Yé Gblọnhona Sinsẹ̀ngán He Gblehomẹ de po Homẹfa Po

Artur, yin nugopọntọ lẹdo tọn de to Arménie, bo dla agun Kunnudetọ Jehovah tọn lẹ tọn de pọ́n. E doayi e go dọ yé ma ko jẹ mahẹ tindo ji to kunnudide gbangba tọn mẹ, enẹ wẹ nado yí kẹkẹvi he mẹ owe mítọn lẹ nọ yin tito do zan. Nado na tuli mẹmẹsunnu lẹ nado tindo mahẹ to kunnudide wunmẹ ehe mẹ, Artur po asi etọn Anna po gọna Kunnudetọ devo he nọ yin Jirayr, ze kẹkẹvi de do tòpẹvi de mẹ. Yé de fihe mẹsusu nọ zọ̀n afọ gbọn.

Mẹhe to filọ gbọn lẹ jẹ ojlo dohia ji bo nọ yí owe sinai do Biblu ji lẹ. Amọ́, e ma dẹn bọ aliho kunnudide tọn yọyọ ehe dọ̀n ayidonugo nukundiọsọmẹtọ lẹ tọn. Sinsẹ̀ngán awe delẹ dọnsẹpọ kẹkẹvi lọ bọ dopo to yé mẹ tùnafọ ẹ dlan ma tin avase depope. Enẹgodo, e hotómẹna Artur bọ gànnukun etọn flẹ jai. Artur, Anna po Jirayr po tẹnpọn nado whiwhẹ sinsẹ̀ngán lọ lẹ, amọ́ ovọ́ mẹ wẹ e dekọtọn do. Sinsẹ̀ngán lọ lẹ tùnafọ kẹkẹvi lọ ji bo vúnvún owe he to e mẹ lẹ pé. To whenue yé ko zun Kunnudetọ lọ lẹ bo sìn-adán na yé godo, yé dedo.

Artur, Anna po Jirayr po yì ponọ-pá lẹdo lọ tọn mẹ nado jẹwhẹ nujijọ lọ tọn. Yé dọ nuhe jọ lọ bo dọhodo Biblu ji to kleun mẹ na ponọ lẹ gọna mẹhe nọ wazọ́n to finẹ lẹ. Enẹgodo, yé plan Kunnudetọ atọ̀n lọ lẹ yì ponọ-gán dè. To tintan whenu, e jlo na yọ́n nuhe jọ lọ to gigọ́ mẹ. Ṣigba, to whenue e wá mọdọ Artur yin dawe he tọ́nalùn de, bo ma ka hoavùn to whenue yè hotómẹna ẹn, ponọ-gán lọ masọ kanhose do whẹho lọ ji ba bo wá jẹ hokanse gando nuyise Kunnudetọ lẹ tọn go ji. Hodọdopọ enẹ zindonukọn na gànhiho ẹnẹ! Nuhe ponọ-gán lọ sè lẹ paṣa ẹ sọmọ bọ e dọmọ: “Sinsẹ̀n dagbe tẹ die! N’na biọ e mẹ!”

To wunkẹngbe, whenue Artur lẹkọwa nado bẹ kunnudide gbangba tọn jẹeji, dawe de he mọ nujijọ he wayi lọ dọnsẹpọ ẹ. Dawe lọ na pipà Artur, na e whiwhẹ bo ma hoavùn hẹ sinsẹ̀ngán lọ wutu. E yidogọ dọ nuhe emi mọ lọ zọ́n bọ emi masọ tindo sisi depope na sinsẹ̀ngán lọ lẹ ba.

To whèjai azán lọ tọn, ponọ-gán lọ ylọ Artur lẹkọwa ponọ-pá mẹ. Amọ́ kakati nido dọhodo whẹho lọ ji, e kàn kanbiọ susu sè gando Biblu go. Ponọ awe devo lẹ kọnawudopọ hẹ yé to hodọdopọ lọ whenu.

To azán atọ̀ntọ gbè, Artur yì dla ponọ-gán lọ pọ́n, bo do video sinai do Biblu ji delẹ hia ẹ. Ponọ-gán lọ ylọ ponọ devo lẹ nado wá pọ́n video lọ lẹ ga.

Ponọ susu wẹ dotoaina owẹ̀n Biblu tọn whla tintan, na nuyiwa ylankan sinsẹ̀ngán lọ lẹ tọn wutu. Ehe zọ́n bọ ponọ lẹ tindo pọndohlan dagbe gando Kunnudetọ Jehovah tọn lẹ go.