Nọ Lẹnnupọndo Nuhe Jehovah Ko Wà Na We lẹ Ji
OJLẸ kleun de to fọnsọnku Jesu tọn godo, devi etọn awe to zọnlinzin sọn Jelusalẹm jei Emausi. Kandai Wẹndagbe Luku tọn dọmọ: “Dile yé to hodọ bo to nulẹnpọn dopọ, Jesu lọsu dọnsẹpọ bo jẹ zọnlinzin hẹ yé ji; ṣigba yé ma penugo nado yọ́n ewọ.” Enẹgodo, Jesu dọna yé dọmọ: “‘Whẹho tẹlẹ ji wẹ mì to nudọn do to mìdelẹ ṣẹnṣẹn dile mì to yìyì?’ Yé sọ nọte ṣúdúdú bọ nukunmẹ yetọn kúṣiọ.” Naegbọn nukunmẹ yetọn do kúṣiọ? Devi lẹ lẹndọ ojlẹ enẹ mẹ wẹ Jesu na de Islaeli sọn aṣẹpipa Kosi lẹ tọn glọ, ṣigba e ma wàmọ gba. Kakatimọ, Jesu yin hùhù. Enẹ wẹ zọ́n bọ yé do blawu.—Luku 24:15-21; Owalọ 1:6.
Jesu jẹ hoyijlẹdohogo hẹ devi etọn lẹ ji. “E bẹjẹeji sọn Mose po Yẹwhegán lẹ po ji bo detana onú he gando ewọ lọsu go lẹ to Owe-wiwe lẹpo mẹ na yé.” Na nugbo tọn, nujijọ ayidego tọn po dehe nọ hẹn yise lodo po susu wẹ jọ to lizọnyizọn Jesu tọn whenu! Dile devi lẹ to todoaina zẹẹmẹ Jesu tọn lẹ, awubla yetọn diọzun ayajẹ. To whèjai gbenẹgbe, yé dọ dọ: “Be ahun mítọn ma yin whinwhàn sinsinyẹn dile ewọ to hodọna mí to aliho ji, bo to zẹẹmẹ Owe-wiwe lẹ tọn basi na mí ya?” (Luku 24:27, 32) Etẹwẹ mí sọgan plọn sọn nuyiwa devi Jesu tọn lẹ tọn mẹ?
Nawẹ Opagbe He Ma Ko Mọ Hẹndi lẹ Nọ Yinuwado Mí Ji Gbọn?
Devi awe he jei Emausi lẹ blawu, na nuhe yé donukun lẹ ma mọ hẹndi wutu. Yé tindo numimọ nuhe Howhinwhẹn lẹ 13:12 dọ tọn dọmọ: “Todido susu hẹn ayiha jẹazọ̀n.” Mọdopolọ, delẹ to mí mẹ, he ko to Jehovah sẹ̀n po nugbonọ-yinyin po na owhe susu, lẹndọ “nukunbibia daho lọ” dona ko wayi. (Mat. 24:21; Osọ. 7:14) Abajọ to egbehe, opagbe enẹ he ma ko mọ hẹndi do nọ hẹn mẹdelẹ blawu.
Ṣigba, flindọ devi awe enẹlẹ gọ̀ ayajẹ yetọn mọ to whenue Jesu gọalọna yé nado ze ayidonugo yetọn do dọdai he ko mọ hẹndi lẹ ji—etlẹ yin dehe mọ hẹndi to gbẹwhenu yetọn lẹ. Mọdopolọ, mí sọgan hẹn ayajẹ ahun mẹ tọn mítọn go bo duto numọtolanmẹ flumẹjijẹ tọn lẹ ji. Mẹho agun tọn numimọnọ de he nọ yin Michael dọmọ: “Ma nọ ze ayidonugo do nuhe Jehovah ma ko wà lẹ ji blo. Kakatimọ, nọ lẹnnupọndo nuhe e ko wà lẹ ji.” Ayinamẹ dagbe nankọ die!
Nuhe Jehovah Ko Wà Lẹ
Mì gbọ mí ni gbadopọnna delẹ to onú ayidego tọn he Jehovah ko wà lẹ mẹ. Jesu dọmọ: “Ewọ he nọ do yise hia to yẹn mẹ, ewọ lọsu na wà azọ́n he yẹn wà lẹ; ewọ nasọ wà azọ́n he klohu ehelẹ.” (Joh. 14:12) To egbehe, devizọnwatọ Jiwheyẹwhe tọn lẹ to azọ́n he klo hugan to whenuho Klistiani lẹ tọn mẹ lẹ wà. Gbẹtọ livi ṣinawe linlán wẹ to nukọnpọnhlan nado lùn nukunbibia daho lọ tọ́n. Pọ́n bo: devizọnwatọ nugbonọ Jehovah tọn he sù sọmọ lẹ ma ko wà azọ́n po zohunhun po to otò susu mẹ sọmọ pọ́n gbede! Na nugbo tọn, Jehovah ko gọalọna devizọnwatọ etọn lẹ nado wà “azọ́n he klohu ehelẹ” dile Jesu dọ dọdai etọn do.
Onú devo tẹlẹ wẹ Jehovah wà na mí? E hùn dotẹnmẹ dotena ahunjijlọnọ lẹ nado tọ́n sọn aihọn ylankan ehe mẹ to yẹhiadonu-liho bo biọ paladisi gbigbọmẹ tọn he e wleawuna lọ mẹ. (2 Kọl. 12:1-4) Yiagbọji bo lẹnnupọndo delẹ to adà paladisi enẹ tọn he mí to vivi etọn dù lẹ mẹ ji. Di apajlẹ, pọ́n owe he tin to wesẹdotẹn towe mẹ lẹ kavi dehe tin to Plitẹnhọ Ahọluduta tọn mẹ lẹ. Yìn nukun pọ́n Index des publications Watch Tower mẹ, kavi pọ́n Watchtower Library to ọdinatẹẹ ji. Dotoaina nupinpọn-do-plọnnu Biblu tọn he yin yíyí-do-kanji de. Lẹnnupọndo hodidọ gọna wadohia he a pọ́n to plidopọ agbegbe agọe tọn de ji. Humọ, lẹnnupọndo gbẹdido dagbe he mí nọ duvivi etọn hẹ mẹmẹsunnu po mẹmẹyọnnu mítọn lẹ po ji. Lehe Jehovah gbọn alọtútlú dali wleawuna núdùdù gbigbọmẹ tọn susugege gọna mẹmẹsunnu owanyinọ lẹ tọn na mí do sọ—enẹ wẹ paladisi gbigbọmẹ tọn nujọnu tọn de!
Psalm-kantọ Davidi dọmọ: “OKLUNỌ E Jiwheyẹwhe ṣie, susu wẹ azọ́njiawu he hiẹ ko wà, po linlẹn towe po hlan míwlẹ dali.” (Ps. 40:5) Mọwẹ, eyin mí nọ lẹnnupọndo nujiawu susu he Jehovah ko wà na mí lẹ ji bosọ nọ lẹnnupọndo linlẹn owanyi tọn he ewọ tindo na mí lẹ ji, mí na vọ́ huhlọn mọyi nado doakọnnanu po nugbonọ-yinyin po to sinsẹ̀nzọn ahundopo tọn mítọn mẹ na Otọ́ mítọn olọn mẹ tọn, Jehovah.—Mat. 24:13.
[Yẹdide to weda 31]
Jesu gọalọna devi etọn lẹ nado lẹnnupọndo nuhe Jehovah ko wà na yé lẹ ji
[Yẹdide to weda 32]
Lẹnnupọndo hodidọ gọna wadohia he a pọ́n to plidopọ agbegbe agọe tọn de ji