Lẹnnupọn to Gbigbọ-Liho bo Nọgbẹ̀!
“Nulinlẹnpọn to gbigbọ-liho zẹẹmẹdo ogbẹ̀.”—LOMUNU LẸ 8:6, NW.
1, 2. Vogbingbọn tẹwẹ Biblu basi to “agbasalan” po “gbigbọ” po ṣẹnṣẹn?
E MAYIN azọngban he bọawu nado hẹn teninọ walọyizan madodiho tọn de go to Jiwheyẹwhe nukọn to ogbẹ́ he gblezọn he nọ pagigona pekọ nina ojlo agbasalan tọn lẹ de ṣẹnṣẹn gba. Ṣigba, Owe-wiwe do vogbingbọn he tin to “agbasalan” po “gbigbọ” po mẹ hia, bo do vogbingbọn họnwun de hia to kọdetọn ylankan he tin to dotẹnmẹ nina mẹdetiti nado yin dududeji gbọn agbasalan ylandonọ lọ dali po kọdetọn dona tọn he tin to alọkikẹyi nuyiwadomẹji gbigbọ wiwe Jiwheyẹwhe tọn lẹ mẹ po tọn ṣẹnṣẹn.
2 Di apajlẹ, Jesu Klisti dọmọ: “Gbigbọ wẹ nagbẹ̀mẹ; agbasa ma doale de: ohó he yẹn dọ hlan mì nẹlẹ, gbigbọ wẹ yé, ogbẹ̀ wẹ yé.” (Johanu 6:63) Apọsteli Paulu wlanwe hlan Klistiani he tin to Galatia lẹ dọmọ: “Agbasalan nọ túnwán jẹagọ do [gbigbọ] go, [gbigbọ] sọ nọ túnwán jẹagọ do agbasalan go; ehelẹ sọ nọ gbọnvo do yenọzo go.” (Galatianu lẹ 5:17) Paulu sọ dọmọ: “Mẹhe do hlan agbasalan etọn, gbọn agbasalan mẹ e na gbẹ̀n gbigble; ṣigba mẹhe do hlan [gbigbọ], gbọn [gbigbọ] mẹ e nasọ gbẹ̀n ogbẹ̀ madopodo.”—Galatianu lẹ 6:8.
3. Nuhudo etẹ tọn wẹ tin nado jẹ mẹdekannu sọn ojlo po ayilinlẹn agọ̀ lẹ po si?
3 Gbigbọ wiwe Jehovah tọn—yèdọ huhlọn yido wazọ́n etọn—sọgan de “wantuntun agbasalan tọn” lẹ po nuyiwadomẹji mẹvasudo tọn gbọn agbasalan ylandonọ mítọn dali sẹ̀ to aliho dagbe mẹ. (1 Pita 2:11) Nado vò sọn kanlinmọgbenu ayilinlẹn agọ̀ tọn lẹ si, onú titengbe wẹ e yin dọ mí ni tindo alọgọ gbigbọ Jiwheyẹwhe tọn tọn, na Paulu wlan dọmọ: “Nulinlẹnpọn to agbasalan-liho zẹẹmẹdo okú, ṣigba nulinlẹnpọn to gbigbọ-liho zẹẹmẹdo ogbẹ̀ po jijọho po.” (Lomunu lẹ 8:6, NW ) Etẹwẹ e zẹẹmẹdo nado lẹnnupọn to gbigbọ-liho?
“Nulinlẹnpọn to Gbigbọ-Liho”
4. Etẹwẹ “nulinlẹnpọn to gbigbọ-liho” zẹẹmẹdo?
4 To whenuena Paulu wlanwe gando “nulinlẹnpọn to gbigbọ-liho” go, e yí hogbe Glẹki tọn de zan he zẹẹmẹdo “aliho nulẹnpọn tọn, ayiha zizedo nude ji, . . . yanwle, mẹwhinwhàn, kanvinván.” Hogbe nuyiwa tọn he gandego de zẹẹmẹdo “nado lẹnnupọn, nado tindo ayilinlẹn to aliho tangan de mẹ.” Enẹwutu, nulinlẹnpọn to gbigbọ-liho zẹẹmẹdo yinyin anadena, gandudeji, podọ yin whinwhàn gbọn huhlọn yido wazọ́n Jehovah tọn dali. E nọ zẹẹmẹdo dọ mí nọ dike na nulinlẹnpọn, ayilinlẹn lẹ, po mẹwhinwhàn mítọn lẹ po ni wá nuyiwadomẹji gigọ́ gbigbọ wiwe Jiwheyẹwhe tọn glọ sọn ojlo mẹ wá.
5. Obá tẹ mẹ wẹ mí dona jo mídelẹ na nuyiwadomẹji gbigbọ wiwe tọn jẹ?
5 Obá he mẹ mí dona jo míde hlan nuyiwadomẹji gbigbọ wiwe tọn jẹ yin nùzindeji gbọn Paulu dali to whenuena e dọho gando yinyin ‘afanumẹ gbọn gbigbọ dali’ go. (Lomunu lẹ 7:6) To dodonu yise yetọn to avọ́sinsan ofligọ Jesu tọn mẹ ji, Klistiani lẹ ko yin hinhẹn jẹ mẹdekannu sọn gandudomẹji gbọn ylando dali mẹ bo ko gbọnmọ dali “kú” na ninọmẹ dai tọn yetọn taidi afanumẹ etọn lẹ. (Lomunu lẹ 6:2, 11) Mẹhe kú to aliho yẹhiadonu tọn mọnkọtọn mẹ lẹ gbẹsọ pò to ogbẹ̀ to agbasa-liho bo ko vò todin nado hodo Klisti taidi “afanumẹ dodo tọn.”—Lomunu lẹ 6:18-20.
Wunmẹdidiọ Ayidego Tọn De
6. Wunmẹdidiọ tẹwẹ yin numimọ etọn tindo gbọn mẹhe to lilẹzun ‘afanumẹ dodowiwa tọn’ lẹ dali?
6 Wunmẹdidiọ sọn “afanumẹ ylando tọn” yinyin mẹ hlan Jiwheyẹwhe sinsẹ̀n kọ̀n taidi “afanumẹ dodo tọn” yin nujijọ ayidego tọn na nugbo tọn. Gando mẹdelẹ he tindo numimọ diọdo mọnkọtọn lẹ go, Paulu wlan dọmọ: ‘Mì ko yin kiklọwé, mì ko yin hinhẹnzun wiwe, mì ko yin lilá di dodonọ to oyín Oklunọ mítọn Jesu Klisti tọn mẹ podọ po gbigbọ Jiwheyẹwhe mítọn tọn po mẹ.’—Lomunu lẹ 6:17, 18; 1 Kọlintinu lẹ 6:11.
7. Naegbọn e do yin nujọnu nado tindo pọndohlan Jehovah tọn gando whẹho lẹ go?
7 Nado sọgan tindo numimọ wunmẹdidiọ ayidego tọn mọnkọtọn, tintan whẹ́ mí dona plọnnu gando pọndohlan Jehovah tọn do whẹho lẹ ji go. Owhe kanweko susu die wayi, psalm-kantọ Davidi vẹ̀ Jiwheyẹwhe vẹkuvẹku dọmọ: “Hẹn mi yọ́n ali towe, OKLUNỌ E . . . Do mi gbọn ali nugbo towe ji, bosọ plọn mi.” (Psalm 25:4, 5) Jehovah dotoaina Davidi, podọ Ewọ sọgan na gblọndo na odẹ̀ mọnkọtọn de sọn devizọnwatọ egbezangbe tọn etọn lẹ dè ga. To whenuena e yindọ aliho Jiwheyẹwhe tọn lẹ po nugbo etọn po yin madodiho bosọ yin wiwe, ayihamẹlinlẹnpọn do yé ji na yin alọgọnamẹnu eyin mí yin whiwhlepọn nado hẹn pekọ wá na ojlo mawé agbasalan tọn lẹ.
Azọngban Titengbe Ohó Jiwheyẹwhe Tọn Tọn
8. Naegbọn e do yin dandannu dọ mí ni plọn Biblu?
8 Ohó Jiwheyẹwhe tọn, Biblu, yin nudetọn gbigbọ etọn tọn. Enẹwutu, aliho titengbe dopo nado dike na gbigbọ enẹ ni yinuwado mí ji wẹ nado to hihia bosọ to Biblu plọn—eyin e yọnbasi egbesọegbesọ. (1 Kọlintinu lẹ 2:10, 11; Efesunu lẹ 5:18) Nugbo po nunọwhinnusẹ́n Biblu tọn lẹ po yíyí do gọ́ ayiha po ahun mítọn po mẹ na gọalọna mí nado nọte pehẹ mẹgbeyinyan lẹ do gbigbọnọ-yinyin mítọn ji. Mọwẹ, whenuena whlepọn mawé tọn lẹ fọndote, gbigbọ Jiwheyẹwhe tọn sọgan hẹn nuflinmẹ Owe-wiwe tọn lẹ po nunọwhinnusẹ́n anademẹ tọn lẹ po wá ayiha mítọn lẹ mẹ he sọgan na huhlọn gbemima mítọn nado yinuwa to kọndopọmẹ hẹ ojlo Jiwheyẹwhe tọn. (Psalm 119:1, 2, 99; Johanu 14:26) Enẹwutu, mí ma yin kiklọ biọ hihodo nuwiwa he jẹagọ de mẹ gba.—2 Kọlintinu lẹ 11:3.
9. Nawẹ oplọn Biblu tọn nọ hẹn gbemima mítọn nado whlá haṣinṣan mítọn hẹ Jehovah lodo gbọn?
9 Dile mí yí ahundopo po sọwhiwhe po do zindonukọn to oplọn Owe-wiwe tọn po owe sinai do Biblu ji lẹ po tọn mítọn mẹ, gbigbọ Jiwheyẹwhe tọn nọ yinuwado ayiha po ahun mítọn po ji, bo nọ hẹn sisi mítọn na nujinọtedo Jehovah tọn lẹ siso dogọ. Haṣinṣan mítọn hẹ Jiwheyẹwhe nọ lẹzun onú titengbe hugan to gbẹzan mítọn mẹ. To whenuena mí pannukọn whlepọn, linlẹn lẹ gando lehe e yin awuvivinu do sọ nado tindo mahẹ to ylanwiwa mẹ ma nọ yin hinhẹn e go gba. Kakatimọ, ahunmẹdunamẹnu afọdopolọji tọn mítọn wẹ nado hẹn teninọ mítọn hlan Jehovah go. Pinpẹn-nutọn-yinyọnẹn sinsinyẹn na haṣinṣan mítọn hẹ ẹ nọ whàn mí nado diahi hẹ ayilinlẹn depope he sọgan hẹn ẹn gble kavi hù i sudo.
“Ṣo Na Yẹn Ka Yiwanna Osẹ́n Towe Dole!”
10. Naegbọn tonusisena osẹ́n Jehovah tọn yin dandannu nado sọgan lẹnnupọn to gbigbọ-liho?
10 Eyin mí na lẹnnupọn to gbigbọ-liho, oyọnẹn Ohó Jiwheyẹwhe tọn kẹdẹ ma ko pé gba. Ahọlu Sọlọmọni tindo nukunnumọjẹnumẹ dagbe tlala nujinọtedo Jehovah tọn lẹ tọn, ṣigba e gboawupo nado nọgbẹ̀ gbọn yé dali to adà godo tọn gbẹzan etọn tọn whenu. (1 Ahọlu lẹ 4:29, 30; 11:1-6) Eyin mí yin gbẹtọ-gbigbọnọ, mí na mọ nuhudo lọ e mayin nado yọ́n nuhe Biblu dọ kẹdẹ gba ṣigba na tonusisena osẹ́n Jiwheyẹwhe tọn po ayiha lẹpo po. Enẹ zẹẹmẹdo dogbapọnna nujinọtedo Jehovah tọn lẹ po sọwhiwhe po bosọ dovivẹnu vẹkuvẹku nado hodo yé. Psalm-kàntọ lọ tindo walọyizan mọnkọtọn. E jihàn dọmọ: “Ṣó na yẹn ka yiwanna osẹ́n towe dole! Ewu wẹ ayihamẹlẹnpọn ṣie to azán popo gbè.” (Psalm 119:97) To whenuena mí yin ahunmẹduna nugbonugbo gando osẹ́n Jiwheyẹwhe tọn hihodo go, mí nọ jẹ jẹhẹnu jijọ-di-Jiwheyẹwhe tọn lẹ dohia ji. (Efesunu lẹ 5:1, 2) Kakati nado yin dindọ̀n gbọn ylanwiwa dali matin avunteninọ, mí nọ do sinsẹ́n gbigbọ tọn hia, podọ ojlo nado hẹn homẹhun Jehovah nọ lẹkọna mí sọn “azọ́n agbasalan tọn” ylankan lẹ kọ̀n.—Galatianu lẹ 5:16, 19-23; Psalm 15:1, 2.
11. Nawẹ hiẹ na basi zẹẹmẹ dọ osẹ́n Jehovah tọn he gbẹ́ ogalilọ dai yin hihọ́ de na míwlẹ gbọn?
11 Nawẹ mí sọgan wleawuna osi sisosiso po owanyi po na osẹ́n Jehovah tọn gbọn? Aliho dopo wẹ dogbigbapọn na nuhọakuẹ etọn po sọwhiwhe po. Gbadopọnna osẹ́n Jiwheyẹwhe tọn he hẹn kọndopọ zanhẹmẹ tọn dote do alọwle ṣẹnṣẹn bosọ gbẹ́ ogalilọ po ayọdide po dai. (Heblu lẹ 13:4) Be tonusise na osẹ́n ehe hò onú dagbe depope yí sọn mí si wẹ ya? Be Otọ́ owanyinọ olọn mẹ tọn na do osẹ́n de he na hò nude heyin alemọyinu mítọn yí wẹ ya? Na nugbo tọn e mayin mọ! Pọ́n nuhe to jijọ to gbẹzan mẹsusu he ma tin to kọndopọmẹ hẹ nujinọtedo walọyizan Jehovah tọn lẹ mẹ. Ohò he yè ma jlo lẹ nọ saba yin dide kavi vlavo biọ alọwle zogbezogbe po ehe ma tindo ayajẹ po tọn lẹ mẹ. Mẹsusu dona penukundo ovi de go matin asu de kavi asi de. Humọ, ogalọtọ lẹ nọ hùn yedelẹ do nùvo na asamẹzọ̀n lẹ. (1 Kọlintinu lẹ 6:18) Podọ eyin devizọnwatọ Jehovah tọn de huwhẹ̀ ogalilọ tọn, nugandomẹgo numọtolanmẹ tọn sọgan yin mẹvasudonu. Tintẹnpọn nado duto adidudu heyin ayihadawhẹnamẹnu heyin whẹgbledo tọn de ji sọgan hẹn amlọnmadọ́ po awufiẹsa apọ̀nmẹ tọn po wá. (Psalm 32:3, 4; 51:3) To whelọnu lo, be e ma họnwun dọ osẹ́n Jehovah tọn he gbẹ́ ogalilọ yin awuwlena nado basi-hihọ́na mí ya? Mọwẹ, alemọyi titengbe de tin na nugbo tọn to wiweji-ninọ walọyizan tọn de go hinhẹn mẹ!
Hodẹ̀ na Alọgọ Jehovah Tọn
12, 13. Naegbọn e do sọgbe nado hodẹ̀ to whenuena mí yin lilẹdo gbọn ojlo ylanwiwa tọn lẹ dali?
12 Nulinlẹnpọn to gbigbọ-liho nọ biọ odẹ̀ vẹkuvẹku na taun tọn. Onú he sọgbe wẹ e yin nado biọ alọgọ gbigbọ Jiwheyẹwhe tọn na Jesu dọmọ: “Eyin mìwlẹ . . . yọ́n le yè nọ na nunina dagbe hlan ovi mìtọn lẹ do, nẹmunẹmu wẹ Otọ́ mìtọn olọn tọn na na [gbigbọ wiwe] hlan yé he biọ to e dè lẹ.” (Luku 11:13) To odẹ̀ mẹ, mí sọgan do ginganjẹ gbigbọ lọ go mítọn na alọgọ gando madogán mítọn lẹ go hia. (Lomunu lẹ 8:26, 27) Eyin mí yọnẹn dọ ojlo kavi walọyizan ylando tọn lẹ to gingando mí go, kavi eyin yisenọ owanyinọ hatọ de hẹn ehe wá ayidonugo mítọn mẹ, nuyọnẹnnu wẹ e na yin nado donù nuhahun lọ go tlọlọ to odẹ̀ mítọn lẹ mẹ bosọ biọ godonọnamẹ Jiwheyẹwhe tọn to duduto ayilinlẹn ehelẹ ji mẹ.
13 Jehovah sọgan gọalọna mí nado ze ayidonugo do dodowiwa, wiweji-ninọ, jijọ dagbe, po onú he jẹna pipà lẹ po ji. Podọ lehe e yin nuhe sọgbe nado vẹvẹna ẹn vẹkuvẹku na “jijọho Jiwheyẹwhe tọn” nido deanana ahun mítọn lẹ po huhlọn apọ̀nmẹ tọn mítọn lẹ po do sọ! (Filippinu lẹ 4:6-8) Enẹwutu mì gbọ mí ni hodẹ̀ na godonọnamẹ Jehovah tọn nado ‘doafọna dodowiwa, mẹdezejo jijọ-di-Jiwheyẹwhe tọn, yise, owanyi, akọndona, walọmimiọn.’ (1 Timoti 6:11-14) Po alọgọ Otọ́ mítọn olọn mẹ tọn po, magbọjẹ lẹ po whlepọn lẹ po ma na whẹ́n jẹ obá he ma yọ́n anadena tọn mẹ gba. Kakatimọ, gbẹzan mítọn lẹ na yin hiadogona gbọn vivomẹ-ninọ he Jiwheyẹwhe nọ namẹ dali.
Mì Hẹn Homẹgblena Gbigbọ Blo
14. Naegbọn gbigbọ Jiwheyẹwhe tọn do yin huhlọn de na wiweji-ninọ?
14 Devizọnwatọ he whèwhín Jehovah tọn lẹ nọ yí ayinamẹ Paulu tọn do yizan mẹ he dọmọ: “Mì hẹn [gbigbọ] ṣi blo.” (1 Tẹsalonikanu lẹ 5:19) To whenuena e yindọ gbigbọ Jiwheyẹwhe tọn yin “gbigbọ wiwe tọn,” madodiho, wiwe-ṣeke, wiwe wẹ e yin. (Lomunu lẹ 1:4) To whenuena e to nuyiwa do mí ji, gbigbọ ehe nọ gbọnmọ dali yin huhlọn de na wiwe, kavi madodiho. E nọ gọalọ nado hẹn mí do aliho wiwe ogbẹ̀ tọn de ji he yin hiadogona gbọn tonusise hlan Jiwheyẹwhe dali. (1 Pita 1:2) Walọyizan mawé depope nọ wleawuna nukunpẹvi yiyido pọ́n gbigbọ enẹ, podọ enẹ sọgan tindo kọdetọn nugbajẹmẹji tọn lẹ. Nawẹ e yinmọ gbọn?
15, 16. (a) Nawẹ mí sọgan hẹn homẹgble na gbigbọ Jiwheyẹwhe tọn gbọn? (b) Nawẹ mí sọgan dapana homẹ hinhẹngble na gbigbọ Jehovah tọn gbọn?
15 Eyọn, Paulu wlan dọmọ: “Mì hẹn homẹgblena [gbigbọ wiwe] Jiwheyẹwhe tọn blo, mẹhe yè ko yí do dohia mì go jẹ ofligọ-zangbe.” (Efesunu lẹ 4:30) Owe-wiwe do gbigbọ Jehovah tọn hia taidi whiwhle, kavi ‘ohia nuhe jà to nukọnmẹ lẹ tọn,’ na Klistiani nugbonọ yiamisisadode lẹ. Podọ enẹ yin ogbẹ̀ jọmaku olọn mẹ tọn. (2 Kọlintinu lẹ 1:22; 1 Kọlintinu lẹ 15:50-57; Osọhia 2:10) Gbigbọ Jiwheyẹwhe tọn sọgan deanana mẹyiamisisadode lẹ gọna gbẹdohẹmẹtọ yetọn lẹ po todido aigba ji tọn de po to ogbẹ̀ nugbonọ-yinyin tọn de mẹ bo sọgan gọalọna yé nado dapana azọ́n ylando tọn lẹ.
16 Apọsteli lọ gbẹnunamẹ sọta ayilinlẹn lẹ dohlan lalonọ-yinyin, ajojijẹ, walọyizan winyandomẹ tọn, po onú mọnkọtọn lẹ po. Eyin mí na dotẹnmẹ mídelẹ nado yin dindọ̀n gbọn onú mọnkọtọn lẹ dali, mí na to nuyiwa sọta ayinamẹ Ohó Jiwheyẹwhe tọn he gbigbọ gbọdo. (Efesunu lẹ 4:17-29; 5:1-5) Mí na gbọnmọ dali nado to homẹ hẹngblena gbigbọ Jiwheyẹwhe tọn jẹ obá he gblo de mẹ, podọ enẹ wẹ yin nude he mí jlo nado dapana na jide tọn. Na whẹho enẹ wutu, eyin depope to mí mẹ jẹ ayinamẹ Ohó Jehovah tọn gbẹdai ji, mí sọgan jẹ awuwlena walọyizan lẹ kavi aṣa lẹ he sọgan dekọtọn do ylanwiwa sọn ojlo mẹ wá bosọ hẹn nukundagbe sọn olọn mẹ wá bu mlẹnmlẹn mẹ. (Heblu lẹ 6:4-6) Dile etlẹ yindọ mí ma na to ylanwa to alọnu din, mí sọgan ko to lilẹhlan adà enẹ ji. Gbọn nuyiwa jẹagọdo anademẹ gbigbọ tọn dali, mí sọgan to homẹ hẹngblena ẹn. Mí nasọ to avùntenọ bosọ to homẹ hẹngble na Jehovah, yèdọ asisa gbigbọ wiwe tọn. Taidi mẹhe yiwanna Jiwheyẹwhe lẹ, mí ma na jlo nado wàmọ gbede gba. Kakatimọ, mí sọgan hodẹ̀ na alọgọ Jehovah tọn na mí ni ma do hẹn homẹgblena gbigbọ etọn ṣigba bo penugo nado hẹn gbégbigbò wá na oyín wiwe etọn gbọn nukọnzinzindo nado lẹnnupọn to gbigbọ-liho dali.
Zindonukọn Nado to Nulẹnpọn to Gbigbọ-Liho
17. Etẹwẹ yin delẹ to yanwle gbigbọmẹ tọn lẹ mẹ he mí sọgan zedai, podọ naegbọn ehe wiwà do yin nuyọnẹnnu?
17 Aliho ayidego tọn dopo nado to nulẹnpọn to gbigbọ-liho wẹ nado ze yanwle gbigbọmẹ tọn lẹ dai bosọ wazọ́n nado jẹ yé kọ̀n. Sinai do nuhudo po ninọmẹ mítọn lẹ po ji, yanwle mítọn lẹ sọgan bẹ hinhẹn walọyizan nupinplọn tọn mítọn pọnte, hinhẹn mahẹ mítọn to azọ́n yẹwhehodidọ tọn mẹ jideji, kavi pipegan na lẹblanulọkẹyi sinsẹ̀nzọn tọn vonọtaun de, taidi lizọnyizọn gbehosọnalitọ whenu-gigọ́ tọn, sinsẹ̀nzọn Bẹtẹli tọn, kavi azọ́n mẹdehlan tọn. Ehe na hẹn ayiha mítọn ján po dagbenu gbigbọmẹ tọn lẹ po bo nasọ gọalọna mí nado nọavunte sọta gbejijona madogán gbẹtọvi tọn mítọn lẹ kavi yinyin dindọ̀n gbọn yanwle agbasanu lẹ bibẹpli tọn po ojlo he ma sọgbe hẹ Owe-wiwe po he gbayipe to titonu ehe mẹ lẹ dali. Ehe na taun tọn wẹ yin nuyọnẹnnu, na Jesu dotuhomẹnamẹ dọmọ: “Mì bẹ adọkunnu pli na mìde to aigba ji blo, fie owán po okọ́ po nọ hẹn ẹn gble te, podọ fie ajotọ lẹ nọ gboadó bo fìnnú te: ṣigba mì bẹ́ adọkunnu pli na mìde to olọn mẹ, fie na owán kavi okọ́ ma nọ hẹn ẹn gble te, podọ fie ajọtọ lẹ ma nọ gboadó bosọ fìnnú te: na fie adọkunnu towe tin te, finẹ wẹ ayiha towe na tin te ga.”—Matiu 6:19-21.
18. Naegbọn e do yin onú titengbe sọmọ nado gbọṣi nulinlẹnpọn to gbigbọ-liho mẹ to azán godo tọn ehelẹ mẹ?
18 Nulinlẹnpọn to gbigbọ-liho po duduto ojlo aihọn mẹ tọn lẹ ji po wẹ yin aliho nuyọnẹn tọn to ‘azán godo tọn’ ehelẹ mẹ na taun tọn. (2 Timoti 3:1-5) Hu popolẹpo, “aihọn sọ to jujujei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.” (1 Johanu 2:15-17) Di apajlẹ, eyin Klistiani jọja de doafọna yanwle sinsẹ̀nzọn whenu-gigọ́ tọn, ehe sọgan yinuwa taidi anademẹnu de to owhe avùnnukundiọsọmẹ aflanmẹ kavi jọja whenu tọn lẹ mẹ. To whenuena e yin kọgbidina nado jogbe, omẹ mọnkọtọn na tindo pọndohlan he họnwun nuhe ewọ sunnu kavi yọnnu jlo nado wadotana to sinsẹ̀nzọn Jehovah tọn mẹ. Gbẹtọ gbigbọnọ mọnkọtọn na pọ́n ẹn hlan taidi gúgú, yèdọ nululu, nado hẹn jijẹ yanwle gbigbọmẹ tọn lẹ kọ̀n bu na afọdona agbasanu lẹ kavi gbẹdudu depope he ylando dopagbe nado namẹ. Flin dọ Mose he tindo ayilinlẹn gbigbọmẹ tọn ‘dè nado yin yasana hẹ gbẹtọ Jiwheyẹwhe tọn lẹ kakati nado tindo gbẹdudu ojlẹ gli ylando tọn.’ (Heblu lẹ 11:24, 25) Vlavo jọja kavi mẹhomẹ, mí basi nudide mọnkọtọn to whenuena mí zindonukọn nado to nulẹnpọn to gbigbọ-liho kakati nido yin gbọn agbasalan madogán lọ gblamẹ.
19. Alemọyi tẹlẹ wẹ mí na duvivi etọn eyin mí gbọṣi nulinlẹnpọn to gbigbọ-liho mẹ?
19 ‘Nulinlẹnpọn to agbasalan-liho zẹẹmẹdo okẹn do Jiwheyẹwhe,’ to whenuena e yindọ ‘nulinlẹnpọn to gbigbọ-liho zẹẹmẹdo ogbẹ̀ po jijọho po.’ (Lomunu lẹ 8:6, 7) Eyin mí gbọṣi nulinlẹnpọn to gbigbọ-liho mẹ, mí na tindo numimọ jijọho họakuẹ tọn. Ahun po huhlọn apọ̀nmẹ tọn mítọn lẹ po na yin hihọ́-basina to gigọ́mẹ sọn nuyiwadomẹji heyin ninọmẹ ylando tọn mítọn mẹ. Mí na penugo nado nọavunte ganji sọta whlepọn lẹ he na hẹn mí tindo mahẹ to ylanwiwa mẹ. Podọ mí na tindo alọgọ sọn olọn mẹ wá nado pehẹ nudindọn he to nukọnzindo to agbasalan po gbigbọ po ṣẹnṣẹn.
20. Naegbọn mí sọgan deji dọ nuhe yọnbasi wẹ e yin nado gbawhàn to avùnhiho lọ to agbasalan po gbigbọ po ṣẹnṣẹn?
20 Gbọn nukọnzinzindo nado lẹnnupọn to gbigbọ-liho, mí nọ tindo kanṣiṣa nujọnu tọn de hẹ Jehovah, yèdọ asisa ogbẹ̀ po gbigbọ wiwe tọn po. (Psalm 36:9; 51:11) Satani Lẹgba po nuyizan etọn lẹ po to nuhe go yé pé lẹpo wà nado và haṣinṣan mítọn hẹ Jehovah Jiwheyẹwhe sudo. Yé nọ tẹnpọn nado deanana nulẹnpọn mítọn lẹ, to yinyọnẹn mẹ dọ eyin mí jogbe, ehe na planmẹ jẹ okẹn do Jiwheyẹwhe mẹ podọ biọ okú mẹ. Ṣigba mí sọgan gbawhàn to awhàn he tin to agbasalan po gbigbọ po ṣẹnṣẹn ehe mẹ. Enẹ wẹ yin numimọ Paulu tọn, na to whenuena e to wekan dogbọn avùnhiho edetiti tọn dali, e kanbiọ jẹnukọn dọmọ: “Mẹnu wẹ na whlẹn mi sọn agbasa okú tọn he si?” Enẹgodo to didohia dọ whlẹngán yọnbasi mẹ, e lá dọmọ: “Yẹn dopẹna Jiwheyẹwhe gbọn Jesu Klisti Oklunọ mítọn dali.” (Lomunu lẹ 7:21-25) Mílọsu sọgan dopẹna Jiwheyẹwhe gbọn Klisti dali na awuwiwlena nuyizan lọ nado pehẹ madogán gbẹtọvi tọn lẹ bosọ zindonukọn to nulinlẹnpọn to gbigbọ-liho mẹ po todido jiawu lọ po heyin ogbẹ̀ madopodo tọn.—Lomunu lẹ 6:23.
Be Hiẹ Flin Ya?
• Etẹwẹ e zẹẹmẹdo nado lẹnnupọn to gbigbọ-liho?
• Nawẹ mí sọgan gbọ̀ na gbigbọ Jehovah tọn ni yinuwado mí ji gbọn?
• Basi zẹẹmẹ nuhewutu, to avùnhiho sọta ylando mítọn mẹ, e do yin onú titengbe nado plọn Biblu, nado setonuna osẹ́n Jehovah tọn, podọ nado hodẹ̀ hlan ẹn.
• Nawẹ yanwle gbigbọmẹ tọn lẹ zizedai sọgan hẹn mí gbọṣi aliho ogbẹ̀ tọn ji gbọn?
[Yẹdide to weda 16]
Biblu pinplọn nọ gọalọ na mí nado nọavunte sọta mẹgbeyinyan lẹ do gbigbọnọ-yinyin mítọn ji
[Yẹdide to weda 17]
Nuhe sọgbe wẹ e yin nado hodẹ̀ na alọgọ Jehovah tọn nado duto ojlo ylanwiwa tọn lẹ ji
[Yẹdide to weda 18]
Yanwle gbigbọmẹ tọn lẹ sọgan gọalọna mí nado gbọṣi nulinlẹnpọn to gbigbọ-liho mẹ