“Ze Linlinnamẹwe Hoho Kavi Alọnuwe Depope He Fọnjlodotenamẹ Donukọnnamẹ”

To osun he mẹ mí nọ ze owe lọ Biblu Plọn Mí donukọnnamẹ bo nọ bẹ oplọn jẹeji to dlapọn tintan whenu te lẹ, mí yin tulina nado nọ “ze linlinnamẹwe hoho kavi alọnuwe depope he fọnjlodotenamẹ donukọnnamẹ” eyin whétọ lọ ko tindo owe lọ bo ma kẹalọyi oplọn. Etẹwutu?

Alọnuwe lẹ po linlinnamẹwe hoho lẹ po nọ dọhodo hosọ voovo he wá do gànmẹ lẹ ji. Nuhe tin to dopo to owe enẹlẹ mẹ sọgan yinuwado whétọ de ji. Enẹwutu, to whenue hiẹ to owe lẹ bẹ do saki kunnudegbe tọn towe mẹ, nọ bẹ alọnuwe voovo lẹ po linlinnamẹwe hoho lẹ po do e mẹ ga. Eyin hiẹ ma tindo linlinnamẹwe hoho lẹ, hiẹ sọgan yì biọ to mẹhe nọ penukundo linlinnamẹwe lẹ go si. Gbọnmọ dali, eyin whétọ de ko tindo owe lọ Biblu Plọn Mí bo ma kẹalọyi plọnmẹ Biblu de, hiẹ sọgan do delẹ to linlinnamẹwe kavi alọnuwe he a tindo lọ lẹ mẹ hia ẹ bo biọ to e si nado yí dehe fọnjlodotena ẹn. Enẹgodo, basi tito nado lẹkọyi mẹlọ dè nado fọ́n ojlo etọn dote. Enẹ sọgan zọ́n bọ e na kẹalọyi plọnmẹ Biblu de to godo mẹ.