Hẹn Lizọnyizọn Towe Pọnte Dogọ—Lehe A Na Gblọnhona Whétọ He Gblehomẹ de Do

Nuhewutu E Do Yin Nujọnu: Susu mẹhe mí nọ dọyẹwheho na lẹ tọn wẹ nọ dotoaina mí. Etomọṣo, Jesu dọ dọdai dọ mẹdelẹ na gbẹwanna mí. (Johanu 17:14) Enẹwutu, e ma dona paṣa mí eyin whétọ de gblehomẹ. Aliho he mẹ mí na gblọnhona whétọ lọ te dona hẹn homẹ Jehovah tọn hùn, na afọzedaitọ etọn lẹ wẹ mí yin. (Lom. 12:17-21; 1 Pita 3:15) Gbọnmọ dali, mí ma na hẹn ninọmẹ lọ ylan deji. Enẹ nasọ yin kunnudide dagbe de na whétọ lọ po mẹhe to lẹdo lọ mẹ lẹ po bo sọgan whàn yé nado dotoaina Kunnudetọ Jehovah tọn lẹ to whedevonu.—2 Kọl. 6:3.

Lehe Mí Sọgan Wàmọ Do:

Fahomẹ bo jọmẹ hẹ whétọ lọ. Enẹ sọgan zọ́n bọ ninọmẹ lọ na pọnte. Mọnú zẹ̀ homẹgble etọn go. (Yẹwh. 7:9) Vlavo nuhahun etọn lẹ kavi ojlẹ he mẹ a wá e dè ma yọ́n wutu wẹ e do gblehomẹ. Eyin owẹ̀n mítọn wẹ tlẹ zọ́n bọ e gblehomẹ, enẹ nọ saba yin na ohó agọ̀ he mẹlọ sè gando mí go wutu.—2 Kọl. 4:4.
Yí ogbè fifá po hogbe he gọ́ na ojọmiọn po do dọhona ẹn. (Howh. 15:1) Be a fọ́n ẹn sọn amlọn mẹ wẹ ya kavi dlapọn towe wá doalọtena nuhe wà e te? Nugbo wẹ dọ mí ma nọ vẹvẹ na yẹwheho he dọ mí te tọn wutu, etomọṣo eyin mí doayi e go dọ ojlẹ he mẹ mí wá do ma yọ́n, mí na gbọn whiwhẹ dali bo vẹvẹna whétọ lọ. Be whétọ lọ gblehomẹ na e ko sè ohó agọ̀ de gando mí go wutu wẹ ya? Eyin mọ wẹ, a sọgan dọmọ: “N’mọnukunnujẹ nuhewutu mì do gblehomẹ go. Amọ́, e taidi dọ nuhe mì sè gando mí go lọ ma sọgbe. Be n’sọgan basi zẹẹmẹ na mì gandego ya?” Be e jẹagọdo nuyise mítọn de wẹ ya, vlavo mẹdidesẹ sọn agun mẹ kavi na mí ma nọ dohùn wutu? A sọgan dọmọ: “N’mọnukunnujẹ numọtolanmẹ mìtọn mẹ. Mẹsusu wẹ ko tindo numọtolanmẹ dopolọ. Be n’sọgan do fie nuplọnmẹ enẹ te to Biblu mẹ hia mì ya?”
Eyin whétọ lọ to adanwà, e na yọ́n hugan dọ mí ni ma gblọn nude blo bo tlọ́n finẹ. Eyin e dọ dọ Kunnudetọ Jehovah tọn de ni masọ wá emi dè ba blo, a sọgan dọna ẹn dọ mí na setonuna nuhe e dọ.

Tẹ́n Ehe Pọ́n to Osun lọ Mẹ:

Basi zepọn to sinsẹ̀n-bibasi whẹndo tọn whenu.
To whenue a ko tlọ́n whétọ he gblehomẹ de dè, dọho hẹ mẹhe a to azọ́nwa hẹ lọ gando lehe e na ko yọ́n hugan nado gblọnhona whétọ lọ do go.