HOSỌ HE JẸNUKỌN | BE OKÚ WẸ OPODO ONÚ LẸPO TỌN YA?
Okú Ma Yin Opodo Onú Lẹpo Tọn!
Bẹtani yin gbétatò pẹvi de he tin to nudi kilomẹtlu atọ̀n do Jelusalẹm. (Johanu 11:18) Nujijọ awubla tọn de wá aimẹ to finẹ osẹ vude jẹnukọnna okú Jesu tọn. Lazalọsi, yèdọ dopo to họntọn vivẹ́ Jesu tọn lẹ mẹ bẹ azọ̀n sinsinyẹn de to ajiji mẹ bo kú.
To tintan whenu he Jesu sè owẹ̀n lọ, e dọna devi etọn lẹ dọ Lazalọsi damlọn podọ emi jei nado yì fọ́n ẹn. (Johanu 11:11) Ṣigba, devi Jesu tọn lẹ ma mọnukunnujẹ nuhe dọ e te mẹ ganji, enẹwutu Jesu hẹn ẹn họnwun na yé dọmọ: “Lazalọsi ko kú.”—Johanu 11:14.
Azán ẹnẹ to dìdì Lazalọsi tọn godo, Jesu yì Bẹtani nado yì miọnhomẹna Malta, yèdọ nọviyọnnu Lazalọsi tọn. Malta dọna Jesu dọmọ: “Eyin hiẹ ko tin tofi wẹ, nọvisunnu ṣie ma na ko kú.” (Johanu 11:17, 21) Jesu gblọn dọmọ: “Yẹn wẹ fọnsọnku po ogbẹ̀ po. Ewọ he do yise hia to yẹn mẹ, eyin ewọ tlẹ kú, e na gọwá ogbẹ̀.”—Johanu 11:25.
“Lazalọsi, tọ́njẹgbonu wá!”
Nado dohia dọ nuhe emi dọ lẹ ma yin nùmẹ-yozò de poun, Jesu yì yọdò lọ tó bo dawhá dọmọ: “Lazalọsi, tọ́njẹgbonu wá!” (Johanu 11:43) Podọ, awuji mẹhe to finẹ lẹ nado mọdọ dawe he ko kú lọ tọ́njẹgbonu.
Jẹnukọnna nujijọ enẹ, Jesu ko wà e whè gbau azọ́njiawu fọnsọnku tọn awe. To dopo to azọ́njiawu lọ lẹ whenu, Jesu fọ́n viyọnnu jọja de sọnku, yèdọ viyọnnu Jailu tọn. Ṣigba, whẹpo e do fọ́n ẹn sọnku, Jesu yí ninọmẹ etọn jlẹdo mẹhe to amlọndọ de go.—Luku 8:52.
Doayi e go dọ, gando okú Lazalọsi po viyọnnu Jailu tọn lọ po tọn go, Jesu yí okú jlẹdo “amlọn” go. Nuyijlẹdonugo he sọgbe de wẹ ehe. Etẹwutu? Amlọn yin ninọmẹ nude mayọnẹn tọn de, podọ mẹhe damlọn nọ gbọjẹ sọn awufiẹsa po yajiji po si. (Yẹwhehodọtọ 9:5; pọ́n apotin lọ, “Okú Taidi Amlọn Yìkànmẹ De.”) Devi tintan Jesu tọn lẹ tindo nukunnumọjẹnumẹ he họnwun gando ninọmẹ oṣiọ lẹ tọn go. Otànwe lọ Encyclopedia of Religion and Ethics dọmọ: “Na hodotọ Jesu tọn lẹ, amlọn wẹ okú yin, podọ yọdò yin gbọjẹtẹn de . . . na mẹhe kú to yise mẹ lẹ.”a
Homẹmiọnnamẹnu de wẹ e yin na mí nado yọnẹn dọ oṣiọ lẹ ma to yaji to yọdò mẹ gba, ṣigba dọ amlọndọ wẹ yé te. Enẹwutu, okú masọ yin nudabla de na mí, podọ e masọ dona nọ dobuna mí zẹjlẹgo.
“EYIN OMẸ DE KÚ, BE EWỌ NASỌ NỌGBẸ̀ BA?”
Mahopọnna dọ mí nọ duvivi amlọn tọn to zánmẹ, mẹnu wẹ na jlo nado damlọn bo ma fọ́n ba? Be todido tin dọ oṣiọ he to amlọndọ to yọdò mẹ lẹ na gọwá ogbẹ̀ dile e yindo na Lazalọsi po viyọnnu Jailu tọn po ya?
Tọgbo Job fọ́n kanbiọ mọnkọtọn dote to whenue e mọdọ emi jlo na kú. E kanse dọmọ: “Eyin omẹ de kú, be ewọ nasọ nọgbẹ̀ ba?”—Job 14:14.
To whenue Job to hodọna Jiwheyẹwhe Ganhunupotọ lọ, e na gblọndo na kanbiọ he ewọ lọsu fọ́n dote lọ dọmọ: “Hiẹ na ylọ yẹn nasọ siọ we: hiẹ do ko tindo ojlo de hlan azọ́n alọ towe lẹ tọn.” (Job 14:15) Job kudeji dọ Jehovah to jejeji na azán he gbè Ewọ na fọ́n devizọnwatọ nugbonọ Etọn lẹ sọnku te. Be odlọ de kú wẹ Job te poun ya? Paali.
Azọ́njiawu fọnsọnku tọn he Jesu basi lẹ yin kunnudenu he dohia hezeheze dọ Jiwheyẹwhe ko na huhlọn Jesu nado gbawhàn okú tọn. Na nugbo tọn, Biblu dọ dọ Jesu ko tindo “họnhungan okú tọn.” (Osọhia 1:18) Enẹwutu, Jesu na hùnhọ̀n yọdò lẹ tọn kẹdẹdile e degbe do dọ zannu he yè yí do sú yọdò Lazalọsi tọn lọ ni yin didesẹ.
Whlasusu wẹ Biblu donù opagbe fọnsọnku tọn ehe go. Angẹli de na jide yẹwhegán Daniẹli dọmọ: “Hiẹ na gbọjẹ, bosọ ṣite to tẹnmimọ towe mẹ, to opodo azán lẹ lọ tọn.” (Daniẹli 12:13) Jesu dọna Sadusi lẹ, yèdọ nukọntọ Juvi lẹ tọn he jẹagọdo opagbe fọnsọnku tọn lọ lẹ dọmọ: “Nuṣiwa wẹ mì te, na mì ma yọ́n Owe-wiwe lẹ kavi huhlọn Jiwheyẹwhe tọn.” (Matiu 22:23, 29) Apọsteli Paulu dọmọ: “Yẹn tindo todido to Jiwheyẹwhe mẹ . . . dọ fọnsọnku dodonọ lẹ po mawadodonọ lẹ tọn po de na tin.”—Owalọ lẹ 24:15.
WHETẸNU WẸ OṢIỌ LẸ NA FỌ́N?
Whetẹnu wẹ fọnsọnku dodonọ lẹ po mawadodonọ lẹ po tọn ehe na wá aimẹ? Angẹli lọ dọna Daniẹli dodonọ lọ dọ e na fọ́n “to opodo azán lẹ lọ tọn” gbè. Mọdopolọ, Malta lọsu yise dọ nọvisunnu emitọn Lazalọsi na “fọ́n to fọnsọnku whenu to azán godo tọn gbè.”—Johanu 11:24.
Biblu dohia dọ “azán godo tọn” enẹ tindo kanṣiṣa hẹ gandudu Ahọluduta Klisti tọn. Paulu wlan dọmọ: “Na ewọ [Klisti] dona dugán taidi ahọlu kakajẹ whenue Jiwheyẹwhe na ko hẹn kẹntọ lẹpo wá afọ etọn lẹ glọ. Taidi kẹntọ godo tọn, okú na yin hinhẹn zun ovọ́.” (1 Kọlintinu lẹ 15:25, 26) Whẹwhinwhẹ́n dagbe de wẹ ehe yin, he wutu mí dona nọ hodẹ̀ dọ Ahọluduta Jiwheyẹwhe tọn ni wá podọ na ojlo Jiwheyẹwhe tọn ni yin wiwà to aigba ji.b
Dile e họnwun na Job do, ojlo Jiwheyẹwhe tọn wẹ nado fọ́n oṣiọ lẹ sọnku. To whenue ojlẹ enẹ na sọ̀, okú na yin hinhẹn zun ovọ́. Podọ mẹdepope ma nasọ kanse ede gbede dọ, ‘Be okú wẹ opodo onú lẹpo tọn ya?’
a Hogbe dowhenu tọn he yin lilẹdo “tẹpamẹ” wá sọn hogbe Glẹki tọn de mẹ he zẹẹmẹdo “amlọndọtẹn.”
b Nado plọn nususu dogọ gando Ahọluduta Jiwheyẹwhe tọn go, pọ́n weta 8tọ owe Etẹwẹ Biblu Plọn Mí Taun? tọn, he Kunnudetọ Jehovah tọn lẹ zinjẹgbonu. E sọ tin-to-aimẹ to www.pr2711.com ji.