JO LẸNPỌN DO
A Gán Wá Nọgbẹ̀ Matin Lẹnpọn
Nuyọnẹn he to Biblu mẹ gán gọalọna mí nado dapana lẹnpọn glanglan. Nugbo wẹ dọ mí ma gán de nuhe nọ hẹn lẹnpọn wá lẹpo sẹ̀. Amọ́, Mẹdatọ mítọn gán wàmọ. E tlẹ ko de mẹde nado gọalọna mí. Mẹlọ wẹ Jesu Klisti. To madẹnmẹ, e na wà nudagbe susu lẹdo aihọn pé hú lehe e wà do to whenue e to aigba ji. Di apajlẹ:
JESU NA HẸNAZỌ̀NGBỌNA MẸLẸ, DILE E KO WÀ DO WAYI.
‘Yé hẹn mẹhe azọ̀n voovo lẹ to tuklado lẹ wá e dè, bọ e hẹnazọ̀ngbọna yé.’—MATIU 4:24.
JESU NA HẸN DIUN DỌ MẸLẸPO TINDO OWHÉ PO NÚDÙDÙ PO.
“Yé [mẹhe ji Klisti na dugán do lẹ] na gbá ohọ̀ lẹ bo nasọ nọ nọ̀ yé mẹ, yé na do vẹngle lẹ bo nasọ nọ dù sinsẹ́n yetọn. Yé ma na gbá bọ mẹdevo na wá nọ e mẹ, mọ yé ma na do bọ mẹdevo na wá dù.”—ISAIA 65:21, 22.
GANDUDU JESU TỌN NA HẸN JIJỌHO WÁ LẸDO AIHỌN PÉ.
“To azán etọn lẹ gbè, dodonọ na vùn, bọ jijọho na sudeji kakajẹ whenue osun ma na tin ba. Mẹjidugando etọn lẹ na tin sọn ohù de kọ̀n jẹ devo kọ̀n podọ sọn Tọ̀sisa lọ kọ̀n jẹ opodo aigba tọn lẹ. . . . Kẹntọ etọn lẹ nasọ didọ́ kọ́gudu.”—SALMU LẸ 72:7-9.
JESU NA SUKÚNDONA MAWADODO.
“Ewọ na nọ wàlẹblanuna agbátọnọ po wamọnọ po, bo nasọ nọ whlẹn ogbẹ̀ wamọnọ lẹ tọn gán. E na nọ whlẹn yé sọn kọgbidinamẹ po danuwiwa po mẹ.”—SALMU LẸ 72:13, 14.
JESU NA TLẸ GBIDI OKÚ PO AWUFIẸSA PO SẸ̀.
“Okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.”—OSỌHIA 21:4.