Nuhahun lẹ Dididẹ to Whẹho Ajọwiwa Tọn lẹ Mẹ

Dile e yin kinkàndai to 1 Kọlintinu lẹ 6:1-8 mẹ do, apọsteli Paulu dọhodo whẹ̀yiylọ yisenọ hatọ lẹ ji. E vẹna ẹn dọ Klistiani delẹ to Kọlinti ma tlẹ whleawu nado “yì ofi owhẹda tọn to mawadodonọ [lẹ] nukọn.” (Wefọ 1) Paulu na whẹwhinwhẹ́n dolido lẹ he wutu Klistiani lẹ ma dona ylọwhẹ yede to whẹdatẹn aihọn tọn lẹ, kakatimọ yé dona nọ didẹ whẹho lẹ to agun lọ mẹ. Mì gbọ mí ni gbadopọnna delẹ to whẹwhinwhẹ́n he wutu ayinamẹ gbọdo ehe yin nina lẹ mẹ podọ to enẹgodo mí na dọhodo ninọmẹ kleun delẹ he mẹ anademẹ ehe ma dona yin hihodo dandan te ji.

Eyin mí tindo nuhahun ajọ́ tọn hẹ yisenọ hatọ de, tintan whẹ́, mí dona tẹnpọn nado didẹ whẹho lọ sọgbe hẹ anademẹ Jehovah tọn, e ma yin sọgbe hẹ linlẹn mítọn titi gba. (Howhinwhẹn lẹ 14:12) Dile Jesu dohia do, e na yọ́n hugan nado didẹ gbemanọpọ lẹ to niyaniya mẹ whẹpo e nido lẹzun onú daho. (Matiu 5:23-26) Ṣigba, e blawu dọ, Klistiani delẹ nọ dọnnu zẹjlẹgo, bo tlẹ nọ ze nuhahun lọ lẹ yì whẹdatẹn aihọn tọn lẹ. Paulu dọmọ: “Nugugu gbidigbidi de wẹ e yin to mì mẹ, dọ mì tindo owhẹylọ lẹ mẹde po mẹde po.” Etẹwutu? Whẹwhinwhẹ́n titengbe dopo wẹ yindọ afọdide mọnkọtọn sọgan hẹn oyín dagbe agun lọ tọn po Jiwheyẹwhe he sẹ̀n mí te tọn po gble. Enẹwutu, mí dona lẹnnupọndo kanbiọ Paulu tọn ehe ji dọmọ: “Etẹwutu mì ma nọ kuku gbọ yí guwhẹ̀?”—Wefọ 7.

Paulu sọ dọ dọ Jiwheyẹwhe ko wleawuna tito dagbedagbe de to agun lọ mẹ nado didẹ nuhahun susu. Mẹho agun tọn lẹ yin sunnu Klistiani he oyọnẹn nugbo Owe-wiwe tọn lẹ ko hẹn zun nuyọnẹntọ lẹ, podọ Paulu dọ dọ yé “tin sọgan nado dawhẹ to mẹmẹsunnu . . . lẹ ṣẹnṣẹn” na nuhe dù “onú he yin [aihọn] he tọn” lẹ. (Wefọ 3-5) Jesu dohia dọ nuhahun he bẹ nuṣiwa sinsinyẹn lẹ hẹn, taidi mẹhẹngble po mẹhodu po, dona yin dididẹ sọgbe hẹ afọdide voovo atọ̀n ehelẹ: tintan, mẹhe go whẹho lọ gando lẹ dona tẹnpọn nado didẹ etọn to yede ṣẹnṣẹn; awetọ, eyin afọdide tintan lọ ma wazọ́n, kunnudetọ dopo kavi awe dona yin hinhẹnwa; podọ atọ̀ntọ, eyin afọdide he jẹnukọn ma wazọ́n, whẹho lọ dona yin hinhẹnwa agun nukọn, ehe mẹho lẹ nọ ze afọ etọn dai.—Matiu 18:15-17.

Nugbo wẹ dọ mẹho Klistiani lẹ ma yin whẹ̀yidọtọ kavi ajọwatọ lẹ dandan gba podọ yé ma tlẹ dona yinuwa taidi omẹ mọnkọtọn de. Yé ma nọ ze nujinọtedo he dona yin hihodo nado didẹ nuhahun ajọwiwa tọn to mẹmẹsunnu lẹ ṣẹnṣẹn dai. Kakatimọ, yé nọ tẹnpọn nado gọalọna mẹhe go whẹho lọ gando lẹpo nado yí ayinamẹ Owe-wiwe tọn zan bo didẹ whẹho lọ to jijọho mẹ. To whẹho he doglẹ lẹ mẹ, yé sọgan kanhose nugopọntọ lẹdo tọn kavi wekantẹn alahọ Kunnudetọ Jehovah tọn lẹ tọn. Ṣigba, ayinamẹ Paulu tọn ma gando ninọmẹ lẹpo go dandan gba. Etẹwẹ yin delẹ to ninọmẹ he go e ma gando lẹ mẹ?

To whẹho delẹ mẹ, whẹ̀ylọmẹ sọgan yin afọdide sọgbe hẹ osẹ́n de poun to vivẹnudido mẹ nado wá gbèta jijọho tọn he ma yin ṣejannabi tọn de kọ̀n. Di dohia, owhẹ̀ nukọn yìyì sọgan yin aliho nuyiwa tọn dopo akàn he tin-to-aimẹ nado mọ onú delẹ yí taidi owe gbẹdai tọn, jlọjẹ lọ nado penukundo ovi de go, akuẹ he alọwlemẹ he yin jijodo dona nọ mọyi, ahọsumẹ alọgọ owùnu-jijọ tọn, yinyin hihia dogọ mẹhe na yin ahọsuna lẹ to whenuena ajọ́ de jai, po kandai gúmimá tọn hinhẹn zun nuhe yọ́n-na-yizan to osẹ́n-liho po. Whẹho delẹ sọ tin to ehe mẹ mẹmẹsunnu de sọgan mọdọ emi tin to dandannu glọ nado vọ́ owhẹ̀ ylọ nado sọgan basi hihọ́na ede.a

Eyin owhẹ̀ mọnkọtọn lẹ ma yin yiylọ po gbigbọ lọ po nado fọ́n zingidi dote, yé sọgan nọma jẹagọdo lẹndai ayinamẹ gbọdo Paulu tọn.b Etomọṣo, nuhe dona yin ahunmẹdunamẹnu tintan Klistiani de tọn wẹ klandowiwe oyín Jehovah tọn gọna jijọho po pọninọ agun lọ tọn po. Onú tintan he yè do nọ yọ́n hodotọ Klisti tọn lẹ gbọnvo wẹ owanyi yetọn, podọ “owanyi . . . ma nọ dín onú etọn titi.”—1 Kọlintinu lẹ 13:4, 5; Johanu 13:34, 35.