Họntọnmẹninọ—Apá 1: Be N’Ko Wleawufo Nado Biọ Họntọn mẹ Ya?

To hosọ ehe mẹ

• Etẹwẹ họntọn mẹ bibiọ zẹẹmẹdo?

• Be a ko wleawufo nado biọ họntọn mẹ ya?

Etẹwẹ họntọn mẹ bibiọ zẹẹmẹdo?

Mẹdelẹ nọ pọ́n họntọn mẹ bibiọ hlan taidi pọninọ nado daihun poun. Amọ́ to hosọ ehe mẹ, “họntọn mẹ bibiọ” kavi họntọnmẹninọ dlẹnalọdo ojlẹ he sunnu de po yọnnu de po nọ yizan dopọ nado pọ́n eyin yé sọgbe hẹ yede bo gán wlealọ. Enẹwutu, họntọnmẹninọ nọ bẹ yanwle de hẹn. E ma yin aliho de poun nado duvivi ayidonugo he omẹ vijinu awetọnọ de gán na we tọn.

Dile ojlẹ to yìyì, họntọnmẹninọ dona dekọtọn do nudide dopo mẹ—vlavo nado wlealọ kavi doalọtena haṣinṣan lọ. Eyin a biọ họntọn mẹ hẹ mẹde, a dona yọnẹn dọ depope to awe lẹ mẹ ji ján e na fó do.

Nuagokun lọ die: Eyin a mọdọ a ko wleawufo nado biọ họntọn mẹ, e dohia dọ a ko wleawufo nado wlealọ niyẹn.

Be a ko wleawufo nado biọ họntọn mẹ ya?

Họntọnmẹninọ sọgan dekọtọn do alọwle mẹ, enẹwutu e na yọ́n dọ a ni lẹnnupọndo jijọ he a na zan to haṣinṣan họntọnmẹninọ tọn lọ mẹ lẹ ji. Di apajlẹ, lẹnnupọndo nuhe bọdego ehelẹ ji:

• Nuyiwa hẹ hagbẹ whẹndo tọn lẹ. Lehe a nọ yinuwa hẹ mẹjitọ po nọvi towe lẹ po do—titengbe eyin nulẹ ma to awubọ na we—nọ saba do lehe a na wá yinuwa hẹ alọwlemẹ towe do hia.

  Ayinamẹ Biblu tọn: “Mì gbọ adi sinsinyẹn, homẹgble, adánjijẹ, awhá po mẹzunzun wunmẹ lẹpo po ni dẹn do mì gọna nuylankan lẹpo.”—Efesunu lẹ 4:31.

  Kanse dewe dọ: ‘Be mẹjitọ ṣie lẹ po nọvi ṣie lẹ po gán yigbe dọ n’nọ yinuwa hẹ yé po sisi po ya? Eyin n’do gbemanọpọ hẹ ode to yé mẹ, be n’nọ penugo nado yí homẹfa do dọhodo whẹho lọ ji ya, kavi n’nọ gblehomẹ bo nọ dọjlẹ?’

  

• Nọ yí dewe zan na mẹdevo lẹ. Eyin a wlealọ, e na biọ dọ a ni nọ na ayidonugo nujlomẹ alọwlemẹ towe tọn lẹ bo nọ saba joawuna yé.

  Ayinamẹ Biblu tọn: “Mì gbọ mẹdopodopo ni nọ dín, e ma yin ale edetiti tọn gba, ṣigba dehe yin mẹdevo tọn.”—1 Kọlintinu lẹ 10:24.

  Kanse dewe dọ: ‘Be n’nọ tẹkudeji dọ nulẹ ni yì do lee n’jlo do wẹ ya? Be mẹdevo lẹ nọ doayi e go dọ n’nọ yinuwa po lẹnpọn dagbe po ya? Aliho tẹlẹ mẹ wẹ n’ko dohia te dọ nuhudo mẹdevo lẹ tọn nọ duahunmẹna mi hú ṣie titi?’

• Whiwhẹ. Alọwlemẹ dagbe de nọ yigbe nuṣiwa etọn lẹ tọn bosọ nọ vẹvẹ po ahundopo po.

  Ayinamẹ Biblu tọn: “Mímẹpo wẹ nọ ṣinuwa whlasusu.”—Jakọbu 3:2.

  Kanse dewe dọ: ‘Be n’nọ yawu yigbe nuṣiwa ṣie lẹ tọn kavi nọ dín whẹjijọ wẹ ya?’ Be n’nọ gblehomẹ sinsinyẹn to whenue mẹdevo lẹ dọ̀n ayidonugo ṣie wá awugbopo ṣie de ji wẹ ya?

• Akuẹzinzan. Mẹhe nọ yọ́n akuẹ zan ganji na dapana dopo to nuhe nọ hẹn whẹgbè wá to alọwle mẹ hugan lẹ mẹ.

  Ayinamẹ Biblu tọn: “Mẹnu to mì mẹ wẹ na jlo nado gbá atọ̀họ̀ de he ma na sinai bo lẹn akuẹ etọn whẹ́ nado pọ́n eyin e tindo nuhe pé nado dotana ẹn?”‏—Luku 14:28.

  Kanse dewe dọ: ‘Be n’nọ pọ́n akuẹ do zan ya, kavi ahọ́ janwẹ nọ to okọ̀ na mi? Be aliho he mẹ n’nọ zan akuẹ te dohia dọ n’ko whèwhín ya?’

• Nuwiwa gbigbọmẹ tọn lẹ. Eyin a yin dopo to Kunnudetọ Jehovah tọn lẹ mẹ, a dona ze tito de dai nado nọ plọn Biblu to gbesisọ mẹ podọ nado nọ yì opli Klistiani tọn lẹ.

  Ayinamẹ Biblu tọn: “Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ.”—Matiu 5:3.

  Kanse dewe dọ: ‘Be n’nọ ze afọdide lẹ na dee nado lodo to gbigbọ-liho ya? Be n’nọ ylọ nuwiwa gbigbọmẹ tọn ṣie lẹ dọ nujọnu hugan ya, kavi n’nọ dike nudevo lẹ ni yitẹn to yé si?’

Nuagokun lọ die: Alọwlemẹ nugopetọ de wẹ e jẹ dọ a ni yin na mẹhe a na wlealọ hẹ. Eyin a to vivẹnudo nado yin alọwlemẹ mọnkọ de, e yọnbasi taun dọ onú towe ni jẹ mẹhe to vivẹnu dopolọ do de tọn ji.