Apotin Kanbiọ Tọn

◼ Be mí sọgan hodẹ̀ eyin mí to anadena plọnmẹ Biblu de to ohọ̀n ji ya?

Ale susu wẹ tin to e mẹ nado hodẹ̀ to bẹjẹeji podọ to vivọnu plọnmẹ Biblu de tọn. Whenuena mí hodẹ̀, mí nọ biọ alọgọ gbigbọ wiwe Jehovah tọn do hodọdopọ mítọn ji. (Luku 11:13) Dẹ̀hiho sọ nọ dohia nuplọntọ mítọn dọ Biblu pinplọn lọ yin nujọnu, podọ e nọ plọn ẹn lehe ewọ lọsu na nọ hodẹ̀ do. (Luku 6:40) Enẹwutu, onú dagbe wẹ e yin nado jẹ dẹ̀ho ji hẹ nuplọntọ lọ dile e sọgan yawu yọnbasi do. Ṣigba, na ninọmẹ lẹ nọ gbọnvo wutu, wẹnlatọ lọ dona yí wuntuntun zan nado yọnẹn eyin e na hodẹ̀ to whenue e to anadena plọnmẹ Biblu de to ohọ̀n ji kavi lala.

Dopo to onú titengbe he ji e na lẹnnupọndo lẹ mẹ wẹ fie oplọn lọ nọ yin bibasi te. Eyin filọ ma jẹ gbangba gbau, odẹ̀ kleun de sọgan yin hihò to bẹjẹeji podọ to vivọnu oplọn he nọ yin bibasi to gbesisọ mẹ de tọn. Etomọṣo, eyin mọwiwà na dọ̀n ayidonugo gbẹtọ lẹ tọn kavi na zọ́n bọ nuplọntọ lọ ma na voawu, e na yọ́n hugan nado nọte kakajẹ whenue oplọn lọ sọgan yin bibasi to fie ma na dọ̀n ayidonugo sọmọ de. Mahopọnna fie oplọn lọ nọ yin bibasi te, mí dona yí wuntuntun zan nado yọ́n whenue mí na jẹ dẹ̀ho ji.—Pọ́n Lizọnyizọn Ahọluduta Tọn Mítọn mars 2005, weda 6.