Yé Ze Yede Jo sọn Ojlo mẹ Wá—To Mexique

AYAJẸNU wẹ e yin nado mọdọ jọja Kunnudetọ he sọha yetọn fọ́n bo to jijideji lẹ nọ hẹn gbẹzan yetọn bọawu nado sọgan gbloada na lizọnyizọn yetọn. (Mat. 6:22) Diọdo tẹlẹ wẹ yé basi? Avùnnukundiọsọmẹnu tẹlẹ wẹ yé pehẹ? Nado mọnukunnujẹemẹ, mì gbọ mí ni pọ́n nuhe delẹ to mẹhe to sinsẹ̀n to alọnu din to Mexique lẹ mẹ dọ.

“MÍ DONA BASI VỌJLADO DELẸ”

Dustin po Jassa po wá sọn États-Unis bo wlealọ to janvier 2007. Ojlẹ vude to enẹgodo, yé penugo nado jẹ yanwle whenu dindẹn tọn yetọn de kọ̀n, enẹ wẹ nado họ̀ bato pẹvi de bo nọ e mẹ na owhe dopo blebu. Yé nọ sìn bato pẹvi yetọn do tọ̀tó to fihe sẹpọ tòdaho Astoria to Oregon, États-Unis, ehe ma dẹn do Ohù Pacifique, podọ pópló he gọ́ na zungbo lẹ po osó he ji osin agó ṣinyọ́n lẹ po wẹ lẹdo tòdaho whanpẹnọ ehe. Dustin dọmọ: “Filẹpo to lẹdo lọ mẹ wẹ yọnwhanpẹ.” Asu po asi po lọ lẹndọ emi ko to gbẹzan he bọawu de zan, bo nọ ganjẹ Jehovah go. Yé nọ lẹndọ ‘to popolẹpo mẹ, bato he dite sọ nudi mẹtlu ṣinatọ̀n de mẹ wẹ mí nọ nọ̀, nọ wazọ́n whenu gli tọn, nọ kọnawudopọ hẹ agun he nọ do jonọ-gbè de, bo nọ basi gbehosọnalitọ alọgọtọ tọn sọn ojẹ de mẹ jẹ devo mẹ.’ Ṣigba to ojlẹ de godo, yé wá mọdọ emide klọ wẹ emi te. Dustin dọmọ: “Kakati mí ni nọgodona agun lọ, diblayin whenu mítọn lẹpo wẹ mí nọ yizan nado jla bato pẹvi mítọn do. Mí yọnẹn dọ eyin mí na ze ojlo Jehovah tọn wiwà do otẹn tintan mẹ to gbẹzan mítọn mẹ nugbonugbo, mí dona basi vọjlado delẹ.”

Jassa yidogọ dọ: “Whẹpo n’do wlealọ, Mexique wẹ n’nọ dai, bo kọnawudopọ hẹ agun he nọ do Glẹnsigbe de. N’duvivi sinsẹ̀nzọn lọ tọn to finẹ, podọ n’to jejeji nado lẹkọyi.” Nado hẹn ojlo yetọn na sinsẹ̀nzọn tògodo tọn sinyẹn deji, Dustin po Jassa po jẹ otàn gbẹzan tọn mẹmẹsunnu po mẹmẹyọnnu po he sẹtẹn yì otò he mẹ ogle lẹ ko bia na gbingbẹ̀n te lẹ tọn hia ji to sinsẹ̀n-bibasi whẹndo tọn yetọn whenu. (Joh. 4:35) Dustin dọmọ: “Mílọsu jlo na tindo numimọ ayajẹ dopolọ tọn.” To whenue họntọn yetọn delẹ dọna yé dọ kándo de ṣẹṣẹ yin didoayi to Mexique bo tindo nuhudo, Dustin po Jassa po basi dide nado yì. Yé jo agbasazọ́n yetọn do bo sà bato pẹvi yetọn, bosọ sẹtẹn yì Mexique.

“ONÚ DAGBE HUGAN HE MÍ WÀ TO GBẸZAN MÍTỌN MẸ”

Dustin po Jassa po sawhé do tòpẹvi Tecomán tọn mẹ, fihe tin to kilomẹtlu 4 345 to hùwaji Astoria tọn, ṣigba bo ma dẹn do Ohù Pacifique. Dustin dọmọ: “To vogbingbọn mẹ na jẹhọn fifá po lẹdo whanpẹnọ Osó lẹ tọn po he tin to Astoria, yozò nọ sinyẹn taun tofi podọ okle-tin lẹ sù taun to lẹdo lọ mẹ.” To tintan whenu, yé ma penugo nado mọ agbasazọ́n de. Na akuẹ wá whè do yé wutu, yé gbọ bo nọ dù lẹsi po abọbọ po whla awe gbèdopo to osẹ lẹpo mẹ. Jassa dọmọ: “To whenue núdùdù enẹ ko dibla ṣì mí wẹ plọnmẹ Biblu mítọn lẹ jẹ nudevo lẹ na mí ji taidi manga, kokoe, agbẹ́pẹ po okle susu po.” Dile ojlẹ to yìyì, asu po asi po enẹ wá mọ agbasazọ́n de he nọ biọ dọ yé ni wazọ́n gbọn Intẹnẹt ji na wehọmẹ ogbè pinplọn tọn de he tin to Taïwan. Todin, akuẹ he yé nọ dù to agbasazọ́n enẹ mẹ nọ pé nado penukundo nuhudo egbesọ tọn yetọn lẹ go.

Etẹwẹ yin numọtolanmẹ Dustin po Jassa po tọn todin? Yé dọmọ “Tẹnsisẹ ehe wẹ yin onú dagbe hugan he mí wà to gbẹzan mítọn mẹ. Haṣinṣan he mí tindo hẹ Jehovah podọ to míde ṣẹnṣẹn tlẹ sinyẹn hugan nuhe mí donukun. Mí nọ wà nususu lẹ dopọ to azán lẹpo gbè—mí nọ yì kunnudegbe dopọ, mí nọ dọhodo lehe mí sọgan gọalọna plọnmẹ Biblu mítọn lẹ do ji bo nọ wleawuna opli lẹ dopọ. Humọ, mí vò sọn kọgbidinamẹnu he mí nọ pehẹ dai lẹ si.” Yé yidogọ dọmọ: “Todin mí wá mọnukunnujẹ nuhe mí ma yọnẹn dai de mẹ, enẹ wẹ nugbo-yinyin opagbe he tin to Psalm 34:8 mẹ tọn, ehe dọmọ, ‘Dọ ẹ pọ́n, bosọ mọdọ yinyọ́n wẹ OKLUNỌ.’”

ETẸWẸ WHÀN AZỌ́NWATỌ FỌTỌ́N SUSU LẸ NADO ZE YEDE JO SỌN OJLO MẸ WÁ?

Mẹmẹsunnu po mẹmẹyọnnu po he yin tlẹnnọ kavi alọwlemẹ he sọha yetọn hugan 2900, bọ susu yetọn tindo owhe 20 linlán kavi owhe 30 linlán wẹ sẹtẹn nado yì sẹ̀n to lẹdo Mexique tọn he mẹ nuhudo wẹnlatọ Ahọluduta lọ tọn sù te lẹ mẹ. Naegbọn Kunnudetọ ehe lẹpo do bẹ azọ́n he kàn dẹpẹ biọ ehe jẹeji? To whenue kanbiọ enẹ yin kinkanse delẹ to yé mẹ, yé na whẹwhinwhẹ́n titengbe atọ̀n. Etẹwẹ yin whẹwhinwhẹ́n ehelẹ?

Nado do owanyi he yé tindo na Jehovah podọ na kọmẹnu yetọn lẹ hia. Leticia yí baptẹm to whenue e tindo owhe 18. Mẹmẹyọnnu lọ dọmọ: “To whenue n’klan dee do wiwe na Jehovah, n’mọnukunnujẹemẹ dọ n’dona yí ahun ṣie lẹpo po alindọn ṣie lẹpo po do sẹ̀n ẹn. Enẹwutu, nado do owanyi ahun dopo tọn he n’tindo na Jehovah hia, n’jlo na yí suhugan whenu po huhlọn ṣie lẹ po tọn zan to sinsẹ̀nzọn lọ mẹ.” (Malku 12:30) Hermilo he wá wlealọ hẹ Leticia, sẹtẹn nado yì sẹ̀n to fihe nuhudo wẹnlatọ Ahọluduta lẹ tọn sù te to whenue e tindo owhe 20 linlán. E dọmọ: “N’doayi e go dọ aliho dagbe hugan he mẹ n’sọgan do owanyi he n’tindo na kọmẹnu ṣie lẹ hia te wẹ nado gọalọna yé nado hẹn pekọ wá na nuhudo gbigbọmẹ tọn yetọn lẹ.” (Malku 12:31) Enẹwutu, e tọ́n sọn tòdaho adọkunnọ Monterrey tọn mẹ, fihe e nọ wazọ́n to akuẹ sẹdotẹn de bo nọ zan gbẹzan vivomẹninọ tọn te, bo sẹtẹn yì tòpẹvi de mẹ.

Nado tindo ayajẹ nujọnu tọn he nọ dẹn-to-aimẹ. Ojlẹ vude to whenue Leticia yí baptẹm godo, e hodo mẹmẹyọnnu gbehosọnalitọ numimọnọ de yì tòpẹvi he to olá de mẹ, fihe yé dọyẹwheho te na osun dopo. Leticia dọmọ: “Awuji mi taun. Ayajẹ ṣie gọfla nado mọ lehe gbẹtọ lẹ kẹalọyi owẹ̀n Ahọluduta lọ tọn he mí lá na yé lọ do. To vivọnu osun enẹ tọn, n’dọna dee dọ, ‘Nuhe n’jlo na yí gbẹzan ṣie do wà lọ die.’” Mọdopolọ Essly, yèdọ mẹmẹyọnnu tlẹnnọ de he tindo owhe 20 linlán, yin whinwhàn nado biọ sinsẹ̀nzọn ehe mẹ, na e doayi ayajẹ he mẹhe to sinsẹ̀nzọn lọ mẹ lẹ nọ tindo go wutu. To whenue e gbẹ́ pò to wehọmẹ daho, e dukosọ hẹ Kunnudetọ zohunhunnọ susu he ko sẹ̀n to fihe nuhudo wẹnlatọ Ahọluduta lọ tọn sù te. E dọmọ: “Ayajẹ he mẹmẹsunnu po mẹmẹyọnnu enẹlẹ po nọ tindo to whepoponu wẹ hẹn mi tindo ojlo nado zan gbẹzan yetọn nkọ.” Mẹmẹyọnnu susu wẹ yinuwa taidi Essly. Na taun tọn, mẹmẹyọnnu tlẹnnọ hugan 680 wẹ to sinsẹ̀n to fihe nuhudo wẹnlatọ Ahọluduta lọ tọn sù te to Mexique. Apajlẹ dagbe nankọ die yé zedai na jọja po mẹho po!

Nado zan gbẹzan he tindo pekọ po lẹndai po. To whenue Essly dotana wehọmẹ daho, e mọ gbedewema yí nado yì plọnwe vọnu to wehọmẹ alavọ tọn. Hagbẹ etọn lẹ dotuhomẹna ẹn nado kẹalọyi nuzedonukọnnamẹ enẹ bo doafọna “gbẹzan he sọgbe,” enẹ wẹ nado tindo gbedewema de, agbasazọ́n po mọto po, podọ nado nọ tọ́nwhẹ̀n yì fidevo lẹ. Etomọṣo, e ma hodo ayinamẹ yetọn. Essly dọmọ: “Susu to họntọn ṣie Kunnudetọ lẹ mẹ wẹ doafọna onú mọnkọtọn lẹ, podọ n’mọdọ yanwle gbigbọmẹ tọn lẹ ma sọ tin to otẹn tintan mẹ na yé ba. N’sọ doayi e go dọ dile yé to afọdona yanwle aihọn ehe tọn lẹ sọ, mọ wẹ nuhahun he yé nọ pehẹ lẹ nọ sù do niyẹn podọ enẹ nọ wá hẹn yé jẹflumẹ. N’jlo na yí jọja-whenu ṣie zan nado sẹ̀n Jehovah to gigọ́ mẹ.”

Essly mọ azọ́nplọnmẹ de yí, ehe zọ́n bọ e mọ agbasazọ́n he gọalọna ẹn nado nọ penukundo ede go to akuẹzinzan-liho dile e to sinsẹ̀n taidi gbehosọnalitọ, podọ to enẹgodo e sẹtẹn yì lẹdo he mẹ yè tindo nuhudo wẹnlatọ Ahọluduta lọ tọn to niyaniya mẹ te. E tlẹ dovivẹnu nado plọn ogbè he akọ̀ Otomi po Tlapaneco po tọn nọ do lẹ. Todin he ewọ ko sẹ̀n to lẹdo voovo he to olá lẹ mẹ na owhe atọ̀n, e dọmọ: “Sinsẹ̀nzọnwiwa to fie nuhudo sù te zọ́n bọ n’tindo pekọ bọ gbẹzan ṣie tindo zẹẹmẹ dogọ. Hú popolẹpo, e hẹn haṣinṣan ṣie hẹ Jehovah lodo dogọ.” Phillip po Racquel po, yèdọ asu po asi po de he tindo owhe 30 linlán bo wá sọn États-Unis dọmọ: “Aihọn lọ to didiọ po awuyiya po sọmọ bọ mẹsusu nọ tindo numọtolanmẹ lọ dọ gbẹzan yetọn sọgan diọ to ajiji mẹ. Ṣigba, sinsẹ̀nzọnwiwa to fihe mẹsusu gbẹ́ nọ dotoaina owẹ̀n Biblu tọn te lẹ nọ hẹn gbẹzan mítọn tindo zẹẹmẹ. E nọ hẹn pekọ wá taun.”

LEHE YÉ PEHẸ AVÙNNUKUNDIỌSỌMẸNU LẸ DO

Mẹhe jlo na yì wà sinsẹ̀nzọn to fihe nuhudo wẹnlatọ Ahọluduta lọ tọn sù te na pehẹ avùnnukundiọsọmẹnu delẹ. Dopo wẹ lehe mẹlọ na penukundo ede go to akuẹzinzan-liho do. Nado wàmọ, hiẹ dona diọada sọgbe hẹ ninọmẹ lẹdo lọ tọn lẹ. Mẹmẹyọnnu Verónica he yin gbehosọnalitọ numimọnọ de dọmọ: “To dopo to fihe n’sẹ̀n te lẹ mẹ, n’nọ dà núdùdù sà. To fidevo, n’nọ sà avọ̀ bosọ nọ pada namẹ. To alọnu din, n’nọ penukundo wiwejininọ owhé de tọn go, bosọ nọ deanana klasi de he mẹ n’nọ plọn mẹjitọ he ṣẹṣẹ jivi tintan lẹ lehe yé na nọ dọhodopọ hẹ ovi yetọn lẹ do.”

Adàdidiọ sọgbe hẹ aṣa po aliho nuyiwa tọn voovo lẹ po sọgan yin avùnnukundiọsọmẹnu, titengbe eyin mẹde sẹtẹn yì lẹdo he tin to olá de mẹ bọ akọ̀ devo wẹ nọ nọ̀ finẹ. Nuhe Phillip po Racquel po pehẹ niyẹn to whenue yé yì sẹ̀n to lẹdo he mẹ Nahuatl-gbè nọ yin dido te. Phillip dọmọ: “Aṣa lọ gbọnvo na mítọn taun.” Etẹwẹ gọalọna yé nado diọada? “Mí ze ayiha mítọn do onú dagbe he Nahuatl-nù lẹ nọ wà ji—pọninọ he tin to whẹndo yetọn lẹ mẹ, nugbonọ-yinyin yetọn na ode awetọ po gbigbọ nunamẹ tọn yetọn po.” Racquel yidogọ dọ: “Mí plọn nususu sọn gbẹninọ to finẹ mẹ podọ sọn sinsẹ̀nzọnwiwa to pọmẹ hẹ mẹmẹsunnu po mẹmẹyọnnu mítọn he tin to lẹdo enẹ mẹ lẹ po dè.”

LEHE HIẸ SỌGAN WLEAWUNA DEWE DO

Eyin hiẹ jlo na yì sẹ̀n to fihe nuhudo tin te to lẹdo he to olá de mẹ, etẹwẹ hiẹ sọgan wà todin nado wleawuna dewe? Mẹmẹsunnu po mẹmẹyọnnu po he tindo numimọ to sinsẹ̀nzọn wunmẹ ehe mẹ lẹ dọmọ: “Whẹpo hiẹ nado sẹtẹn, dovivẹnu nado hẹn gbẹzan towe bọawu bosọ plọn nado nọ tindo pekọ.” (Flp. 4:11, 12) Nudevo tẹwẹ hiẹ sọgan wà? Mẹmẹyọnnu Leticia dọmọ: “N’dapana agbasazọ́n he na biọ to asi e nado gbọṣi fidopo na ojlẹ dindẹn. N’jlo nado nọ sẹtẹn to whedepopenu he nuhudo etọn tin.” Hermilo dọmọ: “N’plọn nado dà núdùdù, bo yàn avọ̀ bosọ nọ lì avọ̀.” Verónica dọmọ: “To whenue n’gbẹ́ pò topọ hẹ mẹjitọ ṣie lẹ po nọvi ṣie lẹ po, n’nọ gọalọ nado penukundo wiwejininọ onú lẹ tọn go bosọ plọn nado dà núdùdù hunsindagbe tọn he pọ̀kuẹ lẹ. N’sọ plọn nado nọ dowéna akuẹ.”

Levi po Amelia po he wá sọn États-Unis bo ko wlealọ sọn owhe ṣinatọ̀n die dọ lehe odẹ̀ gọalọna yé nado wleawu nado yì sẹ̀n to Mexique do. Levi dọmọ: “Mí lẹn akuẹ he mí na tindo nuhudo etọn nado sọgan sẹ̀n to otò devo mẹ na owhe dopo, bo biọ Jehovah to odẹ̀ mẹ dọ ni gọalọna mí nado wazọ́n bo mọ akuẹ enẹ pẹpẹ.” To osun delẹ godo, yé penugo nado pli akuẹ sọha he go yé donù to odẹ̀ yetọn mẹ lọ bo sẹtẹn madọngbàn. Levi yidogọ dọ: “Jehovah ko na gblọndo odẹ̀ vonọtaun he mí hò hlan ẹn tọn, enẹwutu mí dona yí adà mítọn wà.” Amelia yidogọ dọmọ: “Owhe dopo wẹ mí lẹndọ mí na zan, ṣigba mí ko nọfi na owhe ṣinawe todin, podọ mí ma to linlẹn nado lẹkọyi whé! Na mí sẹ̀n tofi wutu, mí tindo numimọ alọgọ Jehovah tọn. Egbesọegbesọ wẹ mí nọ mọ kunnudenu he do dagbewà etọn hia lẹ.”

Dẹ̀hiho sọ gọalọna Adam po Jennifer po taun, yèdọ asu po asi po de he wá sọn États-Unis bo to sinsẹ̀n to agun he nọ do Glẹnsigbe de mẹ to Mexique. Yé na ayinamẹ dọmọ: “Ma nọtepọn ojlẹ dagbe hugan lọ blo. Hodẹ̀ gando ojlo towe nado yì sẹ̀n to otò devo mẹ go, bo yinuwa sọgbe hẹ odẹ̀ towe lẹ. Hẹn gbẹzan towe bọawu, kanwehlan alahọ otò he mẹ a jlo na yì sẹ̀n te lọ tọn, podọ eyin a ko lẹnnupọndo nuhe e na bẹhẹn lẹ ji godo, masọ dọngbàn blo!”a Eyin a wàmọ, be gbẹzan ayajẹ tọn he gọ́ na dona gbigbọmẹ tọn wẹ to tepọn we.

[Nudọnamẹ odò tọn]