“Aigba na nọ de sinsẹ́n etọn tọ́n; Jiwheyẹwhe, yèdọ Jiwheyẹwhe mítọn, na nọ dona mí.”—SALMU LẸ 67:6
Jiwheyẹwhe Na Dona We Kakadoi
Jiwheyẹwhe dopà na yẹwhegán Ablaham dọ dopo to kúnkan etọn lẹ mẹ na yin dona de na “akọta aigba ji tọn lẹpo.” (Jenẹsisi 22:18) Mẹnu wẹ yin mẹlọ?
To nudi owhe 2 000 die, Jiwheyẹwhe na huhlọn Jesu, he wá sọn kúnkan Ablaham tọn mẹ, bọ e wà azọ́njiawu susu. Azọ́njiawu lọ lẹ dohia dọ Jesu wẹ Jiwheyẹwhe na yizan nado dona akọta lẹ bo hẹn opà he e dona Ablaham lọ di.—Galatianu lẹ 3:14.
Mẹhe mọ azọ́njiawu Jesu tọn lẹ yọnẹn dọ ewọ wẹ Jiwheyẹwhe de nado dona gbẹtọvi lẹ, podọ azọ́njiawu lọ lẹ sọ yin kunnudenu dọ ewọ gblamẹ wẹ Jiwheyẹwhe na dona gbẹtọvi lẹ te kakadoi. Pọ́n nuhe azọ́njiawu lọ lẹ dohia gando Jesu go.
Mẹtọnhopọn—Jesu gbọazọ̀nna mẹhe to azọ̀njẹ lẹ.
To gbèdopo, pòtọnọ de vẹvẹna Jesu dọ ni gbọazọ̀nna emi. Jesu doalọ e go bo dọmọ: “Yẹn jlo!” Pòzọ̀n lọ busẹ to afọdopolọji.—Malku 1:40-42.
Nunamẹ—Jesu na núdùdù mẹhe huvẹ to hùhù lẹ.
Jesu ma jlo dọ mẹlẹ ni nọ huvẹ. To ninọmẹ delẹ mẹ, e wà azọ́njiawu bo hẹn whèvi po akla vude po sudeji nado na núdùdù gbẹtọ fọtọ́n susu. (Matiu 14:17-21; 15:32-38) To whenue yé dùnú fó, hogọ́ yemẹpo bọ núdùdù susu sọ pò.
Awuvẹmẹ—Jesu fọ́n oṣiọ lẹ.
“Lẹblanu whàn” Jesu bọ e fọ́n visunnu dopo gee nawe asuṣiọsi de tọn sọnku.—Luku 7:12-15.