Biblu Sọgan Na We Ayajẹ

DILE etlẹ yindọ Biblu ma yin owe amasinzọnwiwa tọn de, e dọhodo lehe numọtolanmẹ lẹ—vlavo dagbe kavi ylankan—sọgan yinuwado dagbemẹninọ mẹde tọn ji to apọ̀nmẹ podọ to agbasa-liho do ji. “Homẹvivi hẹn pọngbọ dagbe wá,” wẹ Biblu dọ, “ṣigba homẹgble ayiha mẹ tọn hẹn ohú hú.” Humọ, mí hia dọmọ: “Eyin nuṣikọna we to azán nukunbibia tọn gbè, huhlọn towe ma sọtẹ́n gba.” (Howhinwhẹn lẹ 17:22; 24:10) Nuṣikọ kavi numọtolanmẹ flumẹjijẹ tọn lẹ sọgan de huhlọn mítọn pò, bo hẹn mí tin taidi mẹhe ma dogán he sọ tin to owù mẹ matin ojlo depope nado basi diọdo kavi dín alọgọ.

Flumẹjijẹ sọgan sọ yinuwadomẹji to gbigbọ-liho. Mẹhe nọ mọ yede taidi nuvọ́nọ lẹ nọ saba lẹndọ yé ma sọgan tindo haṣinṣan dagbe hẹ Jiwheyẹwhe bo mọ dona etọn yí pọ́n gbede. Simone, he yin nùdego to hosọ he jẹnukọn mẹ, lẹndọ emi ma yin “gbẹtọ wunmẹ he Jiwheyẹwhe na kẹalọyi.” Ṣigba, eyin mí pọ́n Ohó Jiwheyẹwhe tọn, Biblu mẹ, mí na mọdọ Jiwheyẹwhe nọ yí nukun dagbe do pọ́n mẹhe to vivẹnudo nado hẹn homẹ etọn hùn lẹ.

Jiwheyẹwhe Nọ Homẹtọnpọn Nugbonugbo

Biblu dọna mí dọ “OKLUNỌ sẹpọ yé he yin ayiha gbigbànọ de tọn lẹ, bosọ [nọ] whlẹn yé he yin ayiha finfinyọnnọ lẹ gán.” Jiwheyẹwhe ma nọ vlẹ “ayiha gbigbà finfinyọ́n” de gba, kakatimọ e dopagbe “nado hẹn gbigbọ whiwhẹnọ lẹ tọn zéta, podọ nado hẹn ayiha [mẹhe yin finfinyọ́n] lẹ tọn zéta.”—Psalm 34:18; 51:17; Isaia 57:15.

To nujijọ de mẹ, Jesu mọdọ dandannu wẹ e yin nado dọ̀n ayidonugo devi etọn lẹ tọn wá nugbo lọ ji dọ Jiwheyẹwhe nọ mọ dagbe he tin to devizọnwatọ Etọn lẹ mẹ. Gbọn apajlẹ de yiyizan dali, e dohia dọ Jiwheyẹwhe nọ doayi e go whenuena oblẹnọ de flẹ jẹ aigba—yèdọ nude he suhugan gbẹtọ lẹ tọn na pọnhlan taidi nuhe ma yin nujọnu sọmọ. E sọ zinnudeji dọ Jiwheyẹwhe yọ́n kakajẹ onú pẹvi pete lẹ ji gando gbẹtọvi lẹ go, etlẹ yin sọha oda he tin to ota yetọn lẹ tọn. Jesu dotana apajlẹ etọn dọmọ: “Enẹwutu, mì dibu blo, mìwlẹ doale hú oblẹnọ susu.” (Matiu 10:29-31)a Jesu dohia dọ mahopọnna nuhe mẹdopodopo sọgan lẹn gando edetiti go, gbẹtọvi yisenọ lẹ họakuẹ to nukun Jiwheyẹwhe tọn mẹ. Na nugbo tọn, apọsteli Pita flinnu mí dọ “Jiwheyẹwhe ma yin mẹnukuntahopọntọ gba: ṣigba to akọta lẹpo mẹ, mẹhe dibusi i, bo wazọ́n dodo, wẹ yè kẹalọyi to e dè.”—Owalọ lẹ 10:34, 35.

Hẹn Pọndohlan Jlẹkaji Tọn Go

Ohó Jiwheyẹwhe tọn na tuli mí nado yin jlẹkajinọ to nukun he mí nọ yí do pọ́n mídelẹ mẹ. Apọsteli Paulu wlan to gbọdo glọ dọmọ: “Yẹn dọ, gbọn ojọmiọn he yè na mi dali, hlan omẹ dopodopo he tin to mì ṣẹnṣẹn, dọ e lẹn ede tọn glanglan hú ehe jẹ e ni lẹn blo: ṣigba nado lẹn hùwhẹ mẹ, kẹdẹdile Jiwheyẹwhe basi ojlẹ yise tọn hlan omẹ dopodopo do.”—Lomunu lẹ 12:3.

Na jide tọn, mí ma na jlo nado lẹn mídetiti tọn zẹjlẹgo kaka bo lẹzun glòlò-jlatọ gba; mọjanwẹ mí ma na lẹnnu yì adà awetọ pete mẹ bo yí mídelẹ do mọ núyọ tata do niyẹn. Kakatimọ, yanwle mítọn dona yin nado wleawuna pọndohlan jlẹkaji tọn gando mídelẹ go, yèdọ dehe na ze nugopipe mítọn lẹ po awugbopo mítọn lẹ po do lẹnpọn mẹ. Yọnnu Klistiani de basi zẹẹmẹ etọn dole: “Yẹn ma yin mẹylankan; mọjanwẹ n’masọ yin angẹli do niyẹn. N’tindo adà dagbe lẹ po adà ylankan lẹ po, podọ mọwẹ e te do na mẹlẹpo.”

Nugbo wẹ dọ e ma nọ bọawu nado wleawuna pọndohlan jlẹkaji tọn mọnkọtọn gba. E sọgan biọ vivẹnudido susu nado de pọndohlan agọ̀ hẹngogo tọn he mí sọgan ko yí owhe susu do wleawuna gando mídelẹ go sẹ. Etomọṣo, po alọgọ Jiwheyẹwhe tọn po mí sọgan diọ gbẹtọ-yinyin mítọn gọna pọndohlan mítọn gando ogbẹ̀ go. Na nugbo tọn, nuhe Ohó Jiwheyẹwhe tọn dotuhomẹna mí nado wà niyẹn. Mí hia dọmọ: “Mì ni klọ́n do apadopo walọ ogbẹ̀ mìtọn hoho tọn, gbẹtọ hoho lọ, he ko gblezọn kẹdẹdi wantuntun he gọ́ na oklọ; . . . mì ni lẹzun yọyọ to gbigbọ ayiha mìtọn tọn mẹ; na mì nisọ ze gbẹtọ yọyọ lọ dogo, mẹhe yè dá to dodo mẹ di apajlẹ Jiwheyẹwhe tọn, podọ to jijọ wiwe nugbo tọn mẹ.”—Efesunu lẹ 4:22-24.

Gbọn vivẹnudido nado diọ ‘gbigbọ ayiha mítọn tọn,’ yèdọ ayilinlẹn tangan mítọn dali, mí sọgan diọ gbẹtọ-yinyin mítọn sọn pọndohlan agọ̀ tintindo mẹ bo lẹzun lẹnpọn dagbenọ. Lena, he yin nùdego to hosọ he jẹnukọn mẹ, wá mọdọ nudepope ma sọgan diọ numọtolanmẹ etọn lẹ gando edetiti go adavo e de linlẹn lọ dọ mẹdepope ma sọgan yiwanna emi kavi gọalọna emi sẹ sọn ayiha etọn mẹ. Ayinamẹ yọn-na-yizan he yin mimọ to Biblu mẹ tẹlẹ wẹ gọalọna Lena, Simone, po mẹdevo lẹ po nado basi diọdo mọnkọtọn?

Nunọwhinnusẹ́n Biblu Tọn He Nọ Yidogọna Ayajẹ Lẹ

“Ze agbàn towe dlan OKLUNỌ ji, ewọ nasọ hẹnwe dote.” (Psalm 55:22) Odẹ̀ wẹ onú tintan he sọgan gọalọna mí nado tindo ayajẹ nujọnu tọn. Simone dọmọ: “Whedepopenu he yẹn jẹflumẹ, n’nọ lẹhlan Jehovah dè bo nọ biọ alọgọ etọn. Yẹn ma ko ba huhlọn po anademẹ etọn po pò to ninọmẹ de mẹ pọ́n gbede.” To whenuena psalm-kantọ lọ dotuhomẹna mí nado ze agbàn mítọn dlan Jehovah ji, nuflin mí wẹ e te dọ gbọnvona dọ Jehovah nọ hò mítọn pọ́n e sọ nọ pọ́n dopodopo mítọn lẹ hlan taidi mẹhe jẹna alọgọ po godonọnamẹ etọn po. To zánmẹ Juwayi owhe 33 W.M. tọn, devi Jesu tọn lẹ tin to awubla mẹ na nuhe Jesu dọna yé gando yìyì etọn he to unklẹn go wutu. Jesu na tuli yé nado hodẹ̀ hlan Otọ́ lọ, bo yidogọ dọmọ: “Mì kanbiọ, mì nasọ mọyi, na ayajijẹ mìtọn nido gọ́.”—Johanu 16:23, 24.

“Nado namẹ do [ayajẹ] hú nado mọyi.” (Owalọ lẹ 20:35) Dile Jesu plọnmẹ do, nunamẹ yin onú titengbe de he nọ hẹnmẹ tindo ayajẹ nujọnu tọn to gbẹ̀mẹ. Nugbo Biblu tọn ehe yíyí do yizan mẹ nọ hẹn mí penugo nado ze ayidonugo do nuhudo mẹdevo lẹ tọn ji kakati nido yin awugbopo mítọn titi lẹ ji. Eyin mí gọalọna mẹdevo lẹ bo mọ pinpẹn-nutọn-yinyọnẹn yetọn, mí nọ hùnhomẹ do míde go. Lena kudeji dọ wẹndagbe Biblu tọn lilá na kọmẹnu emitọn lẹ to gbesisọmẹ nọ gọalọna emi to aliho awe mẹ. “Tintan, e nọ na mi ayajẹ po pekọ wunmẹ he Jesu donù e go po,” wẹ e dọ. “Awetọ, n’nọ duvivi nuyiwa dagbe susu tọn sọn mẹdevo lẹ dè, ehe nọ na mi ayajẹ.” Eyin mí gbọn alọtútlú dali ze mídelẹ jo, mí na mọ nugbo-yinyin Howhinwhẹn lẹ 11:25 tọn he dọmọ: “Ewọ he to sinhúmẹ, ewọ lọsu ga na yin sinhúna.”

“Azán nukunbianọ tọn lẹpo wẹ oylan: ṣigba homẹvivinọ to jijọho dù to whepoponu.” (Howhinwhẹn lẹ 15:15) Mímẹpo wẹ sọgan de aliho he mẹ mí na pọ́n mídelẹ po ninọmẹ mítọn lẹ po te. Mí sọgan tin taidi mẹhe nọ mọ onú lẹpo to aliho agọ̀ mẹ bo nọ lẹzun nukunbianọ, kavi mí sọgan basi dide nado nọ lẹnnupọn to aliho dagbe mẹ, bo yin “homẹvivinọ,” bosọ tin to ayajẹ mẹ taidi dọ mí to vivi jijọho tọn dù, kavi to hùnwhẹ wà wẹ nkọtọn. Simone dọmọ: “N’nọ tẹnpọn nado hẹn pọndohlan dagbe go dile e yọnbasi do. N’nọ hẹn alọnu ján to oplọn mẹdetiti tọn po lizọnyizọn lọ po mẹ, bo nọ gbọṣi odẹ̀ mẹ. N’sọ nọ tẹnpọn nado tin to mẹhe yin lẹnpọn dagbenọ lẹ ṣẹnṣẹn, bo nọ dovivẹnu nado gọalọna mẹdevo lẹ to numọtolanmẹ-liho.” Gbigbọ mọnkọtọn tintindo nọ dekọtọn do ayajẹ nujọnu tọn mẹ, kẹdẹdile Biblu dotuhomẹna mí do dọmọ: “Mì yin homẹhunnọ to OKLUNỌ mẹ, bo to ayajẹ, mì dodonọ emi: bosọ nọ yí ayajijẹ do jihàn, mì he yin tenọglinọ to ayiha mẹ lẹpo.”—Psalm 32:11.

“Họntọn nọ yiwannamẹ whepoponu, ṣigba mẹmẹsunnu wẹ yè ji na madodego [kavi ojlẹ ayimajai tọn].” (Howhinwhẹn lẹ 17:17) Homẹ didọ na mẹyiwanna de kavi ayinamẹtọ dejidego de sọgan gọalọna mí nado pehẹ numọtolanmẹ agọ̀ lẹ bo de yé sẹ whẹpo yé nido hẹn mí gbọjọ. Hodidọ hẹ mẹdevo lẹ sọgan gọalọna mí nado pọ́n nulẹ sọn pọndohlan dagbe jlẹkaji tọn de mẹ. “Numọtolanmẹ lẹ didọtọn nọ gọalọ taun,” wẹ Simone yigbe dọ. “Hiẹ dona dọ numọtolanmẹ towe na mẹde. Nado dọ ẹ jẹgbonu kẹdẹ ko nọ pé to ninọmẹ susu mẹ.” Mọwiwà na gọalọna we nado mọ nugbo-yinyin howhinwhẹn lọ tọn he dọmọ: “Awubla to ayiha gbẹtọ tọn mẹ wẹ nọ hẹn ẹn dokọdò: ṣigba ohó dagbe wẹ nọ hẹn ẹn jaya.”—Howhinwhẹn lẹ 12:25.

Nuhe Hiẹ Sọgan Wà

Nunọwhinnusẹ́n dagbe he sọ yọn-na-yizan vude poun wẹ mí ko gbadopọnna sọn susu he Biblu bẹhẹn lẹ mẹ he sọgan gọalọna mí nado duto numọtolanmẹ agọ̀ lẹ ji bo tindo ayajẹ nujọnu tọn. Eyin hiẹ yin dopo to mẹhe to ahidi hẹ numọtolanmẹ nuvọ́nọ-yinyin tọn lẹ mẹ, mí na we tuli nado gbadopọnna Ohó Jiwheyẹwhe tọn, Biblu yinukọn dogọ. Plọn nado wleawuna pọndohlan dagbe jlẹkaji tọn gando dewetiti go podọ gando haṣinṣan towe hẹ Jiwheyẹwhe go. Todido ahundopo tọn mítọn wẹ yindọ po anademẹ Ohó Jiwheyẹwhe tọn po, hiẹ na penugo nado mọ ayajẹ nujọnu tọn to nuwiwa towe lẹpo mẹ.

[Nudọnamẹ odò tọn]

[Yẹdide to weda 7]

Gbẹninọ sọgbe hẹ nunọwhinnusẹ́n Biblu tọn lẹ nọ yidogọna ayajẹ