Tito Yọyọ Delẹ Na Kunnudide Gbangba Tọn
1. Apajlẹ tẹwẹ Klistiani owhe kanweko tintan tọn lẹ zedai?
1 Klistiani owhe kanweko tintan tọn lẹ ma dọyẹwheho sọn whédegbè jẹ whédegbè kẹdẹ gba, ṣigba yé sọ dọyẹwheho to gbangba ga. (Owalọ 20:20) Di apajlẹ, yé nọ yì tẹmpli mẹ na yé yọnẹn dọ mẹsusu sọgan yin mimọ to finẹ. (Owalọ 5:42) To whenue apọsteli Paulu to Atẹni, e nọ dọyẹwheho egbesọegbesọ na mẹhe e mọ to ahimẹ lẹ. (Owalọ 17:17) To egbehe, lizọnyizọn whédegbè jẹ whédegbè tọn gbẹ́ yin aliho tangan he mẹ mí nọ hẹn wẹndagbe lọ gbayipe te. Ṣigba, mí sọ nọ yì ajọwatẹn lẹ, gbọjẹtẹn lẹ, aligbọntẹn he ji gbẹtọ nọ gọ́ lẹ, po nọtẹn devo lẹ po nado dọyẹwheho na gbẹtọ lẹ to fidepope he yé sọgan yin mimọ te. Na wẹnlatọ lẹpo wẹ yin tulina nado nọ tindo mahẹ to kunnudide gbangba tọn mẹ to fidepope he e yọnbasi te wutu, mẹsusu wẹ na tindo dotẹnmẹ hundote lọ nado tindo mahẹ to tito ojlofọndotenamẹ tọn yọyọ awe delẹ mẹ nado dekunnu to nọtẹn gbangba tọn lẹ.
2. Bẹsọn novembre 2011, tito kunnudide tọn tẹwẹ bẹjẹeji?
2 Tito Kunnudide Gbangba Tọn Vonọtaun de to Tòdaho lẹ Mẹ: Dile e yin didohia to Owhewé 2013 tọn weda 16 po 17tọ po mẹ do, bẹsọn novembre 2011, tito kunnudide gbangba tọn de yin tintẹnpọn to New York City. Wẹnlatọ lẹ nọ yí tafo kavi kẹkẹvi lẹ zan bo nọ tẹ́ yẹdide po nukinkan he na fọnjlodotenamẹ lẹ po gọna linlinnamẹwe he to ogbè voovo mẹ lẹ do yé ji, enẹgodo yé nọ ze yé do fie mẹsusu nọ zọ̀n afọ gbọn to tòdaho lọ mẹ lẹ. Egbesọegbesọ, gbẹtọ fọtọ́n susu wẹ nọ zọ̀n afọ gbọn ofi enẹlẹ, kakajẹ mẹhe nọ nọ̀ owhé daho he gbè Kunnudetọ lẹ ma sọgan biọ kavi ma nọ yin dotẹnmẹ na nado biọ lẹ gọna mẹhe yè ma nọ saba mọ to whégbè lẹ. Mẹsusu wẹ do ojlo hia to owe mítọn lẹ mẹ. To osun dopo poun mẹ to agọe, linlinnamẹwe 3 797 po owe 7 986 po wẹ yin didogbonu. Aligbọntọ susu wẹ biọ dọ yè ni plọn Biblu hẹ emi. Na yanwle tangan lọ wẹ nado bẹ plọnmẹ Biblu lẹ jẹeji wutu, to whenue jlodotọ lẹ na adlẹsi yetọn, e nọ yin didohlan agun he to lẹdo yetọn mẹ to afọdopolọji, na yè nido yì dla yé pọ́n to owhé yetọn gbè.
3. Obá tẹ mẹ wẹ tito kunnudide tọn ehe to yinyin hinhẹn gbayipe jẹ?
3 Na tito kunnudide tọn enẹ to kọdetọn dagbe tindo wutu, e to yinyin hinhẹn gbayipe todin lẹdo aihọn pé to tòdaho devo he mẹ gbẹtọ nọ sù te taun lẹ mẹ. Alahọ otò dopodopo tọn nọ de tòdaho he mẹ tito ehe na yọ́n-na-yizan te lẹ. E nọ saba yin tòdaho he mẹ húnglintẹn lẹ, azọ́nwatẹn lẹ kavi owhé dahodaho lẹ sù te lẹ, na afọzọ̀ntọ lẹ nọ sù taun to lẹdo enẹlẹ mẹ. Enẹgodo, wekantẹn alahọ tọn nọ do wekanhlanmẹ hlan agun he na tindo mahẹ to tito lọ mẹ lẹ bo nọ na yé anademẹ gigọ́ lẹ. To paa mẹ, gbehosọnalitọ whepoponu tọn po titengbe lẹ po wẹ nọ yin yiyizan, ṣigba to lẹdo delẹ mẹ, gbehosọnalitọ alọgọtọ tọn lẹ lọsu nọ tindo mahẹ to azọ́n lọ mẹ.
4. Nawẹ tito kunnudide gbangba tọn vonọtaun to tòdaho lẹ mẹ nọ yì do?
4 Lehe Kunnudide Ehe Nọ Yì Do: Mẹhe nọ tindo mahẹ to tito kunnudide gbangba tọn vonọtaun lọ mẹ to tòdaho lẹ mẹ lẹ nọ saba nọte to tafo kavi kẹkẹvi lọ kọ̀n bọ gbẹtọ lẹ nọ wá e kọ̀n. To whenue mẹde dọnsẹpọ, yé nọ biọ to e si nado yí owe depope he fọnjlodotena ẹn. Gbehosọnalitọ lọ lẹ nọ yí homẹhunhun do na gblọndo kanbiọ lẹ tọn sọn Owe-wiwe lẹ mẹ. Eyin mẹlọ yí owe de, gbehosọnalitọ lọ lẹ ma nọ donù tito nunina tọn go. Ṣigba, eyin mẹlọ kanhose gando lehe azọ́n mítọn nọ yin godonọna to akuẹzinzan-liho do go, yé nọ basi zẹẹmẹ na ẹn dọ nunina lẹ sọgan yin didohlan adlẹsi he yin sislẹ do owe lọ mẹ lẹ. Eyin e yọnbasi, yé nọ kanse mẹlọ dọ: “Be e na jlo mì dọ mẹde ni wá dla mì pọ́n to owhé mìtọn gbè ya?” kavi “Be mì yọnẹn dọ gbọnvona owe ehe, mí sọ nọ plọn Biblu hẹ gbẹtọ lẹ vọnu ya?”
5. Nawẹ mahẹ tintindo to tito yọyọ ehe mẹ ko hẹn ale wá na asu po asi po de gbọn?
5 Mahẹ tintindo to tito kunnudide tọn ehe mẹ ko hẹn ale susu wá. Asu po asi po de wlan dọmọ: “Eyin mí nọte to tafo lọ kọ̀n bo mọ lehe gbẹtọ fọtọ́n susu lẹ to finẹ gbọn wayi egbesọegbesọ do, enẹ nọ whàn mí dogọ nado tindo mahẹ to azọ́n daho he to yinyin wiwà nado jẹ gbẹtọ lẹ dè lẹdo aihọn pé lọ mẹ. Mimọ lehe gbẹtọ lẹ nọ sù sọ podọ nulinlẹnpọn do lehe Jehovah nọ hò mẹdopodopo tọn pọ́n do ji ko yidogọna gbemima mítọn nado zindonukọn to azọ́n yẹwhehodidọ tọn lọ zizedo otẹn tintan mẹ to gbẹzan mítọn mẹ. Mí nọ yí nukun homẹ tọn do pọ́n lehe Jehovah na to ahun mẹdopodopo he nọ gbọn tafo lọ kọ̀n lẹ tọn gbeje pọ́n do bo na to mẹhe jẹ lẹ dín to yé mẹ. Todin, mí nọ tindo numọtolanmẹ lọ hugan gbede pọ́n dọ mí to azọ́nwa to kọndopọ mẹ hẹ angẹli lẹ.”
6. (a) Tito kunnudide gbangba tọn devo tẹwẹ ko to yinyin hihodo to agun susu mẹ, podọ nawẹ ehe gbọnvona tito kunnudide gbangba tọn vonọtaun to tòdaho lẹ mẹ gbọn? (b) Nawẹ agun lẹ sọgan kọngbedopọ to whenue yé to mahẹ tindo to kunnudide gbangba tọn mẹ gbọn?
6 Tito Kunnudide Gbangba Tọn He Nọ Yin Tito-Basina Gbọn Agun lẹ Dali: Gbọnvona tito kunnudide gbangba tọn vonọtaun to tòdaho lẹ mẹ, tito yọyọ devo tin he susu pipli mẹho lẹ tọn ko to hihodo to aigba-denamẹ yetọn lẹ ji. Po tito yọyọ ehe po, wẹnlatọ lẹ nọ zan tafo kavi kẹkẹvi de bo nọ ze e do fie mẹsusu nọ zọ̀n afọ gbọn; nọtẹn lọ ma nọ zẹ̀ dogbó aigba-denamẹ agun lọ tọn go. Tito ehe gbọnvona tito kunnudide gbangba tọn vonọtaun to tòdaho lẹ mẹ, he nọ biọ dọ yè ni yí mẹhe na tindo mahẹ to e mẹ lẹ sọn agun susu mẹ nado dọyẹwheho dopọ to fie mẹsusu nọ zọ̀n afọ gbọn to tòdaho he nọ yin dide gbọn wekantẹn alahọ tọn dali lẹ mẹ.—Pọ́n apotin lọ “Gbekọndopọ Dagbe Yin Nujọnu.”
7. Eyin tito kunnudide gbangba tọn yọyọ ehe yọ́n-na-yizan na agun de, nawẹ mẹho lẹ na basi tito etọn gbọn?
7 Mẹho lẹ na lẹnnupọn nado yọnẹn eyin fie mẹsusu nọ zọ̀n afọ gbọn lẹ tin to aigba-denamẹ agun lọ tọn ji bo pọ́n eyin tito enẹ na yọ́n-na-yizan. Fie tito yọyọ ehe sọgan yọ́n-na-yizan te delẹ wẹ húnglintẹn lẹ, gbọjẹtẹn lẹ, ali he ji yigọyigọ nọ sù te lẹ, fie nusatẹn lẹ sù te, wehọmẹ alavọ tọn lẹ, agahun-glintẹn lẹ po nọtẹn he nọ yin yiyizan na nuwiwa whemẹwhemẹ tọn lẹ po. Tafo he ji owe mítọn lẹ yin titẹ́ do lẹ zizedo nọtẹn dopolọ, to azán dopolọ lẹ ji, podọ to ogàn dopolọ lẹ mẹ nọ hẹn ale wá. E ko yin ayidego dọ tafo lọ titẹ́ do fie nusatẹn lẹ sù te nọ hẹn ale wá hugan dọ yè ni tẹ́ ẹ do fie nusatẹn dopo poun tin te. Na eyin gbẹtọ lẹ wá fie nusatẹn dopo poun tin te, nuhe hẹn yé wá finẹ wẹ nọ saba duahunmẹna yé. To nọtẹn delẹ taidi fie mẹsusu nọ gbọn, e na yọ́n hugan nado nọ yí kẹkẹvi kleun de zan. Mẹho agun tọn lẹ sọgan mọ anademẹ vonọtaun lẹ yí to nọtẹn Intẹnẹt tọn mítọn ji nado wleawuna yẹdide gọna nukinkan voovo lẹ he na dọ̀n ayidonugo gbẹtọ lẹ tọn wá Atọ̀họ̀-Nuhihọ́ lọ Tọn, Réveillez-vous! po owe Biblu Plọn Mí po ji. Anademẹ enẹlẹ ko yin awuwlena nado yin yiyizan titengbe na tito kunnudide gbangba tọn wunmẹ ehe. Mẹhe to mahẹ tindo to tito ehe mẹ lẹ na wazọ́n lọ dile mẹhe nọ tindo mahẹ to tito kunnudide gbangba tọn vonọtaun to tòdaho lẹ mẹ lẹ nọ wà do pẹpẹ, podọ yé dona hodo anademẹ nugopọntọ sinsẹ̀nzọn tọn lọ tọn lẹ to gigọ́ mẹ. Eyin yé yí adlẹsi jlodotọ he ma nọ nọ̀ aigba-denamẹ yetọn ji de tọn, yé dona yawu kanwe gọ́ alọdowemẹwe Veuillez suivre l’intérêt (S-43) bo yí i na wekantọ agun tọn.
8. Eyin depope to tito kunnudide gbangba tọn ehelẹ mẹ ma yọnbasi to agun mìtọn mẹ, dotẹnmẹ tẹlẹ wẹ gbẹ́ hundote na mì nado dọyẹwheho to nọtẹn gbangba tọn lẹ?
8 Yidogọna Lizọnyizọn Towe Gbọn Kunnudide Gbangba Tọn Dali: Ali he ji mẹsusu nọ zọ̀n afọ gbọn sọgan nọma tin to aigba-denamẹ agun delẹ tọn ji; enẹwutu nuhudo lọ sọgan nọma tin nado wleawuna tafo kavi kẹkẹvi de bo tẹ́ owe mítọn lẹ do e ji. Ṣigba, etlẹ yin to agun enẹlẹ mẹ, wẹnlatọ lẹ yin tulina nado nọ lẹnnupọndo lehe yé sọgan tindo mahẹ to kunnudide gbangba tọn mẹ do ji nado yidogọna lizọnyizọn yetọn. Be fie nusatẹn sù te lẹ, kavi ajọwatẹn he mẹ mẹsusu nọ wá họ̀nú te de tin to aigba-denamẹ mìtọn ji ya? Be gbọjẹtẹn kavi fie mẹsusu nọ pli do de tin ya? Be fide tin to aigba-denamẹ lọ ji he nọ saba yin yiyizan na nuwiwa he nọ bẹ gbẹtọ susu lẹ hẹn ya? Eyin mọ wẹ, mì sọgan gbẹ́ duvivi kunnudide gbangba tọn.
9. Naegbọn mí dona dovivẹnu nado nọ dọyẹwheho na gbẹtọ lẹ to fidepope he mí sọgan mọ yé te?
9 Ojlo Jehovah tọn wẹ yindọ “gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.” (1 Tim. 2:4) Enẹwutu, mí to vivẹnudo nado hẹn owẹ̀n Ahọluduta lọ tọn jẹ suhugan gbẹtọ lẹ tọn dè whẹpo opodo lọ nido wá. (Mat. 24:14) To fisusu, e nọ vẹawu nado mọ gbẹtọ lẹ to whégbè. Etomọṣo, mí sọgan mọ yé eyin mí nọ dekunnu to nọtẹn gbangba tọn lẹ. Vlavo kunnudide gbangba tọn wẹ yin aliho dopo gee he mẹ mẹdelẹ na sè wẹndagbe lọ te. Enẹwutu, mì gbọ mí ni hẹn lizọnyizọn mítọn di to gigọ́ mẹ gbọn yẹwhehodidọ na gbẹtọ lẹ to fidepope he mí sọgan mọ yé te dali.—2 Tim. 4:5.
[Apotin to weda 5]
Gbekọndopọ Dagbe Yin Nujọnu
Linlin yin nina dọ to whedelẹnu, wẹnlatọ he tin to agun he ma dẹn do yedelẹ mẹ lẹ nọ tindo mahẹ to kunnudide gbangba tọn mẹ to alihogbó dopolọ ji podọ to ajọwatẹn kavi húnglintẹn dopolọ lẹ. Wẹnlatọ lẹ sọn agun voovo lẹ mẹ ko bẹ linlinnamẹwe lẹ do abò tenọpọnmẹ tọn azọ́nwhé dopolọ tọn kavi do azọ́nwatẹn dopolọ, bo ko sọ dọyẹwheho to ajọwatẹn dopolọ. Enẹ ko zọ́n bọ to whedelẹnu, ajọwatọ lẹ po mẹhe nọ nọ̀ lẹdo lọ mẹ lẹ po gblehomẹ, etlẹ yin to whenue wẹnlatọ lẹ ma wá dọyẹwheho to finẹ to ojlẹ dopolọ mẹ. Enẹwutu, to paa mẹ, e nọ yọ́n hugan ma nado zẹ̀ dogbó aigba-denamẹ agun lọ tọn go to whenue mí to mahẹ tindo to kunnudide gbangba tọn mẹ.
Eyin wẹnlatọ lẹ jlo na tindo mahẹ to kunnudide gbangba tọn mẹ to aigba-denamẹ agun he ma dẹn do yé de tọn ji, yé dona dọna nugopọntọ sinsẹ̀nzọn tọn yetọn. Enẹgodo, ewọ sọgan mọ nugopọntọ sinsẹ̀nzọn tọn agun enẹ tọn nado biọgbè whẹpo wẹnlatọ agun etọn tọn lẹ nido yì aigba-denamẹ enẹ ji. To awà he ji agun he ma nọ do ogbè dopolọ lẹ nọ dọyẹwheho to aigba-denamẹ dopolọ ji te lẹ, nugopọntọ sinsẹ̀nzọn tọn lẹ dona dọhodopọ nado dapana nuhe na hẹn homẹgble mẹhe tin to aigba-denamẹ lọ ji lẹ. Gbọn gbekọndopọ dagbe dali, onú lẹpo sọgan yin wiwà “dile e jẹ do podọ to titoji.”—1 Kọl. 14:40.