Naegbọn Biblu Pinplọn Do Sọgbe?

BILL yin jọja, huhlọnnọ, he yì wehọmẹ, bosọ pé ede ji to akuẹzinzan-liho de. Ṣogan, e ma tindo pekọ gba. Gbẹzan etọn ma tindo lẹndai, podọ enẹ dotukla ẹ tlala. To vivẹnudido nado tindo gbẹzan lẹndainọ de mẹ, e tẹ́n sinsẹ̀n voovo lẹ pọ́n, ṣigba e ma mọ nuhe e to dindin gba. To 1991 e dukosọ hẹ Kunnudetọ Jehovah tọn dopo, he jo owe de he dọho do nuhe Biblu dọ gando zẹẹmẹ ogbẹ̀ tọn go dai na ẹn. Plọnmẹ Biblu de yin titobasina na Bill nido sọgan gbadopọnna hosọ ehe gọna devo lẹ.

Bill flin dọmọ: “Mí basi oplọn mítọn tintan, podọ na mí nọ dlẹnalọdo Biblu gbọzangbọzan wutu, yẹn yọnẹn dọ ehe wẹ yin nuhe yẹn ko to dindin. Gblọndo he tin to Biblu mẹ lẹ fọnjlodotenamẹ taun. To oplọn lọ godo, yẹn kùn mọto yì osó lẹ ji, jẹte sọn mọto lọ mẹ, bosọ dawhá po ayajẹ po. Homẹ ṣie hùn dọ to godo mẹ yẹn to gblọndo lẹ plọn na kanbiọ ṣie lẹ.”

Nugbo wẹ dọ, e mayin mẹhe mọ nugbo Biblu tọn lẹpo wẹ nọ dawhá na homẹhunhun to paa mẹ gba. Ṣogan, gblọndo mimọ na kanbiọ titengbe gbẹzan tọn lẹ nọ yin numimọ ayajẹnọ de na mẹsusu. Numọtolanmẹ yetọn nọ taidi enẹ heyin dawe de to oló Jesu tọn mẹ tọn he mọ adọkun whiwhla de to ogle de mẹ. Jesu dọmọ: “Na homẹhunhun etọn wutu e yì, bo sà nuhe e tindo lẹpo, bosọ họ̀ aigba lọ.”—Matiu 13:44.

Họ̀nhungàn Gbẹzan He Tindo Zẹẹmẹ de Tọn

Bill ko lẹnayihamẹpọn do kanbiọ titengbe de ji, heyin Etẹwẹ yin lẹndai ogbẹ̀ tọn? Tamẹnuplọnmẹtọ lẹ, sinsẹ̀n-nuplọnmẹtọ lẹ, po lẹnunnuyọnẹntọ lẹ po ko dovivẹnu vẹkuvẹku na owhe fọtọ́n susu lẹ nado dín gblọndo na kanbiọ enẹ. Owe susugege ko yin kinkàn gbọn omẹ voovo he to tintẹnpọn nado dín gblọndo na ẹn lẹ dali. Vivẹnudido yetọn ko yin to ovọ́ mẹ, podọ mẹsusu ko dotana dọ kanbiọ lọ ma sọgan mọ gblọndo gba. Ṣogan, gblọndo tin na ẹn. Dile etlẹ yindọ gblọndo lọ siso, e ma doglẹ gba. Biblu basi zẹẹmẹ etọn. Họ̀nhungàn lọ na gbẹzan ayajẹnọ, he tindo zẹẹmẹ wẹ ehe: Mí dona tindo haṣinṣan dagbe de hẹ Jehovah, Mẹdatọ po Otọ́ olọn mẹ tọn mítọn po. Nawẹ mí nọ wà enẹ gbọn?

Adà awe he taidi dọ yé sọta yedelẹ wẹ tin na nuhe dù dindọnsẹpọ Jiwheyẹwhe. Mẹhe wàmọ lẹ nọ dibusi i bosọ nọ yiwanna ẹn. Mì gbọ mí ni gbadopọnna wefọ awe he nọgodona hodidọ enẹ. To ojlẹ dindẹn die wayi, Ahọlu nuyọnẹntọ Sọlọmọni yí sọwhiwhe do dindona gbẹtọvi bosọ basi kandai nudinmọ etọn tọn to owe Biblu tọn heyin Yẹwhehodọtọ tọn mẹ. To ayidonugo etọn bibladopọ mẹ, e wlan dọmọ: “Gbọ mí ni sè opodo ohó lẹpo pete tọn: Dibusi Jiwheyẹwhe bosọ yìn osẹ́n etọn lẹ: na ehe wẹ azọ́n gbẹtọ lẹpo tọn pete.” (Yẹwhehodọtọ 12:​13, wekun flinflin lẹ yin mítọn) Owhe kanweko susu godo, to whenuena e yin kinkanse dọ gbedide tẹwẹ klo hugan to Osẹ́n heyin nina Mose lẹ mẹ, Jesu yigbe dọmọ: “Hiẹ na yí ahun towe lẹpo podọ alindọn towe lẹpo podọ ayiha towe lẹpo do yiwanna Jehovah Jiwheyẹwhe towe.” (Matiu 22:​37, NW ) Be e taidi nupaṣamẹ de na we wẹ dọ mí dona dibusi Jiwheyẹwhe bosọ yiwanna ẹn ya? Mì gbọ mí ni gbadopọnna nujọnu-yinyin obu po owanyi po tọn podọ lehe yé nọ wazọ́n dopọ nado de haṣinṣan pekọ tọn tintindo hẹ Jiwheyẹwhe tọ́n gbọn.

Nuhe Obu Jiwheyẹwhe Tọn Zẹẹmẹdo

Obu sisi tindonamẹ tọn yin dandannu eyin mí na basi sinsẹ̀n hlan Jiwheyẹwhe po alọkẹyi po. Biblu dọmọ: “Dodo nuyọnẹn tọn wẹ osi OKLUNỌ tọn.” (Psalm 111:10) Apọsteli Paulu wlan dọmọ: “Mì gbọ mí ni hẹn ojọmiọn go, ehe mẹ mí sọgan nọ basi sinsẹ̀n homẹhunnọ hlan Jiwheyẹwhe te [to obu po osi jijọ-di-Jiwheyẹwhe tọn po mẹ, NW ].” (Heblu lẹ 12:28) Mọdopolọ, angẹli he apọsteli Johanu mọ to olọn ṣẹnṣẹn to numimọ de mẹ bẹ wẹndagbe lilá etọn jẹeji po hogbe ehelẹ po dọmọ: “Mì dibusi Jiwheyẹwhe, bosọ na gigo e.”—Osọhia 14:​6, 7.

Obu Jiwheyẹwhe tọn ehe, heyin dandannu sọmọ na gbẹzan he tindo zẹẹmẹ de, mayin nudopolọ po obu oylan tọn po gba. Mí sọgan tindo obu oylan tọn eyin sẹ́nhẹngbatọ kanylantọ de dobuna mí. Ṣigba obu Jiwheyẹwhe tọn​​—kavi obu jijọ-di-Jiwheyẹwhe tọn​​—yin obu sisi sisosiso tọn de na Mẹdatọ. E sọ nọ bẹ obu he sọgbe ma nado hẹn Jiwheyẹwhe gblehomẹ tọn hẹn na ewọ wẹ yin Whẹdatọ Nupojipetọ po Ganhunupotọ po wutu, he tindo huhlọn po aṣẹpipa po nado sayana mẹhe vẹtoli lẹ.

Obu po Owanyi po Nọ Wazọ́n Dopọ

Etomọṣo, Jehovah ma jlo dọ gbẹtọ lẹ ni sẹ̀n ẹn poun na obu etọn wutu gba. Jehovah yin Jiwheyẹwhe he tindo owanyi vonọtaun. Apọsteli Johanu yin whinwhàn nado wlan dọmọ: “Jiwheyẹwhe wẹ owanyi.” (1 Johanu 4:8) Jehovah ko yinuwa hẹ gbẹtọvi to owanyi sisosiso mẹ, podọ e nọ jlo dọ gbẹtọ lẹ ni yinuwa hlan emi to owanyi mẹ. Nalete, nawẹ owanyi mọnkọtọn tindo kọndopọ hẹ obu jijọ-di-Jiwheyẹwhe tọn gbọn? Awe lọ lẹ tindo kọndopọ pẹkipẹki na taun tọn. Psalm-kàntọ wlan dọmọ: “Aṣli OKLUNỌ tọn tin to yé he dibusi i lẹ dè.”​​—Psalm 25:14.

Lẹnnupọndo numọtolanmẹ sisi po obu po tọn he ovi de nọ tindo na otọ́ huhlọnnọ po nuyọnẹntọ de po ji poun. To ojlẹ dopolọ mẹ, ovi mọnkọtọn de na yigbe hlan owanyi otọ́ lọ tọn. Ovi lọ na dejido otọ́ lọ go bo na nọ pọnhlan ewọ dè na anademẹ, po jidide lọ po dọ anademẹ etọn lẹ na hẹn ale wá. Mọdopolọ, eyin mí yiwanna bosọ dibusi Jehovah, mí na setonuna anademẹ etọn, podọ mí na mọaleyi sọn ehe mẹ. Doayi nuhe Jehovah dọ gando Islaelivi lẹ go dọmọ: “Ṣó dọ yé tindo ayiha mọnkọtọn de di ehe whepoponu, nado nọ dibusi mi, bo payi gbedide ṣie lẹpo go, na e nido yin dagbe to yé dè, podọ to ovi yetọn lẹ dè kakadoi!”​​—Deutelonomi 5:29.

Mọwẹ, obu jijọ-di-Jiwheyẹwhe tọn ma nọ dekọtọn do kanlinmọgbenu po awubla po mẹ gba, ṣigba do mẹdekannujẹ po ayajẹ po mẹ. Isaia dọ dọdai gando Jesu go dọmọ: “Ayajijẹ nasọ tin na ẹn to obu Jehovah tọn mẹ.” (Isaia 11:​3, NW ) Podọ psalm-kàntọ lọ wlan dọmọ: “[Ayajẹnọ] wẹ mẹhe dibusi OKLUNỌ, he tindo homẹhunhun daho to gbedide etọn lẹ mẹ.”​​—Psalm 112:1.

E họnwun dọ, mí ma sọgan dibusi Jiwheyẹwhe kavi yiwanna ẹn gba eyin mí ma yọ́n ewọ. Enẹwutu wẹ Biblu pinplọn do yin nujọnu taun. Oplọn mọnkọtọn nọ gọalọna mí nado mọnukunnujẹ gbẹtọ-yinyin Jiwheyẹwhe tọn mẹ bosọ yọ́n pinpẹn nuyọnẹn he tin to anademẹ etọn lẹ hihodo mẹ tọn. Dile mí dọnsẹpọ Jiwheyẹwhe, mí nọ jlo nado wà ojlo etọn podọ mí nọ yin whinwhàn nado setonuna gbedide etọn lẹ, to yinyọnẹn mẹ dọ mí na mọaleyi sọn yé mẹ.​​—1 Johanu 5:3.

Homẹhunnu de wẹ e nọ yin nado yọnẹn dọ yè tin to aliho he sọgbe lọ ji to gbẹ̀mẹ. Ehe yin nugbo na Bill, heyin nudego to bẹjẹeji. E dọ to agọe dọmọ: “To owhe ṣinẹnẹ he ko juwayi sọn Biblu pinplọn ṣie tintan whenu gbọ́n, haṣinṣan ṣie hẹ Jehovah ko whẹ́n deji. Ayajẹ tintan he yẹn tindo to bẹjẹeji ko dekọtọn do aliho gbẹzan ayajẹnọ de mẹ na nugbo tọn. Yẹn nọ tindo pọndohlan nujikudo gbesisọ tọn gando gbẹzan go. Azán ṣie lẹ nọ gọ́ po nuyiwa he tindo zẹẹmẹ lẹ po, e mayin gbẹdudu dindin he ma tindo lẹndai gba. Jehovah ko lẹzun omẹ nujọnu tọn de hlan mi, podọ yẹn sọ yọnẹn dọ e tindo ojlo nujọnu tọn to dagbemẹ-ninọ ṣie mẹ.”

To hosọ he bọdego mẹ, mí na gbadopọnna yinukọn dogọ lehe oyọnẹn Jehovah tọn nọ hẹn ayajẹ po alemọyi lẹ po wá na mẹhe yí ì zan to gbẹzan yetọn lẹ mẹ do.

[Blurb to weda 5]

DINDỌNSẸPỌ JIWHEYẸWHE ZẸẸMẸDO DỌ MÍ NI YIWANNA ẸN BOSỌ DIBUSI I

[Yẹdide to weda 6]

Jesu tindo ayajẹ to budisi Jehovah mẹ