Nukiko Yẹsẹ de Poun!

JỌJA yọnnu awe delẹ to zọnlinzin dopọ to Tòdaho Baguio tọn mẹ to Philippines. Yé mọ kẹkẹvi kunnudide tọn de, amọ́ yé ma yì e kọ̀n. Helen, mẹmẹyọnnu he to ote to apá na kẹkẹvi lọ konu do yé yẹsẹ. Yọnnu awe lọ lẹ ma nọte, amọ́ nukiko Helen tọn yinuwado yé ji.

To nukọn mẹ, whenue yọnnu awe lọ lẹ to mọto de mẹ bo lẹkọ jei whé, yé mọ ohia jw.org tọn daho de to Plitẹnhọ Ahọluduta tọn de go. Yé flindọ nukinkan dopolọ wẹ emi mọ wayi to kẹkẹvi kunnudide tọn lọ go. Yé jẹte bo pọ́n azán po ogàn he mẹ agun voovo lẹ nọ bayi opli lẹ te po he yin titẹdo Plitẹnhọ lọ go.

Yé mẹ awe lẹ yì dopo to opli he bọdego lẹ mẹ. Podọ, mì yọ́n mẹe yé mọ whenue yé biọ Plitẹnhọ mẹ an? Helen wẹ! Yé flin to afọdopolọji dọ uwọ wẹ konu do yé wayi. Helen dọ dọ, “Whenue n’mọ mẹlọ lẹ ja dee, obu di mi pẹẹde. N’vẹ̀do dọ nude wẹ n’wà sin.” Amọ́, yọnnu lọ lẹ dọ nue jọ na Helen.

Yé duvivi opli lọ po pọninọ lọ po tọn taun; bosọ voawu ganji. Whenue yé mọ bọ mẹlẹ to azọ́n wiwejininọ tọn wà to pli godo, yé kanse eyin emi gán gọalọ. Todin, dopo to yọnnu lọ lẹ mẹ ko tlọ́n otò lọ mẹ, amọ́ yọnnu awetọ lọ ko jẹ opli lẹ wá ji, bo ko sọ jẹ Biblu plọn ji—ehe lẹpo na nukiko yẹsẹ de poun wutu!