Dọnsẹpọ Jiwheyẹwhe

Azọngban Mítọn Hlan Jiwheyẹwhe Hinhẹndi

BE HIẸ ko kanse dewe pọ́n dọ, ‘Etẹwẹ yin lẹndai ogbẹ̀ tọn’ ya? Jehovah dá mí po nugopipe lọ po e ma yin nado nọ kàn kanbiọ mọnkọtọn sè kẹdẹ, ṣigba po ojlo sinsinyẹn lọ po nado mọ gblọndo etọn ga. Mí dopẹ́ dọ Jiwheyẹwhe owanyinọ mítọn ma jo mí do zinvlu mẹ. Gblọndo kanbiọ enẹ tọn he mí nọ dín vẹkuvẹku tin to Ohó etọn, Biblu mẹ. Lẹnnupọndo hogbe Ahọlu Sọlomọni tọn he tin to Yẹwhehodọtọ 12:13 mẹ lẹ ji.

Sọlomọni tin to otẹn dagbe mẹ nado basi zẹẹmẹ gigọ́ do lehe yè sọgan tindo ayajẹ po pekọ po to gbẹ̀mẹ do ji. Na e yin didona po nuyọnẹn jiawu, adọkunnu susugege gọna aṣẹpipa ahọlu tọn po wutu, e penugo nado yí sọwhiwhe do dindona yanwle gbẹtọvi lẹ tọn, he bẹ afọdidona adọkunnu lẹ po yindidi po hẹn. (Yẹwhehodọtọ 2:4-9; 4:4) Enẹgodo, e basi bladopọ dodinnanu etọn lẹ tọn to gbọdo glọ dọmọ: “Gbọ mí ni sè opodo ohó lẹpo pete tọn: Dibusi Jiwheyẹwhe bosọ yìn osẹ́n etọn lẹ: na ehe wẹ azọ́n gbẹtọ lẹpo tọn pete.” Hogbe enẹlẹ zinnudo vivẹnudido gbẹtọvi tọn he doale bosọ yọ́n hugan lọ ji.

“Dibusi Jiwheyẹwhe.” Linlẹn lọ nado dibusi Jiwheyẹwhe sọgan nọma dọnmẹdogo to tintan whenu. Ṣigba, ninọmẹ ahun mẹ tọn dagbe de wẹ obu ehe yin. E sọgan yin yiyijlẹdo ojlo ovi de tọn nado hẹn homẹ otọ́ owanyinọ etọn tọn hùn go, e ma yin taidi afanumẹ de he to budi ma nado hẹn homẹgble ogán fifiẹtọ de. Owe alọdlẹndonu tọn de dọ dọ budisi Jiwheyẹwhe yin “nuyiwa osi sisosiso po obu po tọn he omẹ Etọn lẹ nọ dohia Ẹ, na yé yiwanna Ẹn bo nọ na sisi huhlọn po kiklo-yinyin Etọn po wutu.” Budisi enẹ nọ whàn mí nado yinuwa sọgbe hẹ ojlo Jiwheyẹwhe tọn, na mí yiwanna ẹn bosọ yọnẹn dọ ewọ lọsu yiwanna mí. Obu he sọgbe ehe ma yin numọtolanmẹ de poun gba; e nọ yin didohia gbọn azọ́n dali. Gbọnna?

“Yìn osẹ́n etọn lẹ.” Budisi Jiwheyẹwhe nọ whàn mí nado setonuna ẹn. E jẹ dọ mí ni setonuna Jehovah. Taidi Mẹdatọ mítọn, e yọ́n aliho dagbe hugan he mẹ mí dona zan gbẹzan mítọn te, kẹdẹdile mẹhe basi nuyizan de nọ yọ́n aliho he yọ́n hugan nado yí nulọ zan te. Humọ, dagbemẹninọ mítọn wẹ nọ duahunmẹna Jehovah. E jlo dọ mí ni yin ayajẹnọ, podọ osẹ́n etọn lẹ tin na dagbe mítọn. (Isaia 48:17) Apọsteli Johanu do enẹ hia dọmọ: “Ehe wẹ nuhe owanyi Jiwheyẹwhe tọn zẹẹmẹdo, dọ, mí ni yìn gbedide etọn lẹ; ṣogan gbedide etọn lẹ ma pẹnagbànmẹ.” (1 Johanu 5:3) Tonusise mítọn nọ dohia dọ mí yiwanna Jiwheyẹwhe, podọ gbedide etọn lẹ nọ do owanyi etọn na mí hia.

“Ehe wẹ azọ́n gbẹtọ lẹpo tọn pete.” Hogbe ehelẹ zinnudo onú titengbe he wutu mí dona dibusi Jiwheyẹwhe bo setonuna ẹn ji. Mọwiwà wẹ azọ́n kavi azọngban mítọn. Jehovah wẹ Mẹdatọ mítọn, yèdọ mẹhe na mí ogbẹ̀. (Psalm 36:9) Mí sọ dona setonuna ẹn. Eyin mí nọ zan gbẹzan he ewọ jlo, be mí to azọngban mítọn hẹndi niyẹn.

To whelọnu lo, etẹwẹ yin lẹndai ogbẹ̀ tọn? Do glido: Jiwheyẹwhe dá mí nado wà ojlo etọn. Aliho dagbe hugan devo de ma tin nado zan gbẹzan he gọ́ na zẹẹmẹ. Naegbọn hiẹ ma na dindona nususu dogọ gando ojlo Jehovah tọn po lehe hiẹ sọgan nọgbẹ̀ sọgbe hẹ ẹ do po go? Homẹ Kunnudetọ Jehovah tọn lẹ tọn na hùn nado gọalọna we.