Mì Pà Jehovah “to Agun Mẹ”

OPLI Klistiani tọn lẹ yin awuwledainanu de sọn Jehovah dè nado hẹn omẹ etọn lẹ lodo to gbigbọ-liho. Eyin mí nọ yì opli lẹ to gbesisọmẹ, mí to pinpẹn nutọn dohia na awuwledainanu Jehovah tọn lẹ. Humọ, e nọ gọalọna mí “nado nọ jlahomẹdona [mẹmẹsunnu mítọn lẹ] to owanyi po azọ́n dagbe lẹ po mẹ,” ehe yin aliho titengbe de nado do owanyi hia na ode awetọ mítọn. (Heblu lẹ 10:24; Johanu 13:35) Ṣigba, nawẹ mí sọgan jlahomẹdona mẹmẹsunnu mítọn lẹ to opli lẹ ji gbọn?

Basi Ogbeyí Gbangba Tọn

Ahọlu Davidi wlan dogbọn edetiti dali dọmọ: “Yẹn na dọho oyín towe tọn hlan mẹmẹsunnu ṣie lẹ; to agun mẹ wẹ yẹn na pà we te. Hiẹ dè wẹ pipà ṣie sọn to agun daho mẹ.” “Yẹn na dopẹna we to agun daho mẹ: yẹn nasọ pà we to gbẹtọ susu mẹ.” “Yẹn ko dọyẹwheho dodo tọn to agun daho mẹ: doayi e go, yẹn ma na do onù ṣie abọẹ.”—Psalm 22:22, 25; 35:18; 40:9.

To azán apọsteli Paulu tọn gbè, eyin Klistiani lẹ plidopọ na sinsẹ̀n-bibasi, yé nọ basi ogbeyí yise yetọn tọn to Jehovah mẹ podọ dogbọn gigo etọn dali. Gbọnmọ dali yé nọ na tuli ode awetọ yetọn bo nọ jlahomẹdona ode awetọ yetọn to owanyi po azọ́n dagbe lẹ po mẹ. To azán mítọn lọsu gbè, yèdọ owhe kanweko susu lẹ to Davidi po Paulu po godo, mí “mọ dọ azán [Jehovah tọn] to sisẹpọ” nugbonugbo. (Heblu lẹ 10:24, 25) Titonu Satani tọn to mùmù jei vasudo etọn, bọ nuhahun lẹ fọ́n bo to susudeji. Mí ‘tindo nuhudo akọ́ndonanu tọn’ hú gbede pọ́n tọn. (Heblu lẹ 10:36) Mẹnu wẹ sọgan sọ na tuli mí nado doakọnna, eyin e mayin mẹmẹsunnu mítọn lẹ?

Dile e te do to hohowhenu, tito lẹ tin to egbehe ga na yisenọ lẹ dopodopo nido nọ basi ogbeyí yise yetọn tọn “to agun mẹ.” Dopo to dotẹnmẹ he hundote na mẹlẹpo mẹ wẹ gblọndo nina na kanbiọ he yin kinkanbiọ mẹplidopọ lẹ to opli agun tọn lẹ ji. Ma yí nukunpẹvi do pọ́n dagbe he ehe sọgan wà na mí gbede blo. Di apajlẹ, gblọndo he nọ do lehe mí sọgan dùto kavi dapana nuhahun lẹ gbọn hia lẹ nọ hẹn gbemima mẹmẹsunnu mítọn lẹ tọn lodo nado hodo nunọwhinnusẹ́n Biblu tọn lẹ. Gblọndo he nọ basi zẹẹmẹ wefọ Biblu heyin dide ṣigba bo ma yin hoyidọ sọn e mẹ lẹ tọn kavi he bẹ nudọnamẹ he yin mimọ to dodinnanu mẹdetiti tọn mẹ hẹn lẹ sọgan na tuli mẹdevo lẹ nado wleawuna aṣa nupinplọn tọn dagbe de.

Yinyọnẹn dọ míwlẹ po mẹdevo lẹ po na mọaleyi eyin mí na gblọndo to opli lẹ ji dona whàn Kunnudetọ Jehovah tọn lẹpo nado dùto winyan kavi awuwhiwhle nado dọho ji. Onú titengbe taun de wẹ e yin dọ mẹho agun tọn lẹ po devizọnwatọ lizọnyizọnwiwa tọn lẹ po ni nọ na gblọndo to opli lẹ ji, na yewlẹ wẹ dona ze apajlẹ dai to mahẹ tintindo to opli lẹ ji, po opli lẹ wiwá po mẹ. Ṣigba, eyin mẹde mọdọ nubiọtomẹsi Klistiani tọn ehe yin avùnnukundiọsọmẹnu de na emi, nawẹ e sọgan dùto e ji gbọn?

Ayinamẹ lẹ Nado Dùto E Ji

Flindọ e yin apadewhe sinsẹ̀n-bibasi mítọn tọn hlan Jehovah. Klistiani mẹmẹyọnnu de he nọ nọ̀ Allemagne basi zẹẹmẹ nukun he e nọ yido pọ́n gblọndo he e na lẹ tọn dọmọ: “Yé yin gblọndo ṣie titi na vivẹnudido Satani tọn nado glọnalina omẹ Jiwheyẹwhe tọn lẹ ma nado nọ basi ogbeyí yise yetọn tọn.” Mẹmẹsunnu he ṣẹṣẹ yí baptẹm to agun dopolọ mẹ de dọmọ: “Yẹn nọ hodẹ̀ whlasusu na nuhe dù gblọndo nina.”

Wleawu ganji. Eyin hiẹ ma wleawuna owe he na yin pinplọn jẹnukọn, e na vẹawu na we nado na gblọndo podọ gblọndo towe ma na jlọmẹdote sọmọ. Ayinamẹ lẹ yin nina gando gblọndo nina to opli agun tọn lẹ ji go to owe Mọaleyi sọn Wehọmẹ Lizọnyizọn Yẹwhehọluduta Tọn Mẹ, weda 70 mẹ.a

Hẹn ẹn zun yanwle nado nọ na e whè gbau gblọndo dopo to opli dopodopo ji. Ehe biọ dọ a dona wleawuna gblọndo susu lẹ, na lehe a ze alọ sù sọ, mọwẹ yọnbasi lọ na sù do dọ mẹmẹsunnu he to anadena opli lọ ni ylọ we. A tlẹ sọgan dọ kanbiọ he a ko wleawu nado na gblọndo etọn lẹ na ẹn jẹnukọn. Ehe yin alọgọnamẹnu taun na mẹyọyọ lẹ. To whenuena e yindọ e sọgan vẹawu na we nado ze alọ “to agun daho mẹ,” yinyọnẹn dọ hukan emitọn die podọ dọ mẹhe to anadena opli lọ na to alọ towe dín, na whàn we nado na gblọndo.

Na gblọndo to bẹjẹeji. Azọngban he vẹawu de ma nọ yin hinhẹn bọawu gbọn sisẹ ẹ do nukọn dali gba. Gblọndo nina to bẹjẹeji opli lọ tọn sọgan yin alọgọnu de. E na paṣa we nado mọ lehe e bọawu taun na we do nado na gblọndo whla awetọ kavi atọ̀ntọ to whenuena a ko dùto avùnnukundiọsọmẹ lọ ji to gblọndo towe tintan whenu.

Sinai do ofi dagbe. E nọ bọawu na mẹdelẹ nado na gblọndo eyin yé sinai do aisinnu nukọn tọn lẹ ji to Plitẹnhọ Ahọluduta tọn mẹ. Ayihafẹsẹnamẹnu susu ma nọ tin, podọ anademẹtọ lọ nọ yawu mọ alọ yetọn. Eyin hiẹ tẹn ehe pọ́n, flin nado zegbèdaga na mẹlẹpo nido sè, titengbe eyin agun lọ ma nọ zan miklo he nọ yin zizepé lẹ.

Nọ dotoai po sọwhiwhe po. Ehe na gọalọna we ma nado dọ nuhe mẹdevo de ko ṣẹṣẹ dọ. Humọ, gblọndo mẹdevo lẹ tọn sọgan hẹn we flin wefọ kavi nuagokun de he a sọgan yizan nado nọgodona linlẹn he ko yin didetọn lọ. To whedelẹnu, numimọ kleun de sọgan yin didọ nado hẹn nuagokun he ji yè to hodọdo lọ họnwun. Gblọndo mọnkọtọn lẹ nọ gọalọnamẹ taun.

Plọn nado nọ na gblọndo to hogbe towe titi lẹ mẹ. Gblọndo lọ hihia tlọlọ sọn owe lọ mẹ sọgan dohia dọ a ko mọ gblọndo he sọgbe lọ, podọ e sọgan yin aliho dagbe de nado plọn gblọndo nina. Ṣigba tintẹnpọn nado nọ na gblọndo to hogbe towe titi lẹ mẹ nọ dohia dọ a mọnukunnujẹ nuagokun lọ mẹ. E ma yin dandan nado nọ hia gblọndo lẹ tlọlọ sọn owe mítọn lẹ mẹ gba. Kunnudetọ Jehovah tọn lẹ ma nọ basi dọvọdọ nuhe owe yetọn lẹ dọ tọn poun gba.

Ma zẹ̀pá blo. Gblọndo he ma gando hosọ lọ go kavi he ma tindo kanṣiṣa hẹ nuagokun he yè to dogbapọnna lọ ma sọgbe gba. Ehe zẹẹmẹdo dọ gblọndo towe lẹ dona nọ sọgbe hẹ hosọ he yè to dogbapọnna. Enẹ na zọ́n bọ yé na hẹn hodọdopọ mẹjlọdote to gbigbọ-liho tọn he to yìyì alọnu do hosọ lọ ji họnwun dogọ.

Yanwle towe wẹ nado namẹ tuli. To whenuena e yindọ whẹwhinwhẹ́n tangan de na gblọndo nina wẹ nado na tuli mẹdevo lẹ, mí dona tẹnpọn nado dapana nuhe sọgan hẹnmẹ gbọjọ lẹ didọ. Humọ, ma basi zẹẹmẹ kitokito do hukan lọ ji sọmọ bọ mẹdevo lẹ ma na mọ nudevo dọ ba blo. Gblọndo gaa gblẹlẹ kavi he ma họnwun nọ hẹn zẹẹmẹ lọ dózin. Gblọndo kleun heyin nina to hogbe vude mẹ sọgan tindo kọdetọn dagbe hugan, podọ e na na tuli mẹyọyọ lẹ lọsu nado na gblọndo gli yetọn.

Azọngban Mẹhe to Anadena Opli lẹ Tọn

Na nuhe dù tuli ninamẹ, mẹhe to anadena opli lọ tindo azọngban daho de. E dona do ojlo nujọnu tọn hia to gblọndo he yin nina lẹpo mẹ gbọn todidoai po sọwhiwhe po dali podọ gbọn nukunji pinpọn yẹsẹ na mẹhe to gblọndo na lọ dali kakati nado hẹn alọnu ján to nudevo lẹ wiwà mẹ. Lehe e na ylan sọ eyin e ma dotoai ganji, bo gbọnmọ dali basi dọvọdọ nuhe ṣẹṣẹ yin didọ lọ tọn kavi vọ́ kanbiọ he gblọndo etọn ko yin didetọn lọ kanbiọ!

Nuhe nasọ hẹnmẹ gbọjọ devo wẹ yindọ anademẹtọ lọ ni nọ basi dọvọdọ gblọndo he ko yin nina lọ tọn to hogbe etọn titi mẹ, taidi dọ gblọndo he yin nina lọ ma ko pé nkọtọn. To alọ devo mẹ, tulinamẹnu de wẹ dọ gblọndo lẹ ni yidogọna hodọdopọ do nuagokun tangan de ji. ‘Nawẹ mí sọgan yí ehe zan to agun mítọn mẹ gbọn?’ kavi, ‘Wefọ tẹ to hukan lọ mẹ wẹ nọgodona nuhe ṣẹṣẹ yin didọ lọ?’ yin kanbiọ delẹ he sọgan yin yiyizan nado whànmẹ nado na gblọndo dagbe lẹ, he nọ dekọtọn do mahẹ tintindo dagbe mẹ.

Na nugbo tọn, mẹyọyọ lẹ kavi winyankutọ lẹ dona nọ yin pipà taun to whenuena yé na gblọndo de. Ehe sọgan yin bibasi to mì omẹ awe lẹ kẹdẹ ṣẹnṣẹn to opli lọ godo nado sọgan dapana winyandomẹ podọ nado na dotẹnmẹ anademẹtọ lọ nado na ayinamẹ lẹ to fie jẹ lẹ.

To hodọdopọ paa lẹ mẹ, mẹhe to ohó-whlẹndọ ma nọ na tuli hodọdopọ lọ nado zindonukọn gba. Mẹhe e to hodọna lẹ ma nọ mọdọ eyin dandan na yé nado dọho gba. Eyin yé tlẹ to todoaina ẹn, e ma nọ yin po ahun lẹpo po gba. Onú mọnkọtọn de sọgan jọ to whenuena anademẹtọ de to ohó-whlẹndọ gbọn zẹẹmẹ etọn titi yiyidogọ gbọzangbọzan dali. Ṣigba, gbọn kanbiọ mẹhẹnlẹnnupọn tọn lẹ yiyizan to whedelẹnu dali, mẹhe to anadena opli lọ sọgan whàn mẹplidopọ lẹ nado dọ linlẹn yetọn gando whẹho de go. Kanbiọ mọnkọtọn lẹ ma dona nọ yin yiyizan to whepoponu gba.

E mayin dandan dọ anademẹtọ lọ ni ylọ mẹhe zealọ jẹnukọn gba. Ehe sọgan hẹn mẹhe tindo nuhudo whenu vude tọn nado lẹnnupọn whẹpo do dọho lẹ gbọjọ. Gbọn gbàndindọn vude dali, e na na dotẹnmẹ mẹhe ma ko na gblọndo depope lẹ nado wàmọ. E nasọ nọ yí zinzin zan ma nado nọ yí alọ ovi pẹvi lẹ tọn nado na gblọndo na kanbiọ he zẹ̀ nugopipe nukunnumọjẹnumẹ yetọn tọn go lẹ.

Eyin gblọndo he ma sọgbe de yin nina lo? Anademẹtọ lọ ma dona dowinyan mẹhe na gblọndo lọ gba. Gblọndo he ma tlẹ sọgbe lẹ nọ saba bẹ nugbo delẹ hẹn. Anademẹtọ lọ sọgan yí zinzin do dè nuhe sọgbe to gblọndo lọ mẹ tọ́n matin winyandomẹ, gbọn kanbiọ lọ vivọ kanbiọ to aliho devo mẹ dali, kavi gbọn kanbiọ mẹhẹnlẹnnupọn tọn devo kinkanbiọ dali.

Nado na tuli mẹplidopọ lẹ nado na gblọndo, anademẹtọ lọ ma dona nọ kàn kanbiọ paa lẹ biọ, taidi, ‘Be mẹdevo de gbẹ́ tindo gblọndo de ya?’ Kinkanse dọ, ‘Mẹnu wẹ ma ko na gblọndo depope? Dotẹnmẹ hundote godo tọn die!’ sọgan yin linlẹn dagbe, ṣigba e na vẹawu dọ kanbiọ mọnkọtọn lẹ ni na tuli mẹde nado na gblọndo to gbangba. Mẹmẹsunnu lẹ ma dona nọ yin hinhẹn nado tindo numọtolanmẹ lọ dọ emilẹ ko huwhẹ̀ na yé ma yawu na gblọndo to nupinplọn lọ whenu gba. Kakatimọ, yé dona yin tulina nado má nuhe yé yọnẹn lẹ hẹ mẹdevo lẹ na ehe yin dohia owanyi tọn. To yidogọ mẹ, to whenuena anademẹtọ lọ ko ylọ mẹde nado na gblọndo, e na yọnhugan ma nado sọ ylọ yinkọ mẹdevo tọn bo dọ dọ, “To omẹ ehe godo, mí nasọ sè gblọndo Mẹmẹsunnu kavi Mẹmẹyọnnu enẹ tọn.” Anademẹtọ lọ dona dotoaina gblọndo omẹ tintan lọ tọn whẹ́ enẹgodo e na yọnẹn eyin nuhudo tin na gblọndo devo.

Gblọndo Nina Yin Lẹblanulọkẹyi De

Opli Klistiani tọn lẹ yìyì yin dandannu gbigbọmẹ tọn de; ṣigba gblọndo nina yin lẹblanulọkẹyi de. Jẹ obá he mẹ mí nọ tindo mahẹ to pipà nina Jehovah to aliho vonọtaun ehe mẹ “to agun mẹ” te, obá enẹ mẹ wẹ mí to hihodo apajlẹ Davidi tọn bosọ to ayinamẹ Paulu tọn ylọdọ nujọnu sọ. Mahẹ tintindo to opli lẹ ji nọ dohia dọ mí yiwanna mẹmẹsunnu mítọn lẹ podọ dọ mí yin apadewhe agun daho Jehovah tọn tọn. Fidevo tẹwẹ hiẹ nasọ jlo nado tin te dile hiẹ “mọ dọ azán lọ to sisẹpọ”?—Heblu lẹ 10:25.

[Nudọnamẹ Odò Tọn]

[Yẹdide to weda 20]

Todidoai po gblọndo nina po yin onú titengbe to opli Klistiani tọn lẹ ji

[Yẹdide to weda 21]

Anademẹtọ lọ nọ do ojlo nujọnu tọn hia to gblọndo lẹpo mẹ