹ.
2. Nawẹ Linlin Ahọluduta Tọn Sọha 38tọ yin awuwlena do?
2 Lehe E Yin Awuwlena Do: Linlin Ahọluduta Tọn Sọha 38tọ yin awuwlena to aliho de mẹ nado yin yinyẹ́n do gaa ji, na hosọ he fọnjlodotenamẹ lọ gọna nukinkan lọ lẹ “Etẹwẹ yin gblọndo towe . . . mọwẹ? lala? n’ma yọnẹn?” nido sọawuhia to nukọn. To whenue wehiatọ lọ hùn Linlin Ahọluduta Tọn lọ, e na mọ gblọndo he Biblu na na kanbiọ he nọtena hosọ lọ gọna ale he opagbe Biblu tọn sọgan hẹnwa na ẹn. E nasọ mọ nuhewutu e sọgan dejido Biblu go. Kanbiọ ojlofọndotenamẹ tọn de tin to godo Linlin Ahọluduta Tọn lọ tọn nado hẹn wehiatọ lọ lẹnnupọn bo whàn ẹn nado plọnnu dogọ.
3. Nawẹ Linlin Ahọluduta Tọn Sọha 38tọ na yin mimá gbọn?
3 Lehe E Na Yin Mimá Do: Nujijla ehe na yin bibasi dile e nọ yì do to oylọ-basinamẹwe Oflin po plidopọ agbegbe po tọn mimá whenu. Mẹho lẹ na na anademẹ lẹ gando lehe nujijla lọ na yin bibasi gbọn aigba-denamẹ agun lọ tọn blebu ji do go, sọgbe hẹ wekanhlanmẹ 1er avril 2013 tọn he yé mọyi. Agun he ma tindo aigba-denamẹ susu lẹ sọgan kanse agun he to yakẹ bo tindo aigba-denamẹ susu lẹ eyin emi sọgan gọalọna yé. To whenue a jlo na yí Linlin Ahọluduta Tọn Sọha 38tọ he a na má, nọ flindọ sọha he a na yizan to osẹ dopo mẹ kẹdẹ wẹ a dona yí. To ojlẹ nujijla lọ tọn mẹ, eyin Linlin Ahọluduta Tọn lọ ko yin mimá sọn whédegbè jẹ whédegbè to aigba-denamẹ lọ lẹpo ji godo, vọkan he pò lọ lẹ sọgan yin mimá to kunnudide gbangba tọn mẹ. Eyin osun lọ ma ko fó bọ vọkan lọ lẹ vọ̀, owe he dona yin zizedonukọnnamẹ to osun lọ mẹ lẹ wẹ mí dona yizan. To Sibigbe tintan osun lọ tọn, nujijla vonọtaun lọ wẹ mí na na ayidonugo, kakati nido yin plọnmẹ Biblu lẹ bibẹjẹeji. To sẹfifo lẹ, mí sọ dona nọ ze linlinnamẹwe lẹ donukọnnamẹ eyin e biọ domọ. Be hiẹ to tito basi nado tindo mahẹ gigọ́ to nujijla vonọtaun ehe mẹ ya?