A Gán Do Ayajẹ Nujọnu Tọn

1. Etẹwẹ nọ yin yiylọdọ “nuhudo gbigbọmẹ tọn,” podọ nawẹ e tindo kanṣiṣa hẹ ayajẹ gbọn?

AYAJẸ nujọnu tọn ma yin numọtolanmẹ homẹhunhun tọn de poun he nọ wá bo nọ yì. E gán nọ aimẹ na gbẹzan mẹde tọn blebu. Gbọnna? Jesu basi zẹẹmẹ to Yẹwhehodidọ Osó ji tọn etọn mẹ dọ: “Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ.” (Mat. 5:3) Jesu yọnẹn dọ gbẹtọvi lẹ yin didá po ojlo vẹkuvẹku lọ po nado yọ́n Mẹdatọ yetọn Jehovah Jiwheyẹwhe, bosọ basi sinsẹ̀n hlan ẹn. Ojlo enẹ wẹ nọ yin yiylọdọ “nuhudo gbigbọmẹ tọn.” Na Jehovah yin “Jiwheyẹwhe ayajẹnọ lọ” wutu, mẹhe nọ sẹ̀n ẹn lẹ lọsu gán do ayajẹ.—1 Tim. 1:11.

2, 3. (a) Sọgbe hẹ nuhe Jesu dọ, mẹnu lẹ wẹ gán sọ do ayajẹ? (b) Etẹwẹ mí na gbadopọnna to hosọ ehe mẹ, podọ naegbọn ehe do yin nujọnu?

² Be dandan wẹ dọ nulẹpo ni to yìyì na mí linsinlinsin whẹpo mí nido do ayajẹ ya? Lala. To yẹwhehodidọ Jesu tọn mẹ, e dọ nude he paṣamẹ. E dọmọ: “Mẹhe to aluẹmẹ lẹ”—vlavo na ylando he yé wà lẹ to tuklado yé kavi na ayimajai he pehẹ yé te to gbẹzan yetọn mẹ lẹ wutu lẹ, gán do ayajẹ. Jesu dọ nudopolọ gando “mẹhe ko yin homẹkẹndo na dodowiwa wutu lẹ” kavi mẹhe to yinyin ‘vivlẹko’ na yé yin hodotọ Klisti tọn wutu lẹ go. (Mat. 5:4, 10, 11) Amọ́, nawẹ e gán yọnbasi gbọn nado do ayajẹ nujọnu tọn to ninọmẹ enẹlẹ mẹ?

³ Jesu plọn mí dọ ayajẹ tintindo ma sinai do ninọmẹ gbẹ̀mẹ tọn he pọnte de ji, amọ́ do pekọ hinhẹnwana nuhudo gbigbọmẹ tọn mítọn po haṣinṣan pẹkipẹki de tintindo hẹ Jiwheyẹwhe po ji. (Jak. 4:8) Nawẹ mí gán wàmọ gbọn? To hosọ ehe mẹ, mí na dọhodo afọdide titengbe atọ̀n delẹ ji he na zọ́n bọ mí na do ayajẹ nujọnu tọn.

NỌ DÙNÚ TO GBIGBỌ-LIHO

4. Etẹwẹ yin afọdide tintan lọ nado mọ ayajẹ nujọnu tọn? (Salmu lẹ 1:1-3)

⁴ AFỌDIDE 1: Mí dona nọ dùnú to gbigbọ-liho nado do ayajẹ nujọnu tọn. Gbẹtọvi lẹ po kanlin lẹ po wẹ do hudo núdùdù agbasa tọn nado nọgbẹ̀. Amọ́, gbẹtọvi lẹ kẹdẹ wẹ gán dùnú to gbigbọ-liho. Podọ, mí do hudo etọn. Abajọ Jesu dọ dọ: “Gbẹtọ ma nọ nọgbẹ̀ gbọn núdùdù kẹdẹ dali gba, ṣigba gbọn ohó he nọ tọ́n sọn onù Jehovah tọn mẹ lẹpo dali.” (Mat. 4:4) Enẹwutu, mí ma dona dike azán dopo ni juwayi bọ mí ma na hia Biblu, yèdọ Ohó họakuẹ Jiwheyẹwhe tọn. Salmu-kàntọ lọ dọmọ: ‘Ayajẹnọ wẹ mẹhe nọ mọ awuvivi to osẹ́n Jehovah tọn mẹ bo nọ hia ẹ to okle po ozán po.’—Hia Salmu lẹ 1:1-3.

5, 6. (a) Etẹlẹ wẹ mí gán plọn to Biblu mẹ? (b) Aliho tẹlẹ mẹ wẹ Biblu hihia gán gọalọna mí te?

⁵ Na Jehovah yiwanna mí wutu, e na mí nudọnamẹ titengbe lẹ to Biblu mẹ gando nuhe mí dona wà nado zan gbẹzan ayajẹnọ de go. Mí nọ plọnnu gando lẹndai etọn na gbẹzan mítọn go. Mí nọ plọn lehe mí gán dọnsẹpọ ẹ bo mọ jona ylando mítọn lẹ tọn yí do. Podọ mí nọ plọnnu gando todido jiawu he e dopà etọn na sọgodo go. (Jel. 29:11) Nugbo ehelẹ he mí nọ plọn to Biblu mẹ nọ hẹn ahun mítọn gọ́ na ayajẹ!

⁶ Dile mí yọnẹn do, Biblu sọ bẹ ayinamẹ he yọ́n-na-yizan na gbẹzan egbesọegbesọ tọn mítọn lẹ hẹn. Mí gán do ayajẹ eyin mí yí ayinamẹ enẹlẹ do yizan mẹ. Whedepopenu he a mọdọ nuhahun gbẹ̀mẹ tọn lẹ hẹn we gbọjọ, nọ yí whenu zan dogọ nado hia Ohó Jehovah tọn bosọ lẹnayihamẹpọn deji. Jesu dọmọ: “Ayajẹnọ wẹ mẹhe to ohó Jiwheyẹwhe tọn sè bo to yíyí i hẹn lẹ!”—Luku 11:28.

7. Nawẹ a gán mọaleyi to gigọ́ mẹ sọn ojlẹ he a nọ yizan nado hia Ohó Jiwheyẹwhe tọn mẹ gbọn?

⁷ Dile a to Ohó Jiwheyẹwhe tọn hia, nọ yí whenu nado duvivi nuhe hia a te tọn. Di apajlẹ, be a ko do numimọ ehe pọ́n an? Mẹde dà núdùdù he a nọ yiwanna taun de. Amọ́ vlavo na a to plaplaji kavi na a to nudevo lẹ lẹnpọn wutu, a ma yiagbọji do dù i ganji. To whenue a ko dù núdùdù lọ fó, a wá doayi lehe a nọ plaplaji do dù i do go, podọ e vẹna we dọ a ma whesọ bo duvivi etọn ganji. Todin, be e ko jọ pọ́n bọ a nọ plaplaji do hia Biblu sọmọ bo ma duvivi owẹ̀n he e bẹhẹn tọn ya? Nọ yí whenu nado mọaleyi sọn Ohó Jiwheyẹwhe tọn hihia mẹ; nọ yí nukun homẹ tọn do mọ nujijọ lọ lẹ, nọ sè nudidọ lẹ po ogbè lẹ po, bo nọ lẹnayihamẹpọn do nuhe a hia lẹ ji. Ehe lẹpo na yidogọna ayajẹ towe.

8. Nawẹ “afanumẹ nugbonọ podọ nuyọnẹntọ lọ” nọ hẹn azọngban etọn di gbọn? (Sọ pọ́n nudọnamẹ odò tọn.)

⁸ Jesu de “afanumẹ nugbonọ podọ nuyọnẹntọ lọ” nado wleawuna núdùdù gbigbọmẹ tọn to ojlẹ sisọ mẹ, podọ e nọ na mí núdùdù ganji to gbigbọ-liho.b (Mat. 24:45) Owe-wiwe gbọdo lẹ ji wẹ nuhe afanumẹ nugbonọ lọ nọ wleawu etọn lẹpo nọ sinai do. (1 Tẹs. 2:13) Taidi kọdetọn de, núdùdù gbigbọmẹ tọn ehelẹ nọ gọalọna mí nado yọ́n linlẹn Jehovah tọn he yin didehia to Biblu mẹ lẹ. Nuhe zọ́n niyẹn bọ mí nọ hia alọnuwe lọ lẹ Atọ̀họ̀-Nuhihọ́ lọ Tọn po Fọ́n! po gọna hosọ he to jw.org ji lẹ. Mí nọ wleawuna opli osẹ ṣẹnṣẹn po sẹfifo po tọn lẹ. Podọ, mí nọ pọ́n tito sunmẹsunmẹ tọn Televiziọn JW^® tọn dopodopo eyin e ko tin-to-aimẹ. Eyin mí hẹn ẹn diun dọ mí nọ hia Biblu bosọ nọ plọn ẹn, e na gọalọna mí nado ze afọdide awetọ lọ he nọ zọ́n bọ yè nọ do ayajẹ.

NỌ NỌGBẸ̀ SỌGBE HẸ NUJINỌTEDO JEHOVAH TỌN LẸ

9. Etẹwẹ yin afọdide awetọ nado do ayajẹ nujọnu tọn?

⁹ AFỌDIDE 2tọ: Mí dona nọ nọgbẹ̀ sọgbe hẹ nujinọtedo Jehovah tọn lẹ nado do ayajẹ nujọnu tọn. Salmu-kàntọ lọ dọmọ: “Ayajẹnọ wẹ mẹdepope he nọ dibusi Jehovah, yèdọ mẹhe nọ zinzọnlin to aliho Etọn lẹ ji.” (Salm. 128:1) Nado dibusi Jiwheyẹwhe zẹẹmẹdo nado nọ na ẹn sisi sọmọ bo nọ dapana nudepope he nọ hẹn homẹgble e. (Howh. 16:6) Nuhe zọ́n niyẹn bọ mí nọ to vivẹnudo zọnmii nado nọgbẹ̀ sọgbe hẹ nujinọtedo dagbe po oylan po tọn Jiwheyẹwhe tọn he to Biblu mẹ lẹ. (2 Kọl. 7:1) Mí na do ayajẹ eyin mí nọ wà nuhe Jehovah yiwanna lẹ bo nọ gbẹ́ nuhe e gbẹwanna lẹ dai.—Salm. 37:27; 97:10; Lom. 12:9.

10. Sọgbe hẹ Lomunu lẹ 12:2, azọngban tẹwẹ mí tindo?

¹⁰ Hia Lomunu lẹ 12:2. Mẹde gán yọnẹn dọ Jehovah tindo jlọjẹ nado magbe nuhe sọgbe po nuhe ylan po tọn, amọ́ mẹlọ sọ dona kẹalọyi nujinọtedo Jiwheyẹwhe tọn lẹ bosọ nọ hodo yé. Di apajlẹ, mẹde gán yọnẹn dọ aṣẹpatọ lẹ tindo jlọjẹ nado ze dogbó lẹ dai na wezun he húnkùntọ kavi kẹkẹ-kùntọ de na họ̀n. Amọ́, e gán nọma desọn ojlo mẹ nado kẹalọyi dogbó enẹlẹ bo setonuna yé. Taidi kọdetọn de, e nọ họ̀nwezun hugan lehe e dona wà do. Mí nọ dohia to walọyizan mítọn mẹ dọ mí kudeji nugbonugbo dọ nujinọtedo Jehovah tọn lẹ hihodo wẹ aliho gbẹninọ tọn he yọ́n hugan lọ. (Howh. 12:28) Numọtolanmẹ dopolọ wẹ Davidi tindo whenue e dọ gando Jehovah go dọmọ: “Hiẹ nọ hẹn ali ogbẹ̀ tọn zun yinyọnẹn na mi. Ayajẹ susugege wẹ tin to nukọn towe; homẹhunhun tin to adusilọ towe mẹ kakadoi.”—Salm. 16:11.

11, 12. (a) Whenue mí jẹflumẹ kavi gbọjọ, etẹ go wẹ mí dona payi? (b) Nawẹ nuhe to Filipinu lẹ 4:8 mẹ gán gọalọna mí whenue mí to ayidedai lẹ de gbọn?

¹¹ Whenue mí do nuhahun kavi gbọjọ, mí gán mọdọ mí dona wà nude he na zọ́n bọ mí na doalọtena nuhihà gando nuhahun mítọn lẹ go. Enẹ ma yin nupaṣamẹ de, amọ́ mí dona to aṣeji ma nado wà nude he Jehovah gbẹwanna.—Efe. 5:10-12, 15-17.

¹² To wekanhlanmẹ apọsteli Paulu tọn hlan Filipinu lẹ mẹ, e dotuhomẹna Klistiani lẹ nado nọ to nulẹnpọn do nudepope he yin “dodo, nudepope he yin wiwe, nudepope he jẹna owanyi, [gọna] nudepope he yin jijọ dagbe” ji. (Hia Filipinu lẹ 4:8.) Dile etlẹ yindọ Paulu ma to wekan na taun tọn gando ayidedai go, nuhe e kàn lẹ dona yọ́n-na-yizan to whẹho ayidedai he mí nọ de lẹ tọn mẹ. Tẹ́n ehe pọ́n: Fidepope he hogbe lọ “nudepope” sọawuhia to wefọ lọ mẹ te, yí hogbe lọ lẹ “ohàn,” “sinima,” “owe,” kavi “aihundida video ji tọn” do diọtẹnna ẹn. Mọwiwà sọgan gọalọna we nado yọ́n dehe sọgbe to nukun Jiwheyẹwhe tọn mẹ po dehe gán nọma sọgbe to nukun etọn mẹ lẹ po. Mí nọ jlo na nọgbẹ̀ to kọndopọ mẹ hẹ nujinọtedo yiaga Jehovah tọn lẹ. (Salm. 119:1-3) To whenẹnu, po ayihadawhẹnamẹnu wiwe de po, mí gán ze afọdide he bọdego nado do ayajẹ nujọnu tọn.—Owalọ 23:1.

NỌ ZE SINSẸ̀N-BIBASI JEHOVAH TỌN DO OTẸN TINTAN MẸ

13. Etẹwẹ yin afọdide atọ̀ntọ nado do ayajẹ nujọnu tọn? (Johanu 4:23, 24)

¹³ AFỌDIDE 3tọ: Nọ hẹn ẹn diun dọ sinsẹ̀n-bibasi Jehovah tọn tin to otẹn tintan mẹ to gbẹzan towe mẹ. Taidi Mẹdatọ mítọn, Jehovah jẹna sinsẹ̀n-bibasi mítọn mlẹnmlẹn. (Osọ. 4:11; 14:6, 7) Enẹwutu, nuhe dona yin nujọnu na mí hugan wẹ sinsẹ̀n-bibasi hlan Jehovah to aliho he ewọ kẹalọyi mẹ, enẹ wẹ “to gbigbọ mẹ podọ to nugbo mẹ.” (Hia Johanu 4:23, 24.) Mí nọ jlo dọ gbigbọ wiwe Jiwheyẹwhe tọn ni deanana sinsẹ̀n-bibasi mítọn, na e nido tin to kọndopọ mẹ hẹ nugbo he tin to Ohó etọn mẹ lẹ. Sinsẹ̀n-bibasi mítọn wẹ dona to otẹn tintan mẹ, eyin mí tlẹ nọ nọ̀ otò he mẹ azọ́n mítọn yin aliglọnna kavi yin alọhẹndotena te de. To alọnu, mẹmẹsunnu po mẹmẹyọnnu mítọn po 100 linlán wẹ yin súsú do gànmẹ, na yé yin Kunnudetọ Jehovah tọn poun wutu.c Etomọṣo, yé nọ yí homẹhunhun do wà nuhe go yé pé lẹpo nado hodẹ̀, plọnnu, bosọ dọhona mẹdevo lẹ gando Jiwheyẹwhe mítọn po Ahọluduta etọn po go. Whenue mẹlẹ vlẹ mí kò kavi dohomẹkẹn mí, mí gán do ayajẹ to yinyọnẹn mẹ dọ Jehovah tin hẹ mí, podọ dọ ewọ na suahọ mí.—Jak. 1:12; 1 Pita 4:14.

APAJLẸ JỌNUN DE

14. Etẹwẹ jọ do mẹmẹsunnu jọja de go to Tadjikistan, podọ etẹwutu?

¹⁴ Numimọ jọnun lẹ dohia dọ afọdide atọ̀n he mí ṣẹṣẹ gbadopọnna lẹ nọ zọ́n bọ mí na do ayajẹ nujọnu tọn mahopọnna ninọmẹ mítọn lẹ. Pọ́n nuhe jọ do Jovidon Bobojonov he do owhe 19 bo wá sọn Tadjikistan go, yèdọ mẹhe gbẹ́ nado biọ awhàn mẹ. To 4 octobre 2019, e yin wiwle gánnugánnu sọn owhé etọn gbè bo yin súsú do gànmẹ na osun lẹ, podọ e yin nuyiwa hẹ taidi sẹ́nhẹngbatọ de. Linlinnamẹnu otò susu tọn wẹ dọho gando mawadodo ehe go. Yé na linlin dọ e yin hihò bo yin kọgbidina nado whlé nado biọ awhàn mẹ podọ nado do awhànwu. Enẹgodo, whẹdatẹn de dọ dọ e hùwhẹ bọ e yin didohlan osla azọ́n sinsinyẹn wiwà tọn de mẹ kakajẹ whenue togán otò lọ tọn wá jona ẹn bo degbè dọ yè ni de e tọ́n. To ojlẹ enẹ lẹpo gblamẹ, Jovidon hẹn tenọgli po ayajẹ etọn po go. Gbọnna? E nọ yọnẹn to whepoponu dọ emi do nuhudo gbigbọmẹ tọn.

15. To whenue Jovidon to gànpamẹ, nawẹ e dùnú to gbigbọ-liho gbọn?

¹⁵ Whenue Jovidon to gànpamẹ, e nọ dùnú to gbigbọ-liho dile etlẹ yindọ e ma do Biblu kavi depope to owe mítọn lẹ mẹ. Nawẹ enẹ yọnbasi gbọn? Mẹmẹsunnu po mẹmẹyọnnu lẹdo lọ tọn lẹ po nọ hẹn núdùdù agbasa tọn wá na ẹn bo nọ kàn wefọ egbesọegbesọ tọn do saki he mẹ yé nọ whleahi do lọ lẹ go. Ehe zọ́n bọ e penugo bo nọ hia Biblu bosọ nọ lẹnayihamẹpọndeji to azán lẹpo ji. Whenue e tọ́n sọn gànpamẹ, ayinamẹ etọn na mẹhe ma ko pehẹ whlepọn sinsinyẹn lẹ die: “Nujọnu taun wẹ e yin dọ a ni nọ yí mẹdekannujẹ towe zan to gigọ́ mẹ nado hẹn oyọnẹn towe gando Jehovah go siso deji gbọn Ohó etọn po owe mítọn lẹ po hihia dali.”

16. Etẹ ji wẹ Jovidon ze ayiha etọn do?

¹⁶ Mẹmẹsunnu mítọn nọgbẹ̀ sọgbe hẹ nujinọtedo Jehovah tọn lẹ. Kakati nado to nulẹnpọn do ojlo he ma sọgbe lẹ ji, bo doalọ to walọyizan ylankan lẹ mẹ, e ze ayiha do Jehovah po nuhe Ewọ nọ yiwanna lẹ po ji. Whanpẹ nuhe Jiwheyẹwhe dá lẹ tọn nọ hẹn awuji Jovidon taun. Nudidọ po hàngbe ohẹ lẹ tọn po wẹ nọ fọ́n ẹn to afọnnu lẹpo. To zánmẹ, e nọ yí sọwhiwhe do pọ́n osun po sunwhlẹvu lẹ po. E dọmọ: “Nunina Jehovah tọn enẹlẹ nọ hẹn mi tindo numọtolanmẹ ayajẹ tọn, podọ yé nọ na mi tuli.” Eyin mí nọ yọ́n pinpẹn nuhe Jehovah wleawu etọn to gbigbọ-liho podọ to agbasa-liho lẹ tọn, mí nọ do ayajẹ, bọ ayajẹ enẹ gán yidogọna nugopipe mítọn nado doakọnnanu.

17. Nawẹ nuhe to 1 Pita 1:6, 7 mẹ lẹ gán yọ́n-na-yizan na mẹhe sọgan to ninọmẹ he taidi Jovidon tọn de mẹ gbọn?

¹⁷ Jovidon sọ ze sinsẹ̀n-bibasi Jehovah tọn do otẹn tintan mẹ. E yọnẹn dọ nujọnu wẹ e yin nado hẹn tenọgli etọn na Jiwheyẹwhe nugbo lọ go. Jesu dọmọ: “Jehovah Jiwheyẹwhe towe wẹ hiẹ dona nọ sẹ̀n, podọ ewọ kẹdẹ wẹ hiẹ dona nọ wà sinsẹ̀nzọn wiwe hlan.” (Luku 4:8) Awhàngán lẹ po awhànfuntọ lẹ po jlo dọ Jovidon ni doalọtena Jehovah sinsẹ̀n. Kakatimọ, e nọ hodẹ̀ vivẹvivẹ to azán lẹpo ji podọ to ozán lẹpo mẹ bo nọ biọ Jehovah dọ ni gọalọna emi ma nado jogbe bo mọ́n yise emitọn. Mahopọnna nuyiwahẹmẹ mawadodo tọn he Jovidon jiya etọn, e ma jogbe gbede. Taidi kọdetọn de, e gán jaya taun todin, na e tindo nude he e ma ko tindo dai whẹpo yè do wle e gánnugánnu, hò e, bosọ ze e do gànpamẹ—enẹ wẹ yise he yin whiwhlepọn de—Hia 1 Pita 1:6, 7.

18. Nawẹ mí gán hẹn ayajẹ mítọn go gbọn?

¹⁸ Jehovah yọ́n nuhe sin hudo mí do nado do ayajẹ nujọnu tọn. Eyin a hodo afọdide atọ̀n he nọ zọ́n bọ yè nọ do ayajẹ nujọnu tọn lẹ, a gán hẹn ayajẹ towe go mahopọnna whlepọn he kàn dẹpẹ biọ lẹ. To whenẹnu, hiẹ lọsu gán dọmọ: “Ayajẹnọ wẹ akọta lọ he Jiwheyẹwhe etọn yin Jehovah!”—Salm. 144:15.