Dawe lọ He Diọ Aihọn

Gbẹtọ liva susu wẹ ko nọgbẹ̀ to aigba ji bo kú. Suhugan yetọn ko yin winwọn. Ṣigba, vude to yé mẹ ko yinuwado whenuho gbẹtọvi tọn ji—podọ vlavo do gbẹzan egbesọegbesọ tọn towe ji.

A FỌ́N to afọnnu bo to awuwle nado yì azọ́nmẹ. Dile a to núsọ, a tá miyọ́ngbán. A ze owe kavi linlinwe de nado hia ẹ to ahihun he a na dó mẹ. A flin bo nù amasin he doto towe kàn na we nado hù wánvú lẹ sọn lanmẹ. Nuyiwa towe gbenẹgbe tọn lẹ ṣẹṣẹ bẹjẹeji wẹ, ṣigba a ko mọaleyi sọn dodinnanu omẹ nukundeji delẹ tọn mẹ.

Michael Faraday Lẹnunnuyọnẹntọ Glẹnsinu he yin jiji to 1791 ehe wẹ wleawuna zomọ he nọ de miyọ́n lẹtliki tọn tọ́n. Dodinnanu etọn lẹ gọalọ nado hẹn miyọ́n lẹtliki tọn tin-to-aimẹ.

Ts’ai Lun Taidi ahọluzọnwatọ de to họ̀nmẹ Chine tọn, Ts’ai Lun wẹ nọ yin alọdlẹndo taidi mẹhe de aliho he mẹ wema nọ yin awuwlena te tọ́n to nudi owhe 105 W.M., ehe zọ́n bọ wema susu wá tin-to-aimẹ.

Johannes Gutenberg To nudi owhe 1450, dodinnanutọ Allemagne-nu ehe wleawuna maṣinu wezinzin tọn tintan he nọ tò wekun dopodopo dopọ. Maṣinu ehe hẹn ẹn yọnbasi nado zín owe jẹgbonu pọṣọnu, bọ enẹ zọ́n bọ e bọawu todin nado mọ nudọnamẹ yí do hosọ voovo ji lẹdo aihọn pé.

Alexander Fleming To 1928, dodinnanutọ Écosse-nu ehe de amasin de tọ́n he nọ hù wánvú lẹ, ehe e do yinkọ na dọ Pénicilline. To egbehe, amasin mọnkọtọn lẹ nọ yin yiyizan gbayipe nado hoavùn sọta wánvú he nọ doazọ̀nmẹ lẹ.

Matin ayihaawe, dodinnanu po nudetọn omẹ kleun delẹ tọn po ko hẹn ẹn yọnbasi na gbẹtọvi liva susu nado mọ ale delẹ yí kavi duvivi agbasalilo dagbe tọn.

Ṣigba, dawe de tin he tọ́nta hú mẹhe pò lẹpo. E ma yin yinyọnẹn na dodinnanu lẹnunnuyọnẹn kavi amasinzọnwiwa tọn de gba. Kakatimọ, dawe he wá sọn whẹndo wamọnọ tọn de mẹ bo kú to nudi owhe 2000 die wayi ehe jo owẹ̀n de dai—yèdọ owẹ̀n huhlọnnọ de he gọ́ na todido po homẹmiọnnamẹ po. Na obá he mẹ owẹ̀n etọn ko yinuwado gbẹzan gbẹtọ lẹ tọn ji jẹ lẹdo aihọn pé wutu, mẹsusu na kọngbedopọ dọ nugbonugbo ewọ wẹ dawe lọ he diọ aihọn.

Jesu Klisti wẹ dawe enẹ. Owẹ̀n tẹwẹ e lá? Podọ nawẹ owẹ̀n kavi nuplọnmẹ enẹ sọgan yinuwado gbẹzan towe ji gbọn?