Wleawuna Ahun Towe Nado Dibusi Jehovah
“Ṣó dọ yé tindo ayiha mọnkọ de di ehe whepoponu, nado nọ dibusi mi, bo payi gbedide ṣie lẹpo go.”—DEUTELONOMI 5:29.
1. Nawẹ mí sọgan deji dọ gbẹtọvi lẹ na duvivi mẹdekannujẹ sọn obu si to gbèdopo gbọn?
GBẸTỌVI ko tin to obu mẹ na owhe kanweko susu. Obu na huvẹ, awutu, sẹ́nhẹngba, kavi awhàn ko hẹn gbẹtọ lẹ gbọṣi magbọjẹ mẹ. Na whẹwhinwhẹ́n ehe wutu hodidọ bẹjẹeji tọn na Nulila Jlọjẹ Wẹkẹ mẹ Tọn na Gbẹtọvi lẹ do ojlo lọ hia nado hẹn aihọn de wá fie gbẹtọvi lẹpo na duvivi mẹdekannujẹ sọn obu si te .a Po homẹhunhun po, Jiwheyẹwhe lọsu hẹn mí deji dọ aihọn mọnkọtọn na wá—ṣigba e mayin gbọn vivẹnu gbẹtọ tọn dali gba. Gbọn yẹwhegán etọn Mika gblamẹ, Jehovah dopagbe na mí dọ to aihọn yọyọ dodowiwa tọn emitọn mẹ, ‘mẹdepope ma na hẹn omẹ emitọn lẹ savò.’—Mika 4:4.
2. (a) Nawẹ Owe-wiwe dotuhomẹna mí nado dibusi Jiwheyẹwhe gbọn? (b) Kanbiọ tẹlẹ wẹ sọgan fọndote to whenuena mí gbadopọnna azọngban mítọn nado dibusi Jiwheyẹwhe?
2 To alọ devo mẹ, obu sọgan sọ yin alemọyinu de. To Owe-wiwe mẹ, devizọnwatọ Jiwheyẹwhe tọn lẹ yin tudohomẹna pludopludo nado dibusi Jehovah. Mose dọna Islaelivi lẹ dọmọ: “Hiẹ na nọ dibusi OKLUNỌ lọ Jiwheyẹwhe towe; podọ ewọ wẹ hiẹ na nọ sẹ̀n.” (Deutelonomi 6:13) Owhe kanweko susu to godo mẹ Sọlọmọni wlan dọmọ: “Dibusi Jiwheyẹwhe [nugbo] bosọ yìn osẹ́n etọn lẹ: na ehe wẹ [azọngban] gbẹtọ lẹpo tọn pete.” (Yẹwhehodọtọ 12:13) Gbọn azọ́n kunnudide tọn mítọn he to yinyin wiwà to anademẹ angẹli lẹ tọn glọ dali, mí lọsu to tudohomẹna gbẹtọ lẹpo nado “dibusi Jiwheyẹwhe, bosọ na gigo e.” (Osọhia 14:6, 7) To yidogọmẹ na budisi Jehovah, Klistiani lẹ dona yiwanna ẹn po ahun yetọn lẹpo po. (Matiu 22:37, 38) Nawẹ mí sọgan yiwanna Jiwheyẹwhe podọ to ojlẹ dopolọ mẹ dibusi i gbọn? Naegbọn e do yin dandannu nado dibusi Jiwheyẹwhe owanyinọ de? Ale tẹlẹ wẹ mí nọ mọyi sọn awuwiwlena obu Jiwheyẹwhe tọn mẹ? Nado na gblọndo kanbiọ ehelẹ tọn, mí dona mọnukunnujẹ nuhe obu Jiwheyẹwhe tọn zẹẹmẹdo mẹ podọ lehe obu wunmẹ ehe yin adà tangan haṣinṣan mítọn hẹ Jehovah do.
Dobu, Jẹ na Gbégbò, bo Dona Yin Budisi
3. Etẹwẹ obu Jiwheyẹwhe tọn zẹẹmẹdo?
3 Obu Jiwheyẹwhe tọn yin numọtolanmẹ he Klistiani lẹ dona tindo hlan Mẹdatọ yetọn. Zẹẹmẹ obu ehe tọn dopo wẹ “gbégbò po osi sisosiso tintindo na Mẹdatọ lọ po gọna obu he sọgbe ma nado hẹn homẹgble e.” Gbọnmọ dali, obu Jiwheyẹwhe tọn yinuwado adà tangan awe gbẹzan mítọn tọn ji: nuyiwa mítọn dohlan Jiwheyẹwhe podọ nuyiwa mítọn dohlan walọyizan he e gbẹwanna lẹ. E họnwun dọ, adà awe lẹpo wẹ yin nujọnu bo jẹ na dogbapọnna sọwhiwhe tọn. Dile Vine’s Expository Dictionary of New Testament Words dọ do, obu gbégbigbò tọn ehe ‘yin mẹwhinwhàn anadenanu gbẹ̀mẹ tọn, to whẹho gbigbọmẹ po walọyizan tọn po mẹ’ na Klistiani lẹ.
4. Nawẹ mí sọgan wleawuna numọtolanmẹ obu po gbégbigbò tọn po na Mẹdatọ mítọn gbọn?
4 Nawẹ mí sọgan wleawuna numọtolanmẹ budisi po gbégbigbò tọn po na Mẹdatọ mítọn gbọn? Mí nọ jọsi to whenuena mí mọ lẹdo whanpẹnọ de, tọ̀sisa he sọn osó mẹ de, kavi họyiyi whanpẹnọ owhè tọn. Numọtolanmẹ ehe nọ siso deji to whenuena mí yí nukun yise tọn do pọ́n dọ yé yin alọnuzọ́n Jiwheyẹwhe tọn lẹ. Humọ, taidi Ahọlu Davidi, mí nọ doayi lehe mí whè sọ to yiyijlẹdo nudida dobunamẹ Jehovah tọn lẹ go. “Whenuena yẹn lẹn olọn towe lẹ pọ́n, azọ́n alọviyẹyẹ towe tọn lẹ, osun po sunwhlẹvu lẹ po he hiẹ ko zẹ̀ali dai na; etẹwẹ gbẹtọ, bọ hiẹ do to nuflin jẹ e go?” (Psalm 8:3, 4) Obu sisosiso ehe nọ dekọtọn do gbégbigbò mẹ, he nọ whàn mí nado dopẹ́ bo pà Jehovah na nuhe e nọ wà na mí lẹpo. Davidi sọ wlan dọmọ: “Yẹn na dopẹ́ hlan we; na awujiji po nujiawu po mẹ wẹ yè dá mi: Nujiawu wẹ azọ́n towe lẹ: Enẹ wẹ ayiha ṣie yọnẹn hezeheze.”—Psalm 139:14.
5. Etẹwutu mí dona dibusi Jehovah, podọ apajlẹ dagbe tẹwẹ mí tindo to whẹho ehe mẹ?
5 Numọtolanmẹ obu po gbégbigbò po tọn nọ wleawuna obu he sọgbe po sisi tintindo po na huhlọn Jiwheyẹwhe tọn taidi Mẹdatọ podọ gando aṣẹpipa etọn taidi Gandutọ jlọjẹnọ wẹkẹ lọ tọn go. To numimọ he apọsteli Johanu mọ de mẹ, “yé he gọ̀ to awhàngba mẹ sọn kanlin lọ dè, sọn boṣiọ etọn dè”—yèdọ hodotọ yiamisisadode Klisti tọn lẹ to nọtẹn olọn mẹ tọn yetọn mẹ—to lilá dọmọ: “Kiklo po nujiawu po wẹ azọ́n towe, OKLUNỌ E Jiwheyẹwhe Ganhunupo; dodo po nugbo po wẹ ali towe, [hiẹ Ahọlu madopodo]. Mẹnu wẹ ma na dibusi we, OKLUNỌ E, bo ma na pagigona oyín towe?” (Osọhia 15:2-4) Obu Jiwheyẹwhe tọn, he nọ wá sọn gbégbò sisosiso tintindo na gigo daho etọn mẹ, nọ hẹn ganduhẹmẹtọ Klisti tọn to Ahọluduta olọn mẹ tọn mẹ ehelẹ nado gbògbéna Jiwheyẹwhe taidi mẹhe tindo aṣẹpipa daho hugan lọ. To whenuena mí gbadopọnna nuhe Jehovah ko wadotana lẹpo gọna aliho dodowiwa tọn he mẹ e nọ deanana wẹkẹ lọ te, be mí ma tindo whẹwhinwhẹ́n susugege nado dibusi ewọ ya?—Psalm 2:11; Jẹlemia 10:7.
6. Naegbọn mí dona tindo obu he sọgbe ma nado hẹn homẹgblena Jehovah?
6 Ṣigba, to yidogọmẹ na obu po gbégbigbò po, budisi Jiwheyẹwhe dona bẹ síjijọ ma nado hẹn homẹgble kavi vẹtolina ẹn hẹn. Etẹwutu? Na dile etlẹ yindọ Jehovah ‘nọ whleawu nado sadi bosọ sù to dagbewanyi mẹ,’ mí dona flindọ ‘e ma na dike whẹgbledonọ to alọdepope mẹ ni yì majiya.’ (Eksọdusi 34:6, 7) Dile etlẹ yin owanyinọ po lẹblanunọ po, Jehovah ma nọ kẹalọyi mawadodo po ylanwiwa sọn ojlo mẹ wá po gba. (Psalm 5:4, 5; Habbakuk 1:13) Mẹhe nọ de sọn ojlo mẹ bo nọ gbọn lẹnvọjọ matindo dali wà nuhe ylan to nukun Jehovah tọn mẹ lẹ po mẹhe diọnukunsọ ewọ po lẹ ma sọgan nọ mayin yasana. Dile apọsteli Paulu dọ ẹ do, “onú dobu wẹ nado jai jẹ alọ Jiwheyẹwhe ogbẹ̀nọ tọn mẹ.” Obu he sọgbe ma nado jai jẹ ninọmẹ mọnkọtọn mẹ tintindo yin hihọ́ mlẹnmlẹn de na míwlẹ.—Heblu lẹ 10:31.
‘Mì Sẹbọdo E Dè’
7. Whẹwhinwhẹ́n tẹwẹ mí tindo nado dejido huhlọn mẹwhlẹngán Jehovah tọn go?
7 Obu gbégbigbòna Jiwheyẹwhe tọn po huhlọn dobu etọn po yinyọnẹn yin afọdide tintan nado tindo jidide po adọgbigbo po to Jehovah mẹ. Kẹdẹdile ovi pẹvi de nọ tindo numọtolanmẹ hihọ́ tọn to whenuena otọ́ etọn tin to yakẹ, mọwẹ mí nọ tindo numọtolanmẹ hihọ́ po jidide po tọn to alọ anademẹ Jehovah tọn glọ do. Doayi lehe Islaelivi lẹ yinuwa to whenuena Jehovah ko hẹn yé tọ́nsọn Egipti do go: “Islaeli sọ mọ azọ́n daho he OKLUNỌ wà to Egiptinu lẹ go, gbẹtọ ewlẹ sọ dibuna OKLUNỌ: yé sọ yise to OKLUNỌ mẹ.” (Eksọdusi 14:31) Numimọ Eliṣa tọn sọ zinnudo nugbo lọ ji dọ “angẹli OKLUNỌ tọn lẹdo yé he dibusi i lẹ pé, bosọ whlẹn yé.” (Psalm 34:7; 2 Ahọlu lẹ 6:15-17) Whenuho egbezangbe omẹ Jehovah tọn lẹ tọn podọ vlavo numimọ mẹdetiti tọn mítọn dohia dọ Jiwheyẹwhe nọ yí huhlọn etọn zan do ota mẹhe to sinsẹ̀n ẹn lẹ tọn mẹ. (2 Otannugbo lẹ 16:9) Gbọnmọ dali mí wá yọnẹn dọ “to osi OKLUNỌ tọn mẹ wẹ tudido he [lodo] te.”—Howhinwhẹn lẹ 14:26.
8. (a) Naegbọn obu Jiwheyẹwhe tọn nọ whàn mí nado zinzọnlin to aliho etọn lẹ ji? (b) Basi zẹẹmẹ lehe mí dona “sẹbọdo” Jehovah go do tọn.
8 E mayin dọ obu he sọgbe tintindo na Jiwheyẹwhe nọ wleawuna jidide po adọgbigbo po to ewọ mẹ kẹdẹ wẹ gba ṣigba e sọ nọ whàn mí nado zinzọnlin to aliho etọn lẹ ji. To whenuena Sọlọmọni hùn tẹmpli lọ, e hodẹ̀ hlan Jehovah dọmọ: “Na [Islaeli] nido dibusi we, nado nọ zinzọnlin to aliho towe lẹ mẹ, dẹ̀n sọ le yé tin to aigba lọ mẹ he hiẹ ko na hlan otọ́ mítọn lẹ.” (2 Otannugbo lẹ 6:31) Mose ko dotuhomẹna Islaelivi lẹ jẹnukọn dọmọ: “Mìwlẹ na nọ zinzọnlin hodo OKLUNỌ lọ Jiwheyẹwhe mìtọn, bo nọ dibusi i, bo nọ payi gbedide etọn lẹ go, bo setonuna ogbè etọn, mìwlẹ bo nasọ nọ sẹ̀n ẹn, bosọ nọ sẹbọdo e dè.” (Deutelonomi 13:4) Dile wefọ ehelẹ dohia do hezeheze, ojlo nado zinzọnlin to aliho Jehovah tọn lẹ mẹ bosọ “sẹbọdo e dè” nọ wá sọn jidide po adọgbigbo do Jiwheyẹwhe go po mẹ. Mọwẹ, budisi Jiwheyẹwhe nọ gọalọna mí nado setonuna Jehovah, bo sẹn ẹn, bosọ sẹbọdo e dè, kẹdẹdile ovi pẹvi de to paa mẹ sọgan tẹdo otọ́ etọn go mẹhe mẹ e nọ tindo jidide po adọgbigbo po te mlẹnmlẹn.—Psalm 63:8; Isaia 41:13.
Owanyi na Jiwheyẹwhe Zẹẹmẹdo Nado Dibusi I
9. Etẹwẹ yin kọndopọ he tin to owanyina Jiwheyẹwhe po budisi Jiwheyẹwhe po ṣẹnṣẹn?
9 Sọn pọndohlan Owe-wiwe tọn mẹ, budisi Jiwheyẹwhe ma glọnalinamẹ nado yiwanna ẹn to aliho depope mẹ gba. To vogbingbọnmẹ, Islaelivi lẹ yin didọna nado “dibusi OKLUNỌ . . . nado nọ zinzọnlin to ali etọn lẹpo mẹ, podọ nado nọ yiwanna ẹn.” (Deutelonomi 10:12) Enẹwutu, obu Jiwheyẹwhe tọn po wanyina Jiwheyẹwhe po tindo kanṣiṣa pẹkipẹki. Obu Jiwheyẹwhe tọn nọ whàn mí nado zinzọnlin to aliho etọn lẹ ji, podọ ehe nọ na kunnudenu dọ mí yiwanna ẹn. (1 Johanu 5:3) Ehe sọgbe hẹ lẹnpọn dagbe na to whenuena mí yiwanna mẹde, mí nọ gbọn gbesisọ dali dibu nado hẹn awugblena ẹn. Atẹṣiṣi Islaelivi lẹ tọn to zungbo mẹ gbleawuna Jehovah. Na jide tọn mí ma na jlo nado wà nuhe na hẹn awubla wá na Otọ́ olọn mẹ tọn mítọn. (Psalm 78:40, 41) To alọ devo mẹ, to whenuena e yindọ “OKLUNỌ tindo homẹhunhun do yé he dibusi i lẹ go,” tonusise po nugbonọ-yinyin mítọn po nọ hẹn ahun etọn jaya. (Psalm 147:11; Howhinwhẹn lẹ 27:11) Owanyina Jiwheyẹwhe nọ whàn mí nado hẹn homẹ etọn hùn, podọ budisi Jiwheyẹwhe nọ glọnalina mí ma nado hẹn homẹgblena ẹn. Yé yin jẹhẹnu he to kọndopọmẹ lẹ, yé ma sọta yede gba.
10. Nawẹ Jesu dohia dọ emi tindo awuvivi to budisi Jehovah mẹ gbọn?
10 Gbẹzan Jesu Klisti tọn dohia hezeheze lehe mí sọgan yiwanna bosọ dibusi Jiwheyẹwhe to ojlẹ dopolọ mẹ do. Gando Jesu go yẹwhegán Isaia wlan dọmọ: “Gbigbọ OKLUNỌ tọn na jẹ do e ji, gbigbọ wuntunnugo po zìnzìn po tọn, gbigbọ lẹnpọn po huhlọn po tọn, gbigbọ nuyọnẹn po osi OKLUNỌ tọn po tọn. Bo na yí i do basi [ayajẹ] to osi OKLUNỌ tọn mẹ.” (Isaia 11:2, 3) To gbesisọmẹ hẹ dọdai ehe, gbigbọ Jiwheyẹwhe tọn whàn Jesu nado dibusi Otọ́ olọn mẹ tọn etọn. Humọ, mí doayi e go dọ kakati obu ehe ni yin agbanpẹnmẹnu, e yin asisa pekọhẹnwanamẹ tọn de. Jesu tindo awuvivi to ojlo Jiwheyẹwhe tọn wiwà mẹ podọ to homẹ etọn hinhẹn hùn mẹ, etlẹ yin to ninọmẹ he sinyẹn tlala lẹ mẹ. To whenuena e jlo na yin hùhù to pòtin ji, e dọna Jehovah dọmọ: “E mayin le yẹn jlo do gba, adavo le hiẹ jlo do.” (Matiu 26:39) Na obu Jiwheyẹwhe tọn tintindo ehe wutu, Jehovah dotoai ganji na ovẹ̀ Visunnu etọn tọn, bo hẹn ẹn lodo, bosọ whlẹn ẹn sọn okú mẹ.—Heblu lẹ 5:7.
Pinplọn Nado Dibusi Jehovah
11, 12. (a) Naegbọn mí dona plọn nado dibusi Jiwheyẹwhe? (b) Nawẹ Jesu plọn mí nado dibusi Jehovah gbọn?
11 To mataidi síjijọ he nọ wá to jọwamọ-liho to whenuena mí doayi huhlọn po yẹyi nudida tọn po go, obu Jiwheyẹwhe tọn ma nọ wá na ede gba. Nuhe zọ́n niyẹn bọ Davidi Daho lọ, yèdọ Jesu Klisti, do basi oylọ na mí to dọdai-liho dọmọ: “Wá, mì yọpọ emi, na otó mi, yẹn na plọn osi OKLUNỌ tọn mì.” (Psalm 34:11) Nawẹ mí sọgan plọn sọn Jesu dè nado nọ dibusi Jehovah gbọn?
12 Jesu nọ plọn mí nado dibusi Jehovah gbọn alọgigọna mí nado mọnukunnujẹ jẹhẹnu jiawu Otọ́ olọn mẹ mítọn tọn mẹ. (Johanu 1:18) Apajlẹ Jesu lọsu titi tọn do lehe Jiwheyẹwhe nọ lẹnnupọn po lehe e nọ yinuwahẹ mẹdevo lẹ gbọn po hia, na Jesu do jẹhẹnu Otọ́ etọn tọn hia mlẹnmlẹn wutu. (Johanu 14:9, 10) Humọ, gbọn avọ́sinsan Jesu tọn gblamẹ, mí sọgan yì Jehovah dè to whenuena mí hodẹ̀ na jona ylando mítọn lẹ tọn. Lẹblanu vonọtaun he Jiwheyẹwhe dohia ehe yin mẹwhinwhàn huhlọnnọ de nado dibusi i. Psalm-kàntọ wlan dọmọ: “Ṣigba jona [nugbo] tin to dè we, bọ yè nado dibusi we.”—Psalm 130:4.
13. Afọdide tẹlẹ wẹ yin titodohukanji to owe Howhinwhẹn lẹ tọn mẹ he na gọalọna mí nado dibusi Jehovah?
13 Owe Howhinwhẹn tọn basi todohukanji afọdide debọdo-dego he na gọalọna mí nado wleawuna obu Jiwheyẹwhe tọn. “Ovi ṣie, eyin hiẹ na yí ohó ṣie lẹ, bosọ bẹ gbedide ṣie pli do de we. Sọmọ bọ hiẹ lẹ́ otó towe hlan nuyọnẹn go, bosọ jlẹ ayiha towe hlan ayitùnnugo. Nugbo eyin hiẹ to awhádo hodo nuyọnẹn, bosọ ze ogbè towe daga na ayitùnnugo; . . . Whenẹnu wẹ hiẹ na tunwun osi OKLUNỌ tọn, bo nasọ mọ oyọnẹn Jiwheyẹwhe tọn.” (Howhinwhẹn lẹ 2:1-5) Enẹwutu, nado dibusi Jiwheyẹwhe mí dona plọn Ohó etọn, bo dovivẹnu vẹkuvẹku nado mọnukunnujẹ nuplọnmẹ etọn mẹ, bosọ nọ na ayidonugo sọwhiwhe tọn ayinamẹ etọn lẹ.
14. Nawẹ mí sọgan hodo ayinamẹ heyin nina ahọlu Islaeli tọn lẹ gbọn?
14 Ahọlu Islaeli hohowhenu tọn lẹpo wẹ yin ayinamẹ na nado basi vọkan Osẹ́n lọ tọn bo nọ ‘hia ẹ to egbesọegbesọ to gbẹzan etọn lẹpo mẹ, na e nido penugo nado plọn nado nọ dibusi Jehovah Jiwheyẹwhe etọn nado sọgan setonuna ohó osẹ́n lọ tọn lẹpo.’ (Deutelonomi 17:18, 19) Biblu hihia po pinplọn ẹn po yin onú titengbe na mí eyin mí na plọn nado nọ dibusi Jehovah. Dile mí to nunọwhinnusẹ́n Biblu tọn lẹ yizan to gbẹzan mítọn mẹ, mí nọ tindo nuyọnẹn po oyọnẹn Jiwheyẹwhe tọn po vudevude. Mí nọ wá ‘mọnukunnujẹ obu Jehovah tọn mẹ’ na mí nọ mọ kọdetọn dagbe he e nọ detọ́n to gbẹzan mítọn mẹ wutu, bosọ nọ wlebòna haṣinṣan mítọn hẹ Jiwheyẹwhe. Humọ, gbọn pipli to gbesisọmẹ hẹ yisenọ hatọ lẹ dali, jọja po mẹhomẹ lẹ po sọgan dotoai hlan nuplọnmẹ Jiwheyẹwhe tọn lẹ, plọn nado dibusi Jiwheyẹwhe, bosọ zinzọnlin to aliho etọn lẹ ji.—Deutelonomi 31:12.
Ayajẹnọ Wẹ Mẹhe Nọ Dibusi Jehovah Lẹpo
15. Aliho tẹlẹ mẹ wẹ obu Jiwheyẹwhe tọn gando sinsẹ̀n-bibasi mítọn hlan ẹn go te?
15 Sọn nuhe mí ko dọ wayi lẹ mẹ, mí sọgan mọ dọ obu Jiwheyẹwhe tọn yin walọyizan dagbe de he mímẹpo dona wleawuna, na e yin adà tangan sinsẹ̀n-bibasi mítọn hlan Jehovah tọn wutu. E nọ deanana mí nado dejido ewọ go mlẹnmlẹn, nado zinzọnlin to aliho etọn lẹ ji, podọ nado sẹbọdo ewọ go. Dile eyin nugbo gando Jesu Klisti go do, obu Jiwheyẹwhe tọn sọgan sọ whàn mí nado hẹn opà klandowiwe mítọn tọn di todin podọ kakadoi.
16. Naegbọn Jehovah na mí tuli nado dibusi ewọ?
16 Budisi Jiwheyẹwhe ma zẹẹmẹdo numọtolanmẹ awubla kavi aliglọnnamẹ zẹjlẹgo tọn gba. “Donanọ wẹ mẹdepope he dibusi OKLUNỌ; he zinzọnlin to aliho etọn lẹ ji,” wẹ Biblu na mí jide dọ. (Psalm 128:1) Jehovah na tuli mí nado dibusi i na e yọnẹn dọ jẹhẹnu ehe na basi hihọ́na mí. Mí doayi mẹtọnhopọn owanyinọ etọn go to ohó etọn lẹ hlan Mose mẹ dọmọ: “Ṣó dọ yé [Islaelivi lẹ] tindo ayiha mọnkọ de di ehe whepoponu, nado nọ dibusi mi, bo payi gbedide ṣie lẹpo go, na e nido yin dagbe to yé dè, podọ to ovi yetọn lẹ dè kakadoi!”—Deutelonomi 5:29.
17. (a) Ale tẹlẹ wẹ mí nọ mọyi sọn budisi Jiwheyẹwhe mẹ? (b) Adà obu Jiwheyẹwhe tọn tẹlẹ wẹ na yin dogbapọnna to hosọ he na bọdego mẹ?
17 To aliho dopolọ mẹ, eyin mí wleawuna ahun mítọn nado nọ dibusi Jiwheyẹwhe, e na yin dagbe na mí. To aliho tẹlẹ mẹ? Tintan, walọyizan mọnkọtọn na hẹn homẹhun Jiwheyẹwhe bo nasọ dọ̀n mí sẹpọ ẹ. Davidi yọnẹn sọn numimọ mẹdetiti tọn mẹ dọ “e nasọ hẹn ojlo yé he dibusi i lẹ tọn ṣẹ: e na se awhá yetọn ga, bo nasọ whlẹn yé gán.” (Psalm 145:19) Awetọ, mí na mọ ale yí sọn obu Jiwheyẹwhe tọn mẹ na e na yinuwado walọyizan mítọn hlan nuhe ma sọgbe ji. (Howhinwhẹn lẹ 3:7) Hosọ he bọdego na gbadopọnna lehe obu ehe nọ basi hihọ́na mí sọn owù gbigbọmẹ tọn lẹ mẹ do, podọ e nasọ gbadopọnna apajlẹ Owe-wiwe tọn delẹ heyin sunnu he dibusi Jiwheyẹwhe bosọ dapana oylan lẹ tọn.
[Nudọnamẹ Odò Tọn]
a Pipli Daho Plidopọ Akọta lẹ tọn kẹalọyi Nulila Jlọjẹ Wẹkẹ mẹ Tọn na Gbẹtọvi to 10 décembre 1948.
Be Hiẹ Sọgan Na Gblọndo Ya?
• Etẹwẹ obu Jiwheyẹwhe tọn zẹẹmẹdo, podọ nawẹ e nọ yinuwado mí ji gbọn?
• Kanṣiṣa tẹwẹ tin to budisi Jiwheyẹwhe po zọnlinzinzin hẹ Jiwheyẹwhe po ṣẹnṣẹn?
• Nawẹ apajlẹ Jesu tọn dohia dọ budisi Jiwheyẹwhe gando owanyina Jiwheyẹwhe go gbọn?
• To aliho tẹlẹ mẹ wẹ mí sọgan wleawuna ahun mítọn nado dibusi Jehovah te?
[Yẹdide to weda 17]
Ahọlu Islaeli tọn lẹ yin gbedena nado basi vọkan mẹdetiti Osẹ́n lọ tọn bo nọ hia ẹ egbesọegbesọ
[Yẹdide to weda 18]
Budisi Jehovah nọ gọalọna mí nado dejido ewọ go dile visunnu de nọ dejido otọ́ etọn go do
[Asisa Yẹdide Tọn to weda 15]
Stars: Photo gbọn Malin dali, © IAC/RGO 1991