Be a gán gọalọna mẹlẹ mahopọnna owhe, otò kavi sinsẹ̀n yetọn ya?
Jiwheyẹwhe Nọ Dona Mẹhe Nọ Gọalọnamẹ Lẹ
To aihọn-gbẹ̀ lọ mẹ, mẹsusu wẹ do hudo núdùdù po fie yé na dọ́ po tọn. Mẹdelẹ ko jẹflumẹ pete. Eyin mí nọ gọalọna omẹ enẹlẹ, be Jiwheyẹwhe na dona mí ya?
NUHE OWE-WIWE DỌ
“Mẹhe nọ do nukundagbe hia agbátọnọ to yinyan na Jehovah, Ewọ nasọ suahọ ẹ na nuhe e wà.”—HOWHINWHẸN LẸ 19:17.
LEHE MÍ NA GỌALỌNA MẸHE TO HUDO MẸ LẸ DO
Jesu na apajlẹ dawe de tọn he jaguda lẹ gbòalina bo hò bosọ jodo kúdaa-gbẹ̀daa. (Luku 10:29-37) Jonọ de gbọn ali lọ ji bo nọte nado gọalọna dawe lọ, mahopọnna dọ akọ̀ voovo mẹ wẹ yé wá sọn.
Gbọnvona dọ jonọ homẹdagbenọ lọ blá apà na dawe lọ, e sọ miọnhomẹna ẹn bo penukundo nuhudo etọn lẹ go.
Etẹwẹ apajlẹ ehe plọn mí? Jesu to pinplọn mí dọ mí dona nọ gọalọna mẹhe to hudo mẹ lẹ. (Howhinwhẹn lẹ 14:31) Owe-wiwe lẹ dohia dọ zande din, Jiwheyẹwhe na de ohẹ́n po yajiji po sẹ̀. Amọ́, mí gán kanse dọ whetẹnu wẹ e na wàmọ podọ nawẹ e na wà ẹ gbọn? Hosọ he bọdego na dọ nudagbe he Mẹdatọ owanyinọ mítọn jlo na wà na mí lẹ.