Wehọmẹ Lizọnyizọn Yẹwhehọluduta Tọn 2015 Tọn Na Gọalọna Mí Nado Hẹn Aliho Mẹpinplọn Tọn Mítọn Pọnte — WESẸDOTẸN INTẸNẸT JI TỌN Watchtower Tọn

Wehọmẹ Lizọnyizọn Yẹwhehọluduta Tọn 2015 Tọn Na Gọalọna Mí Nado Hẹn Aliho Mẹpinplọn Tọn Mítọn Pọnte

¹ Psalm-kantọ Davidi wlan dọmọ: “Gbọ ohó onù ṣie mẹ tọn, po linlẹn ayiha ṣie mẹ tọn po, ni yin alọkẹyi to nukun towe mẹ, OKLUNỌ E, awinyan ṣie, mẹflitọ ṣie.” (Ps. 19:14) Mílọsu jlo dọ Jehovah ni kẹalọyi ohó mítọn le na mí yọ́n pinpẹn lẹblanulọkẹyi he mí tindo nado nọ dọ nugbo lọ to agun mẹ podọ to lizọnyizọn lọ mẹ tọn. Wehọmẹ Lizọnyizọn Yẹwhehọluduta tọn yin dopo to aliho he Jehovah nọ yizan nado plọnazọ́n mí lẹ mẹ. To sẹmẹsẹmẹ, azọ́nplọnmẹ ehe nọ yin nina to agun 111 000 linlán mẹ lẹdo aihọn pé bo ko gọalọna mẹmẹsunnu lẹ po mẹmẹyọnnu lẹ po, mahopọnna akọ̀ yetọn po ninọmẹ gbẹ̀mẹ tọn yetọn lẹ po, nado pegan taidi lizọnyizọnwatọ wẹndagbe lọ tọn lẹ. Taidi kọdetọn de, yé nọ yí nujikudo, zinzin po adọgbigbo po do plọnnumẹ.—Owalọ 19:8; Kọl. 4:6.

² Hosọ he tito-to-whinnu wehọmẹ tọn 2015 tọn na bẹhẹn lẹ na yin didesọn Hogo Biblu Tọn lẹ Na Hodọdopọ mẹ (to weda godo tọn Owe-Wiwe Glẹki Tọn lẹ—Lẹdogbedevomẹ Aihọn Yọyọ Tọn) podọ sọn Atọ̀họ̀-Nuhihọ́ lọ Tọn mẹ. Humọ, whenu he yin dide na nuagokun lẹ po Azọ́ndenamẹ 1 po ko yin didepo. Hukan he bọdego lẹ dọhodo diọdo enẹlẹ po nudọnamẹ he gando lehe adà dopodopo na nọ yin zizedonukọnnamẹ do po go ji.

³ Nuagokun lẹ sọn Biblu Hihia Mẹ: Mẹmẹsunnu he adà ehe yin didena lẹ na nọ yí nukunwhiwhe awe do gbadopọnna nuagokun dopo, yèdọ nuagokun dagbe de he sọ yọ́n-na-yizan sọn Biblu hihia osẹ lọ tọn mẹ. Awuwiwle sọwhiwhe tọn na gọalọna mẹmẹsunnu lọ lẹ nado má nuagokun titengbe de hẹ agun lọ to whenu he yin didena yé lọ gblamẹ. Enẹgodo, nukunwhiwhe ṣidopo na yin jijodo na mẹplidopọ lẹ dile mí nọ saba basi do. Mẹplidopọ lẹ na yí nukunwhiwhe daa (30 secondes) kavi whè humọ do dọ nuagokun yọ́n-na-yizan he yé duvivi etọn to Biblu hihia osẹ lọ mẹ tọn whenu. E nọ biọ awuwle po mẹplọnlọ dido mẹde go po nado na gblọndo dagbe de to nukunwhiwhe daa gblamẹ, ṣigba azọ́nplọnmẹ dagbe wẹ e yin na mí nado wàmọ. Gbọnmọ dali, mí sọ nọ na dotẹnmẹ mẹdevo lẹ nado dọ nuhe yé plọn to dodinnanu yetọn titi lẹ whenu.

⁴ Azọ́ndenamẹ Sọha 1: Todin, Biblu hihia na nọ dẹn na nukunwhiwhe atọ̀n kavi whè humọ bo ma na dite kaka de. Mẹhe mọ azọ́ndenamẹ yí nado hiawe lẹ dona basi zepọn wehihia lọ tọn whlasusu po gbèzeyiaga po, bo dovivẹnu nado ylọ hogbe lẹ to aliho he sọgbe mẹ bosọ hiawe po dẹ́didi po. Enẹ na zọ́n bọ mẹplidopọ lẹ na mọnukunnujẹ linlẹn he wehihia lọ bẹhẹn lẹ mẹ. Na wehihia nọ yí adà daho de wà to sinsẹ̀n-bibasi mítọn mẹ wutu, omẹ Jehovah tọn lẹpo wẹ dona dovivẹnu nado nọ hiawe ganji. Homẹ mítọn nọ hùn taun nado mọdọ ovi mítọn susu wẹ nọ hiawe ganji. Mẹjitọ lẹ jẹna pipà, na yé nọ dovivẹnu vẹkuvẹku nado gọalọna ovi yetọn lẹ na yé nido nọ hiawe ganji.

⁵ Azọ́ndenamẹ Sọha 2tọ: Nuzedonukọnnamẹ ehe na dẹn na nukunwhiwhe atọ́n bo na yin nukunpedego gbọn mẹmẹyọnnu de dali. Hosọ he yin didena ẹn lọ wẹ dona yin yiyizan. Eyin azọ́ndenamẹ lọ sinai do nudọnamẹ he tin to Hogo Biblu Tọn lẹ Na Hodọdopọ mẹ ji, adà lizọnyizọn lọ tọn tangan de he yọ́n-na-yizan na aigba-denamẹ agun lọ tọn wẹ wehọmẹvi lọ dona yizan nado wazọ́n etọn. Eyin azọ́ndenamẹ lọ sinai do mẹhe go Biblu donù de ji sọn Atọ̀họ̀-Nuhihọ́ lọ Tọn mẹ, wehọmẹvi lọ dona gbadopọnna nudọnamẹ he sọawuhia to yinkọ mẹlọ tọn glọ lẹ bo de wefọ he e na yizan lẹ bosọ do nuhe mí sọgan plọn sọn apajlẹ mẹlọ tọn mẹ hia. Wehọmẹvi lọ sọgan yí wefọ devo lẹ zan eyin yé tindo kanṣiṣa hẹ hosọ lọ. Nugopọntọ wehọmẹ tọn na de alọgọtọ dopo na ẹn.

⁶ Azọ́ndenamẹ Sọha 3tọ: Nuzedonukọnnamẹ ehe na dẹn na nukunwhiwhe atọ́n bo na yin nukunpedego gbọn mẹmẹsunnu kavi mẹmẹyọnnu de dali. Eyin mẹmẹyọnnu de wẹ tindo azọ́ndenamẹ ehe, e dona yin nukunpedego sọgbe hẹ anademẹ Azọ́ndenamẹ Sọha 2tọ tọn. Ṣigba, eyin mẹmẹsunnu de wẹ tindo azọ́ndenamẹ ehe bọ e sinai do Atọ̀họ̀-Nuhihọ́ lọ Tọn ji, azọ́n lọ dona yin zizedonukọnnamẹ taidi hodidọ de bo dona sọgbe hẹ nuhudo mẹplidopọ lẹ tọn. Wehọmẹvi lọ dona dọhodo hosọ he yin didena ẹn lọ ji bo de wefọ he e na yizan lẹ. E sọ dona do nuhe mí sọgan plọn sọn apajlẹ mẹlọ tọn mẹ hia.

⁷ Azọ́ndenamẹ Sọha 3tọ Bẹ Adà Yọyọ de Hẹn Na Mẹmẹsunnu Lẹ: To whenue azọ́ndenamẹ ehe sinai do Hogo Biblu Tọn lẹ Na Hodọdopọ ji, e dona yin zizedonukọnnamẹ taidi wadohia sinsẹ̀n-bibasi whẹndo tọn kavi sinsẹ̀nzọn kunnudegbe tọn. Nugopọntọ wehọmẹ tọn wẹ na nọ saba de alọgọtọ de po aliho nuzedonukọnnamẹ lọ tọn po. Alọgọtọ lọ dona yin hagbẹ whẹndo wehọmẹvi lọ tọn kavi mẹmẹsunnu de to agun lọ mẹ. Eyin wehọmẹvi lọ mọ wefọ devo lẹ he zinnudo nunọwhinnusẹ́n Biblu tọn he gando hosọ lọ go lẹ ji, e sọgan yí wefọ enẹlẹ zan eyin yé ma tlẹ sọawuhia to alọdlẹndonu lọ mẹ. Sọn ojlẹ de mẹ jẹ devo mẹ, azọ́ndenamẹ ehe sọgan yin didena mẹho agun tọn de. Mẹho agun tọn lẹ sọgan de alọgọtọ yetọn po aliho he mẹ wadohia lọ na yin zizedonukọnnamẹ te po. Matin ayihaawe, tulinamẹnu wẹ e na yin na agun lọ nado mọ lehe mẹho agun tọn lẹ na yí azọ́nyinyọnẹn mẹpinplọn tọn zan do to whenue yé na to wadohia lọ basi hẹ hagbẹ whẹndo tọn de kavi hẹ mẹmẹsunnu devo.

⁸ Ayinamẹ Nina: Nugopọntọ wehọmẹ tọn na nọ yí nukunwhiwhe awe zan to azọ́ndenamẹ wehọmẹvi dopodopo tọn godo nado na pipà po ayinamẹ mẹjlọdote tọn lẹ po sinai do owe Mọaleyi sọn Wehọmẹ Lizọnyizọn Yẹwhehọluduta Tọn ji. To whenue nugopọntọ wehọmẹ tọn to oylọ-basina wehọmẹvi de, e ma na dọ jẹhẹnu hodidọ tọn he ji wehọmẹvi lọ to azọ́nwa do. To azọ́n wehọmẹvi dopodopo tọn godo, nugopọntọ wehọmẹ tọn dona pà wehọmẹvi lọ dile e jẹ do. Ewọ na dọ jẹhẹnu hodidọ tọn he ji wehọmẹvi lọ to azọ́nwa do bo na kunnudenu he dohia dọ wehọmẹvi lọ wazọ́n do jẹhẹnu lọ ji po kọdetọn dagbe po. Kavi e na basi zẹẹmẹ to aliho he jọmẹ de mẹ bo dọ nuhewutu e na yọ́n dọ wehọmẹvi lọ ni na ayidonugo dogọ jẹhẹnu hodidọ tọn tangan enẹ.

⁹ Owe ayinamẹ tọn na wehọmẹvi dopodopo tin to owe Mọaleyi wehọmẹvi lọ tọn mẹ to weda 79 jẹ 81. To whenue wehọmẹvi de wà azọ́n etọn godo, nugopọntọ wehọmẹ tọn na kannu gọ́ owe wehọmẹvi lọ tọn mẹ bo kanse e to nuglọ eyin ewọ wazọ́n do ayinamẹ he zọnpọ hẹ jẹhẹnu hodidọ tọn he yin didena ẹn lọ ji. Nugopọntọ wehọmẹ tọn sọgan na wehọmẹvi lọ pipà kavi ayinamẹ yọ́n-na-yizan devo lẹ to opli godo kavi to ojlẹ devo mẹ. Ayidonugo sọwhiwhe tọn he nọ yin nina wehọmẹvi dopodopo to wehọmẹ lọ dona nọ yin pinpọnhlan taidi dotẹnmẹ hundote de nado gọalọna wehọmẹvi lọ nado yinukọn to gbigbọ-liho.—1 Tim. 4:15.

¹⁰ Eyin wehọmẹvi de dù gànmẹ, nugopọntọ wehọmẹ tọn kavi alọgọtọ de dona yawu na ohia de wehọmẹvi lọ. Di apajlẹ, yè sọgan húhúgàn kavi wleawuna nudidọ de nado dohia wehọmẹvi lọ po zinzin po dọ gànmẹ etọn ko vọ̀. Wehọmẹvi lọ dona fó nuhe dọ e te ma dọngbàn bo tlọ́n oplò ji.—Pọ́n owe Mọaleyi, w. 282, huk. 4.

¹¹ Mẹhe jẹ nubiọtomẹsi Biblu tọn lọ lẹ kọ̀n lẹpo wẹ yin tulina nado ze yinkọ dai to Wehọmẹ Lizọnyizọn Yẹwhehọluduta tọn. (Pọ́n owe Mọaleyi, w. 282, huk. 6.) Azọ́nplọnmẹ he mí nọ mọyi to wehọmẹ ehe ko gọalọna omẹ Jehovah tọn lẹ nado nọ dọyẹwheho podọ nado nọ plọnmẹ wẹndagbe Ahọluduta lọ tọn po nujikudo po, po yẹyi po, podọ po owanyi po. Ayihaawe ma tin dọ homẹ Jehovah tọn nọ hùn nado mọdọ mẹhe to alemọyi sọn mẹpinplọn yẹwhehọluduta tọn ehe mẹ to gigọ́ mẹ lẹpo to gigo pà na Emi!—Ps. 148:12, 13; Isa. 50:4.

[Asisa Nudọnamẹ Tọn to weda 5]

Nado yinukọn, kẹalọyi ayinamẹ lẹ bo yí yé do yizan mẹ